Micah 2:11 - Syin Chin Bible

¹¹ “Hi mihingte ahile, ‘Sapittui le zu no atu in hong luang tu hi ci in kamsaanna kong son hi’ ci in leilot thu bebek sonin a vak, ngualtheam kamsaang namte, dei uh hi.

Micah 2:11 Iomraidhean Croise

1 Kumpite 13:18

Tuasia ciang Bethel pan kamsaang huai pa in ama munah, “Kei zongh nangma bangma kamsaang khat khi hi, tuaciang Topa ii sawlna taw vantunglalang khat in nang sia inn ah ciapui in zindo in hong sawl hi,” ci hi. Ahihang kamsaang huai pa sia leilot thu son ahi hi.

1 Kumpite 22:6

Tua ahikom Ahab in kamsaangte 400 bang samin, “Kei pai in Ramoth sim tu khi ziam maw, sim ngawl tu khi ziam?” ci in dongh hi. Amate in, “Sim in, Topa in zawna hong pia tu hi,” ci in zo hi.

Job 31:5

Ngitlo ngamtatna nei ngeingawlin, ngualtheam tu hanciam ngeingawl khi hi ci in ka kiciam hi.

Paunakte 25:14

Piak tu kamciam napi a pia ngeingawlte sia nguatui paai ngawl meeikaai le vuite bang ahi hi.

Isaiah 28:7

Kamsaangte le thiampite ngawngawn zu kham in hoi vatut uh hi. Sapittui le zuhang tam ne lei ahikom amate lungmangin lutu uh hi. Kamsaangte zukham lei ahikom Pathian ii a musak khol thute tel zo ngawl uh a, thiampite zongh zukham lei ahikom amate kungah a kipuak thute khensat thei ngawl uh hi.

Isaiah 9:15

A khanghaam le a zatak huai pasalte sia a lu hi a — leilot thu a hil kamsaangte sia a mei ahi hi!

Jeremiah 14:14

Ahihang Topa in, “Tua kamsaangte sia keima min suangin leilot thu son uh hi; amate ka sawl bua a, amate tungah thupiak ka nei bua hi, amate kam khat beak zongh ka paupui bua hi. Amate ii a son mukholna sia kei kung pan hi ngawl hi; mailam thu piang tu a sonkhol thute sia amate ngaisut tawm, kimanna a nei ngawl thu ahi hi.

Jeremiah 23:14

Ahihang Jerusalem khua a kamsaangte in a sia zaw lai a vawt ka mu hi: amate in nupa kipalngul in leilot thu son uh hi; mihingte ii ngitlo ngamtatna pan a kheal ngawl natu in mihingte khial natu panpui uh hi. keima muna ah amate sia Sodom le Gomorrah mite bangma in sia siat uh hi.

Jeremiah 23:17

Ka ci bang hong ngai nuam ngawl mihingte tungah na theampo amate atu in pha tu zam ci tan lai uh hi. Amate in mihing thinpui khat sim tungah tua siatna in ama thutha ngeingawl tu hi ci in son uh hi,” a ci hi.

Jeremiah 23:25

Amate mang sungah ka thupuakte hong pia zo hi ci a keima min suangin leilot thu a son kamsaangte ii thusonte ka he hi.

Jeremiah 23:32

Keima, Topa ii ka ci sia ngai vun! Leilot thu nguaktang ahi amate ii mangte a son kamsaangte ka langpan hi. Amate in hi mangte sonin a leilotnate le a kisaktheina uh taw in ka mite lam khialpui uh hi. Amate ka paisak bua a, thu zongh ka pia bua hi, mihingte atu in amate kimanna nei vet ngawl hi. Keima Topa in ka son zo hi,” ci hi.

Jeremiah 28:15

Tua zawkciang Hananiah tungah hi thu ka son zawkciang, “Ngai in, Hananiah awng! Nang sia Topa ii hong sawl na hi bua hi. Hi mite leilot thu na umsak hi.

Jeremiah 5:31

kamsaangte in leilot thu bek son uh hi; thiampite in kamsaangte thupiakna bangin uk uh a, ka mite in nalh ngawl uh hi. Ahihang a tawpna hun a thet ciang amate in bang law tu uh ziam,” ci hi.

Kaa late 2:14

Na kamsaangte in leilot thu ngawl po nang tungah son tu nei ngawl hi. Na mawna a pholaak ngeingawl amate thuhilna taw nang hong theam ahi hi. Amate in na kisii kik tu a kul ngawl tu dongin hong ngaisunsak hi.

Ezekiel 13:22

Ka liamsak nop ngawl mihing phate, na leilotna taw thinkiamsak nu hi. Mihing ngilote a siatna nusia in, a nuntakna uh a kihut natu pan na khaktan uh hi.

Hosea 7:14

Amate in thin tak taw thu ngen ngawl uh hi, tua sangin amate lei ah kisepin lawkite ngamtat bangin kapin mau uh hi. Sapittui le antang atu thu a nget ciang doaibiate bangin amate le amate kikuikeak uh hi. Bangza in hong langpan ziam!

Micah 3:11

Khuapi ukte in sumnguk neak natu in uk a, thiampite in thaman nga natu in Thukham pheen a, kamsaangte in sum nga natu in thupualaakna pia hi — a vekpi ma in Topa in amate ompui hi ci tek hi. Amate in “Ko tungah siatna hong theng ngawl tu hi. Topa in ko hong ompui hi,” ci uh hi.

Micah 3:5

Sum a pia zote tungah kilemna om tu hi ci in kamciam pia a, ahihang a pia zo ngawlte tungah ngal om tu hi ci in a tawng kamsaangte ii theamna sia ka mite in thuak hi. Hi kamsaangte tungah Topa in,

Romete 16:18

Banghang ziam cile tuabangin a ngamtate in ih Topa Christ atu in a seamte hi ngawl a, amate ngilpi atu in a seamte ahi uh hi. Amate in kamneal le kisialpoknate taw bangma a he ngawl mihing pawlkhat a theam uh hi.

Philippi te 3:19

Amate sia a khakbel ciangin hell theng tu uh hi, banghang ziam cile cii le sa deinate sia amate ii pathian ahi hi. A maizum huai, a thasiathuaite thangphatna in la uh a, leitung neisa nate bekma ngaisun uh hi.

1 John 4:1

Ka it lawmte awng, Thaa ka nei a ci theampo na um heak vun, ahihang amate nei thaa sia Pathian kung pan hong pai ahile ahi ngawl na sittel tavun. Banghang ziam cile mun theampo ah kamsaang maan ngawlte pai kawkoai zo uh hi.