Pusuana 34:16 - Syin Chin Bible

¹⁶ Na tapate in tua ngamdang numeite teenpui tha tu a, amate in kei tungah a thumaan ngawl natu le a doai pathiante a biak natu in na tapate lam khialpui tha tu hi.

Pusuana 34:16 Iomraidhean Croise

Pianciilna 24:3

Hi sung a, Canaan mihingte sung pan ka tapa zi tu na teal ngawl natu in, vantung le leitung Pathian Topa min taw na kiciam tu ka dei hi.

1 Kumpite 11:1

Solomon in ngamdang numeite tam ma it hi. Egypt kumpipa ii tanu bek hi ngawl, Hit, Moab, Ammon, Edom le Sidon pan numeite teenpui hi.

1 Kumpite 21:25

( Topa muna ah Ahab bangin khialna vawt natu a kipumpiak kuama dang om ngawl hi — tua theampo a zi Jezebel ii hanthotna panin piang ahi hi.

2 Khangtaanghthu 21:11

Ama in Judah ngam mualsaangte tungah doai sepna munte ngawngawn vawtin, Judah le Jerusalem mite Topa langpanin mawna sung then hi.

Ezra 9:12

Amate hong cina pan, tua ngam sungah nuamsa in na suan na paalte in a tawntung na luasak nuam uh le tua mite taw na kiteangthaang ngei buatu uh a, a khanto natu le a matut natu in hu ngeingawl tu nu hi, hong ci hi.

Ezra 9:2

Jew pate in ngamdang numeite teenpui ahikom Pathian ii mi thiangthote mi thiangtho ngawl suaksak uh hi. A khial belte sia lampuite le uliante veu ahi hi.

Nehemiah 10:30

Ih ngam sungah a teang ngamdangmite taw ka kiteangthaang buatu uh hi.

Nehemiah 10:31

Ngamdangmite in Sabbath ni ahibuale a thiangtho ni khat pawpo ah antang le a dang na khat pawpo hong zuak le ka lei buatu uh hi. Kum sali a cin simin lo ka tho buatu uh a, leiba theampo ka bosak tu uh hi.

Nehemiah 13:23

Tua hun in Judah pasal tam mama in Ashdod, Ammon le Moab numeite a teenpui uh zongh ka mu hi.

Nehemiah 13:25

Tua pasalte teih in ka haamsiat ngawp a, saatin, a sam ka nuk zazaan hi. Tua zawkciang amate ahizong a tate ahizong ngamdangmite taw a ten kik ngei nawn ngawl natu in Pathian min taw ka kiciamsak hi.

Psalm Late 106:39

A ngamtatna uh taw amate le amate kininsak in Pathian tungah a thumaan bua uh hi.

Hosea 1:2

Topa in Hosea tungtawn a, Israel a paupui phitbel hunin Hosea tungah, “Pai in a, zi nei in; na zi in na vaang hong tang ngawl tu a, na tate ama bang lian ma hi tu hi. Tuasia bangma ka mite in kei hong nusia in, a thumaan ngawl te suak uh hi,” ci hi.

Thiampite 21:15

Tuabang ahibuale a thiangtho tu a tate sia biakna taw kisai in a thiang ngawl suak tu hi. Keima in Topa hi a, ama sia Thiampi Lianbel in ka koituam zo hi,” ci hi.

Joshua 23:12

Na thumaan bua uh a, no sungah a taanglai minamte taw kipawlkhawm in na kiteang uh le,

Joshua 23:13

Topa na Pathian in hi minamte sia maisang na manaw uh ciang hong nawkeaksak nawn ngawl het tu ahi sia na he thei hi. Amate sia no atu in thaang bang, vuum bangin hong lauhuai zaw tu a, thibin pan kivel bang, mittang sung ling do bangin hong na zaw tu hi. Topa na Pathian ii hong piaksa hi leitang hoi tungah note kuama na om nawn ngawl uh dong hisia kipee tan tu hi.

Thukhente 14:3

Ahihang a pa le a nu in “Zi khat nga natu in tua Pathian he ngawl Philistine te kungah pai kul na ziam? Eima mi sung teng, ih bee ih phung sungah ngaknu khat mu zo ngawl ni ziam?” ci in dong hi. Ahihang Samson in a pa munah, “Kei atu nong puisak tu ka dei sia ama bekma hi. Ama diksa khi hi,” ci hi.

Thukhente 3:5

Tuabangin Israel mite sia Canaan te, Hit te, Amor te, Periz te, Hiv te le Jebus te kawmah teang uh hi.

Thukhente 3:6

Amate sia tua mite taw kiteang tetekin, a pathiante bia uh hi.

Thukhente 8:27

Gideon in khamh milim khat vawt a, a pianna khua Ophrah ah koi hi. Israel te theampo in Pathian nusia in tua munah milim bia tu in pai uh hi. Tuasia in Gideon le a bangkua atu in thaang khat hong suak hi.