Matthew 25:34 - Syin Chin Bible

³⁴ Tuaciang Kumpipa in ziatsang a om mihingte munah, ‘Hong pai tavun; Ka pa ii thupha piakte awng! Simlei a kibitphua ciil panin no atu a kipua khol sate lua tu in hong pai tavun.

Matthew 25:34 Iomraidhean Croise

Psalm Late 2:6

Ama in “Ka mual thiangtho Zion ah ka kumpipa ka koi zo hi,” ci hi.

Paunakte 11:17

Na dik le nangma le nangma kiphatvawt na hi hi. na ngilo le nangma le nangma kiliamsua na hi bek hi.

Isaiah 33:22

Tua teambawte tungah a kizangh khaute theampo a luithawthong hi; Teambaw puankhakte kiphal thei ngawl hi! Ih ngalte ii ngalkap honte nei na manpha theampo ih matsak tu a, vanh tam mama tu ahikom peangbaite ngawngawn zongin hawmtel khat tek nga tu uh hi. Topa mama sia ih kumpi hi tu a; ama in eite hong ukin hong sungsia tu hi.

Isaiah 6:5

Keima in, “Kei atu bangma lam et om ngawl hi! Kei a lal hi ing, banghang ziam cile ka muk pan a pusuak kammal sim sia mawna veu hi a, a kampau sim mawna veu ahi mite sungah ka teang hi. Tuabang teng ahitazong, Kumpipa, Vaanglianbelpa Topa sia ka mittang vateak taw ma in ka mu zo hi,” ka ci hi.

Isaiah 9:7

Ama ii kumpi vaangletna sia kizomin khang tawto tu a; ama ii kumpi ngam sungah kilemna a tawntungin om tu hi. Ama in David kumpipa ii za lai tu a, ama ii vaangletna in a maan le thukhaikim bulphu in tu pan kipan hun bo dongin uk tu hi. Vaanglianbelpa Topa in hite theampo khensatin seam tu hi.

Daniel 9:25

Hi thu ciamtee in tel in: Jerusalem a kipua kik natu thupiakna a om hun pan kipan Pathian ii teal lampui pa hong thet dong kum sali mun salivei hun ngei tu hi. Jerusalem sia a lampite le a kidalna kulh khote taw kivawt kik tu a, kum sawmluk le kum nii ii a salivei kumte dong kho tu a, ahihang hi hun sia buaina hun hi tu hi.

Zephaniah 3:15

Topa in na daan thuakna bosak zo hi; Na ngalte theampo hong hepsak hi. Topa, Israel kumpipa sia note taw omkhawm hi; tu in bangma lau natu thu om ngawl hi.

Matthew 13:35

Hi bangin ahi sia kamsaangpa pauna a taangtut natu ahi hi, “Amate tungah ka pau ciangin thusonteena ka zangh tu hi; Simlei a kibitphua pan kipan a kihe ngeingawl thute amate tungah ka son tu hi.”

Matthew 19:29

Tuaciang a kuama po kei hu in, a inn, a suapuipate, a suapuinute, a pa, a nu, a tate, a leitang khat pawpo a nusiate in, a see zakhat sangin tamzaw in saang tu a, tawntung nuntakna kipia tu hi.

Matthew 20:23

“Ka hai sia dawn takpi tu nu hi, ahihang ka ziatsang le ka veisang a to tute sia kei teal thei hi ngawl hi. Hi munte sia ka Pa ii see sa mite atu ahi hi,” ci hi.

Matthew 21:5

“Zion khuapi munah son vun, En vun, na kumpipa no kungah hong pai hi! Ama kiniamkhiak in laa tungah to a, laapui ii ta laano tungah to hi.”

Matthew 25:21

‘Pha hi, a thumaan naseam pha pa awng, tawmno na zeakna tungah thumaan na hikom, tampi zeakna ah a uk tu in kong koi tu hi. Kei taw lungdam khawm tu in hong pai ta'n!’ ci hi.

Matthew 25:23

‘Pha hi, a thumaan naseam pha pa awng! Na tawmno tungah thumaan na hikom, na tampite uk tu in, kong koi tu hi. Kei taw lungdam khawm tu in hong pai ta'n!’ ci hi.

Matthew 25:40

Kumpipa in, ‘A maan tak ka ci ciang, hi ka suapuite a nobel khat tungah na vawt uh sia kei tung a hong vawt na hi uh hi!’ ci in zo tu hi.

Matthew 25:41

“Tuaciangin a veisang a tote munah, ‘Kei kung pan tai vun, no Pathian ii haamsiat sate awng! Doaimangpa le a lalangte atu a kivawt kholsa tawntung meikuang sungah pai tavun.

Matthew 27:37

A lu tung san ah ama kimawsakna laimal teng taak uh hi. “Hisia in Jesus hi. Jew te Kumpipa hi,” ci in at uh hi.

Matthew 3:2

“Na mawna uh pan kisiik kik vun, banghang ziam cile Vantung ngam hong nai zo hi!” ci hi.

Matthew 5:19

Tua ahikom, a kuama po thupiakte sung pan a nobel khat ni ngawlin midang zongh tuabangin a nit ngawl natu a hil sia in Vantung ngam sungah a nobel hi tu hi. Tuaciangin a kuama po ahizong thukham ni a, midangte zongh tuabangin a nit natu a hil sia Vantung ngam sungah lian tu hi.

Mark 10:17

Jesus ding tu in a kipat kik ciangin, pasal khat hong tai a, ama mai ah khupdin in, “Sya pha awng, tawntung nuntakna ka nga natu in bang ka vawt tu ziam?” ci in dongh hi.

Mark 10:40

Ahihang ka ziatsang le ka veisang a to tute sia, kei in teal thei natu thu ka nei bua hi. Hi munte sia ama puuakholsak te atu in, Pathian in pia tu hi,” ci hi.

Luke 11:28

Ahizong Jesus in, “Tua sangin Pathian kammal za a, a zuite in bangza in thupha nga zaw ziam!” ci in, zo kik hi.

Luke 11:50

Tua ahikom simlei kibitphua pan kipan a kisuamlum kamsaang theampo hangin, tu hun a mihingte daan kipia tu hi,

Luke 12:32

“Tuu honnote awng, lau heak vun. Banghang ziam cile na Pa in Ngam hong pia nuam hi.

Luke 19:38

“Topa min taw hong pai Kumpipa tungah Pathian in thupha pia tahen! Vantung ah thinnopna om tahen a, Pathian minthang tahen!” ci uh hi.

John 1:49

Nathanael in, “Syapa awng, nang sia Pathian Tapa na hi hi! Israel Kumpipa na hi hi!” ci hi.

John 12:13

Tua ahikom amate in palm thingbaakte la in, ama muak tu in pai uh a, “Pathian pok vun! Topa min taw hong paipa, Pathian in thupha pia tahen! Pathian in Israel Kumpipa thupha pia tahen!” ci in au uh hi.

John 17:24

“Pa awng! Amate nong piaksa hi a, nong piaksa ka minthanna sia a mu thei natu in, ka omna munah hong om tek tu ka dei hi; banghang ziam cile, simlei a kipiansak ma in, nong it zo hi.

John 19:15

Amate in, “Ama that vun! Ama that vun! Thinglamtee tungah that vun!” ci in au uh hi. Pilate in “Na kumpipa uh thinglamtee tungah ka thalup tu dei nu ziam,” ci in dongh hi. Thiampi liante in, “Kumpipa khat bek ka nei uh sia Kumpilianpa sia hi!” ci in zo hi.

Sawltakte 15:18

hi thu taangh tawngh laipek pan a hesak Topa in son hi.’

Sawltakte 3:26

Tua ahikom note theampo in na ngitlo nate pan kikheal a, thupha hong piak thei natu in, Pathian in a Naseampa teal in note kungah hong sawl masa hi,” ci hi.

Romete 8:17

A tate ih hi zawk nungsang a mite atu a khealsia thuphate ih lua tu a, Christ atu a Pathian ii a koi nate zongh ih lua tu hi; banghang ziam cile Christ ii thuakna ih thuakpui le a minthanna zongh ih lua tu hi.

1 Corinth te 15:50

Ka ci nop thu in, suapuite awng, chi le sa taw a kivawt sia in, Pathian ii Ngam lua thei ngawl a, a thithei sia in thithei ngawlna lua thei ngawl hi.

1 Corinth te 2:9

Ahitazong, laithiangtho in, “Kuama ii a mu ngeingawl a zaak ngeingawl, suak thei tu in a ngaisut ngeingawl thu sia, ama a itte atu in Pathian ii a vawtkhol sa ahi hi,” a ci bangma ahi hi.

1 Corinth te 6:9

Mihing ngilote in Pathian Ngam lua ngawl het tu ci in he nu hi. Noma le noma kitheam heak vun; mihing a paktatte le milim a biate, palngul mawna a vawtte, pa le pa, numei le numei a khialte,

Galatia te 5:21

kidungawkna, zukhamna, sikvil loklenna le hite taw a kibang ngamtatna dangte nei uh hi. Kidop natu kong piak ngei bangin tu in kong ci hi: hi bang ngamtatna neite in Pathian Ngam lua ngawl tu hi.

Ephesus te 5:5

A kuama po a paktatte, a thasiathuai a, a kithoaite le a duhopte (duhop sia milim biakna nam khat hi) in Pathian le Christ Ngam lua ngeingawl tu hi ci sia pha takin na he uh hi.

1 Thessalonica te 2:12

Ama Ngam le a minthanna hong hawm tu in hong sam Pathian ii diksak nuntakna a nei tu in, kong hanthawn a, kong heeneam a, kong thawn top uh hi.

2 Timothy 2:12

Thuakna ih zom to suak le ama taw ih maangkhawm tu hi. Ama ih nial le, ama zongh in hong nial tu hi.

2 Timothy 4:8

Tu in thumaan thutang thukhenpa, Topa in tua Ni ciangin kei hong piak tu, Pathian mai ah thutang suana zawna thaman in kei hong ngak nginge hi. Kei bek hong pia tu hi ngawl a, ama hong pai kik tu itna taw a ngakte theampo zongh pia tu hi.

Hebrew te 1:14

Tua ahile vantunglalangte sia bang ziam? Amate sia Pathian naseam thaa te hi a, ngupna a saang tute a hu tu in, a sawlte ahi uh hi.

Hebrew te 11:16

Amate ii lungngul sia ngam phazaw, vantung ngam hi zaw hi. Tua ahikom Pathian in amate ii Pathian hi a kici sia a mai a zum bua hi. Banghang ziam cile ama in, amate atu khuapi khat vawtkhol sa in koisak hi.

Hebrew te 4:3

Tua hi a, ei a umte in, Pathian hong kamciamsa tawlngak nuam sia ih saang hi. “Ka thin uuk a, hi bangin a ciliap huai kamciam ka vawt hi. ‘Amate in ka piak tu tawlngakna ngamnuam ah a tum ngei buatu hi!’ ” a ci bang tatak ma ahi hi. Ama ii nasep sia simlei a bitphua hun panin a kiman sa hi napi tu a bangin ci veve hi.

Hebrew te 9:26

tuabang hi thong le, simlei a kibitphua pan kipan tamveipi na thuak zo tu hi. Tu in hunkhen theampo a tawp natu hong nai ciangin, ama le ama a kipiakna taw mawna kithiansua natu in, ama in a tawntung atu, khatvei lian hong kilaak zo hi.

James 2:5

Hong ngai tavun, ka it suapuite awng! Pathian in hi leitung ah mizawngte sia, upna sungah a hau tu le ama a itte atu kamciam a piak kumpi ngam a lua tu in teal zo hi.

1 Peter 1:9

banghang ziam cile ama na upna uh hu in na upna uh ii tupna bulpi a hi thaa ngupna sia na saang uh hi.

1 Peter 3:9

Ngitlona sia ngitlona taw thuk kik heak vun a, haamsiatna zongh haamsiatna taw thuk kik heak vun; tua hi ngawl zaw in thupha taw kithuk zaw vun, banghang ziam cile, note Pathian hong sap lai in piak tu a hong kamciam sia thupha hi zaw hi.

Thupualaakna 13:8

A kithatlum Tuuno ii neisa ahi leitung kibitphua ma a nuntakna laibu sungah a kikhum min neite simngawl, leitung a teang mihing theampo in a bia tu uh hi.

Thupualaakna 17:8

Nganhing sia khatvei lai nungta ngei ahihang tu in nungta nawn ngawl hi; ama sia a hawng thukpui sung panin, hong pusuak to dektak zo a, a kisusia tu in pai tu hi. Leitung bitphua ma in, nuntakna laibu sungah a min uh a kikhum ngawl, leitung ah a nungta mihing theampo in, nganhing sia a et uh ciangin, lamdang sa tu uh hi. Ama sia khatvei lai in nungta ngei hi; tu in nungta nawn ngawl hi, ahihang khatvei hong kilangh kik tu hi.

Thupualaakna 19:16

A puantual tung le a pheizang tungah, “kumpite ii Kumpipa, topate ii Topa,” ci in a min ki at hi.

Thupualaakna 21:7

Zawna a nga pawpo kei tung pan a saan tu thu in: Kei sia amate ii Pathian ka hi tu a, ama sia Keima tapa ahi tu hi.

Thupualaakna 5:10

Nangma in amate sia eima ii Pathian na a seam tu in kumpi thiampite ukna na suaksak zo a, tuaciang amate in leitung uk tu uh hi.”