प्रकाशितवाक्य 12:9 - सादरी नवाँ नियम

⁹ तब उ बड़का अजगर मतलब ओहे पुरना साँप, जे इबलीस आउर शैतान कहायला, आउर गोटा दुनिया केर आदमीमन के भरमाएक वाला हेके, उकर दूतमन केर संगे उके धरती में गिराय देवल गेलक।

प्रकाशितवाक्य 12:9 Iomraidhean Croise

मत्ती 13:39

जे दुश्मन जंगली बिहीन बुनलक उ शैतान हेके, कटनी दुनिया केर अंत हेके, आउर काटेक वालामन परमेश्‍वर केर दूतमन हेकैं।

मत्ती 24:24

काले कि झूठा मसीह आउर झूठा परमेश्‍वर केर संदेश बताएक वालामन उइठ खड़ा होबैं उमन बड़का-बड़का चिन्हा आउर चमत्कार केर काममन के देखाबैं आउर होई सके तो उमन चुनलमन के हों बहकाय देबैं।

मत्ती 25:41

तब मोंय राजा लेंगा बटे केर आदमीमन से कहमूँ, ‘हे सरपाल आदमीमन, मोर सामने से दूर होई जावा आउर उ जुग-जुग बारेक वाला आइग में चाइल जावा, जेके शैतान आउर उकर दूतमन लगिन तेयार करल जाय हे।

मत्ती 4:1

इकर पाछे पवितर आत्मा यीशु के सुनसान ठाँव में लेई गेलक ताकि शैतान उके परखोक।

मत्ती 4:10

तब यीशु उकर से कहलक, “हे शैतान मोर से दूर होई जा, काले कि पवितर किताब में लिखल अहे, ‘तोंय प्रभु अपन परमेश्‍वर केर भक्ति कर, आउर सिरिफ उकरे सेवा कर’ ”

मत्ती 4:5

तब शैतान उके पवितर शहर यरुशलेम में लेई गेलक आउर यहूदी मनक मंदिर केर सोउब से ऊँचा ठाँव में ठड़ुवालक।

मत्ती 4:8

फिन शैतान उके एगो ढेइर ऊँचा पहार उपरे लेई गेलक आउर गोटा दुनिया केर राइज आउर उकर धन-दौलत देखाय के

लूका 10:18

यीशु उमन से कहलक, “जब भूतमन तोहर आगया मानलैं, तो मोंय शैतान के अचका बिजली नियर स्वरग से हेंठे गिरते देखलों।

लूका 13:16

शैतान इ जनाना के जे अब्राहम केर संतान हेके, अठारह साल से बाइंध के राइख रहे, तो का इके यहूदी मनक आराम केर दिन में ठीक होवेक नी रहे?”

लूका 22:3

से बेरा शैतान यहूदा में ढूइक गेलक। जे इस्करियोत गाँव केर रहेक वाला आउर यीशु केर बारह चेलामन में से एगो रहे।

लूका 22:31

यीशु आगे कहलक, “सिमोन, हे सिमोन, देख, शैतान तोहर परीक्षा करेक लगिन परमेश्‍वर से इजाजत माँइग लेई हे, बेस आदमीमन के बुरा आदमीमन से अलग करेक लगिन, जइसन एगो किसान गोहोम के भूसा से अलग करेला।

लूका 8:12

डहर किनारे केर भूंई नियर उ आदमीमन अहैं, जेमन बचन के सुनलैं, मगर शैतान आय के उ मनक मन में से सुनल बचन के मेटाय देवेला, कहीं एइसन ना होवोक कि उमन बिसवास काइर के बाइच जाबैं।

यूहन्ना 12:31

अब दुनिया केर आदमीमन केर न्याय करेक लगिन परमेश्‍वर केर समय आय जाहे, दुनिया में राइज करेक वाला शैतान केर शक्ति के नाश काइर के उके निकलाय देवल जाई।

यूहन्ना 14:30

मोर ठिना तोहर संगे गोठियाएक लगिन ढेइर समय नी बाइच हे, काले कि इ दुनिया केर सरदार शैतान आवाथे। मोर उपरे उकर कोनों अधिकार नखे।

यूहन्ना 16:11

न्याय केर बारे में इ बताई कि दुनिया केर सरदार शैतान दोषी ठहराल जाय हे।

यूहन्ना 8:44

तोहर आबा शैतान हेके आउर तोहरेमन उकर इच्छा के हें पूरा करेक चाहाला। उ तो शुरु से हें हत्यारा अहे। आउर उके सच्चाई से कोनों लेना-देना नखे, काले कि सच्चाई उकर में हइये नखे। जब उ झूठ बोलेला, तो अपन स्वभाव केर मोताबिक बोलेला, काले कि उ झूठा हेके आउर झूठ केर आबा हेके।

खास चेलामन केर काम 26:18

मोंय तोके उ मनक आँइख खोलेक लगिन, उमन के अंधार से इंजोत में लानेक लगिन, मतलब शैतान केर अधिकार से छोड़ाय के परमेश्‍वर बटे लानेक लगिन उमन ठिना भेजाथों। जेकर से उमन मोर उपरे बिसवास काइर के अपन पापमन केर क्षमा पाओक आउर पवितर करल आदमीमन केर माझे अपन ठाँव के पाओक।’

खास चेलामन केर काम 5:3

पतरस उकर से कहलक, “हे हनन्याह! शैतान काले तोर मन में पवितर आत्मा से झूठ बोलेक केर बिचार के भाइर हे, आउर तोंय अपन बेचल सम्पति केर दाम केर एक हिस्सा के अपन लगिन राइख लेले?

रोमानियनमन 16:18

काले कि एइसन आदमीमन हमर प्रभु मसीह केर निहीं, मगर अपन फायदा लगिन सेवा करैना, आउर उमन मिठा-मिठा गोइठमन से सीधा-सादा आदमीमन के बहकाय देवैना।

रोमानियनमन 16:20

शांति केर परमेश्‍वर शैतान के जल्दी हें नाश काइर देवी आउर तोहरे केर अधीन काइर देवी। हमर प्रभु यीशु मसीह केर किरपा तोहरे उपरे बनल रहोक।

2 कुरिनथियनमन 11:14

आउर इ कोनों ताजुब केर गोइठ ना लगे, काले कि शैतान खुद हें चमकेक वाला स्वरगदूत केर रूप धारण करेला।

2 कुरिनथियनमन 11:3

मगर मोंय डरावना कि जइसन शैतान साँप केर रूप में अपन चलाँकी से पहिला जनाना हव्वा के बहकालक, तइसनेहें तोहरे केर मन के हों उ सिधाई आउर पवितरता से मसीह के जे आदर देवेक चाही, उकर से कहीं दूर ना काइर देओक।

2 कुरिनथियनमन 12:7

मोंय परमेश्‍वर केर अदभुत गोइठमन केर चलते जेके उ मोके देखाय हे, घमंड से ना भाइर जामूँ, से लगिन मोर काया में एगो काँटा जोबल जाय हे, मतलब शैतान केर एगो दूत मोके घूँसा मारेक लगिन ताकल अहे, ताकि मोंय फूइल ना जामूँ।

2 कुरिनथियनमन 2:11

शैतान के हमरे से कोनों फायदा उठाएक ना देवा, काले कि हमरे जानिला कि उ हमेशा हमरे के पाप में गिराएक लगिन लगल रहेला।

2 कुरिनथियनमन 4:4

आउर उ अबिसवासीमन नी बुझैना, जे मनक बुद्धि के इ दुनिया केर ईश्‍वर शैतान अंधरा काइर देई हे, ताकि उमन मसीह केर महिमा केर बारे में आवेक वाला शुभ समाचार केर इंजोत के देखेक नी पारबैं, जे परमेश्‍वर कइसन अहे इके देखायला।

इफिसियनमन 4:14

ताकि आगे हमरे छउवामन नियर नी रहब, आउर ना उ डोंगा नियर, जे पानी केर लहरा से हिने-हुने उछलत रहेला आउर हवा से कखनों इ दिशा, तो कखनों उ दिशा घूमते रहेला। हमरे के धोखेबाज आदमीमन केर झूठा शिक्षामन से, जे सच्चा नियर लगेला बहकेक नखे।

2 थिस्सलुनीकियनमन 2:3

प्रभु केर आवेक केर बारे में इ सोउब गलत गोइठमन में बिसवास ना करा, जेकर बारे में आदमीमन तोहरेमन के बताथैं। काले कि प्रभु यीशु केर घूइर आवेक से पहिले एइसन समय आवी कि ढेइर आदमीमन परमेश्‍वर केर बिरोध में हुड़दंग मचाबैं, आउर अधरमी आदमी मतलब बिनाश केर बेटा हों दिस्तार होवी।

1 तीमुथियुस 2:14

आउर आदम शैतान से बहकाल नी गेलक, मगर जनाना हव्वा के शैतान बहकालक आउर उ पापी होलक।

2 तीमुथियुस 3:13

मगर दुष्ट आउर बहकाएक वालामन धोखा देते आउर धोखा खाते, बिगड़ते चाइल जाबैं।

इब्रानीमन 2:14

से लगिन जबकि परमेश्‍वर केर छउवामन माँस आउर लोहू से बाइन हैं, तो यीशु हों खुद हें उमन नियर माँस आउर लोहू केर आदमी बाइन गेलक, ताकि अपन माउत केर जरिया से उके, जेके माउत केर उपरे शक्ति मिल रहे, मतलब शैतान के नाश काइर देवोक।

1 पतरस 5:8

सोउब बेरा तेयार रहा आउर जागते रहा, काले कि शैतान, तोहर दुश्मन तोहर उपरे हमला करेक चाहेला कि तोहरे आबा परमेश्‍वर केर आगयामन के ना माना। उ गरजेक वाला सिंह नियर अहे, जे आगे-पिछे जाय के इ खोजेला कि उ केखो खाएक पारोक।

1 यूहन्ना 5:19

हमरेमन जानिला कि हमरे परमेश्‍वर बटले हेकी आउर समूचा दुनिया उ दुष्ट शैतान केर वश में पड़ल अहे।

यहूदा 1:9

मगर हिंयाँ तक कि मुध स्वरगदूत मीकाईल हों एइसन नी करलक जइसन बिसवास केर देखावा करेक वालामन करैना। जेखन शैतान मीकाईल से इ गोइठ से विवाद करलक कि उमन में से केके मूसा केर लाश के दफनाएक केर अधिकार अहे, तो मीकाईल शैतान के बुरा-भला कइह के उकर उपरे दोष नी लगालक। उ सिरिफ एतना कहलक, “प्रभु तोके डाँटोक।”

प्रकाशितवाक्य 12:12

से लगिन, हे स्वरगमन आउर उकर में रहेक वाला आदमीमन, खुशी मनावा। मगर हे धरती आउर समुदर, तोहर उपरे हाय! काले कि शैतान तोहर ठिना पोंहइच जाय हे, उ खीस से भरल अहे, काले कि उके पता होई जाय हे कि उकर थोरहें समय आउर बचल अहे।”

प्रकाशितवाक्य 12:3

फिन एक आउर चिन्हा आकाश में दिस्तार देलक, एगो बड़का लाल अजगर रहे, जेकर सात मूँड़ आउर दस सींग रहे, आउर उकर मूँड़मन में सात राजमुकुट रहे।

प्रकाशितवाक्य 12:7

फिन स्वरग में लड़ाई होलक। मीकाईल आउर उकर स्वरगदूतमन केर लड़ाई अजगर आउर उकर दूतमन से होलक। अजगर आउर उकर दूतमन उकर से लड़लैं।

प्रकाशितवाक्य 12:8

मगर उमन टिकेक नी पारलैं, से लगिन स्वरग में उमन लगिन फिन ठाँव नी रहलक।

प्रकाशितवाक्य 13:14

आउर उ चिन्हामन केर खातिर जेके उ जानवर केर सामने देखाएक केर अधिकार उके देवल जाय रहे, उ धरती केर रहेक वाला आदमीमन के बहकात रहे आउर उमन से इ कहत रहे कि जे जानवर के तलवाइर लाइग रहे, उ जी जाय हे, उकर मूर्ति बनावा।

प्रकाशितवाक्य 16:14

इमन चिन्हा देखाएक वाला भूतमन हेकैं, जे समूचा दुनिया केर राजामन ठिना निकइल के इ लगिन जायना कि उमन के सर्वशक्तिमान परमेश्‍वर केर उ महान दिन केर लड़ाई लगिन जमा करोक।

प्रकाशितवाक्य 18:2

उ जोर से कहलक, “धाँइस गेलक, महान देस बेबीलोन धाँइस जाय हे! उ भूतमन केर डेरा आउर हर एक अशुद्ध आत्मामन केर अड्डा आउर हर एक अशुद्ध आउर घिनघिना चरई केर अड्डा बाइन गेलक।

प्रकाशितवाक्य 18:23

दीया केर इंजोत कहियो तोर में फिन नी चमकी आउर दूल्हा आउर दुलहिन केर आवाज कहियो तोर में फिन नी सुनाई देई, काले कि तोर बेपारीमन धरती केर खास आदमीमन रहैं, आउर तोर ओझा से सोउब जाइतमन भरमाल जाय रहैं।

प्रकाशितवाक्य 19:20

आउर उ जानवर आउर उकर संगे झूठा संदेश देवेक वाला धराय गेलक। इ झूठा संदेश देवेक वाला ओहे हेके, जे उ जानवर केर बटले चमत्कार केर चिन्हा देखात रहे आउर उ सोउब आदमीमन के बहकाय देई रहे, जेमन केर उपरे उ जानवर केर छाप रहे, आउर जेमन उकर मूर्ति केर पूजा करत रहैं। इ दुयो के जीते-जी आइग केर झील में जे गंधक से बरेला, साइज देलैं।

प्रकाशितवाक्य 2:13

मोंय इ तो जानोना कि तोंय हूवाँ रहिसला जहाँ शैतान केर सिंहासन अहे, आउर तोंय मोर नाँव में स्थिर रहिसला। तोंय मोर उपरे बिसवास करेक से उ दिनमन में हों पिछे नी हटले, जेकर में मोर बिसवास लायक गवाह अन्तिपास, तोहर माझे उ ठाँव में मोराल गेलक जहाँ शैतान रहेला।

प्रकाशितवाक्य 2:24

मगर तोहरे थुआतीरा नगर केर बचल आदमीमन से जेतनामन इ शिक्षा के नी मानैना, आउर उ गोइठमन के जेके शैतान केर गहरा गोइठमन कहैना नी जानैना, उमन से मोंय इ कहोना कि मोंय तोहर उपरे आउर बोझ नी देमूँ।

प्रकाशितवाक्य 2:9

मोंय तोर दुःख आउर गरीबी के जानोना, मगर हकीकत में तोंय धनी अहिस। आउर जे आदमीमन खुद के यहूदी कहैना आउर ना लगैं, मगर शैतान केर सभा हेकैं, उमन केर निंदा के हों जानोना।

प्रकाशितवाक्य 20:10

आउर उमन के बहकाएक वाला शैतान आइग आउर गंधक केर उ झील में, जेकर में उ खूंखार जानवर आउर झूठा संदेश देवेक वाला आदमी हों होवी, साइज देवल जाई, आउर उमन जुग-जुग राइत दिन बाथा में तड़पते रहबैं।

प्रकाशितवाक्य 20:8

तब उ, उ जाइत केर आदमीमन के जे धरती केर चाइरो बटे होबैं, मतलब गोग आउर मागोग के जेमन केर हिसाब समुदर केर बालू केर बराबइर होवी, बहकाय के लड़ाई केर लगिन जमा करेक ले निकली।

प्रकाशितवाक्य 3:9

देख, मोंय शैतान केर उ सभा केर आदमीमन के तोर वश में काइर देमूँ जे यहूदी बाइन बाइठ हैं, मगर ना लगैं, उमन झूठ कहैना, देख, मोंय एइसन करमूँ कि उमन आय के तोर पाँव में गिरबैं आउर इ जाइन लेबैं कि मोंय तोर से प्रेम करोना।

प्रकाशितवाक्य 9:1

जब पाँचवाँ स्वरगदूत तुरही फुँकलक तो मोंय आकाश से धरती उपरे एगो तइरगन के गिरते देखलों, आउर उके बेथाह गढ़हा केर कुंजी देवल गेलक।

प्रकाशितवाक्य 9:20

आउर बचल आदमीमन जे उ बिपइतमन से नी मोइर रहैं अपन हाँथमन केर बुरा काममन के करेक नी छोड़लैं। उमन भूत-प्रेतमन आउर, सोना, चाँदी, पीतल, पखना आउर काठ केर बनाल मूर्तिमन केर पूजा करेक नी छोड़लैं, जेमन ना देखेक पारैना, ना सुनेक पारैना आउर ना हें चलेक पारैना।