2 पतरस 3:2 - सादरी नवाँ नियम

² मोंय एइसन इ लगिन कराथों, काले कि मोंय चाहोना कि तोहरे उ बचनमन के याइद रखा, जे परमेश्‍वर केर संदेश के बताएक वालामन ढेइर पहिले कइह रहैं, आउर हमर छुटकारा देवाइया आउर हमर प्रभु यीशु मसीह केर आगयामन के याइद रखा, जेके तोहरे के चुनल खास चेलामन सिखाय रहैं।

2 पतरस 3:2 Iomraidhean Croise

लूका 1:70

जइसन कि उ अपन पवितर परमेश्‍वर केर संदेश के बताएक वालामन बटले ढेइर आगे हें करार काइर रहे,

लूका 24:27

तब यीशु उमन के पवितर किताब में मूसा केर नियम से शुरु काइर के सोउब परमेश्‍वर केर संदेश के बताएक वालामन बटले अपन बारे लिखल गोइठमन के समझाय देलक।

लूका 24:44

फिन यीशु उमन से कहलक, “इ गोइठमन के मोंय तोहर संगे रहेक बेरा हें तोहरेमन के बताय रहों कि मोर बारे में जेतना गोइठमन मूसा केर नियम, परमेश्‍वर केर संदेश के बताएक वालामन आउर भजन संहिता केर किताबमन में लिखल अहे, उ सोउब पूरा होवेक जरुरी अहे।”

खास चेलामन केर काम 10:43

ओहे यीशु केर बारे में परमेश्‍वर केर संदेश के बताएक वाला सोउब आदमीमन गवाही देवैना कि जे केऊ यीशु केर उपरे बिसवास करी, उके उकर नाँव से पापमन केर क्षमा मिली।”

खास चेलामन केर काम 28:23

तब यहूदी अगुवामन पौलुस केर संगे एक दिन ठहरालैं, आउर उ दिन ढेइर आदमीमन उकर हिंयाँ जमा होलैं। बिहान से लेई के साँझ तक पौलुस सच्चाई से परमेश्‍वर केर राइज केर बारे में शिक्षा देते रहलक। उ मूसा केर नियम आउर परमेश्‍वर केर संदेश के बताएक वालामन केर किताबमन में लिखल बचनमन से यीशु मसीह केर बारे में उमन के समझाएक केर कोशिश करते रहलक।

खास चेलामन केर काम 3:18

मगर परमेश्‍वर इ गोइठमन के अपन सोउब संदेश के बताएक वालामन केर बटले आगे हें बताय देई रहे कि उकर मसीह दुःख उठाई आउर मोराल जाई। आउर उ इ लेखे इके सच काइर के देखालक।

खास चेलामन केर काम 3:21

यीशु के स्वरग में उ समय तक रहेक जरुरी अहे जब तक परमेश्‍वर उ सोउब चीजमन के नवाँ नी बनाय देई जेमन के उ बनाय हे। जेकर बारे में ढेइर समय पहिले से हें परमेश्‍वर अपन पवितर संदेश के बताएक वाला आदमीमन केर मुँह से बताय देई रहे।

गलातियनमन 6:2

हमर में से जेमन दुःखमन में अहैं, तो हमरे के उमन केर मदइत करेक चाही, एहे नियर हमरे मसीह केर नियम के मानिला।

इफिसियनमन 2:20

आउर यीशु केर चुनल खास चेलामन आउर परमेश्‍वर केर संदेश के बताएक वालामन केर नेव उपरे एगो घर नियर बनाल जाय हा, जेकर कोना केर पखना मसीह यीशु खुद हें हेके।

इफिसियनमन 3:5

इ लुकल योजना के पहिले पीढ़ी केर आदमीमन के नी बताल जाय रहे, मगर अब पवितर आत्मा बटले यीशु मसीह केर चुनल पवितर खास चेलामन के आउर परमेश्‍वर केर संदेश के बताएक वालामन के बताय देवल जाय हे।

1 तीमुथियुस 6:14

कि तोंय उ सोउब कुछ के कर जेके पूरा करेक लगिन परमेश्‍वर तोके आगया देई हे, ताकि केऊ हों प्रभु यीशु मसीह केर धरती में घूइर आवेक तक, तोर उपरे कोनों गलत करेक केर दोष ना लगाएक पारोक।

2 पतरस 2:21

मोर कहेक केर मतलब इ हेके कि जेमन मसीह के जाइन के छोइड़ देवैना उमन के जेमन मसीह के कहियो हें नी अपनाय हैं उमन से बगरा दंड मिली। उमन लगिन एहे बेस होतक कि उमन कहियो इ नी जानतैं कि अपन जिंदगी के धरमी तरीका से चलाएक केर का मतलब होवेला। अब उमन जानैना कि ठीक का हेके, मगर उमन परमेश्‍वर केर उ आगयामन के मानेक छोइड़ देलैं, जेके हमरे उमन के देई रही।

2 पतरस 3:15

आउर अगर हमर प्रभु अपन धीरज केर खातिर देरी कराथे तो इके तोहरे अपन छुटकारा पावेक केर एगो मोका केर रूप में समझा, जइसन हमर दुलारा भाई पौलुस हों तोहरे के उ गेयान केर मोताबिक लिखलक, जे परमेश्‍वर उके देई हे, ओहो तोहरे के ओहे गोइठ बतालक जेके मोंय अपन चिट्ठी में बताय हों।

2 पतरस 3:16

तइसनेहें उ अपन सोउब चिट्ठीमन में हों इ गोइठमन केर चरचा काइर हे, जेकर में केतना गोइठमन एइसन अहे, जेके समझेक कठिन अहे, आउर अनपढ़ आउर चंचल आदमीमन उकर अर्थमन के हों पवितर किताब केर आउर गोइठमन केर नियर खींच-ताइन के अपनेहें नाश केर कारण बनायना।

1 यूहन्ना 4:6

हमरेमन परमेश्‍वर केर हेकी। जे परमेश्‍वर के जानेला, उ हमरेमन केर सुनेला, जे परमेश्‍वर के नी जानेला उ हमरेमन केर नी सुनेला। हमरेमन इ लेखे सच्चाई केर आत्मा आउर झूठा आत्मा के जाइन लेविला।

यहूदा 1:17

मगर हे दुलार बिसवासी भाई-बहिनमन, तोहरेमन उ गोइठमन के याइद रखा, जे हमर प्रभु यीशु मसीह केर चुनल खास चेलामन पहिलेहें कइह चुइक हैं।

प्रकाशितवाक्य 19:10

तब मोंय उकर पाँव केर भीरे निहइर के माथा टेकलो आउर उकर आराधना करलों। उ मोर से कहलक, “देख, एइसन ना कर, मोंय तोर आउर तोर भाईमन केर संगी दास हेकों, जे यीशु केर गवाही देवेक में स्थिर अहैं। परमेश्‍वर केर हें आराधना कर। काले कि यीशु केर गवाही भविष्यवाणी केर आत्मा हेके।”