Jeremiah 26:6 - Syin Chin Bible

⁶ Thu na ni bua lalai uh le, Shiloh khua tungah ka vawt bangin hi Biakinnpi tungah ka vawt tu a, leitung minamte theampo in hi khuapi ii min sia kihaamsiatna in zangh tu uh hi,” hong ci hi.

Jeremiah 26:6 Iomraidhean Croise

2 Kumpite 22:19

tuaciang Jerusalem le a mite daan piak tu ka tawn na te na zaak ciang kisiik kikin kiniamkhiakna taw ka mai ah na puansilh eaukeak in kap ni hi. Mit mu bek zongin a lauhuai mama na mun ka suaksak tu a, mihingte in tua mun ii min sia haamsiatna kammal in a zangh tu hi. Ahihang na thungetna hong za zo khi hi,

Isaiah 43:28

no hong ukte in ka inn thiangtho sia ninsak uh hi. Tua ahikom Israel tungah siatna kong thengsak hi; ka mite selnona ka thuaksak hi,” ci hi.

Isaiah 65:15

Ka tealsa mihingte in na min sia haamsiatna in zangh tu uh hi. Vaanglianpipa Topa keima in nang kong thisak tu hi. Ahitazong ka thu hong nite min thak khat ka pia tu hi.

Jeremiah 24:9

Amate tungah tuabang tuasiatna ka thengsak tu a, leitung minamte theampo patau tu uh hi. Mite in amate sia ciammuina lelin nei a, nunau selno in, amate ka thethaangna mun theampo ah a min uh sia kihaamsiatna in zangh tu uh hi.

Jeremiah 25:18

Amate sennealngam khat, a lauhuai, diipkuathuai mun a sua natu le, mihingte ii ama te min sia haamsiatna in a zak natu in — tu hun dong a kizak lai bangma Jerusalem le Judah ngam khuapite theampo, a kumpite uh le a lampuite uh taw tua hai sung panin kidawnsak hi.

Jeremiah 29:18

Ngal, kialpi le natna taw amate ka zuizen tu a, leitung minam theampo in tuasia a mu uh ciang lau tu uh hi. Mun theampo ah amate ka thethaang tu a, amate tung thupiangte hangin mihingte ingh in lau tu uh hi. Mihingte in amate nunau in, a min uh sia kihaamsiatna in zangh tu uh hi.

Jeremiah 29:22

Jerusalem pan Babylon ah thongtaak bangin a kipuak mite in khat pawpo a haamsiat nop uh ciang, ‘Babylon kumpipa ii a hingtang a mei sung a em Zedekiah le Ahab bangin Topa in nang hong vawt tahen!’ ci tu uh hi.

Jeremiah 42:18

“Topa, Israel, ii Pathian in, ‘Ka thin uukna le ka thinsona Jerusalem khua mite tungah a kibuak bangma in, Egypt ngam ah na pai uh le ka thinsona sia note tungah hong kibuak tu hi. Midangte ii hong muna ah a cizathuai na suak tu uh hi; Mite in note ciammuina in hong nei tu a na min uh sia haamsiatna in zang tu uh hi. Hi mun sia na mu kik ngei nawn buatu uh hi,’ ci hi,” ka ci hi.

Jeremiah 44:22

Tuni mama in na ngam uh sia a lalcip sa in om a, a sungah kuama teang ngawl hi. Na seksolna uh le a sia na vawtna uhte Topa in thuak zo nawn ngawl ahikom na ngam uh sia a lipkhaphuai mun suak a mihingte in a min sia kihaamsiatna in nei uh hi.

Kaa late 2:15

Khuapi kaantan in a pai mihingte in nangma hong ngaimawk et uh hi. Amate in Jerusalem ii zaanthapna sia a lu pei in nuisan uh hi: “Hisia, tua khuapi hoi sia ma hi kana ziam? Hisia, leitung bup ii kiphatsakpui sia hi ka na ziam?”

Kaa late 2:16

Na ngalte theampo in hong selno in etsatna taw nang hong salh uh hi. Amate mukmen in “Khuapi lalthamsak zo hing! hisia ih ngalaakbel ni hi!” ci in selno uh hi.

Daniel 9:11

Israel mite theampo in na thukhamte paltan in na son thute ngai nuam ngawl uh hi. Nang tungah kong maw uh hi, tua hu in na naseampa Moses ii thukham sungah a ki at haamsiatnate ko tungah nong tungsak hi.

Zechariah 5:3

Tuaciang ama in kei tungah, “Tuasia tungah ngam bup sungah a tung tu haamsiatna ki at hi. A laizial langkhat ah ngamsung panin nguta a minpiang kinotkeak tu hi; a langkhat ah kiciamna taw leilot thu a son theampo zongh kikaikeak tu hi, ci in ki at hi.

Malachi 4:6

Ama in pate le tate hong ngawmtua kik tu hi; tuabang ahibuale keima kong pai tu a, na ngam ka suksiat kul tu hi,” ci hi.

Joshua 18:1

Ngam a zawthal zawk uh ciang Israel taangpi bup sia Shiloh ah kikhawm in, Topa ompuina Puanbuk sa uh hi.