Jirimiạ 11:13 - সান্তালী বাইবেল

¹³ Jihudạre tinạkʼ nagraha ar atoko menakʼ unạkʼge debotako hõ menakʼkoa, ar Jerusalemre tinạkʼ kulhiko menakʼ uniye lajao ocokʼ Bakʼal debota ńutumte dhup jered lạgitʼ pinḍko hõ unạkʼge benao akana.

Jirimiạ 11:13 Iomraidhean Croise

2 Rapajko 23:13

Jerusalem purub secʼ dhaṅ dhaserakʼ buru reakʼ dạkhin secʼre okako than boṭkocʼ tahẽkan onako hõ uni doe bhõnḍ ocokeda. Israelren raj Solomon do Sedonikoren Astoret debota lạgitʼ, Moabikoren Kemos debota lạgitʼ ar Amonren Melok debota lạgitʼ niạko than boṭkocʼ doe benaoleda.

2 Bõsbudạ 28:25

Uni do debotako ńutumte dhup jered lạgitʼ Jihudạ reakʼ mitʼke mitʼ nagraha ar atokore than boṭkocʼkoe benao ocoketʼte uniren hapṛamkoren Probhu Isorakʼ edreye rakapʼ ocoketʼtaea.

Jesaea 2:8

Ona chaḍa disạm do boṅga murtikote perecʼgetakoa. Onko do akoakʼ tite benaoakʼ jinisko sewawakʼ kana, ar kạṭupʼte okako benaoetʼkan onageko ḍobokʼakʼ kana.

Jirimiạ 11:17

Phạdkoren Probhu Isor, okoe do uniye rohoelede uni do uniyakʼ sorbonas reakʼe ray akada, ente Jihudạ ar Israelren hoṛ do bạṛicʼakʼko kạmiakada ar Bakʼal debota ńutumte dhupko jeretʼ akatʼte uniko edre ocoakadea.

Jirimiạ 17:1

Probhu Isore meneda, “Jihudạ reakʼ kại do mẽṛhẽtʼ kolomte ol akana, hirạ reakʼ surshạtege onkoakʼ ontorre, onkoakʼ pinḍ reakʼ dereńre ol gạḍiạu akana.

Jirimiạ 18:15

Menkhan ińren hoṛ do iń hiṛińkate ạuṛiyakʼren boṅga ṭhen dhupko jeretʼeda. Onko do akoakʼ ḍaharreko tohotʼ gurakana. Ar iń sabeń lạgitʼ khạyũkʼko la akada, ona sedae reakʼ soṛok korege. Onko do bhage hor bạgikate bạṛicʼ secʼko ghańjeṛ akana.

Jirimiạ 19:4

Ente onko do ińko bạgi giḍi akadińa ar niạ ṭhạ̃i do debotakoakʼ ṭhạ̃iko benao akada; onko do nonkan debotako ṭhen dhupko jeretʼeda one onkoakʼ katha do akoren hapṛamko se Jihudạren rapajko hõ tisge bako baḍaekan tahẽkan. Ona chaḍa niạ ṭhạ̃i do miridoskoakʼ mãyãmteko perecʼ akada.

Jirimiạ 19:5

Onko do Bakʼal ńutumte jeredokʼ samaṅokʼakʼko menkate akoren hoponko seṅgelre atar giḍiko lạgitʼ Bakʼal boṭkocʼ thankoko benao akada, menkhan iń do bạń hukum akada se bạń menakada ar ona do ińakʼ monre tishõ baṅ rakapʼakana.

Jirimiạ 2:28

E Jihudạ, apnar lạgitʼ okoe debotakom benao akawan onko do unre okareko tahenkana? Muhinrem paṛaolenre amko bańcao daṛeam khan doko hecʼocoge, ente aema nagrahako menakʼtama ar debotako hõko ḍhergetama.

Jirimiạ 3:24

Aboakʼ juạn jokhecʼ khonge aboren hapṛamkoakʼ khaṭaoteakʼ jo, metakʼme onkoren gại-ḍaṅgra, bhiḍi merom palko ar onkoren hopon ar hoponerako do onko lajao ocokʼkan debotageko utʼ akatʼkoa.

Jirimiạ 3:25

Dela hijukʼpe, abo do aboakʼ lajaoakʼre bon kunḍlạṅokʼma,, aboakʼ lajao do aboko danaṅ esetʼbon ma. Juạn okte khon teheń hạbicʼ abo do aboren Probhu Isor upạrte bon kạiyeda, ar aboren hapṛamko hõ onkageko kạmileda. Abo do aboren Probhu Isorakʼ bon bebatao akada.”

Jirimiạ 32:35

Onko do Molok debota ńutumte akoren gidrạko samaṅko lạgitʼ Bin-hinom buru nalare Bakʼal debota ńutumte boṭkocʼ thankoko benao akawana. Iń do tishõ ona bạń hukum akawatʼkoa se ińakʼ monre tishõ baṅ hecʼakana, onko do nonkan bạṛicʼakʼ kạmikate Jihudạko kại ocoyea mente.

Jirimiạ 44:21

“Jihudạ reakʼ atoko ar nagrahakore ar Jerusalem reakʼ ḍaharkore ape ar aperen hapṛamko, aperen rapajko, rajkạmiyạko ar disạmren eṭakʼ hoṛko okoe do dhupko jeretʼetʼ tahẽkan ona do cetʼ Probhu Isorakʼ disạ do bạnukʼtaea ar ona reaṅ uni do cetʼ bae dạndikʼ kana?

Jirimiạ 44:5

Menkhan onko do bako luturada, ar bako hetaoada; ar onko do akoakʼ dusṭạmi khon bako ruạṛlena ar debotako ṭhen dhup jered hõ bako bạgiletʼa.

Jirimiạ 48:35

Iń Probhu Isorge noa katha doń meneda, Moabre okoe do than boṭkocʼkore samaṅokʼakʼko samaṅetʼ tahẽkan ar onkoren debotako ńutumte dhupko jeretʼetʼ tahẽkan onko doń marao utạrkoa.

Jirimiạ 7:9

Ape do kombṛoko, gogocʼko, laṭghaṭko ar eṛe eṛe kiriạkʼko kanape ar Bakʼ-al debota ńutumte dhupkope jeretʼetʼ kana. Ona chaḍa okoe debotako bape orom akatʼko onkope pańjayetʼkoa.

Hosea 10:1

Israel doe alak balakokʼkan darkha nạ̃ṛĩ kana; onare do ḍher joge sapʼlena. Uni do joko tinạkʼ saṅge idiyentae unạkʼge pinḍko hõe ḍherkeda; ar disạm hõ tinạkʼ sahre idiyentae unạkʼge uni do mońj mońj boṅga khunṭikoe benaokeda.

Hosea 12:11

Gilead do bedhoromteye perecʼgea; uniren hoṛ doko ạuṛiyakʼgea. Onko do Gilgolre ḍher ḍaṅgrako samaṅketʼkoa. Onkoakʼ pinḍko do casetʼkan jumire dhiri ḍạṅko leka ḍhergea.

Hosea 9:10

Probhu Isore meneda, “Hahaṅkarre darkha nạ̃ṛĩ leka Israel doń ńamledea; pạhil dhao jo emokʼkan loa dare reakʼ pạhilakʼ jo lekage aperen hapṛamkoń ńelletʼkoa. Menkhan onko do Bakʼal-Piyạr ṭhen senkate apnartetʼko ạkhrińena ar akoren dulạṛiạ boṅga lekage onko do hirkhạwankoko hoylena.