Numeri 14:14 - সান্তালী বাইবেল

¹⁴ Unre Misorrenko do ona katha niạ disạmren hoṛko lạiyakoa. Ar E Probhu Isor, niạ disạmren hoṛko ańjomakada, am do Israelrenko sãotem tahenkana, ar E Probhu Isor, am do samna sạmnim sodorakana. Onkoko ańjom akada, amakʼ rimil khunṭi do onko cetanre menakʼa ar siń do rimil khunṭire ar ńindạ do seṅgel khunṭire onko laha lahatem calakʼkana.

Numeri 14:14 Iomraidhean Croise

Genesis 32:30

Unre Jakob do ona jaega reakʼ ńutum Penuele dohokeda (metakʼme “Isorakʼ mẽtʼãhã”). Uniye menkeda, “Iń do samna sạmni Isoriń ńelkedere hõ jiwetʼge minạńa.”

Nehemiạ 9:12

Siń do rimil reakʼ khunṭite ar ńindạ do seṅgel reakʼ khunṭitem ạyurletʼkoa.

Sereńko 105:39

Onko aḍko lạgitʼ uni do acʼakʼ rimile doholeda, ar ńindạ marsal emokʼ lạgitʼ seṅgele emena.

Sereńko 78:14

Siń do rimilte ar ńindạ do seṅgel reakʼ marsalte onko do hore udukʼ idiyakokan tahẽkana.

Exodus 15:14

Ona katha ańjomkate eṭakʼ jạtrenko do botorteko thar tharaokʼa, ar Philisṭiko do monreko dhak dhakaokʼa.

Exodus 33:11

Manwa cetʼleka gate sãote samna sạmni kathako roṛ ṭhik onkage Probhu Isor hõ Mose tulucʼe galmaraoetʼ tahẽkana. Ar noa tayom Mose do Israelkoakʼ ḍerateye ruạṛ senokʼkan tahẽkana menkhan Nunren hopon Josuạ do ńapamokʼ tạmbu khon bae oḍokokʼkan tahẽkana. Ente Josuạ ńutuman nui juạn koṛa do Moseren gokʼṛoyicʼe tahẽkana.

Exodus 33:16

Ale sãote bam senlen khan cekatele baḍaea, amakʼ daya do iń ar amren hoṛko cetanre menakʼa mente? Iń ar amren hoṛko dhạrtiren eṭakʼ hoṛko khonle begarge ona do cekatele bujhạu daṛekea?”

Exodus 40:38

Probhu Isorakʼ noa rimil do Israelkoakʼ goṭa daṛan horre sińre do onkoakʼ mẽtʼ samaṅre sekʼwa tạmbu cetanre ar ńindạ do onare seṅgel tahenkan tahẽkana.

Numeri 10:34

Ḍera khonko uṭhạukʼre Probhu Isorakʼ rimil do siń bhor Israelko cetanre tahenkan tahẽkana.

Numeri 12:8

Iń do uni tulucʼ samna sạmni kathań roṛeda, jãhãn kukmũ talate do baṅ. Probhu Isor oka lekae ńel ocokʼ uni do onkae ńeleńkana. Inạ tayom hõ ińren golam Mose upạrte katha roroṛ do baben botorlena?”

Johan 1:18

Isor do okoe hõ tisge bako ńelakadea. Ar acʼ sãote menae uni sadher Hopon, one okoe do acʼtetʼgeye Isorkan, unige uni doe sodor akadea.

Johan 14:9

Jisu do uniye metadea, “E Philip, nunạkʼ din ape tulucʼ minạńa, enrehõ cetʼ bape baḍae akadińạ? Okoe ińe ńelakadiń uni do Baba hõe ńelakadea. Am do cekatem meneda, ‘Baba baṛe udukʼaleme?’

1 Korinthiko 13:12

Abo do ńitokʼ ạrsire pusṭạute babo ńeleda, menkhan unre samna sạmni bon ńel ńama. Iń do ńitokʼ okań baḍaekan ona do purạute bạń baḍaea, menkhan Isor do cetʼleka purạteye baḍaeyediń kan, unre onkage purạteń baḍaea.

Dosar Biboron 1:19

“Inạ tayom aboren Probhu Isorakʼ hukumte abo do Horeb buru bạgikate Amorikoakʼ buru ṭoṭha secʼ bon mohnḍa idiyena. Tinạkʼ maraṅ ar tinạkʼ botoranakʼ hahaṅkar talatebon calaolen ona dope ńelakada. Nonkate abo do Kadesre senkate bon seṭerena.

Dosar Biboron 34:10

Teheń hạbicʼ Israelko talare Mose lekan ar cele nạbiyakʼ janam hõ baṅ hoyakana one uni tulucʼ Probhu Isor do gate leka samna sạmniye galmaraoetʼ tahẽkan.

Dosar Biboron 5:24

Unre ape dope menleda, ‘aboren Probhu Isor do acʼakʼ ṭhonok ar daṛeye ńel ocoketʼbona ar seṅgel tala khon uniyakʼ aṛaṅle ańjomakada. Teheń ale dole bujhạu daṛeakʼkana, Isor jãhãe ṭhen kathae roṛle khan hõ uni do jiwetʼe tahẽdaṛeakʼa mente.

Dosar Biboron 5:4

Probhu Isor do ona buru cetanre seṅgel tala khon abo samaṅre kathae roṛleda.

Josuạ 5:1

Jordan gaḍa pạchim secʼren Amorikoren sanam rajko ar doreão aṛe reakʼ sanam Kanani rajko tinreko ańjomkeda, abo bon parom hijukʼre Probhu Isor cetʼleka jordan gaḍa reakʼ dakʼ, metakʼme Israelko samaṅ khone ańjetʼ ocoletʼ un khon onkoakʼ as do chuṭạuentakoa; Israelko samaṅre teṅgokʼ reakʼ dil ar do baṅ hoylentakoa.

1 Johan 3:2

E dulạṛiạ gidrạko, ńitokʼ do Isorren gidrạko kana bon, menkhan tayomte cetʼ hoyokʼa ona do ńit hõ baṅ sodor akana. Menkhan bon baḍaea, Mạsiye sodorokʼre abo do uni lekage bon hoyokʼa, ente uniy okalekanicʼ kan, ona muṭhạntege bon ńelea.