Jeremiah 10:10 - Syin Chin Bible

¹⁰ Ahihang Topa, nangma in Pathian tatak na hi a, a nungta Pathian le tawntung kumpipa na hi hi. Na thin uuk ciangin leitung liing a; minamte in na thin uukna thuak zo ngawl uh hi.

Jeremiah 10:10 Iomraidhean Croise

Pianciilna 21:33

Tuaciang Abraham in Beersheba ah makeang kung khat suan a, Tawntung Pathian, Topa bia hi.

1 Kumpite 18:39

Mipite in hisia a mu uh ciang amate le amate lei ah hong bok suk a, “Topa sia Pathian hi; Topa bekma Pathian hi!” ci in au uh hi

1 Kumpite 8:60

Tuabangin leitung minamte theampo in Topa ama bek Pathian hi a — a dang Pathian om ngawl hi ci in he tu uh hi.

1 Khangtaanghthu 29:11

Nangma sia a lian, a vaanglian, a minthang, a lamdang le a tuanngen na hi hi. Leitung vantung ah a om theampo nangma aa hi a, nangma kumpi na hi a, tuate theampo a ukpipa na hi hi.

2 Khangtaanghthu 15:3

Israel sia khuangei hialma Pathian maan nei ngawl a, a hil tu thiampite le thukham zongh nei ngawlin nungta uh hi.

Job 9:6

Pathian in zinliingsak a, lei ngawksak hi, ama in leitung a nang khuamte thiing hi.

Psalm Late 10:16

Topa in a tawntung a tawntungin kumpipa ahi hi; pathian dang a biate sia ama ii leitang tung panin mong tu hi.

Psalm Late 100:3

Topa sia Pathian hi ci in ciamtee vun. Ama in eite hong vawt a, eite in ama aa ih hi hi; eite sia ama ii mihingte ih hi a, ama tuuhonte ih hi hi.

Psalm Late 100:5

Topa pha hi; ama ii itna in bomaw a, ama thumaanna sia a tawntungin kikhomsuan hi.

Psalm Late 104:32

Ama in simlei en a, leitung a liing hi; ama in mualte tham a, tuate sung pan meikhu pusuak hi.

Psalm Late 114:7

Topa hong pai ciang, Jacob ii Pathian mai ah leitung awng, liing in;

Psalm Late 145:13

Na ukna kip tawntung a, nang sia a tawntungin kumpipa na hi hi. Topa in a kamciamnate tungah thumaan a, a ngamtatna sung theampo ah hesuak thei hi.

Psalm Late 146:6

ama sia vantung, leitung le tuipi, tua teng sung a om theampo a Bitphuapa ahi hi. Ama in a kamciamte kholet tawntung hi;

Psalm Late 18:7

Tuasia ciang leitung sia liingin ngawk hi; mualte ii tawdapte kilokin phe vadil hi, banghang ziam cile Pathian thin uuk hi.

Psalm Late 29:10

Topa in kumpi a hina taw tui thukte a tawntungin uk hi.

Psalm Late 31:5

Nong kepna sungah keima le keima kong ki aap hi. Topa awng, nong hun tu hi. Nang sia a thumaan Pathian na hi hi.

Psalm Late 42:2

Nang a nungta Pathian sia tui du bangin kong thangai hi; bang hun ciang nang omna munah hong pai in hong bia thei tu khi ziam?

Psalm Late 68:11

Topa in thupia a, numeite tam mama in tua thu son uh hi:

Psalm Late 68:8

Sinai Pathian ahi Israel te ii Pathian hong paina hangin, lei kiliing a, van in nguatui buaksuk hi.

Psalm Late 74:12

Ahihang Pathian awng, nang sia a kipat panin koma kumpipa na hi hi; nangma in kote tamvei ma nong hun zo hi.

Psalm Late 76:7

Ahihang Topa awng, nang sia a kuama theampo in hong kiita hi. Na thin uuk ciang na mai ah kuama ding zo ngawl hi.

Psalm Late 76:8

Vantung panin na thukhenna na kitelsak hi; leitung ah a kinengcip theampo hut natu,

Psalm Late 77:18

Na vanto sia a kipee in ngingkeak a, khualeng in leitung taangsak hi; leitung liingin ngawk hi.

Psalm Late 84:2

Tua munah bangza in om nuam khi ziam! Topa Biakinn sungah om tu ka thangai hi. Ka nuntakna buppi taw a nungta Pathian tungah lungdam in la ka sa hi.

Psalm Late 9:8

Ama in thutang taw leitung uk a; ama in minamte thukhaikim taw thukhen hi.

Psalm Late 90:11

Na thin uukna ii thahatna buppi akua in thuak ngei ziam? Na thinsona sia bangza lauhuai thei ci sia akua in he ziam?

Psalm Late 90:2

Mualte na bitphua ma, simlei na piansak ma in nangma in a om tawntung Pathian na hi a, a tawntungin Pathian na hi tu hi.

Psalm Late 93:2

Topa awng, na kumpi tokhum sia a kipat pan ma khotop a, hun kipat ma in nangma na omkhol zo hi.

Psalm Late 97:4

Ama ii khualeng in simlei taangsak hi; tuasia leitung in mu in liing hi.

Isaiah 37:17

Tu in Topa awng, hong ngai ta'n a, kote tungah hong piang thute hong en ta'n. A nungta Pathian ahi nang tungah Sennacherib papau in hong nunauna thute theampo ngai in.

Isaiah 37:4

Assyria kumpilianpa in a ulianbel pa sia a nungta Pathian nunau tu in paisak zo hi. Hi bang nunaunate Topa na Pathian in za tahen a, nunauna kampaute daan pia tahen. Tua ahiciang a nungta lai ih mite atu in Pathian tungah thungen vun,” ci hi.

Isaiah 40:15

Topa atu in minamte sia bangma hi ngawlin, tuimal khat bang zongh hi ngawl hi; a khuala na ah a om tuikulhte sia leivui bangin zaang hi.

Isaiah 40:28

He ngawl nu ziam? Za zo hi ngawl nu ziam? Topa sia tawntung Pathian ahi hi; ama in leitung theampo bitphua hi. Ama sia toi ngeingawl a, ngim ngeingawl hi. Ama ii ngaisutnate kuama in tel ngawl hi.

Isaiah 57:15

“Keima in a saang le a thiangtho, a tawntung a nungta Pathian ka hi hi. Keima in a saang le a thiangtho na munah ka teang hi, ahihang mite ii hong muanna le lametna a nga kik thei natu in mawna kisiik kik a, a kiniamkhiak vadeam mite taw zongh in ka teang khawm hi.

Isaiah 65:16

Tua ngam sungah a om thupha a ngen pawpo in Thumaan Pathian ii thupha a piak tu in ngen tu uh hi. Kiciamna a la pawpo in Thumaan Pathian min taw kiciam tu uh hi. A bosa hunsung a ngimnate bomang tu a kimangil tu hi,” ci hi.

Jeremiah 23:36

Tua ahikom amate in ‘Topa ii Vanhngit’ ci kammalte zangh nawn ngawl tu uh hi, banghang ziam cile khat pawpo in a zangh ahile, ka thupuak sia ama atu in vanhngit takpi khat ka suaksak tu hi. Mihingte in amate ii Pathian, a nungta Pathian, Vaanglianbelpa Topa ii kammalte lumlet uh hi.

Jeremiah 4:2

ka min suang a na kiciam tu uh sia no atu in a maan hi tu hi. Tuasia ciang minam theampo in amate thupha ka piak natu hong ngen tu uh a, kei hong pok tu uh hi,” ci hi.

Jeremiah 4:24

Mualliante ka en a — tuate liing hi, tuaciang mualnote kivei kawkoai hi.

Jeremiah 50:46

Babylon a bo ciang, awnging nasia tu ahikom leitung buppi liing tu hi. Patau in a auna awte minam dangte in za tu uh hi,” ci hi.

Jeremiah 51:29

Leitung sia lau in liing hi; banghang ziam cile Babylon ngam sia kuama ii ten ngawlna sennealngam suaksak tu a, Topa in a ngealna a taangtutsak hang ahi hi.

Daniel 4:3

“Pathian ii eite hong lak nalamdangte lian lawlawm hi! A vawt nalamdang laknate vaang nei lawlawm hi! Pathian sia a tawntungin kumpi hi a; ama in a tawntungin uk tu hi.

Daniel 4:34

Kumpipa in, “Kum sali a cin zawkciang van ka ento a, ka thin hong ciim kik hi. Lianbel Pathian ka pok a, a nungta tawntung pa khat tungah zatakna le minthanna ka pia hi. “Ama in a tawntungin uk tu a, a kumpi ngam sia kip tawntung tu hi.

Daniel 6:26

Ka kumpi ngamlian sung a om mihingte theampo in Daniel ii Pathian a kiitak natu le a zatak natu in thu ka pia hi. “Ama in a nungta Pathian hi a, a tawntungin uk tu hi. A ngam kisiasak ngeingawl tu a, a vaangletna bo ngeingawl tu hi.

Daniel 6:27

Ama in ngum in suatak a; vantung le leitung ah a lamdangte le nalamdang laknate vawt hi. Ama in Daniel sia tawpite thalup natu pan suatak hi.”

Daniel 7:14

Ngam theampo, minam theampo le paunam theampo pan mite in ama ii na a sep natu in ama sia thu neina, upatna le kumpi vaangletna kipia hi. A thuneina in a tawntungin kip tu a, a kumpi ngam bo ngeingawl tu hi.

Joel 2:11

Topa in a ngalkaphonpi tungah vanto aw taw thupia hi. A thuni ngalkap honte tam a, thahat hi. Topa ni sia bangza in lauhuai ziam! akua suakta zo tu ziam?

Micah 1:4

Tuasia ciang meikhuk khat ii sungah khuainun a tuithap bangin mualpite ama ii nuai ah tuitham tu hi; mualno khat tungah tui buaksuk bangin ngamkuamte sungah buaksuk tu hi.

Nahum 1:5

Topa mai ah mualpite liingin kektham a; ama mai ah mualnote tuitham hi. Topa a kilangh ciang leitung kilok a; leitung le a mite theampo liing hi.

Nahum 1:6

Ama a thin uuk ciang akua nungta zo lai tu ziam? A lauhuai mama a thinsona ah akua nungta zo nawn tu ziam? A thin uukna meikuang tha suk a; suangte tamhthamin ama ii mai ah leivui suak hi.

Habakkuk 3:10

Mualte in nang hong mu ciangin liing uh a, van panin tui hong buasuk hi. Leinuai a tuite hawk vabuat a, a tuihualte khangin saangto hi.

Habakkuk 3:6

Ama a tawlngak ciang, leitung kithing a; Ama ii a et ciang minamte liinglawng hi. A tawntungin a om mualte kektham a; taanghlai hunin, a va ngeina mualte, a kip tawntung mualte kiasuk hi.

Malachi 3:2

Ahihang ama ii hong pai ni ciang, akua peuma in thuak zo tu hi ziam? Ama hong kilangh ciang akua nungta zo tu ziam? Ama in a pha satpia le thik a thiangsak meikuang taw kibang hi.

Matthew 16:16

Simon Peter in zo a, “Nang sia Messiah, a nungta Pathian Tapa na hi hi,” ci hi.

Matthew 26:63

Ahihang Jesus a huthe bua hi. Khatvei ma Thiampi Lianbelpa in ama tungah, “A nungta Pathian min taw nang sia kiciamna hong vawtsak khi hi: Pathian Tapa Messiah na hi ziam, hong son ta'n,” ci hi.

John 17:3

Tuaciang in tawntung nuntakna ci sia in nangma bek Pathian a maan ahi sia heakna le na sawlpa Jesus Christ heakna ahi hi.

Sawltakte 14:15

“Banghangin hi bangin, ngamta thong nu ziam? Ko zongh mihing thawthong hi a, noma bangma hi lel khu hi! Ko sia hi sungah, Lungdamna Thupha thangsak tu, hi a man nei ngawl nate panin a nungta Pathian sangah hong kiheaksak tu ka hi uh hi. Tua Pathian in vantung, leitung, tuipi, le tuate sung a om theampo a vawtpa ahi hi.

Thuhil kikna 32:4

“Topa sia note hong dal a hatbelpa hi a, A sepzia theampo kicing in maan hi; Na Pathian thumaan in thutak a; Ama in a maan le a pha in seam hi.

Thuhil kikna 5:26

A nungta Pathian ii meikuang sung pan a paupuina a zaak zawkciang a nungta mihing om ngei na ziam?

1 Thessalonica te 1:9

Tua mihing theampo in kong haw uh lai a, nong saan zia uh, milim biakna pan Pathian sangah na kikhealna uhte son tek a, a maan le a nungta Pathian atu sepsak tu le,

1 Timothy 1:17

Ama bek Pathian ahi a thi thei ngawl, a kimu thei ngawl Tawntung Kumpipa tungah patoaina le minthanna a tawntung a tawntungin om tahen! Amen.

1 Timothy 6:17

Hi nuntakna sungah a kizangh nate hauna taw a kiphatsak ngawl natu, tuabang a kho ngawl haunate tungah lametna koi ngawlin, ih nopsak natu a, na theampo ngo takin hong pia Pathian tungah lametna koi vun ci in a haute tungah na hil in.

Hebrew te 10:31

A nungta Pathian khut sung ih taaksuk tu sia lauhuai mama hi!

Joshua 3:10

Maisang ah na manaw uh ciang ama in Canaan te, Hit te, Hiv te, Periz te, Girgash te, Amor te le Jebus te notkeak takpi tu hi.

1 John 5:20

A maan Pathian ih heak natu in Pathian Ta hong pai zo a, teltheina hong pia zo ahi hunlam ih he hi. Eite in a maan Pathian taw pumkhat hi in — ama Tapa Jesus Christ taw pumkhat in ih nungta hi. Hisia in a maan Pathian hi a, tawntung nuntakna ahi hi.

Thupualaakna 20:11

Tuaciangin a lian kumpi tokhum kaang khat le a tungah a to pa ka mu hi. Leitung le vantung sia ama omna panin tai uh a, mu mun om nawn ngawl hi.

Thukhente 5:4

Topa awng, Seir mualpite na nusiat ciang, Edom ngam panin nong pusua ciang, lei liingin van pan nguatui hong taak suk hi. Hi hi, meei sung panin tui hong bua hi.

1 Samuel 17:26

David in ama kung nai a omte munah, “Hi Philistine pa that zo a, Israel mite mindaina pan a suaktasak sia in bang nga tu ziam? A peuma in hi Pathian he ngawl Philistine pa sia akua ka hi ci a, a nungta Pathian ii ngalkaphonpi nalh ngam ziam?” ci in dongh hi.

1 Samuel 17:36

Tawpite le vompuite ka that zo a, a nungta Pathian ii ngalkap hon a nalh pa, Pathian he ngawl Philistine pa sia tuabang ma in vawt tu khi hi.