Nehemiạ 9:30 - সান্তালী বাইবেল

³⁰ Menkhan enhõ ḍher bochor hạbicʼ onkoakʼem sahaoleda. Amren nạbiko ar amren jiu hotete onkom sontorletʼkoa, menkhan onko do ona bako luturatʼ tahẽkana. Onate am do eṭakʼ eṭakʼ jạtrenkoakʼ tirem jimạletʼkoa.

Nehemiạ 9:30 Iomraidhean Croise

2 Rapajko 18:11

Ar Asurren raj do Israelkoe bondiketʼkote Asur disạmteye idiketʼkoa ar Halare ar Habor gaḍa aṛe reakʼ Geson ṭoṭha ar Medekiạkoakʼ nagrahakoreye girobas ocoketʼkoa.

2 Rapajko 21:10

Unre Probhu Isor do acʼren gutiko, metakʼme nạbiko hotete niạ kathae menkeda,

2 Bõsbudạ 24:19

Probhu Isor do hoṛko acʼ ṭhen ruạṛ ạguko lạgitʼ nạbikoe kolletʼkoa ar hoṛkoe sontorketʼkore hõ onko do bako ańjomleda.

Esra 9:10

“Menkhan ńitokʼ do, E aleren Isor, niạ tayom ale do cetʼ jãhãnakʼle mendaṛekea? Am do amren nạbiko hotete okako hukumem em akatʼle ona dole bạgi akawada. Am dom menleda, ‘okaṭakʼ disạm ạidạri lạgitʼpe calakʼkan ona do onḍenko hoṛkoakʼ besapha iạte bhõnḍ akana. Onkoakʼ hirkhạwanakʼ kạmi iạte onko do disạm reakʼ mitʼ simạ khon eṭakʼ simạ hạbicʼ besaphawakʼteko perecʼ akada.

Nehemiạ 9:20

Ar onko cetʼako lạgitʼ do amren bhạlạiyicʼ atmam danatʼko tahẽkana. Am do onko jom ocoko lạgitʼ serma khon Mannam emalena ar ona do bam bondleda; ar onkoakʼ tetaṅ maraotako lạgitʼ do dakʼem ematʼkoa.

Nehemiạ 9:26

“Menkhan enhõ onko do bebatao iạte am upạrteko hulkeda; ar amakʼ ạn-ạriko bạgiyada. Amren okoeko nạbi do am secʼ ruạṛ lạgitʼko sontoretʼko tahẽkan onko nạbi doko gocʼketʼkoa; ar am do ạḍi bạṛicʼko opomanketʼmea.

Nehemiạ 9:29

“Amakʼ ạn-ạri secʼ ruạṛ hijukʼ lạgitʼ onkom sontorletʼkoa menkhan onkoakʼ beohar do bạḍạite perecʼge tahẽkantakoa; onko do amakʼ sanam hukumko bebataoleda. Amakʼ okako hukum palonkate hoṛko bańcaokʼ ona upạrteko kạileda. Onko do hoṭokʼko keṭecʼ ketʼtakote amakʼ katha bako ańjomletʼa.

Sereńko 86:15

Menkhan E Probhu Isor, am do mãyãte perecʼ dayayicʼ Isor kanam; am do usạrate bam edre hodokʼa, amakʼ asambheṛ dulạṛ ar pạtiạrtetʼ reakʼ mucạtʼtetʼ do bạnukʼa.

Sereńko 95:10

Pongel bochor hạbicʼ ona piṛhirenkote iń do ạḍiń ạṛis cabalena; ińiń menleda, ‘noko hoṛakʼ ontor do eṭakʼ secʼ ghańjeṛ akantakoa; ińakʼ hor do bako baḍaelakʼa.’

Jesaea 28:10

Ente sikhạuna upạr sikhạuna menakʼa, sikhạuna upạr sikhạunage. Thar upạr thar, ar thar upạr tharge, nonḍe thoṛa hanḍe thoṛa. ”

Jesaea 42:24

Jakob do luṭe lạgitʼ okoeye soprot akadea? Ar Israel do luluṭkoakʼ tire okoeye jimạ akadea? Unige cetʼ Probhu Isor doe baṅkana, one uni upạrte bon kại akatʼ? Unkin do uniyakʼ horte calakʼ bạkin khojleda, ar uniyakʼ hukum hõ bạkin manaoleda.

Jesaea 48:9

Ińakʼ ńutum iạte ińakʼ edreń bilom ocoyeda; ar ińakʼ sabasi lạgitʼ ona doń sambṛaoa jemon aloń marao giḍipe.

Jesaea 63:10

Enhõ onko doko hulkeda ar uniren sonot Jiuko duk ocokedea. Ona iạte uni do onkoren bạiriye hoyena ar acʼtetʼge onko upạrte lạṛhạiye ehopʼena.

Jirimiạ 25:4

“Probhu Isor do acʼren sanam gutiko, metakʼme nạbiko jaoge ape ṭhene kolletʼkore hõ ape do bape ańjomletʼtakoa ar mone hõ bape moneyada.

Jirimiạ 44:22

Apeakʼ bạṛicʼ ar hirkhạwakʼ kạmiko Probhu Isor do tinre bae sahao daṛeada unre apeakʼ disạm do ujạṛakʼ, maraoakʼ ar hirkhạwakʼ ṭhạ̃ige hoyena ar ona disạm reakʼ ńutum do hoṛkoko sarapakʼa. Ar teheń hạbicʼ hõ ona do onkage menakʼa.

Jirimiạ 44:4

Iń do aema dhao ińren gutiko, metakʼme nạbikoń kolletʼkoa nonka memen lạgitʼ; noa hirkhạwakʼ do alope kạmiya okaṭakʼ iń kurudakʼkan.

Jirimiạ 44:5

Menkhan onko do bako luturada, ar bako hetaoada; ar onko do akoakʼ dusṭạmi khon bako ruạṛlena ar debotako ṭhen dhup jered hõ bako bạgiletʼa.

Jirimiạ 7:25

Aperen hapṛamko Misor disạmko bạgiyatʼ tayom khon teheń hạbicʼ dinke din ape ṭhen ińren gutiko, metakʼme nạbikoń kolletʼkoa.

Rak̕joṅ 2:17

Probhu Isor do acʼakʼ goṭawakʼ lekageye kạmi akada; one okaṭakʼ katha ḍher laha khongeye roṛletʼ uni do ona kathae purun akada. Uni do begor mãyãtegeye lebda giḍi akatʼmea; bạiriko hõ am upạrteye rạskạ ocoyetʼkoa, uni do am upạrtenkoakʼ daṛeye ḍher ocoyetʼtakoa.

Daniel 9:6

Aleren rajko, mukhiyạko, hapṛamko ar disạmren sanam hoṛko ṭhen amren guti nạbiko do am emakʼ oka kathako menakatʼ ona do ale bale ańjomleda.

Sakariạ 7:12

Onko do dhiri leka monko keṭecʼketʼtakoa ar ạn-ạri do bako bataoleda. Iń phạdkoren Probhu Isorge ińren Jiu hotete lahaten nạbiko hotete okaṭakʼ kathań kolletʼ ona hõ bako luturada. Ar onatege ińakʼ maraṅ edre do jol rakapʼlentińạ.

Sakariạ 7:13

Ińiń hohowatʼkore hõ onko do bako hetawatʼtińạ, ar onkoko hohowạdińre iń phạdkoren Probhu Isor do bạń ańjomletʼtakoa.

Numeri 11:26

Unre Eldad ar Medad ńutuman bar hoṛ do ḍera bhitrire kin tahẽkana. Unkin hõ bachao akan murubbiko modre kin tahẽkana, ar ńapamokʼ tạmbu ṭhen bạkin sen akan tahẽkana. Enhõ unkin cetanre uni Jiue hecʼena. Unre unkin hõ ḍera talare nạbi lekate katha roroṛkin ehopʼena.

Aposkạmi 28:25

Pạulakʼ kathate ako talare katha baṅ jurilente onko do onḍe khonko calaoena. Adoko calakʼ lahare Pạule menkeda, “Sonot Jiu do Jesaea nạbi hotete aperen hapṛamko ṭhen ṭhikgeye roṛlakʼa,

Aposkạmi 7:51

E keṭecʼ hoṭokʼanko! Be-Jihudiko lekage apeakʼ lutur ar ontor do, ar apehõ ṭhik aperen hapṛamko leka kanape. Ape do jaoge sonot Jiupe tạkicʼ daramedekana.

Romiko lạgitʼ Pạul Apostolakʼ ciṭhi 2:4

Am do Isorakʼ asambheṛ daya, sahao daṛe ar soborim neṅghaoetʼtaea. Am dom hiṛiń akada, Isorakʼ noa daya do kại khone ạcur ruạṛetʼmea mente.

1 Patras 1:11

Onkoakʼ ontorre Mạsiren Jiu do laharege gohae emleda je, Mạsi do duk jojom hoyokʼtaea ar ona tayom do ṭhonoke ńama. Nạbiko baḍaejoṅko khojletʼge Mạsiren uni Jiu do oka okte ar oka dosa reakʼ kathae baḍae ocoyetʼkoa mente.

2 Patras 1:21

ente nạbiko do akoakʼ kusi sana leka jãhãn katha bako roṛakada; onko do sonot Jiu reakʼ ạyurtege Isorakʼ kathako roṛakada.

2 Patras 3:9

Adom hoṛko hudiseda Probhu Isor do acʼakʼ gokʼakʼ purạu lạgitʼe bilomeda, menkhan ona do baṅ. Asokaete uni do ape lạgitʼe soboriyeda, ente jãhãegeye nosṭokʼ do bae khojkana, bickom sanamkoge jemon kại khon monko ạcurtako onageye khojkana.