प्रकाशितवाक्य 14:4 - सादरी नवाँ नियम

⁴ इ उमन हेकैं, जे जनानामन केर संगे अशुद्ध नी होलैं, मगर कुँवारा हेकैं: इ उमन हें हेकैं जे जहाँ कही मेमना जायला, उकर पिछे चलैना। इमन तो परमेश्‍वर आउर मेमना लगिन पहिला फार होवेक ले आदमीमन से कीन लेवल जाय हैं।

प्रकाशितवाक्य 14:4 Iomraidhean Croise

मत्ती 19:12

काले कि थोरेक आदमीमन आयो केर कोख से हें नपुंसक जनइम हैं आउर थोरेक आदमीमन के आदमीमन नपुंसक बनालैं। आउर थोरेक आदमीमन स्वरग राइज लगिन खुद के नपुंसक बनाय हैं, जे इ बचन के बुझेक पारेला, उ बुइझ लेवोक।”

मत्ती 25:1

यीशु आगे कहलक, “जब मोंय आदमी केर बेटा घूइर आमूँ, तब स्वरग केर राइज उ दस कुँवारीमन केर जइसन होवी, जेमन अपन-अपन दीया लेई के दूल्हा से भेंट करेक लगिन उकर बिहा में जाएक ले निकललैं।

मत्ती 8:19

आउर जइसनेहें उमन जाएक लगिन तेयार होवत रहैं, एगो मूसा केर नियम के सिखाएक वाला आदमी आय के उकर से कहलक, “हे गुरु, मोंय तोर चेला बनेक लगिन जहाँ-जहाँ तोंय जाबे, हूवाँ तोर पिछे-पिछे जामूँ।”

यूहन्ना 10:27

जइसन भेड़ीमन अपन असली चरवाहा केर आवाज के चिन्हैना, तइसनेहें मोर आदमीमन मोर गोइठमन उपरे धेयान देवैना। मोंय उमन के जानोना आउर उमन मोर चेला बाइन जाय हैं।

यूहन्ना 12:26

अगर केऊ मोर सेवा करेक चाहेला तो मोर पिछे होई लेवोक आउर मोर चेला बाइन जाओक। तब जहाँ मोंय अहों, हूवाँ मोर सेवक हों रही। अगर केऊ मोर सेवा करी तो आबा परमेश्‍वर हों उकर माइन करी।

यूहन्ना 13:37

पतरस उकर से कहलक, “हे प्रभु एखन मोंय तोर पिछे काले आवेक नी पारमूँ? मोंय तो तोर लगिन अपन जान के हों देई देमूँ।”

यूहन्ना 8:12

यीशु फिन आदमीमन से कहलक, “दुनिया केर दीया मोंय हेकों। जे मोर पिछे होई लेवी, आउर मोर चेला बनी, उ अंधार में नी चली, मगर जिंदगी केर इंजोत पावी।”

खास चेलामन केर काम 20:28

से लगिन तोहरे खुद केर आउर उ दल केर रखवाली करा जेकर लगिन पवितर आत्मा तोहरे के अगुवा चुइन हे, ताकि तोहरे परमेश्‍वर केर कलीसिया केर देखभाल करबा, जेके उ अपन बेटा केर लोहू देई के कीन लेई हे।

1 कुरिनथियनमन 16:15

हे बिसवासी भाईमन, तोहरेमन स्तिफनास केर परिवार के जानाला कि उमन अखया परदेस केर पहिला बिसवासी हेकैं, आउर परमेश्‍वर केर आदमीमन केर सेवा करेक लगिन तेयार रहैना।

1 कुरिनथियनमन 6:20

परमेश्‍वर तोहरे के दाम देई के कीन लेई हे, से लगिन अपन काया से परमेश्‍वर केर महिमा करा।

1 कुरिनथियनमन 7:28

मगर तोंय सादी हों करबे तो पाप ना लगे, आउर अगर डिंड़ा कन्या सादी करेला तो कोनों पाप ना लगे, मगर एइसनमन के काया केर दुःख होवी आउर मोंय बचाएक चाहोना।

2 कुरिनथियनमन 11:2

काले कि मोंय तोहरे केर बारे में चिंता करोना, जइसन परमेश्‍वर करेला, से लगिन तोहरेमन के मोंय, तोहरे केर एके गो पति मसीह केर हाँथ में पवितर डिंड़ा कन्या नियर सोंइप देवेक केर करार काइर हों।

इफिसियनमन 1:14

पवितर आत्मा छुटकारा पावल आदमीमन लगिन जमा करल धन नियर अहे, जे पक्का भरसा दिवायला कि परमेश्‍वर उ सोउब चीजमन के देवी जेके देवेक केर करार काइर हे, आउर जेके उ अपन आदमीमन लगिन कीन लेई हे। ताकि उकर महिमा लगिन उकर बड़ाई होवोक।

इफिसियनमन 5:27

उ अपन कलीसिया केर सोउब आदमीमन लगिन मोइर गेलक, ताकि उमन के सिद्ध बनाएक पारोक, आउर सोउब के अपन हेदना लानेक पारोक, जेमन में कोनों दोष या पाप या आउर कोनों रकम केर बुराई नी होवी, बल्कि उमन पूरा पुरी पवितर आउर निरदोष होबैं।

1 तीमुथियुस 4:3

उमन बिहा करेक से आउर खाएक केर थोरेक चीजमन के खाएक से मना करबैं, मगर परमेश्‍वर सोउब खाएक केर चीजमन के बिसवासीमन लगिन बनाय हे, जेके धन्यबाद केर प्रार्थना काइर के खाएक पारैना।

इब्रानीमन 12:23

तोहरेमन परमेश्‍वर केर पहिलौठा संतानमन केर सभा आउर कलीसिया में आय हा, जेमन केर नाँव स्वरग में लिखल अहे, उमन स्वरग में धरमी केर आत्मा हेकैं, आउर अब उमन के सिद्ध बनाल जाय हे, तोहरेमन हों खुद परमेश्‍वर ठिना आय हा, जे सोउब कुछ केर फैसला करेक वाला हाकिम हेके।

याकूब 1:18

उ अपनेहें इच्छा से हमरे के सच्चाई केर बचन से अपन संतान बनाय हे, ताकि हमरे उकर सिरजाल चीजमन में से एक रकम केर पहिला फार नियर होवब।

1 पतरस 2:9

मगर तोहरेमन एइसन नखा, काले कि तोहरे परमेश्‍वर केर चुनल आदमी हेका, तोहरे परमेश्‍वर केर पुरोहित हेका जे राजा हेके, तोहरेमन एइसन आदमी हेका जेमन खुद के परमेश्‍वर केर सेवा लगिन सोंइप देई हा, आउर तोहरे परमेश्‍वर केर हेका, तोहरे के परमेश्‍वर अंधार में से चुइन के अपन इंजोत में लाइन हे, ताकि तोहरे उकर अदभुत काममन केर परचार करबा।

प्रकाशितवाक्य 17:14

इमन मेमना से लड़बैं, आउर मेमना उमन केर उपरे जीत जाई, काले कि उ प्रभुमन केर प्रभु आउर राजामन केर राजा हेके आउर जेमन बोलाल आउर चुनाल अहैं, आउर उकर परती बिसवास लायक अहैं, आउर उमन उकर संगे अहैं, उमन हों जीत जबैं।”

प्रकाशितवाक्य 21:22

मोंय उकर में कोनों मंदिर के नी देखलों, काले कि सर्वशक्तिमान प्रभु परमेश्‍वर आउर मेमना हें उकर मंदिर हेकैं।

प्रकाशितवाक्य 21:23

उ नगर में बेइर आउर चाँद केर इंजोत केर दरकार नखे, काले कि परमेश्‍वर केर तेज रोशनी से उकर में इंजोत होवाथे, आउर मेमना उकर दीया हेके।

प्रकाशितवाक्य 3:4

मगर हाँ, सरदीस शहर में तोर हिंयाँ थोरेक एइसन आदमीमन अहैं, जेमन अपन-अपन लुगा के अशुद्ध नी करलैं, उमन चरका लुगा पिंधल मोर संगे घूमबैं, काले कि उमन इ लाएक अहैं।

प्रकाशितवाक्य 5:9

आउर उमन इ नवाँ गीत गावेक लगलैं: “तोंय इ किताब के लेवेक आउर इकर मोहर के खोलेक केर लायक अहिस, काले कि तोंय बलि होई के अपन लोहू से हरेक गोतर, भाषा, आदमीमन, आउर जाइत में से परमेश्‍वर केर लगिन आदमीमन के कीन लेई हिस।