इफिसियनमन 4:1 - सादरी नवाँ नियम

¹ मोंय प्रभु यीशु केर सेवा करोना से लगिन जेहेल में अहों। मोंय तोहरेमन से बिनती करोना कि परमेश्‍वर तोहरेमन के जइसन जिंदगी बिताएक ले बोलाय हे तइसनेहें जिंदगी बितावा।

इफिसियनमन 4:1 Iomraidhean Croise

खास चेलामन केर काम 9:31

अब समूचा यहूदिया परदेस, गलील परदेस, आउर सामरिया परदेस में कलीसिया केर आदमीमन के चैन मिललक, आउर उ मनक बिसवास मजबूत होते गेलक, काले कि उमन प्रभु केर डार में जिंदगी बितात रहैं, उमन पवितर आत्मा केर मदइत से शांति पालैं आउर बिसवासीमन केर गिनती बढ़ते गेलक।

रोमानियनमन 11:29

काले कि परमेश्‍वर कहियो अपन बरदानमन से, आउर बोलाएक से पिछे नी मुढ़ेला।

रोमानियनमन 12:1

इ लगिन हे बिसवासी भाईमन, परमेश्‍वर हमरे के अपन महान दया के देखाय हे, से लगिन मोंय तोहरेमन से बिनती करोना कि अपन जिंदगी के जिंदा आउर पवितर, आउर परमेश्‍वर के पसिंद लायक बलिदान केर रूप में, परमेश्‍वर लगिन चढ़ाय देवा, एहे परमेश्‍वर केर भक्ति करेक केर सही तरीका हेके।

1 कुरिनथियनमन 4:16

से लगिन मोंय तोहर से बिनती करोना कि मोर जइसन चाल चला।

2 कुरिनथियनमन 10:1

थोरेक आदमीमन कहैना कि जब मोंय तोहर संगे रहोना तो नरम रहोना, मगर जब तोहर से दूर रहोना तो साहस करोना, से लगिन मोंय पौलुस तोहरे से अरजी करोना कि यीशु मसीह केर धीरज आउर नरम जिंदगी केर चलते मोंय उकर नमूना केर पालन करोना।

2 कुरिनथियनमन 5:20

से लगिन हमरे मसीह केर राइज केर संदेश देवेक वाला हेकी, जइसन कि परमेश्‍वर हमर जरिया से अपन संदेश के स्वीकार करेक लगिन, आदमीमन के कहाथे कि परमेश्‍वर केर संगे मेल-मिलाप काइर लेवा।

2 कुरिनथियनमन 6:1

आउर हमरे जे परमेश्‍वर संगे काम करेक वाला हेकी, तोहरे से अरजी करिला कि उकर किरपा जे तोहर उपरे होई हे, उके बेकार ना जाएक देवा।

गलातियनमन 4:12

हे बिसवासी भाईमन, मोंय तोहरेमन से बिनती करोना, तोहरेमन मूसा केर नियम से मोर नियर आजाद होई जावा। काले कि मोंय हों तोहरे परजाइतमन नियर मूसा केर नियम से आजाद होई गेलों।

इफिसियनमन 2:10

काले कि हमरे परमेश्‍वर केर बनाल हेकी, उ हमरे के यीशु मसीह में उकर भला काममन के करेक लगिन बनाय हे, जे काममन के करेक लगिन परमेश्‍वर हमरे के पहिले से तेयार काइर हे।

इफिसियनमन 3:1

से लगिन मोंय पौलुस तोहरे परजाइत आदमीमन लगिन मसीह यीशु केर काम करेक केर चलते जेहेल घर में बंदी अहों।

इफिसियनमन 4:17

इ लगिन मोंय उ अधिकार केर साथ जेके प्रभु मोके देई हे, तोहरे के इ बतावना कि अबिसवासीमन नियर ब्यवहार ना करा, जेमन बेकार गोइठमन केर चिंता करैना।

इफिसियनमन 4:4

हमरे सोउब एके गो काया में जुड़ल अही, (मतलब कलीसिया में) आउर हमरे सोउब के एके गो आत्मा मिल हे। जब तोहरेमन परमेश्‍वर केर आदमी बनेक लगिन चुनल गेला, तब तोहरे के जे आसरा मिल हे ओहे आसरा हमरेमन के हों मिल हे।

इफिसियनमन 5:2

मसीह केर पिछा करते दोसरमन लगिन प्रेम से भरल जिंदगी जिया, जे तोहर से प्रेम करलक आउर तोहर पापमन के उठाएक लगिन खुद के बलिदान काइर देलक। उकर से परमेश्‍वर खुश रहे, काले कि उ बलिदान उकर लगिन महकेक वाला सेंट नियर रहे।

फिलिप्पियनमन 1:27

तोहरे सिरिफ एतना करा कि तोहर चाइल-चलन मसीह केर शुभ समाचार केर लायक होवोक। चाहे मोंय आय के तोहरेमन के देखमूँ, चाहे नी हों आमूँ, तो तोहरे केर बारे में एहे सुनमूँ कि तोहरेमन एक हें मन होई के स्थिर अहा, आउर एक संग मिल के शुभ समाचार में बिसवास लगिन मेहनइत करते रहाला।

फिलिप्पियनमन 3:14

मोंय निशाना बटे कूदते जाथों, ताकि उ इनाम के पामूँ, जेके देवेक लगिन परमेश्‍वर मोके स्वरग बोलाय हे आउर जेकर लगिन मसीह यीशु अपन जान के देई हे।

कुलुसियनमन 1:10

आउर तोहरे एइसन जिंदगी जियेक पारबा जइसन प्रभु चाहेला, आउर तोहर चाइल-चलन प्रभु केर आदमीमन केर चाइल-चलन नियर होवोक ताकि तोहरेमन सोउब रकम से प्रभु के खुश करबा, आउर तोहरे लगातार सोउब रकम केर अच्छा काम करते रहबा। आउर परमेश्‍वर के जानेक में लगातार बढ़ते जबा।

कुलुसियनमन 2:6

इ लगिन जइसन तोहरेमन मसीह यीशु के प्रभु माइन के ग्रहण काइर लेई हा, तइसनेहें लगातार उकर पिछे चलते रहा।

कुलुसियनमन 4:12

इपफ्रास जे तोहर शहर केर हेके आउर मसीह यीशु केर सेवक हेके, तोहरे के जोहार कहेला। उ सोउब बेरा तोहर लगिन प्रार्थना करते रहेला ताकि तोहरेमन सिद्ध होई के पूरा बिसवास केर संगे परमेश्‍वर केर इच्छा में स्थिर रहा।

1थिस्सलुनीकियनमन 2:12

कि तोहर चाइल-चलन परमेश्‍वर केर इच्छा केर मोताबिक होवोक, जे तोहरेमन के अपन राइज आउर महिमा में बोलायला।

2 थिस्सलुनीकियनमन 1:11

इ लगिन हमरे लगातार तोहरे ले प्रार्थना हों करिला, ताकि परमेश्‍वर तोहरेमन के उके करेक केर लाएक बनाओक, जेके करेक लगिन उ तोहरे के बोलाय हे, आउर उ अपन शक्ति से तोहर हर भला इच्छा के पूरा करोक आउर हर उ काम के सफल करोक, जे तोहरे केर बिसवास केर बदली में अहे।

2 तीमुथियुस 1:9

जे हमरे के बचालक आउर पवितर जिंदगी जियेक लगिन बोलालक, उ हमरे के हमर बेस काममन केर चलते निहीं। मगर अपन योजना केर मोताबिक यीशु मसीह के हमर लगिन दुनिया में मोरेक ले भेजेक केर चलते हमर उपरे किरपा करलक।

तीतुस 2:10

उमन मालिक केर कोनों चीजमन केर चोरी ना करोक, मगर सोउब रकम से पूरा ईमानदार रहोक। ताकि आदमीमन उ मनक बेस ब्यवहार के धेयान देबैं। आउर उ मनक बेस काम आदमीमन के हमरे केर छुटकारा देवाइया परमेश्‍वर केर बारे में संदेश सुनेक केर जरिया बनोक।

इब्रानीमन 3:1

हे मोर संगी बिसवासी भाईमन जेमन परमेश्‍वर केर हेका, तोहरेमन स्वरग में उकर से मिलेक लगिन बोलाल जाय हा, यीशु मसीह उपरे धेयान देवा जे हमर लगिन परमेश्‍वर केर शुभ समाचार केर दूत आउर महापुरोहित हेके।

1 पतरस 2:11

हे दुलार भाईमन, तोहरे इ दुनिया में परदेसीमन आउर डहर चलुवामन नियर रहाथा। मोंय तोहर से बिनती करोना कि दुनिया केर उ सोउब बुरा इच्छामन से बचा, काले कि उ तोहर आत्मा केर बिरोध में लड़ते रहेला।

1 पतरस 3:9

बुराई केर बदला बुराई ना करा आउर ना गाली केर बदला गाली देवा, मगर इकर उल्टा उमन के आशीष हें देवा। परमेश्‍वर तोहरे के इ लगिन बोलाय हे कि तोहरे दोसरमन के आशीष देवा अगर तोहरेमन एइसन कराला तो परमेश्‍वर हों तोहरे के आशीष देवी।

1 पतरस 5:10

परमेश्‍वर जे पूरा रीति से किरपा से भरल अहे, उ हमरे के यीशु मसीह केर संगे एक जूट होवेक केर खातिर, स्वरग में उकर जुग-जुग केर महिमा में साझादार होवेक लगिन बोलाय हे। तोहर थोरेक देरी लगिन दुःख सहेक केर पाछे, परमेश्‍वर तोहरे के बेस बनाय देवी ताकि तोहर में कोनों दोष ना रहोक आउर उ तोहर दिल के मजबूत करी आउर उकर उपरे तोहर भरसा के सचमुच में स्थिर बनाय देवी।

2 पतरस 1:3

परमेश्‍वर अपन शक्ति से हमरे के उ सोउब कुछ के देई हे, जे हमरे के एइसन जिंदगी जियेक लगिन चाही जे परमेश्‍वर के खुश करेला। इ होवेक पराई काले कि हमरे परमेश्‍वर के जानिला आउर उ ओहे हेके, जे हमरे के अपन महिमा आउर भलाई से अपन आदमी होवेक लगिन बोलाय हे।

2 यूहन्ना 1:5

अब हे बहिन, मोंय तोर से बिनती करोना कि हमरेमन के एक दोसर से प्रेम करेक चाही, इ कोनों नवाँ आगया ना लगे मगर ओहे आगया हेके, जेके हमरेमन ओहे बेरा से जानाथी जब हमरे मसीह केर उपरे बिसवास करली।