Joshua 22:5 - Syin Chin Bible

⁵ Moses ii hong thupiak bangin thukham na zui natu khuangaisun hamtang tavun: Topa na Pathian it vun, ama deina bang ngamta vun, a thupiakte ni vun, ama tungah thumaan vun, tuaciang ama atu na thin theampo le na thaa theampo taw seam vun,” ci hi.

Joshua 22:5 Iomraidhean Croise

Psalm Late 106:3

Ama thupiakte ni a, a tawntungin a maan in a seamte sia mihing lungdamte ahi hi.

Psalm Late 78:7

Hi bangin amate in zongh Pathian muang a, ama ii sepna sate mangil ngawlin, ama thupiakte ni tawntung tu uh hi.

Pusuana 15:26

Ama in, “Keima ii maan ka sak sia na vawtna uh taw ka thu nong ni siat uh a, ka thupiakte na zui uh le Egypt te tungah ka tunsak natnate khat zongh kong tungsak buatu hi. Keima in Topa note hong damsakpa “Jehovah Rapha” ka hi hi,” ci hi.

Pusuana 20:6

Ahizong kei hong it in, ka thukhamte a zuite ahile ka itna a khang tul tampite tungah ka lak tu hi.

Pusuana 23:13

“Keima, Topa ii kong son theampo hong ngai tavun. A dang pathiante tungah thungen heak vun a; a min zongh lo heak vun.

Pusuana 23:25

Topa na Pathian keima nong bia uh le an le tui taw thupha kong pia tu a, note natna theampo kong laaksak siat tu hi.

Paunakte 4:23

Na khua ngaisut dan kidawm in; na nuntakzia sia na khua ngaisutna in zeam hi.

Isaiah 55:2

Banghangin ngilva dangva na ngawl po in sum zangh thawthong nu ziam? Banghangin na thalaw sa sumte zangh napi ngilkial lalai nu ziam? Hong ngai tavun a, kong ci bangin seam vun, tua hile an limbel na ne tu uh hi.

Jeremiah 12:16

Amate in khatvei lai in ka mite Baal min taw kiciam tu in a hil bangma — amate in a thin theampo uh taw ka mite ii biakna saang thei tu a, ‘Topa a nuntak bangma in’ ci in a kiciam uh le — amate zongh keima mi ma hi tu a, a ma vangin nuamsa tu uh hi.

Matthew 22:37

Jesus in, “ ‘Na Topa Pathian sia na thin theampo, na thaa theampo le na ngaisutna theampo taw it in.’

Matthew 4:10

Tuasia ciang Jesus in, “Satan awng, tai in! Laithiangtho in, ‘Na Topa Pathian bek bia vun a, Ama atu bek sepsak vun!’ ci hi,” a ci hi.

Matthew 6:24

“Kuama in to nii ii sal hi thei ngawl hi. Ama in khat ensan tu a, khat it tu hi; khat ii tungah thumaan tu a khat puavawk tu hi. Pathian le sum ii sal na seam khawm thei buatu hi.

John 12:26

Ka naseampa sia keima omna po ah, keima taw a om thei natu in, kei atu hong sepsak nuam peuma in kei hong zui kul tu hi. Tuaciang kei atu a seam khat pawpo sia ka Pa in patoai tu hi.

John 14:15

“Nong it uh le ka thupiakte na ni tu uh hi.

Sawltakte 11:23

Ama a thet ciang, Pathian ii a mite thupha a piakzia mu ahikom ama lungdam a, Pathian tungah thin tak lung tak taw a thumaan natu in, amate theampo hanthawn hi.

Sawltakte 27:23

Banghang ziam cile ama ii neisa ka hi a, ka biak Pathian ii vantunglalang khat tu zanin hong pai a,

Romete 1:9

A Tapa ii Lungdamna Thupha ka hilsak, ka thin theampo taw ka sepsak, tu a ka son teng sia thumaan a hina thu ah — Pathian sia ka tetti ahi hi. No kong phawna sia Pathian in,

Romete 12:9

Ki itna in thin tak ahi tu thupi hi. A sia theampo ensan vun a, a pha ci theampo keamcing tavun.

Romete 8:28

Pathian ii tupna taw a sam sa ahi ama a itte atu in na theampo Pathian in a phabel in piangsak hi.

Thuhil kikna 10:20

Topa na Pathian ii thu ni in ama bek bia vun. Ama tungah thumaan in ama min bek suangin na kamciamna te vawt vun.

Thuhil kikna 11:1

“Topa na Pathian it vun, a thukham theampo zui tawntung vun.

Thuhil kikna 11:13

“Tua hi a, tuni in kong thupiakte zui vun; Topa na Pathian sia na thin theampo taw it in, a na seam vun.

Thuhil kikna 11:22

“No kong piaksa thukham theampo thumaan takin zui vun: Topa na Pathian it vun a, a thupiak theampo seamin, ama tungah thumaan vun.

Thuhil kikna 13:4

Topa zui in zatak vawt vun; a thu ni in a thupiakte zui vun. Ama bia in, a tungah thumaan vun.

Thuhil kikna 4:29

Tualai ah Topa na Pathian na zong tu uh a, na thinsung theampo taw na zong uh le na mu tu uh hi.

Thuhil kikna 4:4

ahizong Topa na Pathian tungah a thumaan note tuni dongin nungta lai nu hi.

Thuhil kikna 4:6

Thumaan takin zui vun, tua hile hisia in minam dangte tungah, na ciimna uh lak tu hi. Hi thukhamte theampo a zaak uh ciang, amate in, ‘Hi minam liante sia bangza in ciim a thu he zen ziam?’ ci tu uh hi.

Thuhil kikna 4:9

Na kihuukna in kidawm tavun! Na mit taw na mute na nuntak lai teng mangil peuma heak vun. Na tate le na tute tung na son tu thu khat sia

Thuhil kikna 5:10

Ahizong kei hong it a, ka thukhamte a zuite tungah ka itna khang tul tam mama dongin ka lak hi.

Thuhil kikna 6:17

Ama ii hong piak thukham theampo pha takin zui vun.

Hebrew te 12:15

Pathian ii thuthiamna pan na heak kik ngawl natu kikeam tavun. A khaa thingkung khangto a, lalna tam mama a piangsak nguu a nei thingkung bang na hi heak vun.

James 1:12

Ze etna haksa a thuak zote in a lungdam mihing ahi hi, banghang ziam cile tuabang hong sit nate a zaw ciangin, Pathian a itte tungah a kamciamsa nuntakna sia tel in saang tu hi.

James 2:5

Hong ngai tavun, ka it suapuite awng! Pathian in hi leitung ah mizawngte sia, upna sungah a hau tu le ama a itte atu kamciam a piak kumpi ngam a lua tu in teal zo hi.

Joshua 23:8

Tua taangin tu dong ciang na thumaan sa uh bangma Topa tungah thumaan tu nu hi.

Thupualaakna 15:3

Pathian naseampa Moses la le Tuuno lasa uh a: “Topa Pathian vaanglianbelpa, Na sep, na vawtnate bangza in lianin lamdang ziam! Minamte ii Kumpipa awng, na lampi sia bangza in tang a, maan ziam?

1 Samuel 12:20

Samuel in, “Lau heak vun, siatna khaatna tuaza in vawt na hi uh hangin, Topa nusia heak vun, ahihang na thin theampo taw ama na na seam vun.

1 Samuel 12:24

Topa thu ni vun a, thumaan takin na thin theampo taw ama ii na seam vun. Na lianpi no atu hong sepsak te ciamtee vun.

1 Samuel 7:3

Samuel in Israel mite munah, “Na thinsung theampo taw Topa sangah na kihei tu uh le, ngamdang pathiante le Astarte numeipathian ii limte na vawk siat uh kul tu hi. Topa tungah noma le noma kipum aapna nei vun a, ama bek bia vun, tuaciang ama in Philistine te khut sung pan hong suatak tu hi,” ci hi.