Rak̕joṅ 2:9 - সান্তালী বাইবেল

⁹ Ona reakʼ phaṭok duạrko do otre danaṅ akana; huṛkạṛko doe rạputʼ giḍiakada. Uniren raj ar mukhiyạko do jạt jạtrenko talareko bondi ocoakana; ạn-ạri mente cetʼge bạnukʼa; uniren nạbiko do Probhu Isor ṭhen khon dorson do bako ńameda.

Rak̕joṅ 2:9 Iomraidhean Croise

2 Rapajko 25:7

Lạṛhại phạdko do Sedekiạ samaṅrege uniren hoponko gocʼketʼkoa. Ona tayom onko do uniyakʼ mẽtʼko hoṭor totʼketʼtaea ar pitạl reakʼ sikṛite tolkate Babelteko idikedea.

2 Bõsbudạ 15:3

Israelko do ḍher din hạbicʼ sạri Isor chaḍa, naeke chaḍa ar ạn-ạriko chaḍageko calakʼkan tahẽkana.

Nehemiạ 1:3

Onko doko lạiyadińa, “Bondi dosa khon okoe do disạmteko ruạṛ senakan onko do maraṅ harkhet ar henostare menakʼkoa. Jerusalem reakʼ pạcri do rạputʼ akana ar ona reakʼ phaṭok duạrko hõ seṅgelteko jeretʼ akawada.”

Sereńko 74:9

Abo iạte jãhãn hahaṛa kạmi hoyokʼkan nonka do ar babon ńeleda; jãhãn nạbiko hõ ar bạnukʼkoa; nonka baṅ ar tinạkʼ din calakʼ ona do aboren okoe hõ bako baḍaea.

Jesaea 24:12

Nagraha do dhaṅdhaser ḍạṅ leka hoyokʼa ar phaṭok duạrko do kuṭạm lạnduṛ ocokʼa.

Jirimiạ 14:14

Unre Probhu Isor do ińe metadińạ, “Nạbiko do iń ńutumte eṛe kathako roṛakada. Onko do bạń kol akatʼkoa, ar bạń hukum akatʼkoa se onko ṭhen jãhãn kathage bạń roṛakada. Ape ṭhen onko do eṛe dorson, okaj sạgun ar akoakʼ monre benaoakʼ eṛe kathako roṛetʼkana.

Jirimiạ 23:16

Phạdkoren Probhu Isore meneda, “Nạbiko okaṭakʼ kathako menetʼkan ona do alope ańjoma; onko do apeakʼ monre eṛe asko janam ocoyeda. Ar Probhu Isorakʼ moca khon ańjomakʼ katha do bako roṛeda bickom akoakʼ benaoakʼ dorson reakʼ kathageko roṛetʼkana.

Jirimiạ 39:2

Sedekiạ rajakʼ rajokʼ gelmitʼ bochor ponakʼ cando reakʼ areakʼ dinre nagraha pạcri reakʼ mitʼ jaegare bhugạkʼ hoyena .

Jirimiạ 39:8

Babelrenko do rajakʼ oṛakʼre ar hoṛkoakʼ oṛakʼkore seṅgelko jeretʼada ar Jerusalem reakʼ pạcriko rạputʼkeda.

Jirimiạ 51:30

Babelren birbanṭako do lạṛhạiko thirakana; onko do akoakʼ gaṛrege menakʼkoa. Onkoakʼ daṛe do ńurentakoa; ar maejiuko lekako nijor akana. Onkoakʼ tahen ṭhạ̃i do seṅgelteko jeretʼ akatʼtakoa; Babel reakʼ sanam phaṭok duạr reakʼ huṛkạṛko do rạputʼ ocoakana.

Jirimiạ 52:14

Rajren rurukhiyạ dolren subedar tabere Babelren sanam lạṛhại phạdko do Jerusalem reakʼ pạcri bhitko rạputʼkeda.

Rak̕joṅ 1:3

Kosṭo ar kajak khaṭaokʼ tayom Jihudạ do sạṅgińteye bondi idi ocoakana. Uni do eṭakʼ jạtrenko talareye girobasokʼ kana; ar okarehõ jirạu do bae ńam akada. Okoe uniko khudạulede onko do uniyakʼ dạrun dukko talatege uniko sapʼ tiyokʼ akadea.

Rak̕joṅ 4:15

Hoṛko do hohoateko metakokan tahẽkana, “Ocogokʼpe, ape dope bhonḍgea. Ocogokʼpe, men ocokʼpe, alope joṭetʼlea. ” Onko do uḍạcal hoṛ lekako ạcur baṛaekan tahẽkana; boṅgan hoṛ jạtrenko doko menetʼ tahẽkana, “Abo talare upriạ do bako tahẽ daṛeakʼa. ”

Rak̕joṅ 4:20

Aboakʼ mũ reakʼ sahẽtʼ Probhuren ojokʼicʼ do, onkoakʼ khạnreye sapʼ ocolena; menkhan abo dobon hudisokʼkan tahẽkana uniyakʼ umulre jạt jạtrenko talare bon girobasokʼa.

Jeheskel 12:13

Iń do uni lạgitʼ jhạliń oḍaoa ar uni do ińakʼ pạsireye sabokʼa. Ar uni do Babelrenkoakʼ disạmteń idiyea, menkhan ona do bae ńela; uni do onḍegeye gujukʼa.

Jeheskel 17:20

Iń do uni lạgitʼ jhạliń oḍaoa ar uni do ińakʼ pạsireye sabokʼa. Ar ińreye bepạtiạr akante uni do Babelteń idiyea ar onḍegeń sạjạiyea.

Jeheskel 7:26

Muhin cetan muhin hijukʼa, unạn cetan unạn ańjomokʼa. Onko do nạbiko ṭhen khon dorson reakʼ katha ańjom lạgitʼko kurumuṭuiya; naekekoakʼ ạn-ạri reakʼ cecetʼakʼ ar murubbikoakʼ sopolha do baṅ tahena.

Hosea 11:6

Onkoakʼ nagrahakore botorge lạṛhại hoyokʼa; onate onkoakʼ phaṭok duạrko reakʼ huṛkạṛko do rạpudokʼtakoa ar onkoakʼ goṭawakʼ iạte onko doko marao utạrokʼa.

Hosea 3:4

Ṭhik nonkage Israelko do ḍher din hạbicʼ rapajko, mukhiyạko, samaṅokʼakʼ porobko, pujạ reakʼ dhiriko, ephod ar boṅgako chaḍageko tahena.

Amos 1:5

Iń do Damesek reakʼ huṛkạṛ koń rạputʼ giḍikakʼa; ar Awen reakʼ lodamre hoṛko ar Beth-Edenre okoeṭakʼ hoṛ do raj ṭheṅgae sapʼakatʼ uni doń marao giḍikaea. Ar Aramren hoṛ do bondikate Kirteko idi ocokʼa.”

Dosar Biboron 28:36

“Ar okoeṭakʼ rajpe bahale Probhu Isor do uni ar ape bondikate idipe lạgitʼ nonkan mitʼ jạtrenko ṭhene jimạpea okoe do bape oromakatʼko ar aperen hapṛamko hõ bako baḍae akatʼko. Onḍe ape do kaṭ ar dhiriren deb-murtikope sewawakoa.

Dosar Biboron 28:63

Ar okaṭakʼ rạskạte Probhu Isore bhạlại akatʼpe ar aperen hoṛkoakʼ lekhae saṅge ocoakatʼtape ona reakʼ rạskạtege uni doe marao caba utạrpea. Ar okaṭakʼ disạmpe dokhol lạgidokʼkan ona disạm khon rehetʼ sudhạpe totʼ giḍi ocokʼa.

1 Samuel 28:6

Ar cetʼe cekaea mente Probhu Isor ṭhene kuliyana, menkhan Probhu Isor do kukmũte hõ baṅ, Urim ar Thumimte hõ baṅ se nạbiko hotete hõ bae roṛ ruạṛadea.