Hosea 2:8 - Syin Chin Bible

⁸ Ama ii Baal biakna ah a zak ngunn le khamh theampo le olive thau, sapittui le antang a pia sia keima ka hi hunlam ama in kitelsak ngeingawl hi.

Hosea 2:8 Iomraidhean Croise

1 Khangtaanghthu 29:16

Oh Topa, kote Pathian awng, na min thiangtho patoai natu biakinn khat sak natu in, hi nei le lamh theampo kong paipui tek uh hi; ahihang tuate theampo sia nangma kung pan hong paite veu hi a, a vekpi in nangma aa ahi hi.

Job 19:8

Pathian in lampi khak zo a, ka paisuak thei bua hi; ama in khuazing sungah ka lampi seal zo hi.

Isaiah 1:3

Khuite in a topa he uh a, laate in a topa ii an piakna mun he hi. Ahihang ka mihing Israel te in tua za in he ngawl hi. Amate in tel vet ngawl uh hi,” ci hi.

Isaiah 46:6

Mihingte in a dangka ipte hongin khamhte suakeak hi; khaikhin taw ngunnte tee uh hi. Amate in pathian khat vawt tu in khamh seak khat cial hi; tuaciang amate kunin tuasia bia uh hi!

Jeremiah 7:18

Patangte in thing tomin, pasalte in meithut a, numeite in Vantung Kumpi nu a ci uh numeipathian atu in moh beang, moh em in om uh hi. Ka thin nat natu in, amate in pathian dangte tungah biakpiakna in sapittui buak si uh hi.

Ezekiel 23:41

Amate tokhum hoi khat tungah to in, a mai ah sabuai khat dim a koi naphate sungah ngimnamtui le olive thau ka piakte zongh koikhawm uh hi.

Daniel 3:1

Kumpipa Nebuchadnezzar in metre 27 a saang le metre 3 dektak a lian khamh milim khat vawt a, Babylon ngamkhen Dura zaangtam ah phut hi.

Daniel 5:23

Vantung Topa na langpan a, a Biakinn pan na laak haite kuangte nong paipui hi. Nangma, na uliante, na zite le na zinote in tua haite taw zu ne in, khamh, ngunn, taau, thik, thing le suang taw a kivawt khuamu thei ngawl, khua za thei ngawl a, bangma a he ngawl pathiante na pok uh hi. Ahitazong na thi tu le na nun tu hong khensat a, na sep na vawt theampo hong uk Pathian na upat bua uh hi.

Hosea 10:1

Israel mite sia a ngathiam sapitkung khat taw kibang hi. A ci thei vaial ciang biaknatau tam seseam vawt uh hi. A leitang panin a piang a tam seseam ciang a biak uh suangkhuam thiangthote zepna hoisak vaial uh hi.

Hosea 13:1

Hun bosa sungah Ephraim namte a pau ciang, Israel nam dangte lau a; amate in Ephraim thupi et hi. Ahihang tua mite Baal bia in mawna vawt ahi uh ciang hi sia hu in amate thi tu uh hi.

Hosea 13:2

Mihing ngaisutna le mihing khut taw a suai ngunn milimte — thik milimte a biak tu in a vawtna taw amate maw thua seseam uh hi. Tuasia zawk ciang amate in, “Tuate tungah sangaw biakpiakna pia vun!” ci hi. Bangbangin akua in tua milimte — khuital lim a, a kivawtte — namh thei tu ziam!

Hosea 4:11

Topa in, “Sapittui in, a lui ahizong, a thak ahizong, ka mite ii khua phawna laksak hi!

Hosea 8:4

“Ka mite in kumpite teal hi, ahihang amate uuk bang bek in teal uh hi. Amate in lampuite teal ahihang kei thukim puina om ngawl hi. Amate in a ngunn le a khamh la in milim in vawt a — amate lal natu ahi hi.

Habakkuk 1:16

Amate in a ngeente ngawngawn bia in tuate atu sangaw biakpiakna vawt hi, banghang ziam cile na theampo sung pan a pha belte tua ngeente in ngasak hi.

Luke 15:13

Ni tawmvei zawkciangin, a tapa nozaw sia in, ama ii neisa teng zuak siat a, inn nusia in a sum teng taw pusuak hi. Ngam khualana khat ah pai a, tua munah a sum teng zangh maai siat hi.

Romete 1:28

Pathian huvau heakna maante sia mihingte in khua ngaisut in nei nuam ngawl ahikom Pathian in amate ngamtat tuak ngawlte ngamtat theina ngaisutna sungah thazau hi.

Thuhil kikna 8:18

Na hau natu in vaangletna hong pia pa sia Topa na Pathian a hina thu phawk vun. Ama in hi bangin hong sep sia na taanghpupite taw a vawt thuciam tungah tuni dongin a thumaan laina hang ahi hi.

Thukhente 9:27

Amate sia a sapithuante sungah pai siat in sapitnga lo a, sapittui a vawt zawk uh ciang poai khaam uh hi. A pathian biakinn sungah amate tumin tua munah ne in dawn in om a, Abimelech simmawkna kam pau uh hi.