Hosea 11:6 - Syin Chin Bible

⁶ Ngal in a khuapite phialmang tu a, a kongpite sutham siat tu hi. A uuk thu in phabel a sak bang po in ngamta ahikom tuasia in ka mite susia hi.

Hosea 11:6 Iomraidhean Croise

Psalm Late 106:39

A ngamtatna uh taw amate le amate kininsak in Pathian tungah a thumaan bua uh hi.

Psalm Late 106:43

Tamvei ma Topa in a mite suatak ahihang, amate in Topa langpan tu teal zaw ahikom amate sia mawna sungah a thuk zaw in taaksuk uh hi.

Isaiah 18:5

Sapit ngate a kikaikhop ma, a paakte pul siat in a ngate a min ciang, sapitkung pan a baakte nam taw ol takin a kiheu bangin, ngalte in Ethiopia te susia tu hi.

Isaiah 27:10

A muanhuai khuapi sia lalcip in om hi. Ngamkol khat bangin kinusia hi. Ngan thana le ngan lup thei na mun suak hi.

Isaiah 30:1

Topa in: “Judah ngamukte a lal ahi hi, banghang ziam cile amate in kei hong langpan uh hi. Amate in kei ngealna ahi ngawlte zui in, kei deina langpanin thuciamnate vawt a, mawna khat zawkciang khat vawt thawthua uh hi.

Isaiah 9:14

Ni khat sungin Topa in Israel lampuite le a mihingte daan pia tu a; a lu le a mei saattan tu hi.

Jeremiah 5:17

Amate in na ankungte le na an uhte hong khawnsak tu uh a; na tapate le na tanute thatlum tu uh hi. Amate in na tuu le na khuihonte ngo tu uh a, na sapitkungte le na thei kungte susia tu uh hi. Na muan mama uh kulh taw a ki uum khuapite a ngalkapte in susia tu uh hi.

Jeremiah 50:35

Topa in, “Babylon ah thina theng hen! A mihingte, a ukte le a mipilte tungah thina theng hen.

Kaa late 2:9

Kongpite sia leivum suangvum sungah kivuknelh a, a zawlte a bebekin kivaat tham zo hi. Kumpipa le namliante tu in saltaang in om hi. Thukham kihil nawn ngawlin, kamsaangte in mu kholnate Topa ii tung pan nga ngawl hi.

Ezekiel 20:47

Thangsang taam ngam tungah Vaanglianpipa Topa ii ci teng a zaak tu in son in: En vun! Keima in kaanghmei khat kipansak khi hi, tuasia in na sungah a om a hing, a ko thingkung theampo kaanghtum tu hi. Bangma in tua kaanghmei sia sumit zo ngawl tu hi. Tua kaanghmei sia thangsang panin saksang dong kizel tu a, mihing theampo in meisa thuak tu uh hi.

Hosea 10:14

na mite tungah ngal hong theng tu a, na kulh theampo kisusia tu hi. Tua ni in Kumpi Shalman ii Betharbel khuapi ngal sungah a lalcipsak le, nute le a tate a kisuklup siat ni bang hi tu hi.

Hosea 10:6

Tua milim sia a kumpilianpa maivil natu in Assyria ah kipua tu hi. Tua ngaisut piakna bang a zui hu in Israel minpaan tu a, kimaizumsak tu hi.

Hosea 13:16

Kei hong langpan hu in Samaria sia daan kipia nanak tu hi. A mite ngal sungah thi tu uh hi; nausente sia lei denna in kinei tu a, naupaai nupite ngil kikui tham tu hi,” ci hi.

Hosea 4:16

Israel mite sia laate bangin thinpui hi. Bangbangin amate lopa hingna sungah tuuno bangin taasak thei tu khi ziam?

Hosea 4:17

Israel mite sia milimte ii ngau tawk hi. Amate lampi tek tawn lel tahen.

Thiampite 26:25

Ih thuciamna na palsat manin daan hong pia tu in no tungah ngalpi kong thengsak tu hi. Na ngammuan natu in khuapi sung na zuan zonghin a dam maw natnate kong tungsak tu a, na ngalte na lel hamtang uh kul tu hi.

Thiampite 26:31

na khuapite ka lalcipsak tu a, na biakna munte siasak in, na sangaw biakpiaknate kong saang buatu hi.

Thiampite 26:33

Ngal kong thengsak tu a, ngamdang ah kong thethaang tu hi. Na leitang kitaisan tu a, na khuapite lalcip in kinusia tu hi.

Amos 6:8

Vaanglianpipa Topa, Vaanglianbelpa in hi a ciliap huai kidopna tu thupia zo hi: “Israel mite ii kiphatsakna ka ngaimaw hi; amate ii inn nuam mamate ka kii hi. Amate khuapi le a sung a om theampo ngalte ka pia tu hi,” ci hi.

Micah 5:11

Na ngam sungah khuapite ka susia tu a, na kidalna theampo ka balkeak tu hi.

Malachi 4:1

Vaanglianbelpa Topa in, “A kiphasakte theampo le misiate theampo taangphaw bangin a kak tu ni hong theng tu hi. Tua ni in amate kaanghtum tu a, amate taw kisai bangma a taang nawn buatu hi.

Thuhil kikna 28:52

Amate in Topa na Pathian ii no hong piak tu ngamsung khua theampo sim tu a, na muan na suan luphung saangte cimhtham tu hi.

Thuhil kikna 32:25

Ngalpi hangin amate lam lai ah thi tu uh a; a bangkua uh sungah patauna tung tu hi. Tangvalno le ngaknuno te thi tu uh a; nausente le khanghaamte zongh kikhoaikhe ngawl tu hi.