Pusuana 28:43 - Syin Chin Bible

⁴³ Aaron le a tapate in a sealno teng a kimu hu in, thalupna a thuak ngawl natu in ka omna Puanbuk ah hong pai ciang ahibuale Mun Thiangtho ah thiampi naseam tu in biaknatau hong neak ciang tua ngoaipuan teang tawntung tu hi. Tua in Aaron le a suan a paalte atu in a zui tu ngeina kip ahi hi.

Pusuana 28:43 Iomraidhean Croise

Pusuana 20:26

Kei atu biaknatau na sak uh ciang a tungah kaato natu in keallei vawt heak vun; na vawt uh le a tung na kaato uh ciang noma sealno teng kilanghsak tu nu hi.

Pusuana 27:21

Kong ompuina Puanbuk sung, Thuciamna Thingkuang mai, puankhai pua sangah Aaron le a tapate in meiinn koi tu uh hi. Tua mun keima omna ah nitak pan zingsang dong mei de tu uh hi. Hi thupiak sia Israel te le a suan a paalte in a tawntung a zui tu uh ahi hi.

Pusuana 30:21

Amate a thi ngawl natu in a khut le a peangte a sil kul hi. Hi ngeina sia amate le a suan a paalte in a tawntung a zui tu ahi hi,” ci hi.

Ezekiel 44:17

Amate Biakinnpi suum sungnung paina kongpi vang a tum ciangin puanneal silh tu uh hi. Biakinnpi suum sungnung, ahibuale Biakinnpi sungah na a sep laitakin amate in samul taw kivawt khat pawpo silh ngawl tu uh hi.

Thiampite 16:13

Tualai Topa ompuina munah ama in ngimnamtui sia mei tungah koi tu a, a khu in Thuciamna Thingkuang sitna sia seal tu hi, tua hile ama in tuasia mu ngawl tu a, thi ngawl tu hi.

Thiampite 17:7

Israel mite in Topa tungah hong thumaan in, lo sung keal doaite biakna in sa ngo nawn ngawl tu hi. Israel mite in maisang hun theampo ah hi ngeina zui tu hi.

Thiampite 22:15

Thiampite in tua ante a ne thei ngawl tu midang khat pawpo a neaksakna taw,

Thiampite 22:9

“Thiampi theampo in kong piaksa ngeinate zui tu hi. Tuabang a zui bua uh le amate a maw hi tu a thi tu uh hi, banghang ziam cile amate in a thiangtho ngeinate a zui ngawl hang ahi hi. Keima in Topa ka hi a, amate ka thiangthosak hi.

Thiampite 3:17

Israel te in a thau ahizong, a chi ahizong, ne thei ngawl tu hi; hi thu in Israel te theampo ii a teenna mun pawpo ah a tawntung a zui tu ngeina khat ahi hi.

Thiampite 5:1

A nuai a thute ah mawphel biakpiaknate kisamh hi. Mihing khat sia thukhenzum ah tetti pang tu in kisam a, ama muna bang le a zaakna bangin a son buale ama in a piang bang a thuak kul tu hi.

Thiampite 5:17

Mihing khat pawpo in tup khol ngawlin Topa thupiakte a paltan le, ama a khial hi a, a khialna daan thuak tu hi.

Mi Simna 15:15

Noma na hi uh zong, note sungah hong teang ngamdangmite ahizong, hi ngeinate ma maisang hun theampo ah zui tu hi. Note le amate Topa muna ah a kibang na hi uh a;

Mi Simna 18:22

Israel dangte in Puanbuk neak nawn ngawl het tu uh a, tuabangin a neak a om le thina daan thuak tu uh hi.

Mi Simna 18:32

Topa tungah a phabel na piak zawk uh nungsang na neak uh ciang maw ngawl nu hi. Ahizong Israel te ii a piak letsong a thiangtho te a phabel khen khat sia Topa tungah a piak ma in na neakna uh taw tua letsong ninsak heak vun; na ninsak uh le hong kithatlum tu hi,” ci hi.

Mi Simna 18:8

Topa in Aaron tungah, “Kei hong kipia tuamte theampo sung pan biakpiakna sungah a kihaltumte simngawl po nangma kong piak sia ciamtee in. Hite nangma le na suan na paalte atu in a tawntung atu kong piak ahi hi.

Mi Simna 9:13

Ahizong mihing khat po biakna taw kisai in thiang a, khual zongh haw ngawl napi Paisan Poai a vawt bua ahile ka mi khat in kingaisun nawn ngawl tu hi, banghang ziam cile a hunin biakpiakna hong piak ngawl hang ahi hi. Ama in a mawna hu in thuak nanak tu hi.