John 8:44 - Syin Chin Bible

⁴⁴ No sia na pa uh doaimangpa ii tate na hi uh a, tuaciangin na pa uh ii deinate na zui nuam uh hi. A kipatciil pan kipan, ama sia mi thatpa hi a, thumaan sangah a pang ngei bua hi, banghang ziam cile, ama sungah thumaan thutak a om bua hi. Ama in leilot thu a son ciangin, ama pianzia bangin pau ahi lel hi, banghang ziam cile, ama sia leilot thei pa hi a, leilotna theampo ii a pa ahi hi.

John 8:44 Iomraidhean Croise

Pianciilna 3:15

Numei taw khat le khat kong kihuatsasak tu a; ama ii hin le toaite le nang aa te a tawntungin na kingal tu uh hi. Ama ii hin le toaite in na lutang hong sucip tu a, nang in a khuatul na tuksak tu hi,” ci hi.

1 Kumpite 22:22

Topa in ‘Bangbangin maw?’ ci in dongh hi. Tua thaa in, ‘Keima pai in Ahab ii kamsaangte theampo leilot thu ka sonsak tu hi!’ ci in zo kik hi. Topa in, ‘Va pai ta'n a, va theam ta'n, theam zo tu ni hi,’ ” ci hi.

1 Khangtaanghthu 21:1

Satan in Israel mite tungah ngimna thengsak nuam ahikom ama in David sia mi simna vawt tu in khensatsak hi.

Job 1:11

Ahihang tu in a neisa theampo nangma in laaksak ci tawng — na maitang pan hong haamsiat tu hi!” ci in zo kik hi.

Matthew 12:34

No ngul ngilo suante awng — mihing ngilote na hi uh ciang, bangbangin thupha son thei tu nu ziam? Banghang ziam cile thinsung pan a, a dimleet teng sia kam panin kipau ahi hi.

Matthew 13:15

Banghang ziam cile amate thin bulthu zo a, a bil uh kihu cip zo in, a mit uh si cip zo uh hi. Tua ahibuale a mittang uh taw mu tu a, a bil uh taw za tu a, a thinsung taw tel tu uh hi. Tuaciang kei kungah hong zuan tu uh hi. Tuasia ciangin amate ka damsak tu hi, Pathian in ci hi.’

Matthew 13:38

Thaicii pha sia Kumpingammite ahi hi; mimphei sia a ngilopa ii neisa mihingte ahi uh hi.

John 6:70

Jesus in, “No sawm le nii teng, keima kong teal hi kana ngawl nu ziam? Tua hi napi, no sungah khat sia doai ahi hi,” ci hi.

John 7:17

Pathian dei bang a ngamta nuamte peuma in, Pathian kung pan hong pai thu ziam, tua ahibuale keima aituam thuneina taw hil khi ziam, he tu hi.

John 8:38

Kei sia ka Pa ii hong lak bang teng ka pau a, no sia na pa uh hong sawl teng na seam uh hi,” ci hi.

John 8:41

Note in, na pa sep teng na seam uh hi,” ci in zo kik hi. “Pathian bekma, kote ii khat bek ka nei ka Pa uh hi a, tuaciangin ko sia ama tate tatak ka hi uh hi,” ci in amate in zo uh hi.

John 8:55

No sia ama na he ngei bua uh hi, ahihang kei in ka he hi. Ama he ngawl khi hi, ci tu hi leng, noma bangma in a leilot ka suak tu hi. Ahihang ama ka heak hi a, tuaciangin ama ii thu ka ni hi.

Sawltakte 13:10

“Nang Doaimangpa tapa awng! Nang in a pha ci theampo ii ngalin pang ni hi. Nang in ngitlo thimthel pilna theampo taw kidim ni hi, tuaciangin, Topa ii thumaan thutakte sia leilot thu suaksak tu in hanciam tawntung ni hi!

Sawltakte 24:9

Jew te in hi mawna a kisotna sungah, hong pawm hon uh a, hi thu theampo maan hi, a ci uh hi.

Sawltakte 5:3

Peter in, “Ananias awng, banghangin Satan in na thin uksak a, Thaa Thiangtho theam in, na neisate zuak man sum aheap banghangin keam ni ziam?

2 Corinth te 11:3

Eve sia ngul ii leilot pilnate taw a theam bangma in — na thinsung uh lalin Christ tungah a kicing le a thiangtho in na kipiakna uhte na nusiat thaak tu uh ka lau hi.

1 Peter 5:8

Pilvang vun a, encik vilvel vun! Na ngalpa Doaimangpa sia a valhlup tu khat po zong a, a hawk tawpi taw kibangin, na kiimkot ah hong vak kawkoai hi.

2 Peter 2:4

Pathian in a maw a khial vantunglalangte khoaikhe ngawlin, hell sung denna in nei hi, amate tua mun khuazing sungah Thukhenna Ni ngak tu in koltaang hi.

1 John 1:8

Mawna nei bua hing ih cile eima le eima kitheam ih hi a, ih sungah thumaan thutak om ngawl ahi hi.

1 John 2:21

Tua ahikom lai kong thaakna in thumaan thutak na tel ngawl uh hang hi ngawl hi; thumaan thutak na heak uh hang hi zaw a, tuaciangin thumaan thutak sung pan leilot thu hong piang ngeingawl ci zongh na heak uh ahi hi.

1 John 2:4

Khat po in ama ka he hi ci napi, a thupiakte a zui buale mihing leilot hi a, ama sungah thumaan thutak a om bua hi.

1 John 3:12

Eite Cain taw ih kibang buatu hi; ama sia Ngilo Pa ii neisa hi a, a suapuipa tatak Abel thatlum hi. Banghang Cain in ama thatlum ziam? Banghang ziam cile ama ii ngamtatnate sia maan ngawl a, a suapuipa ngamtatnate maan ahihang hi.

1 John 3:15

Ngualdang a ensan peuma sia mihing that hi a, mihing that khat in, ama sungah tawntung nuntakna nei ngawl hi ci in na he uh hi.

Jude 1:6

Amate thuneina ciaciang sungah a om po ngawl, a teenna a nusia vantunglalangte phawk tavun: amate sia leinuai khuazingna ah tawntung thikkol kibul a, amate tungah thu a kitan tu Pathian ii Ni lianpi ni dong atu in Pathian in koi hi.

Thupualaakna 12:9

Tua ciangin taangh ngulpui lian Doaimangpa ahibuale Satan a kici leitung bup a theampa ngulpui lian mama sia, ama ii lalang theampo taw leitung ah hong kisepsuk hi.

Thupualaakna 13:14

Nganhing masa sia ii mai ah vawt thei natu thu a nga bangin nalamdang laknate taw leitung mihing theampo theam hi. Tua nganhing in namsau taw kiliamsua napi a nungta lai nganhing sia upat natu in milim khat a vawt natu amate sawl hi.

Thupualaakna 2:10

Na thuak lai tute a bang po ahizong, lau heak vun. Ngai vun! Doaimangpa in note hong ze etna in, pawlkhat thonginn sung denna in hong nei tu a, na ngimna uh sia ni sawm sung teng hi tu hi. Thi tu keak a kul zong kei tungah hong thumaan tavun, tua hile nuntakna sia zawna tel in kong pia tu hi.

Thupualaakna 21:8

Ahihang a lauthauh, ngual leeheakte, zummawk seamte le ngual thatte, a paktatte, bum le ai toaite, milim biate, le a leilot thei theampo — a om natu sia niivei thina ahi meili le kaan sia ahi hi,” hong ci hi.

Thupualaakna 22:15

Ahihang lampialte, bum le ai toaite, a paktatte, mihing thatte, milim biate, leilot kampauna le ngamtatna taw ngualtheam theite khuapi puasia ah om tu uh hi.

Thupualaakna 9:11

Amate in a uk kumpipa khat nei uh hi, tuasia pa sia a hawng thukpui a uk vantunglalang hi. Ama ii min sia Hebrew kam in Abaddon hi a, Greek kam in Apollyon hi. (“A Susia pa” a cinopna hi)