Daniel 2:11 - Syin Chin Bible

¹¹ Kumpipa ii nong thu dokna sia haksa mama ahikom pathiante simngawl hong son thei tu kuama om ngawl hi, tuaciang amate sia mihingte sungah teang ngawl hi” ci in zo uh hi.

Daniel 2:11 Iomraidhean Croise

Pianciilna 41:39

Kumpipa in Joseph tungah, “Pathian in nang tungah hite theampo hong lak zo hi, tua ahikom nang saang a, a ciim zaw le thu thuk mu zaw kuama dang om ngawl ahi sia kilangh hi.

Pianciilna 41:8

A zingsang ciang ama thinngim ahikom mitbum thiamte le Egypt mipil miciim theampo samsak hi. Ama in amate tungah a mang teng son a, ahizong kuama in a mang khiaksak thei ngawl hi.

1 Kumpite 8:27

“Ahihang, Oh Pathian awng, nang leitung ah teang thei takpi tu ni ziam? Vantung theampo zongh nang hong huam tu in lian tham ngawl hi, tua ahikom hi Biakinnpi kei ii sak sia lian khom thong tu ziam?

2 Khangtaanghthu 6:18

“Ahihang, Oh Pathian awng, nang leitung mihingte sungah teang thei takpi tu ni ziam? Vantung theampo zongh nang hong huam tu in lian tham ngawl hi, tua ahikom hi Biakinnpi keima sak sia lian khom thei tu ziam?

Psalm Late 132:14

“Hi sia in a tawntungin, ka teen natu mun ahi hi; hi mun in ka uk nopna mun ahi hi.

Psalm Late 68:18

Ama in a saangna munte ah kaato a, a ngalmat sa tam mama tonpui hi; ama in a leedo mite tung panin letsong saang hi. Tua munah Topa Pathian teang tu hi.

Pusuana 29:45

Israel mite sungah ka teang tu a, amate ii Pathian ka hi tu hi.

Pusuana 8:19

tuaciang mitbum thiamte in kumpipa tungah, “Hi sia in Pathian nasepna hi zo hi!” ci uh hi. Ahizong kumpipa thinsakin, Topa ci bangma kumpipa in Moses le Aaron thu ngai ngawl hi.

Isaiah 47:12

Na no lai pek panin na zak na mitbum thiamna le na dei aite a vekpi in keamcing in. Tuate in nang hong hu thei tha tu hi; na ngalte na lauthawn thei tha tu hi.

Isaiah 57:15

“Keima in a saang le a thiangtho, a tawntung a nungta Pathian ka hi hi. Keima in a saang le a thiangtho na munah ka teang hi, ahihang mite ii hong muanna le lametna a nga kik thei natu in mawna kisiik kik a, a kiniamkhiak vadeam mite taw zongh in ka teang khawm hi.

Isaiah 8:18

Topa ii hong piaksa tate taw hi munah ka om hi. A kumpi tokhum Zion mual tungah a om, Vaanglianbelpa Topa in, Israel mite kungah a nungta thupuakte bangin eite hong puak hi.

Daniel 4:4

“Keima in kumpi inn sungah ka teang hiithiat a, nuamsa mama in ka om hi.

Daniel 5:11

Na ngam sungah a thiangtho pathiante ii thaa a nei mihing khat om hi. Na pa kumpi ahi lai in, hi sia pa in, pathiante ii ciimna taw kibangin ciimna, heakna le ngaisut thiamna nei hi. Tuaciang na pa, Nebuchadnezzar kumpipa in ama sia aisaan theite, mitbum thiamte, bumtoai aitoaite le aksi enthiamte a ukpi tu in koi hi.

Mi Simna 35:34

Na teenna ngam le lei ninsak heak vun, banghang ziam cile Keima in Topa ka hi a, Israel mite sungah ka teang hi,” ci hi.

Matthew 19:26

Jesus in amate tangtan in en a, “Mihing atu in suak thei ngawl ahihang Pathian atu na khat pawpo suak thei hi,” ci hi.

John 1:14

Kammal in mihing hong suak a, thuthiamna le thumaan thutak taw kidimin, ei sungah hong teang hi. Eite in ama ii vaangletna, Pa ii Tapa khat bek a hina taw a saan vaangletna ih mu zo hi.

John 14:17

Ama in Pathian ii thumaan thutak hong pualaak Thaa ahi hi. Leitung in ama saang thei ngawl hi, banghang ziam cile ama mu thei ngawl a, he ngawl hi. Ahihang no in ama na he uh hi, banghang ziam cile ama note taw omkhawm in, note sungah hong om hi.

John 14:23

Jesus in, “A kuama po kei hong it sia in ka hilcianna a zui tu hi. Ka Pa in tua pa it tu a, ka Pa le keima in ama kungah pai in, ama taw ka teang tu uh hi.

2 Corinth te 6:16

Pathian ii biakinn sia doai biakna milimte taw bangbangin thukimna vawt thei tu ziam? Banghang ziam cile eite sia a nungta Pathian biakinn ih hi hi! Pathian in: “Ka mite sungah ka inn ka vawt tu a, amate sungah ka teang tu hi; keima in amate Pathian ka hi tu a, amate in keima mihingte ahi tu uh hi,” ci hi.

Thupualaakna 21:3

Kumpi tokhum pan a ngingin a pau khat ka za hi: “Tu in Pathian omna inn sia mihingte taw omkhawm zo hi! Ama in amate taw teang khawm tu a, ama mihingte a hi tu hi. Pathian mama in amate taw omkhawm tu a, ama in amate ii Pathian ahi tu hi.