Jeremiah 16:11 - Syin Chin Bible

¹¹ Tuasia ciang Topa ii hi bangin a ci sia amate tungah va son ta'n hong ci hi, ‘Na taanghpupite in kei kung pan puapial a ngamdang pathiante bia in a na seam uh hi. Amate in kei hong nusia a ka hil thute ni ngawl uh hi.

Jeremiah 16:11 Iomraidhean Croise

1 Kumpite 9:9

Mihingte in ‘Banghang ziam cile Egypt ngam panin a taanghpupite a pusua, a Pathian a nusiat uh hu hi. Pathian dangte tungah kinga a, a biak hu in Topa in hi tuasiatna amate tungah tungsak hi,’ ci in kizo tu hi,” ci hi.

2 Khangtaanghthu 7:22

Mipite in ‘A taanghpupite Egypt ngam pan a pusua pui Topa a Pathian a nusiat hang hi. Amate in pathian dangte pom in bia uh hi. Tuasia hangin Topa in hi tuasiatna teng amate tungah tungsak hi,’ ci in zo tu uh hi,” ci hi.

Jeremiah 13:22

Banghangin, hi thute theampo na tungah hong piang ziam — banghangin na puante hong kileamkeak sakin, hong kibuan a, hong kikhialpui ziam ci in na dongh le — na mawna a nasiat lei lawlawm hang ahi hi.

Jeremiah 2:8

Thiampite in, ‘Topa koisung om ziam?’ ci in zongh dongh ngawl uh hi. Keima ii thiampite mama in kei hong he ngawl uh hi. Ngam ukte in kei hong langpan uh a; kamsaangte in Baal min suangin thuson uh a, tuaciang bangma kimanna a nei ngawl milimte bia uh hi.

Jeremiah 22:9

Tuasia ciang na Pathian, keima taw na kiciamna uh nusia in pathian dangte bia in a na na sepsak uh hang hi, ci in amate in zo tu uh hi,” ci hi.

Jeremiah 44:3

banghang ziam cile tua khua mite in a sia vawtin ka thin hong uksak uh hi. Amate ahizong noma na hi uh zong, na taanghpupite ahizong ii biak ngeingawl pathian dangte tungah amate in biakpiakna pia in a na seam uh hi.

Jeremiah 8:2

A ngute khawmtua a, kiphumsak tu ci thada, lei ah eak vawk bangin pheang om tu hi. Tuate sia a it le a na a sepsak, thu a dok le a biak uh ahi ni, tha le aksite mai ah kipheangpha tu hi.

Jeremiah 9:14

Tua kawmkaal ah, a thin uh pui in a taanghpupite ii hil bangin Baal milimte bia uh hi.

Kaa late 5:7

Koma taanghpupite mawna hi a; ahihang tu in amate om nawn ngawl hi, amate mawna hu in kote in ngimna ka thuak uh hi.

Ezekiel 11:21

Ahihang a ninnoi, a kiihuai milimte a bia nuam mite daan ka pia tu hi. A sepnasa tungah amate daan ka pia tu hi,” hong ci hi. Vaanglianpipa Topa in son zo hi.

Amos 2:4

Topa in, “Judah mite maw kikik khial kikik ahiciang amate daan ka pia tatak tu hi. Amate in ka hilnate thusim ngawl a ka thupiakte zui ngawl uh hi. A taanghpupi ii biak a maan ngawl pathiante ma in amate lam pialsak hi.

Malachi 3:7

Note, na taanghpupi masate bangin ka thukhamte pan na puapial uh a, na zui bua uh hi. Kei kungah hong heak kik tavun, tua hile kei zongh no sang kong nga tu hi. Ahizong ‘Nang kung kong zot kik natu in bang ka sep uh kul tu ziam?’ ci in nong dongh uh hi.

1 Peter 4:3

A bosa hun sungah Pathian he ngawlte ii sep nop teng, a khomin seam zo nu hi. Na nuntakna uh sia, zummawk ngamtatna, sikvilna, zu khamna, uangtatna, zuneakna, a thasiathuai milim biaknate taw zangh zo nu hi.

Thukhente 2:11

Tua zawkciang Israel mite in Topa tungah mawna vawtin, Baal pathiante bia tu in hong kipan uh hi.