Ebrəə 2:14 - LAWA A BOO SONBORE

¹⁴ Bɛa yɔrɔ kɛ la, mà laanka gɔ̀nɔn siĩ bɛ́ minin kɛn lɛn lon lɔn, a na á n zɛnaa Yezu dɔ-n miɛ̃, á daa yɛ a din minbuiin nɛbaa kɛ lɛ nɛ. Yezu na á bɛ lɛ zɛnaa, màn mɛn bɛ́ toɛ, a gɛ̀ barka nɛ, *Sɛtaan mɛn bɛ́ gɛ̀ a pàã ná a gɔn, a bɛ pàã ziziɛ̃,

LAWA A BOO SONBORE 2011

¹⁴ Bɛa yɔrɔ kɛ la, mà laanka gɔ̀nɔn siĩ bɛ́ minin kɛn lɛn lon lɔn, a na á n zɛnaa Yezu dɔ-n miɛ̃, á daa yɛ a din minbuiin nɛbaa kɛ lɛ nɛ. Yezu na á bɛ lɛ zɛnaa, màn mɛn bɛ́ toɛ, a gɛ̀ barka nɛ, *Sɛtaan mɛn bɛ́ gɛ̀ a pàã ná a gɔn, a bɛ pàã ziziɛ̃,

Ebrəə 2:14 Iomraidhean Croise

Siin Giala 3:15

Ma á re baraabaa diɛ n laanka lɔ bii ni, ma da n tɔrɔ laanka lɔ tɔrɔ bii ni. Lɔ tɔrɔ á re n mìi yɔyɔrɛ, n dɔ á re lɔ tɔrɔ yawɛɛ a gòãtoro ganaa.»

Izayii 25:8

Dɛnaa Lawa á re gɛ̀ papaɛ̃ duduu. Á re min tumaa yii mu tuturi. Á re a zaman tumaa a sìi nyɛɛ a bɔ ǹ ganaa. Dɛnaa Lawa na á pɛ.

Izayii 53:12

Bɛ lɛ nɛ, man bǎã koe la min dadaran bii. Á re zɔ́ɔn gɔn màn gii kɔn ka pàãdɛnan nɛ. A giala á n din kɔ gɛ̀ la, ǹ nə́ da kun ka min baraan nɛ. Taãn nɛ, á n toɛ̃ ka min gigiã a sii baraan nɛ, á daa sii baraa-zɛnaalin gú ganaa.

Izayii 7:14

Bɛ lɛ nɛ, Dɛnaa din nə die sii a kɔnboe koe ka la: Á ke, nɛnɛn tá re nɔ̀ sii, a nɛgiĩ yɛ. Á re a tɔ koe Emanuwɛli, bɛ giala mà "Lawa tá kun ka wɔ nɛ".

Ozee 13:14

Masɛ Dɛnaa Lawa, ma doamaa nɛ, ma bɛa minin kɛn waa ma ǹ bɔ geren piɛ, ma á re ǹ kirisibiɛ gɛ̀ ganaa. Gɛ̀, n pàã lɛ a ma-a? Geren piɛ, n gɛ̀ dɛ ǹ pàã lɛ a ma-a? Man die n yii tiɛ̃, ma a re makara doɛ̃ doo wa.

Matiə 16:17

Yezu tɔ́n pɛ a dɔ nɛ: – Zonaasi a nɛgiĩ Simɔn ganaa, n wɔ na á bǐɛ̃ kɔ. A giala minbuiin nɛ bie á kɛ nyaa n nɛ wa, ma Di Lawa na á nyaa n nɛ.

Matiə 25:41

Bɛ kio, kii lɛ á die pii a gɔsɛdɛnan lɛn manɛ: «Lawa bɛ́ á barka bɔ kasɛn mɛnɛn nɛ, ka n zɔ̃ ka n bɔ masɛ ganaa! Tɛ mɛn bɛ́ a ba nimi wa, Lawa zɛnaa *Sɛtaan laanka a dia dí-a wolen manɛ, ka wo walan.

Zaã a sɛ́wɔ 1:14

Bɛa Boo kɛ lɛ na á n baa minbuiin nɛ lɛa, á giã wɔ bii. Wɔ́ a gugurubaa yɛ, Díi Lawa din bɛ́ á gugurubaa mɛn kɔ a Nɛgiĩ goon toto la. Bǐɛ̃baa laanka sonborebaa tá a lon parsiini.

Zaã a sɛ́wɔ 12:24

Masɛ n taãn pii ka nɛ, bɛ̀ *belee nàn mɛnaa tii li á gã wa, a n goɛ̃ a dinsɔɔ̃. Sɛnɛ, bɛ̀ á gã, a n nàn gigiã boe.

Rɔmu minin 14:9

A giala, *Krita lɛ na á gã, a yii kaa, màn mɛn bɛ́ toɛ, a geren laanka yiikoonaan Dɛnaa baa.

Rɔmu minin 8:3

Wɔa Lawa a dí-pɛn doɛ̃ kɛ bie toɛ wɔ n si sii baraa la wa, a giala, wɔ boo la wɔ bɛa dí-pɛn kɛn lɛn bɔlɔ si wa. Sɛnɛ, Lawa na á dí kɔsɔ nya wɔa kirisibaa ǹ wɔ lɛa. Sii baraa mɛn bɛ́ dùũ sii babaraan nɛ, á bɛ pàã nya. A na á ná a Nɛgiĩ dia bɛ lɛ zɛnɛɛ. Yezu lɛ dɔ na á daa ka minbuiin nɛ dùũ siin ni a lon. Asɛ a gɛ̀ barka nɛ, Lawa na á kiri kuru sii baraa la dùũ siin kɛn lɛn nɛ.

Korɛnti1 1:28

Minin tan, kanaa minin nə́ giɛ ǹ ganaa màn kooron lɛa. Ǹ ba n yiri koɛ ǹ li wa, ǹ ba màn kɔ́n lɛa ǹ yii li wa. Lawa na á bɛn lɛn bɔ. Sii mɛn bɛ́ kanaa minin nə́ giɛ a ganaa sii taãn lɛa, a là nə́ ǹ ganaa, Lawa n bɛ ziziɛ̃ ka bɛa minin kɛn lɛn nɛ.

Korɛnti1 15:50

Ma dɔɔ̃nɔn lɛn, ma bɛ́ boo mɛn pii ka nɛ, bɛ á ke: màn mɛn nə n zɛnaa siĩ lɛa ka mà nɛ, bɛ gii ba *Lawa a kiibaa ǹ bǎã-n wa. Màn mɛn dɔ bɛ́ giɛ̃, bɛ gii ba nyin nyabaã kɛ-n ma.

Galaasi minin 4:4

Sɛnɛ, biikoo mɛn nə n bɔ á n koa, bɛ bɛ́ á dɔ, Lawa ná a Nɛgiĩ dia. Á yɛ lɔ la, Zuifun dí-pɛn pàã giulun,

Kolɔɔsi minin 2:15

Bɛa yɔrɔ kɛ lɛ la, Lawa na á lon màn pàãdɛnan laanka a goledɛnan pàã nya. A na á sìi da ǹ ganaa buə̃buə̃ ne, á ǹ kũ ka kòso nɛn bɛ́ lɔn, á ǹ kaa kun ka zaman kɛ nɛ, woe gɔ̀lɔ̀baa ǹ da-zii we a Nɛgiĩ ni.

Timote1 3:16

Sonbore ne, sii-durii mɛn bɛ́ wɔa golee Yezu li ǹ sii lɛa, á n nyaa, bɛ á gole á la yii ni: Á n din baa minbuiin nɛ lɛa, á daa, Lawa Yiri ná a peperebaa nyaa, Lon a dia dí-a wolen nə́ yɛ miɛ̃. A boo nə́ n kalaa tɔrɔn bii, kanaa minin nə́ golee li, Lawa tɔ́n saa á woo-n lon.

Timote2 1:10

Wɔa Dɛnaa Yezu Krita bɛ́ á daa kanaa kəni, wɔ Lawa a bǐɛ̃baa gole lɛ yɛ. Boo Tii Kɔɔ̃n barka nɛ, wɔ á doɛ̃ wáa Yezu gɛ̀ pàã nya, á toa wɔ nyin nyabaã yɛ.

Ebrəə 10:10

Yezu Krita na á Lawa foo sii kɛ lɛ zɛnaa, a ná a din gɔ̀nɔn kɛ kɔ, mà a n baa wúlu màn kɛ lɛa, ǹ mɛn bɛ́ á n zɛnaa gunyin goon toto, bɛ lɛ nɛ, á wɔ yoreen koe.

Ebrəə 10:5

Bɛ lɛ nɛ, *Krita bɛ́ die kanaa, á pɛ Lawa nɛ: N goã giɛ wúlu mànan laanka gɔ ǹ mànan li wa, sɛnɛ, ma nə ń gɔ̀nɔn siĩ kɔ ma la.

Ebrəə 2:17

Bɛ lɛ na á toa, á n din baa ka n dɔɔ̃n minbuiin nɛn bɛ́ lɔn yɔrɔ tumaa la, màn mɛn bɛ́ toɛ, a n baa wúlu-bɔlen kiã lɛa, á n makara doɛ̃ a dí kɛ nɛ Lawa yɔrɔ-a, a minin sii baraa tuturu.

Ebrəə 2:18

Bɛ lɛ tɔ ganaa, a din bɛ́ á fuu yɛ lɔn damagɔ́ɔ̃li siin gɔn, min mɛnɛn dɔn bɛ́ damagɔ́ɔ̃li siin gɔn, á boe la a n dɔ bɛn lɛ.

Ebrəə 4:15

Wúlu-bɔlen kiã mɛn bɛ́ a ba wɔa pàã wɛɛnaabaa doɛ̃ wa, bɛ bie wɔ lon wa. Wɔa wúlu-bɔlen kiã lɛ damagɔ́ɔ̃li ǹ siin fuu yɛ, yɔrɔ din tumaa la ka wɔ dɔn bɛ́ lɔn, sɛnɛ, asɛ sii baraa zɛnaa wa.

Ebrəə 9:15

Bɛ lɛ taman yii ni, Krita lɛ á lɛ kɔ kɔn la dii a zɛlɛ lɛa. Sii baraan mɛnɛn nə n zɛnaa lɛ kɔ kɔn la zizi a biikoo li, asɛ na á gã á minin si bɛn la, màn mɛn bɛ́ toɛ, Lawa din min mɛnɛn bíi, á n lɛ kɔ ǹ la ka bǐɛ̃ nyabaã wole ne, bɛn nə bɛ yɛ.

Piɛrɛ1 1:20

Lawa na á ná a din lɛ bɔ, á koa bɛa lɛa, bɛ̀ kanaa bɛ́ a tɔn nə n da wa. A na á nyaa kanna a biikoo kɛ li biikoo giala-nyɔmiɛ lɛa, ka dinin bǐɛ̃ taman yii.

Sii-nyaan 1:18

Ma din nə yiikoonaa lɛa. Má goã má gã, sɛnɛ, kanna man goɛ̃ ma yii n koo yǎa duduu. Gɛ̀ a lɛduə̃ ǹ pàã n masɛ din gɔn, ka geren piɛ tumaa wɔ nɛ.

Sii-nyaan 12:9

Ǹ nə́ tɔɔ babaraa piɛ̃ wole gangabiɛ lɛ kũ ǹ nə́ zũ kanaa. A din ni lɛlɛ a miɛ̃ kɛ lɛ lɛa, ǹ nə́ bíi: «Nɔ̀ɔn Babaraa,» hinlaa *Sɛtaan, a n kanaa min tumaa yiri siɛ̃. Ǹ nə́ zũ tán la kun ka a dia dí-a wolen tumaa nɛ.

Sii-nyaan 2:10

Boɛɛnɛ, Sɛtaan lɛ á re n diɛ ka gɔ́ɔ̃ li. A n die kaa min tɛnɛn kuĩ a ǹ zũ kòso-n. Ka á re fuu yii lɛawaa fù gɔ́ɔ̃ nɛ. Bɛa fuu kɛ lɛ nyan nyɛ́ɛ da n ganaa wa. Goã bɔlɔgoondɛnaa lɛa haalɛ ta a n doe n gɛ̀ ganaa. Ma á re nyin nyabaã koe n la, ka a gɔ̀lɔ̀baa ǹ kii bafolo lɛa.

Sii-nyaan 20:2

Á tɔɔ babaraa piɛ̃ wole kɛ kũ á da fɔlɔ biɛ nɛ, mà yǎa lɛ̀ duu goon. A din lɛ n lɛlɛ a miɛ̃ lɛ lɛa, ǹ nə́ bíi nɔ̀ɔn babaraan kiã, ǹ nə́ bíi *Sɛtaan dɔn.