Hosea 8:8 - Syin Chin Bible

⁸ Israel ngam sia ngamdang khat pawpo taw kibang zo a, leibeal tamhtham sa khat bangin kimanna nei ngawl hi.

Hosea 8:8 Iomraidhean Croise

2 Kumpite 18:11

Assyria te ii kumpilianpa in Israel te thongtaak tu in paipui a, pawlkhat sia Halah khuapi sungah, pawlkhat Gozan ngamkhen sung Habor Ngun hui ah, pawlkhat sia Media te khuapite ah teangsak hi.

Isaiah 30:14

Zan niknek ahikom meikhuk sung pan meikam lua tham natu ahizong, tuikuang sung pan tui sua tham natu ahizong a bek lian zongh a om ngawl leibeal khat bangin nang hong kitamhthamsak tu hi” ci hi.

Jeremiah 22:28

Keima in, “Jehoiachin kumpipa sia kuama ii a dei ngawl, a kivawksa thambeal tamh khat bang suak zo ziam? Tua hu in ama le a tate sia amate heak ngeingawlna ngam ah saltaang tu in kipaipui ahi ziam?” ka ci hi.

Jeremiah 25:34

No lampuite awng, kap vun, ka mite a cing a keamte awng, a ngingin kap vun! Tau in leivui sungah liik vun. Note hong kithalup tu hun hong theng zo a, tuutalte bangin note hong kisem tu hi.

Jeremiah 48:38

Moab ngamsung innkhum theampo le taangpi khawlmun theampo ah khuangaina ci ngawl bangma dang om ngawl hi, banghang ziam cile kuama dei ngawl thambeal khat bangin Moab ka sutham zo hi.

Jeremiah 50:17

Topa in, “Israel mite sia tawpite in delmang a, a kithethaang tuute taw kibang uh hi. A masabel in amate sia Assyria kumpipa in sim a, tua zawkciang Babylon kumpipa Nebuchadnezzar in a ngu khimtham hi.

Jeremiah 51:34

Babylon kumpipa in, Jerusalem sia saattan in ne hi. Ama in thambeal khat bangin khuapi hawm suaksak a; ngulpui khat bangin ama in valh hi, ama in a dei teng la in a dang teng vawk hi.

Kaa late 2:16

Na ngalte theampo in hong selno in etsatna taw nang hong salh uh hi. Amate mukmen in “Khuapi lalthamsak zo hing! hisia ih ngalaakbel ni hi!” ci in selno uh hi.

Kaa late 2:2

Topa in Judah ngam khuano theampo hesuak ngawlin lalthamsak a, Ngam huukna kulhpite baltham hi. Ama in kumpi ngam le a ukte maizum pia hi.

Kaa late 2:5

Topa in ngal khat bangin Israel susia zo hi. Ama in a kulhte le kumpi innte a zaancip sa in nusia hi. Ama in Judah mite tungah a bo thei ngawl heena tungsak hi.

Kaa late 4:2

Zion ii tangvalnote sia khamh bangin ei atu in manpha hi, ahihang tu in leibeal thawthongte bangin kivawt hi.

Kaa late 5:2

Kote neisa sia khualmite khut sungah om a; ngamdangmite sia koma inn sungah teang uh hi.

Ezekiel 36:3

“Tua ahiciang kamsaanna son in a, Keima, Vaanglianpipa Topa ii ci teng taangko in. A ngampaamte in Israel mualte la in, a sutol ciang, amate theampo in Israel te nunau uh hi.

Thiampite 26:33

Ngal kong thengsak tu a, ngamdang ah kong thethaang tu hi. Na leitang kitaisan tu a, na khuapite lalcip in kinusia tu hi.

Romete 9:22

Pathian nasepna zongh tuasia bangma ahi hi. Ama in a thin uukna lak nuam a, a vaangletna kihesak nuam hi. Ama a thin a uuksak, lalcipna sung a theng tu mihingte thinsauna tatak taw thuak hi.

Thuhil kikna 28:25

“Topa in na ngalte in hong zosak tu hi. Note in mun khat pan na sim tu uh a, ahizong mun theampo ah na tai tu uh hi, note tungah thupiangte a mu uh ciang leitung mihingte theampo lau mama tu hi.

Thuhil kikna 28:64

“Topa in note sia leimong khat pan mong khat dong, minamte theampo sungah hong thethaang tu a, tualai ah noma le na taanghpupite ii biak ngeingawl pathiante, thing le suang taw a kivawt pathiante na, na seam tu uh hi.