Levitikus 26:9 - সান্তালী বাইবেল

⁹ Unre iń do daya mẽtʼteń ńelpea ar apeń bạḍ ocopea ariń saṅge ocopea, ar ape sãote ińakʼ bondobosiń bandhaoa.

Levitikus 26:9 Iomraidhean Croise

Genesis 1:28

Isor do unkin bhoratʼkinteye metatʼkinạ, “Saṅgekʼ reakʼ daṛete perejokʼpe, ar apnarakʼ lekha ḍhertape ar dhạrti perejpe ar dhạrti do apeakʼ ḍanṭaore dohoype. Ona chaḍa ape do jalapuriren hakoko, coṭren cẽṛẽko ar otren sanam lekan jiwiyanko cetanre mạlik lekate ektiạripe calaoa.”

Genesis 17:20

Ańjomme, iń do uni hõń bhoraea ar ạḍi utạr hoponkote uni bõsren hoṛkoakʼ lekhań ḍher ocoya. Uni hõ gelbar khũṭren janam datae hoyokʼa ar uni khon iń do mitʼṭecʼ maraṅ jạtrenkoń benao rakapʼkoa.

Genesis 22:17

khạṭigeń bhorama, ar sermaren ipilko ar jalapuri reakʼ gitil leka amakʼ bõsrenkoń saṅge ocokoa. Am bõsren hoṛ do akoren bạirikoakʼ nagrahako jitạu joṅa,

Genesis 26:4

Iń do am bõsren hoṛko sermaren ipilko lekań saṅge ocokoa ar noa disạm do onkoń emakoa. Ar amren bõs hotete dhạrtiren sanam jạtrenko do bhorko ńama,

Genesis 28:14

Amren bõsko do dhạrtiren gitil lekako saṅgekʼa. Onko do purub-pạchim ar utạr-dạkhin secʼko pasnao idikʼa. Ar dhạrtiren sanam jạtrenko do am ar amren bõsko hotete bhorko ńama.

Genesis 28:3

Sanam daṛean Isor do ame bhoramma ar aema hoponren apat hoyokʼ reakʼ daṛeye danama. Uni do am bõsren hoṛkoe saṅge ocokoa. Onko do aema jạtrenko hoyokʼa.

Genesis 48:4

Uni doe metadiń tahẽkana, ‘ạḍi utạr hoponkoren baba hoyokʼ reakʼ daṛeń ematʼmea ar am bõsren hoṛkoakʼ lekha doń saṅge ocoya. Iń do am khon aema jạtrenkoń sirjạukoa, ar am tayom noa disạm do jaejug reakʼ sompotti lekate amren bõskoń emakoa.’

Genesis 6:18

“Menkhan iń do am lạgitʼ mitʼṭecʼ bondobosiń dohoya. Am do jahajtem bolokʼa ar am sãote amren hoponko ar amren bạhu ar kiminmetako hõko tahena.

1 Rapajko 3:8

Ar amren guti do nonḍe amem bachao akawan hoṛko talarege menaea. Ar onko do nonkan mitʼṭecʼ maraṅ jạtren kanako, one onko do ohoko lekha caba daṛelen.

2 Rapajko 13:23

Menkhan Probhu Isor do Abraham, Isahak ar Jakob lạgitʼ okaṭakʼ bondobose doholetʼ ona iạte uni do Israelko cetanre daya are mãyãkʼkan tahẽkante onkoe luturatʼkoa. Onate teheń hạbicʼ hõ marao giḍiko se apnar samaṅ khon sạṅgiń giḍikako do bae khojleda.

Nehemiạ 2:20

Iń do onkoń roṛ ruạṛatʼkoa, “Sermaren Isor do aleye jo baha ocolea. Ale do uniren gutiko kanale, onate pạcri do arhõle gathao aroya, menkhan Jerusalem do apeakʼ jãhãn sompotti, jãhãn dạbiteakʼ se jãhãn ạidạriyakʼ do baṅkana.”

Nehemiạ 9:23

Sermaren ipilko leka onko do alekha hoponkom ematʼkoa ar okaṭakʼ disạmte bolokate ona ạidạri reakʼ katha onkoren hapṛamkom metatʼko tahẽkan ona disạmtem aderketʼkoa.

Sereńko 107:38

Uni do onkoe bhorako kana ar onate onko do ạḍiko saṅgekʼkana; uni do onkoren ạtiń janwarko bae komao ocoyetʼkoa.

Sereńko 89:3

Am dom menakada, “Ińren bachao hoṛko lạgitʼ iń do mitʼṭecʼ bondobosiń bandhao dohoakada; ińren golam Dạud ṭhen iń do noań kiriạ akana,

Exodus 1:7

Menkhan Israelkoakʼ bõsko saṅge idikʼ reakʼ daṛe do tahẽkangea; onko do lekhareko ḍher idiyente beṛhaeteko pasnaoena arko daṛe idiyena, ar onkote Misor disạm do perecʼena.

Exodus 2:25

Uni do Israelko secʼe beṅgetʼkeda ar onkoe moneyatʼkoa.

Exodus 6:4

Iń do onko lạgitʼ ińakʼ bondobosiń doholeda. Ona bondobosreń menleda, onko do bidisiạ lekate okareko tahẽkan ona disạmgeń emakoa.

Jesaea 55:3

Ińakʼ katha luturakʼpe, ar iń ṭhen hijukʼpe; jemon ińakʼ katha ańjomkate jiwetʼpe tahen. Iń do pạtiạrte perecʼ dulạṛ iạte Dạud ṭhen okań gokʼletʼ ona lekage ape lạgitʼ mitʼṭecʼ jaejugakʼ bondobos iń bandhaoa.

Jirimiạ 23:3

Okako disạmre ińren pal bhiḍikoń laga ńirletʼko onḍe khon ińge onkoren sarecʼko do akoakʼ ạtiń ṭạnḍiteń ruạṛ ạgukoa; onḍe onko doko bạḍokʼa arko saṅge idikʼa.

Jirimiạ 23:4

Onko cetanre nonkan gukʼpikoń bahalkoa okoe do onkoko ńel todarot daṛeako; unre ińren bhiḍiko bako botorokʼa, bako asokʼ ṭayogokʼa ar okoeṭakʼge bako adokʼa. Iń Probhu Isorge niạ kathań meneda.”

Jirimiạ 33:3

hohoạńme, ar iń doń roṛ ruạṛama ar nonkan maraṅ ar nonkan danaṅakʼko reaṅ kathań lạiyama one oka do bam baḍaekan.

Jeheskel 16:62

Am lạgitʼ ińakʼ bondobosiń bạisạua, arem baḍae daṛeakʼa, ińkangeạń Probhu Isor do.

Jeheskel 36:9

Iń do ape secʼge minạńa ar apegeń moneyapea; onate apere do casogokʼa ar itạ hõ erogokʼa.

Levitikus 26:15

ar ińakʼ niạmko bape hetawakʼ ar ińakʼ ạn-ạrikope nindạu ar ińakʼ hukumko bape senakʼte ińakʼ bondobospe rạpud,

Luk 1:72

Uni do aboren hapṛamko mãyãwako lạgitʼ acʼakʼ sonot bondobos, metakʼme acʼakʼ gokʼakʼ purạu lạgitʼ, aboe rukhiyạ akatʼ bona.

Dosar Biboron 28:11

Ar okaṭakʼ disạm emape reakʼ Probhu Isor do aperen hapṛamko ṭhene gokʼletʼ ona disạmre ạḍiye bhorapea, metakʼme apeakʼ gharońjkoren hopon ar hoponerako do bhoranko hoyokʼtapea, mĩhũ, merom ar bhiḍiko hõ ḍherko bạḍokʼa ar khetre hõ ḍher phosol hoyokʼtapea.

Dosar Biboron 28:4

“Ar bhorpe ńamte apeakʼ gharońjren hopon ar hoponerako hõ bhoranko hoyokʼa, ar apeakʼ khet baṛgere ḍher phosol hoyokʼtapea ar mĩhũ- merom ar bhiḍiko hõ ḍherko bạḍokʼtapea.

Dosar Biboron 7:13

Uni do apeye dulạṛpea, are bhorapea ar aperen hoṛkoe saṅge ocopea. Ar okaṭakʼ disạm emokʼ lạgitʼ aperen hapṛamko ṭhene gokʼletʼ tahẽkan ona disạmteye aderpea. Onate aperen do ḍher hopon ar hoponerako hoyokʼtapea, ar apeakʼ jumi khon ḍher anajko, darkha rasako ar sunumkope ńama, ar aperen bhiḍi, merom, ḍaṅgrako hõ ạḍi ḍherko hoyokʼtapea.

Ibriko 8:9

Misor disạm khon onkoren hapṛamko ti sapʼkateń oḍok ạguko jokhecʼ onko lạgitʼ oka bondobos iń doholetʼ tahẽkan, ona leka noa nãwã bondobos do baṅ hoyokʼa. Ińakʼ ona bondobos leka bako calaolente onko secʼ do bạń beṅgetʼ ruạṛeda.” Probhu Isor do noa kathae meneda.