Matthew 11:21 - Syin Chin Bible

²¹ “Nang atu in bangza in lauhuai ziam, Chorazin awng! Nang atu in bangza in lauhuai ziam, Bethsaida awng! Tyre le Sidon khuate tungah note sungah hong kivawt nalamdang laknate kivawt thong le, a mihingte in khau-ip puan silh in, amate tungah vut kithe in, mawna kisiik kikna a lak zawk ngei zo tu hi.

Matthew 11:21 Iomraidhean Croise

Job 42:6

Tua ahikom ka pau sa theampo tungtaang ka maizum a, kisik kik in leivui sung le vut sungah ka om hi.

Jeremiah 13:27

Ama ii huasaak nate na vawt uh sia ama in mu zo hi. Pa khat in a innpaampa ii zi a khialpui nop bang, ahibuale siphu tal lan khat ii anu khat a zuzui bangin doai biakna mualtung ah hikale, lo sungah hikale pathian dangte na zot uh sia ama in hong mu zo hi. Jerusalem mite awng, a lal hi nu hi! Bang hun ciangin thiangtho ngei tu nu ziam?

Joel 3:4

“Tyre, Sidon le Philistia ngamkhente theampo awng, kei, bang hong law nuam nu ziam? Bang khat po hangin hong thuk kik nuamin hanciam nu ziam? Tuabang nong hi uh le keima in manlang takin kong thuk kik tu hi!

Amos 1:9

Topa in, “Tyre mite maw kikik, khial kikik ahiciang amate daan ka pia tatak tu hi. Amate in minam bup Edom ah sal tang tu in paisak a, kipawlmat natu thukimna a vawt sia len ngawl hi.

Matthew 11:22

A tatakin ka ciciang, Pathian thukhenna Ni hong thet ciang, note tung sangin Tyre le Sidon khua mite tungah Pathian in hesuakna tam lak zaw tu hi.

Matthew 15:21

Jesus in tua mun pan dingin, Tyre le Sidon khuapi taw a kinai ngam ah pai hi.

Matthew 18:7

Mihingte upna a lalsak thei nate om ahikom, hi leitung atu bangza in kiitakhuai ziam? Tuabangte sia hong piang tawntung tu hi, ahihang tuabang a piangsakte atu in, bangza in lauhuai ziam?

Matthew 26:24

Mihing Tapa sia Laithiangtho in thi tu hi a ci bangma in thi tu a, ahihang Mihing Tapa a leeheak sia atu in, bangza in lauhuai ziam? Tua pa atu in pian awl zaw le phazaw hi,” ci in zo hi.

Mark 3:8

Jerusalem, Idumea ngam, Jordan ngun nisuana sang ngam, Tyre le Sidon khuapite kiim le paam ngamte panin hong pai hi. Hi mite theampo sia Jesus sep le vawt teng a zaak hu in, Jesus kungah hong pai uh hi.

Mark 6:45

Mipite a ciasak lanin Jesus in nungzuite ngunkuang tungah tosak a, tuili langkhat Bethsaida khua ah a paikhol tu in sawl hi.

Mark 7:24

Tua zawkciangin Jesus Tyre khuapi hui ngamkhen ah pai tu in ding hi. Inn khat sungah tum a, tua munah ama a om hunlam kuama heak tu oai ngawl ahihang a bucip zo bua hi.

Mark 7:31

Jesus in Tyre kiim le paam teng nusia in Sidon kaantan in Galilee ah pai a, Khuapi Sawm ii ngamkhente tawn hi.

Mark 8:22

Amate Bethsaida khua hong theng a, ama ii tham tu in mittaw pasal khat mihing pawlkhat in Jesus kungah hong paipui hi.

Luke 4:26

Ahitazong Elijah sia Israel ngam sungah meingongte khat beak ii kungah a kipaisak bua hi, ahihang Sidon ngamkhen Zarephath khua ah teang meingong khat ii kungah, kipaisak hi.

Luke 6:17

Mualtung pan sawltakte taw Jesus hong tuaksuk kik ciangin, zaanglei tam mun khat ah a nungzui mihing honkhat taw ding hi. Judea ngam bup pan le Jerusalem le tuipi hui khuapi Tyre le Sidon pan, hong kingawmtua mihon khat, tua munah om uh hi;

Luke 9:10

Sawltakte hong cia kik uh a, amate sep sa theampo Jesus tungah ko uh hi. Ama in amate paipui in, Bethsaida a kici khuapi zuan uh hi.

John 1:44

(Philip sia Andrew le Peter te ii teenna Bethsaida khua pan ahi hi.)

John 12:21

Amate in Philip (Galilee ngam Bethsaida khua mi) kungah pai in, “Syapa awng, ko Jesus mu nuam khu hi,” ci uh hi.

Sawltakte 12:20

Herod in Tyre le Sidon mite tungah a thin uuk mama hi, tua ahikom amate in Herod taw kimu tu in, pai hon uh hi. A masa in kumpi inncingpa Blastus sia amate a hu tu in, a thinzosak phot uh hi. Tua zawkciang amate in Herod kungah pai in kilemna ngen uh hi, banghang ziam cile amate ngam ii anneak tu sia kumpipa ii ngam panin nga uh hi.

Sawltakte 27:3

A zingsang ciangin, Sidon ka theng uh hi. Julius sia Paul tungah hong dik a, a kitaangsap pawpo a kipiak thei natu in, a lawmte kungah hawsak thei hi.

Jude 1:11

Amate atu in bangza in lauhuai ziam! Amate in Cain ii lampi tawn uh hi. Balaam khial bangma in, amate sia sum huvau in puk uh hi. Korah ii a langpan bangin, amate zongh in langpan uh a, ama bangma in kilalsak hi.

Thupualaakna 11:3

Ka tetti te nii khau-ip puan silh in, ka paisak tu a, amate in ni 1,260 sung teng Pathian ii thu vaithak thangsak tu uh hi,” hong ci hi.

Thupualaakna 6:12

Tua zawkciang tepteena a lukna sia Tuuno in a hon ka mu hi. Nasia takin zinliing a, ni sia puanvom bangin hong vomcip a, tha sia chi bangin sancip hi.