1 Samuel 7:3 - Syin Chin Bible

³ Samuel in Israel mite munah, “Na thinsung theampo taw Topa sangah na kihei tu uh le, ngamdang pathiante le Astarte numeipathian ii limte na vawk siat uh kul tu hi. Topa tungah noma le noma kipum aapna nei vun a, ama bek bia vun, tuaciang ama in Philistine te khut sung pan hong suatak tu hi,” ci hi.

1 Samuel 7:3 Iomraidhean Croise

Pianciilna 35:2

Tua ahiciang Jacob in a innkuan puite le a ompui teng tungah, “Ngamdang pathian milim na nei te vawk vun a; noma le noma kithiansua in, puanthiang silh vun.

1 Kumpite 11:33

Hi bangin seam tu khi hi, banghang ziam cile Solomon in kei hong nial in ngamdang pathiante: Sidon te ii numeipathian Astarte;, Moab te ii pathian Chemosh; Ammon te ii pathian Molech te bia hi. Solomon in ka thu hong ni ngawl hi; ama in khialna vawt zo hi, a pa David ii a zui bangin ka thukhamte le ka thupiakte zui ngawl hi.

1 Kumpite 8:48

Tua ngam ah amate in thin tak le thu maan takin kisiik a, ka taanghpupite tungah na piak sa, hi ngam, na tealsa hi khuapi le nang atu ka sak hi Biakinnpi sia maingat in thu hong ngen le,

2 Kumpite 17:39

Keima Topa, na Pathian ii thu nong ni tu uh a, tuasia ciang, na ngalte kung pan kong suatak tu hi,” ci in thupia hi,

2 Kumpite 23:15

Josiah in Israel te mawna sungah a lampui Nebat ii tapa Kumpipa Jeroboam ii saksa Bethel a om biakpiakna mun sia zongh baltham hi. Josiah in biaknatau kaivawk a, a suangte a bekin sutham in leivui suak tu in seakcip hi; ama in Asherah ii lim zongh haltum hi.

1 Khangtaanghthu 22:19

Tu in na thinsung theampo le na thaa theampo taw Topa na Pathian na seam in. Topa Thuciamna Thingkuang le ama biakna ah a kizangh vanh thiangtho dangte theampo a sungah na koi thei natu in tua Biakinnpi sak kipan in,” ci hi.

1 Khangtaanghthu 28:9

Tua ciang Solomon tungah ama in, “Ka tapa awng, na pa ii Pathian sia thusim in a, lungkaa ngawlin uuk tatakna taw ama na seam in. Ama in ih thinsung tawngh le ih ngaisutna theampo he siat hi. Ama kung na zuan le ama in nang hong saang tu a; na taisan le a tawntungin nang hong nungngat tu hi.

2 Khangtaanghthu 19:3

Tuabang ahitazong nang sungah phatna pawlkhat om veve hi. Nangma in mite biak Asherah numeipathian milim teng na vawk siat a, Pathian ii deina zui tu na hanciam hi,” ci hi.

2 Khangtaanghthu 20:33

ahihang doai sepna munte susia ngawl hi. Mipite in a taanghpupite ii Pathian biakna sang ah thintak lungtak taw kiheak ngawl lai uh hi.

2 Khangtaanghthu 30:19

“Ka taanghpupite ii Pathian, Topa awng, a zeksa om bangin thiang ngawl ahitazong a thinsung theampo taw nang hong bia amate tungah na thin phatna taw maisak in,” ci hi.

Paunakte 16:1

Eite in tupna sawmna vawt ka leang Pathian ii deina bang bekin taangtung hi.

Isaiah 55:7

Mi seksolte in amate ii nuntakna zia nusia tahen a, a ngaisutna zia kheal tahen. Topa ih Pathian kungah amate in zuan tahen; Topa in hong hesuak thei a, mawna hong maisak papai hi.

Jeremiah 24:7

Keima Topa ka hi hunlam heak nopna thin ka pia tu hi. Tuasia ciang amate sia ka mite hi tu a, keima in a Pathian ka hi tu hi, banghang ziam cile amate in a thin theampo taw ka kung hong zuan kik tu uh hi.

Jeremiah 36:3

Judah mite in amate susia tu a ka sawmna thute theampo a zaak uh ciang, a tatsiatnate panin kikheal tha tu uh hi. Tuasia ciang a seksolna le a maw a khialnate ka maisak tu hi,” hong ci hi.

Jeremiah 4:1

Topa in, “Irsael mite awng, na kiheak nuam uh le, kei kungah hong heak kik tavun. Ka tungah nong thumaan a, ka ngaimawk milimte na vawk uh le,

Ezekiel 14:6

“Tua ahikom tu in, kei Vaanglianpipa Topa ii Israel te tungah ka ci teng son in: Hong heak kik tavun a, a kiihuai milimte nusia vun.

Ezekiel 18:31

A sia a kha na vawt uh theampo kheal vun a, thinthak lungthak na nei tavun. No Israel mite banghang thi nuam nu ziam?

Hosea 14:1

Israel mite awng, Topa na Pathian kungah heak kik vun. Noma mawna in hong lutusak a, hong puksak hi.

Matthew 15:8

‘Hi mite in a kammal uh taw kei zatakna hong pia hi; ahihang a thinsung sia kei taw kikhuala hi,’ Pathian in ci hi.

Matthew 4:10

Tuasia ciang Jesus in, “Satan awng, tai in! Laithiangtho in, ‘Na Topa Pathian bek bia vun a, Ama atu bek sepsak vun!’ ci hi,” a ci hi.

Matthew 6:24

“Kuama in to nii ii sal hi thei ngawl hi. Ama in khat ensan tu a, khat it tu hi; khat ii tungah thumaan tu a khat puavawk tu hi. Pathian le sum ii sal na seam khawm thei buatu hi.

Luke 4:8

Jesus in “Laithiangtho in na Topa Pathian bek na bia tu a, ama atu bekma na seam tu hi ci hi!” ci in zo kik hi.

John 4:24

Pathian sia Thaa hi a, a Thaa ii vaangletna bekma taw mihingte in ama sia ahi bang tatakin bia thei hi,” ci hi.

Thuhil kikna 10:20

Topa na Pathian ii thu ni in ama bek bia vun. Ama tungah thumaan in ama min bek suangin na kamciamna te vawt vun.

Thuhil kikna 13:4

Topa zui in zatak vawt vun; a thu ni in a thupiakte zui vun. Ama bia in, a tungah thumaan vun.

Thuhil kikna 4:29

Tualai ah Topa na Pathian na zong tu uh a, na thinsung theampo taw na zong uh le na mu tu uh hi.

Thuhil kikna 6:13

Topa na Pathian zatak vawtin ama bek bia tavun a, ama min taw bekin kamciamnate vawt tavun.

Joshua 13:31

Bashan kumpipa Og ii kumpi ngamsung khuapi thupibel te Astaroth le Edrei, le Gilead ngam khenlang zongh tua ii sungah kihel hi. Hite theampo sia Manasseh tapa Machir ii suan innkuan te ii lang atu a kipia ahi hi.

Joshua 24:14

“Tua ahiciang, tu in, Topa zatak vawt vun a, thintak le thumaanna taw a na seam vun,” ci in Joshua in a thu son zom a, “Mesopotamia le Egypt a na taanghpupite ii biak pathiante vawk vun, Topa atu bek seam vun.

Joshua 24:23

“Tua ahiciang ngamdangte pathian na kep uhte vawk vun, tuaciang Topa Israel te ii Pathian tungah na thumaanna kamkho pia vun,” ci in ngen hi.

Thukhente 10:16

Tua ahikom amate in ngamdang pathiante vawkin, Topa bia uh hi; tuasia ciang ama sia Israel te ii ngim ngana tungtaang ah a thinnuam ngawl hi.

Thukhente 10:6

Khatvei ma Israel te in Baal te, Astarte te, Syria te, Sidon te, Moab te, Ammon te le Philistia te ii pathiante zongh a biakna uh taw Topa tungah maw uh hi. Amate in Topa nusia uh a, ama a biak uh tawp hi.

Thukhente 2:11

Tua zawkciang Israel mite in Topa tungah mawna vawtin, Baal pathiante bia tu in hong kipan uh hi.

Thukhente 2:13

Topa a biak uh nusia in, Baal le Astarte te bia uh hi.

1 Samuel 31:10

Tua zawkciang amate in Saul ii ngalhiamte a Astarte numeipathian biakinn sungah koi in, a luang sia Beth Shan khuapi luphung tungah kilh uh hi.