इफिसियनमन 2:2 - सादरी नवाँ नियम

² उ बेरा तोहरेमन इ दुनिया केर आदमी मनक रीति-रिवाज केर मोताबिक चलत रहा, जेमन परमेश्‍वर के नी जानैना। आउर तोहरेमन शैतान केर आगया के मानत रहा जे भूतमन केर उपरे आकाश में राइज करेला। जे एखनोहों उ आदमीमन के अपन कब्जा में करेक केर कोशिश कराथे, जेमन परमेश्‍वर केर आगया के नी मानैना।

इफिसियनमन 2:2 Iomraidhean Croise

मत्ती 11:19

मगर मोंय आदमी केर बेटा खाते पिते आवाथों, सेकरो में उमन कहैना कि ‘देखा, पेटू आउर पियंक्कड़ आदमी, मालगुजारी लेवेक वालामन आउर पापी आदमीमन केर संग हेके।’ मगर आदमी केर उकर काममन से पता चलेला कि उ भला या बुरा आदमी हेके।”

मत्ती 13:22

एहे लेखे काँटा झूँड़ से भरल भूंई उ आदमी नियर अहे जेकर उपरे बिहीन गिरलक, उ बचन के सुनेला मगर दुनिया केर चिंता-फिकिर, आउर धन केर मोह-माया उकर मन में भाइर जायला आउर बचन के दबाय देवेला आउर बेगर फार केर जिंदगी जियेला।

मत्ती 13:38

खेत दुनिया हेके, बेस बिहीन परमेश्‍वर केर राइज केर आदमीमन हेकैं। आउर जंगली बिहीन शैतान केर आदमीमन हेकैं।

मरकुस 4:19

मगर दुनिया केर चिंता-फिकिर, आउर धन केर मोह-माया, आउर चीज-बसूत केर लोभ, उ मनक मन में भाइर जायला आउर बचन के दबाय देवेला, आउर उमन बेगर फार केर जिंदगी जियैना।

लूका 16:8

मालिक उ अधरमी भंडारी केर बड़ाई करलक, काले कि उ होशियारी से काम काइर हे। एहे नियर इ दुनिया केर आदमीमन अपन जइसन आदमीमन केर संगे लेन-देन करेक में इंजोत केर आदमीमन से बगरा चतूर अहैं।

लूका 22:31

यीशु आगे कहलक, “सिमोन, हे सिमोन, देख, शैतान तोहर परीक्षा करेक लगिन परमेश्‍वर से इजाजत माँइग लेई हे, बेस आदमीमन के बुरा आदमीमन से अलग करेक लगिन, जइसन एगो किसान गोहोम के भूसा से अलग करेला।

यूहन्ना 12:31

अब दुनिया केर आदमीमन केर न्याय करेक लगिन परमेश्‍वर केर समय आय जाहे, दुनिया में राइज करेक वाला शैतान केर शक्ति के नाश काइर के उके निकलाय देवल जाई।

यूहन्ना 13:2

यीशु राइत के अपन चेलामन केर संगे खात रहे। शैतान आगे से हें यीशु के धोखा देवेक लगिन सिमोन केर बेटा यहूदा के उसकाय रहे, जे इस्करियोत गाँव केर रहे।

यूहन्ना 13:27

आउर जइसनेहें यहूदा रोटी केर टुकरा खालक शैतान उकर में ढूइक गेलक। तब यीशु उकर से कहलक, “तोके जे करेक अहे उके तुरते कर।”

यूहन्ना 14:30

मोर ठिना तोहर संगे गोठियाएक लगिन ढेइर समय नी बाइच हे, काले कि इ दुनिया केर सरदार शैतान आवाथे। मोर उपरे उकर कोनों अधिकार नखे।

यूहन्ना 15:19

अगर तोहरेमन दुनिया केर आदमीमन नियर होता, तो दुनिया केर आदमीमन अपन जाइन के मन से प्रेम करतैं, मगर तोहरेमन दुनिया केर आदमीमन से नाता नी रखाला। काले कि मोंय तोहरेमन के दुनिया केर आदमीमन में से चुइन लेई हों। एहे लगिन दुनिया केर आदमीमन तोहरेमन से बैर करैना।

यूहन्ना 16:11

न्याय केर बारे में इ बताई कि दुनिया केर सरदार शैतान दोषी ठहराल जाय हे।

यूहन्ना 7:7

दुनिया केर आदमीमन तोहरेमन से दुश्मनी नी करबैं, मगर मोर से करबैं, काले कि मोंय उमन केर बिरोध में इ गवाही देवोना कि उ मनक काममन बुरा अहे।

यूहन्ना 8:23

यीशु उमन से कहलक, “तोहरेमन हिंयाँ इ दुनिया में जनम लेई हा, मगर मोंय स्वरग से आय हों। तोहरेमन इ दुनिया केर हेका मगर मोंय इ दुनिया केर ना लगों।

यूहन्ना 8:44

तोहर आबा शैतान हेके आउर तोहरेमन उकर इच्छा के हें पूरा करेक चाहाला। उ तो शुरु से हें हत्यारा अहे। आउर उके सच्चाई से कोनों लेना-देना नखे, काले कि सच्चाई उकर में हइये नखे। जब उ झूठ बोलेला, तो अपन स्वभाव केर मोताबिक बोलेला, काले कि उ झूठा हेके आउर झूठ केर आबा हेके।

खास चेलामन केर काम 19:35

शहर केर मंत्री आदमीमन के शांत काइर के कहलक, “हे इफिसुस शहर केर रहेक वाला आदमीमन, कोन आदमी नी जानेला कि इफिसुस शहर केर आदमीमन महान देवी अरतिमिस केर मंदिर केर देख-भाल कराथैं आउर उ मनक पवितर मूर्ति आकाश से गिर रहे।

खास चेलामन केर काम 5:3

पतरस उकर से कहलक, “हे हनन्याह! शैतान काले तोर मन में पवितर आत्मा से झूठ बोलेक केर बिचार के भाइर हे, आउर तोंय अपन बेचल सम्पति केर दाम केर एक हिस्सा के अपन लगिन राइख लेले?

रोमानियनमन 12:2

आउर इ दुनिया केर आदमीमन नियर ना बना, मगर तोहरे केर मन केर पूरा बदइल जाएक से तोहर चाइल-चलन हों बदलते जाओक, ताकि तोहरेमन परमेश्‍वर केर भला, आउर भावती, आउर सिद्ध इच्छा के अनुभव से जानते रहा।

1 कुरिनथियनमन 5:10

इ निहीं कि तोहरेमन बिलकुल इ दुनिया केर ब्यभिचारीमन, या लोभीमन, या दोसर के ठाकेक वालामन, या मूर्ति पूजा करेक वालामन से संगति ना करबा, काले कि एइसन करेक से तो तोहरेमन के इ दुनिया के छोइड़ देवेक पड़तक।

1 कुरिनथियनमन 6:11

आउर तोहर में से थोरेक आदमीमन पहिले एइसनेहें रहैं, मगर अब तोहरेमन केर पापमन धोवाय गेलक, आउर अब तोहरे परमेश्‍वर लगिन अलग होई गेला, तोहरे परमेश्‍वर केर देखेक में धरमी ठहराल गेला काले कि प्रभु यीशु मसीह आउर परमेश्‍वर केर आत्मा तोहर लगिन एइसन काइर हे।

2 कुरिनथियनमन 4:4

आउर उ अबिसवासीमन नी बुझैना, जे मनक बुद्धि के इ दुनिया केर ईश्‍वर शैतान अंधरा काइर देई हे, ताकि उमन मसीह केर महिमा केर बारे में आवेक वाला शुभ समाचार केर इंजोत के देखेक नी पारबैं, जे परमेश्‍वर कइसन अहे इके देखायला।

गलातियनमन 1:4

हमर आबा परमेश्‍वर केर इच्छा केर मोताबिक मसीह यीशु खुद के हमरे केर पापमन केर क्षमा लगिन बलिदान काइर देलक। ताकि हमरे इ दुनिया केर आदमीमन केर बुरा असर से बचल रहब।

इफिसियनमन 1:21

हूवाँ उकर नाँव सोउब रकम केर प्रधानता आउर अधिकार, आउर शक्ति, आउर प्रभुता केर उपरे, आउर हरेक नाँव केर उपरे, जे ना सिरिफ इ दुनिया में मगर आवेक वाला दुनिया में हों लेवल जाई।

इफिसियनमन 2:11

तोहरे याइद करा कि तोहरेमन परजाइत आदमीमन केर रूप में जनइम हा। (आउर जेमन काया में हाँथ केर करल खतना से खतना वाला कहायना, उमन तोहरेमन के बेगर खतना वाला कहैना)।

इफिसियनमन 2:13

एक समय रहे जब तोहरेमन परमेश्‍वर से दूर रहा मगर अब तो मसीह यीशु केर संगे एक होवेक केर चलते जे दूर रहा, परमेश्‍वर उ लोहू से जेके यीशु मसीह तोहर लगिन बहाय हे तोहरे के अपन ठिना लेई आनलक।

इफिसियनमन 2:3

हमरे हों ओहेमन नियर ब्यवहार करत रही आउर हमर पापी स्वभाव केर इच्छामन के पूरा करत रही, आउर बाकी सोउब आदमीमन नियर बुरा रही आउर परमेश्‍वर केर दंड के पावेक लायक रही।

इफिसियनमन 4:17

इ लगिन मोंय उ अधिकार केर साथ जेके प्रभु मोके देई हे, तोहरे के इ बतावना कि अबिसवासीमन नियर ब्यवहार ना करा, जेमन बेकार गोइठमन केर चिंता करैना।

इफिसियनमन 4:22

से लगिन तोहरेमन पिछला चाइल-चलन आउर पुरना पापी स्वभाव के छोइड़ देवा, जे तोहरे के बुरा इच्छामन में फँसाय के धोखा देलक आउर तोहर जिंदगी के बरबाद काइर देलक।

इफिसियनमन 5:6

केऊ तोहरेमन के इ कइह के धोखा ना देवोक कि परमेश्‍वर उमन के दंड नी देवी, जेमन एइसन पाप करैना। काले कि एहे काममन के करेक केर चलते परमेश्‍वर केर खीस आगया नी मानेक वालामन उपरे भड़केला।

इफिसियनमन 5:8

तोहरेमन तो पहिले शैतान केर कब्जा में रहा, मगर अब परमेश्‍वर केर होई गेला, से लगिन अब परमेश्‍वर केर संतानमन नियर चला।

इफिसियनमन 6:12

काले कि हमरे लोहू आउर माँस से बनल आदमीमन से नी लड़ाथी, मगर मुखियामन से आउर अधिकारीमन से, आउर अनदिस्तार शक्तिमन से जेमन उ आदमीमन उपरे राइज करैना, जेमन एखनो तक इ दुनिया केर अंधार में अहैं, आउर उ दुष्ट आत्मामन से जेमन फौजमन नियर आकाश में अहैं।

कुलुसियनमन 1:21

तोहरेमन जे पहिले परमेश्‍वर से दूर रहा, आउर अपन बुरा काममन केर चलते उकर दुश्मन रहा।

2 तीमुथियुस 4:10

काले कि देमास इ दुनिया केर चीजमन से प्रेम काइर के मोके छोइड़ देलक, आउर थिस्सलुनीके शहर चाइल गेलक, आउर भाई क्रेसकेंस गलातिया परदेस आउर तीतुस दलमतिया परदेस चाइल गेलक।

याकूब 1:27

हमर आबा परमेश्‍वर केर नजइर में शुद्ध आउर सच्चा भक्ति इ हेके कि अनाथमन आउर बिधवामन केर दुःखमन में उ मनक खेयाल रखेक, आउर खुद के इ दुनिया केर बुरा काममन से बचाय के रखेक।

याकूब 1:7

एइसन आदमी इ ना समझोक कि मोके प्रभु से कोनों मिली।

याकूब 4:4

हे धोखा देवाइयामन, का तोहरेमन इ नी जानाला कि दुनिया से दोस्ती करेक परमेश्‍वर से बैर करेक हेके? एहे लेखे जे केऊ दुनिया से दोस्ती करेक चाहेला, उ खुद के परमेश्‍वर केर बैरी बनायला।

1 पतरस 1:14

आउर परमेश्‍वर केर आगया के माना जइसन कि बेस छउवामन अपन आबा केर आगया के मानैना। आउर उ बुरा काममन के ना करा जेके तोहरे उ बेरा करेक चाहत रहा, जब तोहरे परमेश्‍वर केर सच्चाई के नी जानत रहा।

1 पतरस 4:3

बितल समय में तोहरेमन गैर बिसवासी आदमीमन नियर बुरा काम करेक में ढेइर समय बरबाद काइर देला। जइसन कि लुच्चा काम करेक केर चाह, ब्यभिचार, मतवारी करेक, रीझ-रंग, पियंक्कड़, आउर मूर्ति पूजा, जेकर से परमेश्‍वर घिरना करेला।

2 पतरस 2:14

उमन हर एक जनाना केर संगे गलत संबंध रखेक चाहैना, जेके उमन देखैना। उमन पाप करेक केर मोका सोउब बेरा खोजते रहैना, उमन उ आदमीमन के धोखा देवैना जेमन मसीह में मजबूती से भरसा नी करैना, आउर उमन के पाप बटे लेई जायना। उमन केर बगरा से बगरा चीजमन के पावेक केर लालसा केर खातिर परमेश्‍वर उमन के दंड देवी।

1 यूहन्ना 3:10

इकरे से परमेश्‍वर केर संतान आउर शैतान केर संतान चिन्हाल जायना, जे केऊ उ काममन के नी करेला जे परमेश्‍वर केर देखेक में ठीक अहे, तो उ परमेश्‍वर केर संतान ना लगे आउर ओहो ना लगे जे अपन भाई से प्रेम नी करेला।

1 यूहन्ना 3:8

जे केऊ पाप करते हें रहेला उ शैतान बटले हेके, काले कि शैतान शुरु हें से पाप करते आय हे। परमेश्‍वर केर बेटा इ लगिन आलक कि शैतान केर काममन के नाश करोक।

1 यूहन्ना 4:4

हे दुलार छउवामन, तोहरेमन परमेश्‍वर केर हेका आउर तोहरेमन परमेश्‍वर केर संदेश के बताएक वाला झूठा आदमीमन के जीत लेई हा, आउर जे पवितर आत्मा तोहर में अहे उ शैतान से हों बाड़ अहे जे दुनिया में राइज करेला।

1 यूहन्ना 5:19

हमरेमन जानिला कि हमरे परमेश्‍वर बटले हेकी आउर समूचा दुनिया उ दुष्ट शैतान केर वश में पड़ल अहे।

1 यूहन्ना 5:4

काले कि जे केऊ परमेश्‍वर केर संतान हेके, उ दुनिया के जीत लेवेला आउर उ जीत जेकर से दुनिया में जीत मिलेला उ हमरे केर बिसवास हेके।

प्रकाशितवाक्य 12:9

तब उ बड़का अजगर मतलब ओहे पुरना साँप, जे इबलीस आउर शैतान कहायला, आउर गोटा दुनिया केर आदमीमन के भरमाएक वाला हेके, उकर दूतमन केर संगे उके धरती में गिराय देवल गेलक।

प्रकाशितवाक्य 13:14

आउर उ चिन्हामन केर खातिर जेके उ जानवर केर सामने देखाएक केर अधिकार उके देवल जाय रहे, उ धरती केर रहेक वाला आदमीमन के बहकात रहे आउर उमन से इ कहत रहे कि जे जानवर के तलवाइर लाइग रहे, उ जी जाय हे, उकर मूर्ति बनावा।

प्रकाशितवाक्य 13:8

धरती केर उपरे रहेक वाला सोउब आदमीमन राक्षस केर पूजा करेक लगलैं। सिरिफ ओहेमन उकर पूजा नी करलैं, जेमन केर नाँव दुनिया केर सिरजन होवेक से पहिलेहें से जिंदगी केर किताब में लिखल जाय रहे। इ जिंदगी केर किताब उ मेमना केर किताब हेके, जेके बलिदान केर रूप में माइर देवल जाय रहे।

प्रकाशितवाक्य 16:17

आउर सातवाँ स्वरगदूत अपन कटोरा हवा में उझइल देलक, आउर परमेश्‍वर केर मंदिर केर सिंहासन से इ बड़का शबद सुनालक, “होई चुकलक!”

प्रकाशितवाक्य 20:2

उ अजगर के मतलब पुरना साँप के, जे इबलीस आउर शैतान हेके, धाइर के हजार बरिस केर लगिन बाइंध देलक।