Sereńko 69:13 - সান্তালী বাইবেল

¹³ Menkhan E Probhu Isor, amakʼ daya tinre ńamokʼkan tahẽkana unrege iń do am ṭheniń koejoṅkan tahẽkana; E Isor, amakʼ asambheṛ dulạṛte amakʼ babańcao reakʼ pạtiạrtetʼ ńelte roṛ ruạṛạńme.

Sereńko 69:13 Iomraidhean Croise

Genesis 24:27

“Bhạgạngeae Probhu Isor do, one okoe doe ińren kisạ̃ṛ Abrahamren Isor kan! Uni do ińren kisạ̃ṛe emade tahẽkan katha ar pạtiạrtetʼ udug do bae hiṛiń akada. Unige horkoe udukʼ ạguạdińa ar iń kisạ̃ṛren boehawakʼ oṛakʼteń hecʼakana.”

Ester 5:2

Uni do Ester rạni raj dorbarre teṅgo akane ńelkede khan kusite acʼakʼ ti reakʼ sona ṭheṅgae ạwiladea. Unre Ester doe sen sorente ona ṭheṅga reakʼ agaltetʼe joṭetʼkeda.

Ester 5:6

Darkha rasa ńuńu tulucʼ raj do Estere kulikedea, “Am do cetʼem khojkana? Am okam khoj onagem emocokʼa. Amakʼ nehõr joṅakʼ lạiyạńme? Rajakʼ adha kanrehõ enhõ onam emocokʼa.”

Ester 7:2

Unkin do tinre darkha rasakin ńuńukan tahẽkana unre raj do arhõe kuliyana, “Ester rạni, am do cetʼem khojkana? Am okam khoj onagem emocokʼa. Amakʼ nehõr joṅakʼ do cetʼ tam? Adha rajosṭim khoj khan ona hõm ńama.”

Sereńko 32:6

Ona iạte tinạkʼ din ạt menakʼ unạkʼ din amko botoramkan hoṛ do am ṭhenko koejoṅ ma; sạrige, muhin do banbạsi dakʼleka tinre hijukʼa unre ona do onko baṅ paṛao akoa.

Sereńko 51:1

E Isor, amakʼ asambheṛ dulạṛ iạte ińre dayakʼme; amakʼ asambheṛ mãyãte ińakʼ sanam dusṭạmiko ikạ kạtińme.

Sereńko 91:15

Uniye hohowạńreń ańjomtaea; ar muhinre uni sãoteń tahena; uni doń rukhiyạyea ariń manotea.

Sereńko 98:3

Israel jạtrenko lạgitʼ acʼakʼ asambheṛ dulạṛ ar pạtiạr reakʼ katha uni doe disạ dohoakada; ar aboren Isorakʼ bańcao reakʼ kạmi do goṭa dhạrtiren hoṛko ńelakada.

Jesaea 49:8

Probhu Isor do nonkae meneda, “Bạsutakʼ okterege amiń roṛ ruạṛama ar bańcaokʼ reakʼ dinre amiń goṛowama. Iń do amiń rukhiyạmea ar am hotete hoṛko lạgitʼ mitʼṭecʼ bondobosiń dohoya, jemon disạmem teṅgo ruạṛ daṛeakʼ ar ujạṛakʼ jaegakore hoṛko arhõm ạidạri daṛeako.

Jesaea 55:6

Probhu Isor do sorreye tahenrege uni secʼ ruạṛokʼpe; ar sorreye tahenrege uni ńam baṛayepe.

Rak̕joṅ 3:63

Ńelme, onkoakʼ sanam kạmiko talate sereńate ińko landa-dhutʼạń kana.

Mikạ 7:20

Ḍher din lahare am do aleren hapṛamko ṭhen cetʼlekam gokʼletʼ onkage Abraham ar Jakob bõsrenko ṭhen pạtiạranicʼ baṛe tahenme ar amakʼ asambheṛ dulạṛ baṛe sodorme.

Luk 1:72

Uni do aboren hapṛamko mãyãwako lạgitʼ acʼakʼ sonot bondobos, metakʼme acʼakʼ gokʼakʼ purạu lạgitʼ, aboe rukhiyạ akatʼ bona.

Luk 22:44

Ar Jisu do ala jhalareye paṛaoente arhõ jidkateye koekeda. Uniyakʼ hoṛmo reakʼ balbal dakʼ do mãyãm leka otre ṭhopʼ ṭhopʼ jorokʼ ehopʼena.

2 Korinthiko 6:2

Isor do sonot sostorreye menakada, “Batar jokhecʼ iń do amakʼ kathań ańjomketʼtama ar kại khon bańcaokʼ reakʼ dinreń goṛo akatʼmea.” Ńelpe, oktetetʼ do ńitokʼkangea, ar teheńge bańcao ńam reakʼ din kana.

Ibriko 5:7

Okoe gocʼko khone rukhiyạ daṛeae uni Isor ṭhen Jisu do noa dhạrtire tahen jokhecʼ ãṭ aṛaṅte rakʼateye nehõrade tahẽkana are koeleda. Ar bhokti sãote batao tahẽkantaete Isor do uniyakʼ koejoṅe ańjomletʼtaea.

1 Patras 2:23

Hoṛko tinre uniko henostawadea unre uni do onko bae henostawatʼkoa, ar duk jom jokhecʼ hala ruạṛako lạgitʼ botor hõ bae udukʼatʼkoa, bickom acʼ do dhorom bicạricʼ ṭhengeye jimạyena.

1 Samuel 25:8

Uni do acʼren gutikoe kulileko khange ona katha doe baḍae daṛeakʼa. Onate ińren noko juạn koṛako jemone dayawako, ente onko do uniyakʼ rạskạkʼ reakʼ dinre uni ṭhenko hecʼakana. Ona iạte daṛeakʼ bhor jemon uniren noko guti ar uniren hopon Dạud cetanre baṛeye dayakʼma.”