Jeremiah 15:10 - Syin Chin Bible

¹⁰ A lungdam ngawl pa sia keima ka hi hi! Banghangin ka nu in leitung ah kei hong hing ziam? Ngam sungah mihing theampo taw kihau in thu kinial tu ka hi thong hi. Sum ka pukthaak bua a sum ka pu bua hi; tua hi napi ngual theampo in kei hong haamsiat veve hi.

Jeremiah 15:10 Iomraidhean Croise

1 Kumpite 21:20

Ahab in Elijah a mu ciang, “Ka ngal pa awng, kei hong pha zo ngawngaw ni ziam?” ci hi. Elijah in “Hi hi, hong pha zo khi hi,” ci in zo hi. “Topa muna ah khialna hi teng na vawt natu in nangma le nangma kipumpiak ni hi.

1 Kumpite 22:8

Ahab in, “Khat om lai hi, Imlah ii tapa Micaiah hi. Ahihang ama ensan khi hi, banghang ziam cile ama in kei atu a pha bangma sonkhol ngeingawl hi; a pha ngawl khat veu hi tawntung hi,” ci in zo hi. Jehoshaphat in “Tuabangin ci heak in!” ci in zo kik hi.

Psalm Late 109:28

Amate in kei hong tomlaw thei tu ahihang nangma in thupha nong pia tu hi. Kei hong vawtsiate in lelna thuak tahen a, keima, na naseampa hong lungdamsak ta'n.

Psalm Late 15:5

Amate in a meet ngawl taw sum pukthaak hi, tuaciang a maw ngawlte langpanna tetti tu in sumnguk ne ngawl hi. A kuama po hi bang a, a ngamta sia in ngam muanna nei tawntung tu hi.

Psalm Late 69:4

Bangma thu om ngawl a, kei hong ensante sia ka lu a samzamte sangin tamzaw hi. Ka ngalte in kei langpanna leilot thu son hi; amate hat a, kei hong thatlum nuam hi. Ka nguk ngawl bul nate amate in hong pia kiksak hi.

Pusuana 22:25

“Keima ii mi ahi a zawng khat pawpo tungah sum na pukthaak uh le sum pukthaak pa bangin om heak vun a, summeet na la heak vun.

Paunakte 26:2

A thuak tu ma in na kilawm bua nale haamsiatna in bangma hong law zo ngawl tu hi. Tuate in leleang a, tawlngak hun a nei ngawl vacimte taw kibang hi.

Jeremiah 15:20

Hi mite taw na kizopna ah taau ciitak taw a kivawt khua uumna dal taw kong kibang sak tu hi. Amate in nang hong sim uh hangin hong zo buatu hi. Nang hong dal tu le hong keamcing tu in nang taw kong omkhawm tu hi.

Thiampite 25:36

Ama tung pan a meet la heak in a, ahihang Pathian thu ni in na Israel mipuipa na nai ah teangsak in.

Thiampite 25:37

Ama, sum na pukna tung pan summeet la heak in a, na anzuakte tung pan a meet la heak in.

Habakkuk 1:3

Tuabang ngimnate banghangin hong musak ni ziam? Tuabang tatkhialnate en in bangbangin thuak zo ni ziam? Siatna le ngongtatnate ka kiimkot ah om a, kihauna le kidona mun theampo ah om hi.

Matthew 24:9

“Tua zawkciang note hong kiman tu a, daan piak tu le thalup tu in hong ki aap tu hi. Keima hu in mihing theampo in note hong ngaimaw tu hi.

Matthew 5:44

Ahihang kei kong cina pan: na ngalte it vun a, hong vawtsiate atu thungetsak vun.

Luke 2:34

Simeon in amate thupha a piak zawkciangin, a nu Mary tungah hi bangin ci hi, “Hi patang sia Israel mite, tam mama ii a siatcip natu le, tam mama ii a kingup natu Pathian ii tealsa ahi hi. Ama sia mihing tam mama ii a langpan tu, Pathian ii lim lakna khat hi tu a,

Luke 6:22

“Mihing Tapa hangin ngual in hong ensan a, hong nial in hong lang in, misiate awng hong cile, a lungdamte na hi uh hi!

Sawltakte 28:22

Ahihang nangma ngaisut nate ka za nuam uh hi, banghang ziam cile, mun theampo ah mihingte in, na pawl puite a siatson tek sia ka he uh hi,” ci uh hi.