Micah 5:3 - Syin Chin Bible

³ Tua ahikom nau nei tu numei nu ii a tapa a pian mateng Topa in a mite sia a ngalte khut sungah a nusia tu hi. Tua zawkciang ngamdang ah saltaang a mipuite sia a mite taw kingawm kik tu hi.

Micah 5:3 Iomraidhean Croise

1 Kumpite 14:16

Topa in Israel taisan tu hi banghang ziam cile Jeroboam in mawna vawt a, Israel mite mawna sungah lampui hi.”

2 Khangtaanghthu 30:7

Amate ii Pathian, Topa tungah a thumaan ngawl, na taanghpupite le Israel na mipuite bangin om heak vun. Na mu thei bangma in, Topa in nasia takin daan thuaksak hi.

Psalm Late 67:3

Pathian awng, mihingte in nang hong pok tahen; mihing theampo in nang hong pok tahen!

Isaiah 11:11

Tua ni a thet ciang, Topa in ama ii vaangletna khatvei zangh kik tu a, ama ii mite sung pan Assyria le Egypt ngamsung, Pathros, Ethiopia, Elam, Babylon, Hamath ngamsung teng le tuipi tuikulhte tung, le tuipi dung ngamte ah a kinusia mite, a inn uh ah puak kik tu hi.

Isaiah 49:6

Topa in kei tungah, “Ka naseampa awng, nangma sep tu in nasep lian zaw khat ka nei hi, a suakta lai Israel mite a lian in lapto kik tu bek hi ngawlin, minamte tungah khuavak ahi tu zonghin nang kong vawt tu hi — tuabangin leitung theampo in ngupna a nga thei natu ahi hi,” hong ci hi.

Jeremiah 23:5

Topa in, “David suan a thumaan khat kumpi tu in ka teal tu hun hong theng tu hi. Tua kumpipa in ciimna taw ngam uk tu a thumaan thutang sia seam in a ngam buppi uk tu hi.

Jeremiah 31:1

Topa in, “Israel minamte theampo ii Pathian ka hi hun hong theng tu a, amate in ka mite hi tu uh hi.

Ezekiel 34:16

“Keima in a bote ka zong tu a, a lampial te ka khoi kik tu hi, a liamte a liamma ka tuamsak tu a, a ciinate ka damsak tu hi; ahihang thau in a thahatte ka susia tu hi, banghang ziam cile keima in a maan in a ngamta tuucingpa ka hi hi.

Hosea 11:8

“Israel awng, bangbangin hong thasua thei tu khi ziam? Bangbangin hong nusia thei tu khi ziam? Admah ka suksiat bangin hong susia ngei tu khi ziam? tua ahibuale Zeboiim tungah ka vawt ngei bangin nang hong vawt tu khi ziam? Ka lungtang in tuabang hong vawtsak ngawl tu hi! Nang kong itna sia nasia lei hi.

Hosea 2:14

Tua ahikom sennealngam sungah ama ka paipui kik tu a; tua munah ki itna kam taw ama ka zol kik tu hi.

Hosea 2:9

Tua ahikom anlaak hun ciang ka piakthongsa antang le sapittui te tuaciang a silh tu ka piak samul le patpuan te ka la kik tu hi.

Amos 5:15

Thusia ngaimaw in thu man dei vun a, thukhenzumte ah thukhaikim omsak vun. Hi ngamte sungah a nungta lai mite Topa in hesuak thei tha tu hi.

Micah 4:4

A neisa sapithuante le a theikungte sungah mi theampo kilemin teang tu hi, tuaciang kuama in ama lausak ngawl tu hi. Topa Vaanglianbelpa in hi kamciam pia zo hi.

Micah 4:7

Amate liamin bai a, inn panin kikhuala hi, ahihang a taanglaite atu kipat kikna thak khat ka vawtsak tu a, amate minam lian khat suak tu hi. Amate tua hun pan kipan Zion Mual tung pan a tawntungin ka uk tu hi,” ci hi.

Micah 5:7

Israel mi a suakta laite sia minam tam atu in Topa piak tha thak nga kikna daaitui bang hi tu a, thingno suante tung a nguazu vapeak bang hi tu hi. Amate in Pathian bealh tu a, mihing suang ngawl tu hi.

Micah 5:8

Minamte sungah a taanglai mite sia duisung ahibuale, ngamsa tatna mun ah, an zong tawpi savai khat bang hi tu hi: ama in tuuhon sungah tum a, tuute manin a bek a bekin laai a — tuaciang suatak natu lametna om ngawl hi.

Micah 6:14

An na neak uh hang na lungkim buatu uh a — a tatakin na ngil uh kial veve lai tu hi. Vanhte pua in, nate paipui tu na hi uh hang na keamcing zo buatu uh hi. Na top uh vanh pawpo ngal sungah ka susia tu hi.

Micah 7:13

Ahihang tua leitang sia a tungah a teangte ngitlo seksol hu in sennealngam suak tu hi.

Zechariah 10:6

“Keima in Judah mite ka hatsak tu hi; Israel mite ka suatak tu hi. Keima in amate khuangaihuai ka sa tu a, a vekpi in inn ah ka ciapui kik tu hi. Amate sia ka nial ngeingawl mite bang hi tu hi. Keima in Topa, a Pathian ka hi hi; A thungetnate ka zo tu hi.

Matthew 1:21

Ama in tapa khat hong hing tu a, a min Jesus ci in na phuak tu hi — banghang ziam cile ama in a mite mawna pan a hun tu hi,” ci hi.

Matthew 12:50

Vantung ah ka Pa deina bang a ngamtate sia ka suapuipa, ka suapuinu le ka nu ahi hi,” ci hi.

Matthew 25:40

Kumpipa in, ‘A maan tak ka ci ciang, hi ka suapuite a nobel khat tungah na vawt uh sia kei tung a hong vawt na hi uh hi!’ ci in zo tu hi.

Romete 8:29

Pathian teal sate a Tapa taw a kiban natu in, doituam a, tua hu in a Tapa in unau tam mama sung panin ta upabel suaksak hi.