Jeremiah 21:10 - Syin Chin Bible

¹⁰ Hi khuapi sia khe tuan ngawlin suksiat tu in ka thin ka khensat zo hi. Babylon kumpipa khut sungah kipia tu a, ama in mei taw haltum tu hi. Keima, Topa in ka ci zo hi.”

Jeremiah 21:10 Iomraidhean Croise

2 Khangtaanghthu 36:19

Ama in Biakinnpi le khuapi sia a kumpi innte le a nei a lam theampo taw haltum in khuapi uumna luphungte sutham hi.

Psalm Late 34:16

ahihang siatna a vawtte sia ama in langpan a, tua in amate a thi uh ciangin a kimakngil pal natu ahi hi.

Jeremiah 17:27

Ahihang amate in ka thu hong nit kul tu a Sabbath sia ni thiangtho khat in a tan uh kul tu hi. Tua ni in amate Jerusalem kongpite kaantan in vanh bangma pua ngawl het tu uh hi. A pua uh ahile Jerusalem kongpite mei taw ka hal tu hi. Mei in Jerusalem khua kumpi innte kaanghtum tu a, kuama in phel zo ngawl tu uh hi,” hong ci hi.

Jeremiah 26:6

Thu na ni bua lalai uh le, Shiloh khua tungah ka vawt bangin hi Biakinnpi tungah ka vawt tu a, leitung minamte theampo in hi khuapi ii min sia kihaamsiatna in zangh tu uh hi,” hong ci hi.

Jeremiah 33:5

Mihing kimkhatte in Babylon te do tu uh hi, amate in ka thin uuk ka thangsiatna taw ka velvawk tu mithi luangte taw innte dimsak tu uh hi. A mite ii a tatsiatnate hu in hi khuapi ka nungngat zo hi.

Jeremiah 34:2

Topa Israel ii Pathian in Judah kumpipa Zedekiah kungah pai in hi bangin son ta'n, “Keima, Topa in hi khuapi sia Babylon kumpipa khut sungah ka aap tu a, ama in haltham tu hi.

Jeremiah 34:22

Keima in thu ka pia tu a, hi khuapi ah amate hong heak kik tu uh hi. Amate in tua khuapi simin la tu a, mei taw haltham tu uh hi. Keima in Judah ngam khuate sia kuama ii teen ngawlna sennealngam khat bang ka suaksak tu hi. Keima, Topa in ka son zo hi,” hong ci hi.

Jeremiah 38:17

Tuasia ciang Zedekiah tungah Vaanglianbelpa Topa Israel ii Pathian in, “Babylon kumpipa ii uliante khutnuai ah na tum le, na nuntakna hong kikhoaikhe tu a, hi khuapi kihaltum ngawl tu hi. Nangma le na innkuanpuite kikhoaikhe khawm tu hi.

Jeremiah 38:18

Ahihang na tum bua le, hi khuapi sia Babylon te khut sungah ki aap tu a, amate in haltum in amate ii khut sung panin na suakta buatu hi,” a ci teng ka son hi.

Jeremiah 38:23

Tua zawkciang keima in, “Na zite le na tate theampo sia Babylon te kungah kipaipui tu a, nang zongh na suakta buatu hi. Nang sia Babylon kumpipa in thong hong taksak tu a, hi khuapi sia mei taw kihaltum tu hi,” ka ci lai hi.

Jeremiah 38:3

Topa in, “Keima in hi khuapi sia Babylon ngalkaphonpi khut sungah ka pia tu a, amate in la tu uh hi,” a ci sia zongh amate tungah ka son si hi.

Jeremiah 39:16

Ethiopia mi Ebedmelech tungah a son tu in Topa in kei hong sawl hi. “Ka vawt tu hi ka ci bangin hi khuapi tungah nopsakna ahi ngawl siatna ka tungsak tu hi. Hi bangin hong pian ciang a mu tu in tua munah na om tu hi.

Jeremiah 39:8

Tua hun sung ma in Babylon te in kumpi inn le mipite ii innte haltum a Jerusalem khua luphungte sutham uh hi.

Jeremiah 44:11

“Tua ahikom, Vaanglianbelpa Topa Israel ii Pathian keima in, note kong langpan tu a Judah ngam theampo ka susia tu hi.

Jeremiah 44:27

Note a nuamsa ngawlin kong vawt tu hi, bek dom ngawlin kong susia tu hi. Note khat zongh kikhe ngawlin, ngal taw ahizong, natna taw ahizong na lalcip tu uh hi.

Jeremiah 52:13

Ama in Biakinnpi, kumpi inn le Jerusalem khua sungah mi thupi theampo ii innte mei taw haltum hi;

Ezekiel 15:7

daan ka pia tu hi. Amate meikuang khat panin suakta zo hi, ahihang tu in mei in kaanghtum tu hi. Amate daan ka piak ciangin Keima sia Topa ka hi hunlam nong tel tu uh hi.

Ezekiel 24:11

Tu in taau bealhawm sia a san dongin meikam tungah suang vun. Tua hile a kheangh teng kaanghin, a kok zawkciang beal sia a ngeina bang thiang kik tu hi,

Thiampite 17:10

Israel te khat pawpo ahibuale a teen khoppui ngamdangmi khat pawpo in a sungah chi om lai sa a ne le, Topa in ama nungngat tu a, ama mi in sim nawn ngawl tu hi.

Thiampite 26:17

Ngal na lel natu in kong nungngat tu a, hong ngaimaw te in hong uk tu hi; na patau mama tu uh a, hong del om ngawl napi na tatai tu uh hi.

Amos 2:5

Tua ahikom Judah tungah meikuang ka khiak tu a, Jerusalem kulhpite ka haltum tu hi,” ci hi.

Amos 9:4

A ngalte in manin luangtasak kale amate a thalup natu thu ka pia tu hi. Amate ka suksiat tu le ka hu ngawl tu sia khensat zo khi hi,” ci hi.

Zechariah 1:6

Na taanghpupite tungah ka naseam kamsaangte tungtawnin thupiaknate le kidop natu thute ka pia hi, ahihang amate in tuate thusim ngawl a, a ngamtatna taw a kizui in ngimna thuak uh hi. Tuasia ciang amate kisiik kikin, keima, a Vaanglianbelpa Topa in amate taw a kiphu bang le ka sep tu tatak a ka khensat bangin daan ka piak hunlam hong tel uh hi,’ ” cisak hi.