Loo gə́ killa rea kəm Ja̰’g 7:16 - Maktub gə́ To gə Kəmee

¹⁶ Ɓó a tɔl dee nda̰ bèe el ləm, kṵdaman a tɔl dee nda̰ el ləm, kàr a kɔs dee nda̰ el ləma, né gə́ nuŋga kəd-kəd gə́ rara kara a nuŋga dee el ləm tɔ.

Loo gə́ killa rea kəm Ja̰’g 7:16 Iomraidhean Croise

Pakɔsje 121:5

Njesigənea̰ lé to njekaa dɔi ya ləm, Njesigənea̰ to ndil gə́ aar dɔ jikɔli’g o̰ dɔi ləm tɔ.

Pakɔsje 121:6

Kàr a kɔsi dan kàr gə́ nuŋga kəd-kəd’g el ləm, Naḭ a rai loondul’g el ləm tɔ.

Pakɔsje 143:6

M’odo jim m’ula ndiŋ gə́ rɔi’g ya ləm, Ŋgaw məəm əmə biriri-biriri gooi’g Asəna gə dɔ naŋg gə́ tudu kurum-kurum Gə́ ndiŋga mán keneŋ bèe ləm tɔ.

Pakɔsje 42:2

To gə́ arkas gə́ əmə biriri-biriri kəm-rəw-mán’g bèe lé Ǝi Ala, ma kara m’əmə biriri-biriri gooi’g bèe ya tɔ.

Pakɔsje 63:1

Pakɔs lə Dabid. Taree wɔji dɔ loo gə́ yeḛ si ne dɔdilaloo gə́ Juda lé.

Pa gə́ ur dɔ paje 1:6

Maji kar sí oreeje dɔ ndul’g ləm ba el, To kàr ɓa ram am m’ndul ya. Meḛ ŋgakɔmje gə́ diŋgam ḭ sə dee jugugu dɔm’g Ar dee d’undam gə́ njeŋgəm ndɔ-nduúje. Ndɔ-nduú ləm-ma ndá ma m’ŋgəm el.

Esai 25:4

Mbata kédé i to loo-kiya-rɔ Le yeḛ gə́ siŋgá godo ləm, Loo-kiya-rɔ lə njenékəmndoo Gə́ si dan néurti’g ləm, Gə néko̰-dɔ-loo loo gə́ lel-boo ula ləma, Gə ndil-ko̰-dɔ-loo loo gə́ kàr ɔs yaa̰ ləm tɔ, Mbata lel ta njékorè dɔ dəwje naŋg lé To asəna gə lel-mal gə́ unda ndògo-bɔrɔ naŋg bèe.

Esai 32:2

Nana kara a to kasəna gə njo̰loo-kula-dɔ gə́ lel dəs giree’g ləm, A to kasəna gə loo-kiya-rɔ gə́ taa lel-boo dɔ dəw’g ləm, A to kasəna gə kəm-rəw-mán gə́ to mee loo gə́ tudu kurum-kurum’g bèe ləma, A to kasəna gə ndil biri mbal gə́ boo gə́ to dɔ naŋg gə́ tudu kurum-kurum’g bèe ləm tɔ.

Esai 41:17

Njénékəmndooje gə njéndooje lé Saŋg mán ndá d’iŋga el, Ta dee tudu kurum-kurum Mbata kṵdaman gə́ tɔl dee Ndá ma Njesigənea̰ m’a koo ndu no̰ lə dee, Ma Ala lə Israɛlje m’a kuba dee kya̰ dee nda̰ el.

Esai 49:10

Ɓó a tɔl dee el ləm, Kṵdaman a tɔl dee el ləma, Pər kàr gə́ nuŋga kəd-kəd gə kàr lé D’a kula kəm dee ndòo el ləm tɔ Mbata yeḛ gə́ mée aw taḭ-taḭ dɔ dee’g lé A to njekɔrno̰ dee Ndá yeḛ a kɔr no̰ dee par gə́ kəm-rəw-manje’g.

Esai 65:13

Gelee gə́ nee ɓa Mbaidɔmbaije gə́ Njesigənea̰ pa togə́bè pana: Aa ooje, kuraje ləm d’a sɔ né, Nɛ ɓó a ra sí-seḭ, Aa ooje, kuraje ləm d’a kai mán, Nɛ seḭ lé kṵdaman a ra sí, Aa ooje kuraje ləm d’a kal rɔ dee, Nɛ seḭ lé rɔkul a dəb dɔ sí’g,

Junas 4:8

Loo gə́ kàr uba mba̰ ndá Ala ar lel gə́ nuŋga pid-pid ḭ bər ula ləm, ar kàr kara nuŋga dɔ Junas’g ləm tɔ ndá yeḛ guru naŋg rug. Yeḛ ndiŋga rəa gə yoo pana: Ma lé kwəi ɓa ma m’ndigi yaa̰ unda kisi kəmba tɔ.

Matiyo 13:21

nɛ ŋgira ta neelé ɔm jamee mée’g el ndá dəw neelé si ne waga el mbata mée mbɔré dɔ’g. Loo gə́ néɓəl əsé néurti teḛ dəa’g mbata lə ta neelé ndá yeḛ oso kas ila ne ta kɔrɔ yal.

Matiyo 13:6

Yee ḭ wububu mbata naŋg to keneŋ ŋgwɔidɔ bèe, nɛ loo gə́ kàr ɔs keneŋ ndá wa mèŋgèŋgḛ̀, ndòlé mbata ŋgirá wa naŋg el.

Matiyo 5:6

Deḛ gə́ mal ra né gə́ gə dɔ najee ra dee asəna gə kṵdaman gə́ tɔl dee əsé ɓoo gə́ ra dee lé rɔ dee lel dee, Mbata meḛ dee a ndan tub-tub ɓəi.

Mark 4:17

nɛ ŋgira ta neelé ɔm jamee meḛ dee’g el ndá d’aw ne waga el mbata meḛ dee mbɔrè. Loo gə́ néurti əsé néɓəl teḛ dɔ dee’g mbata ta neelé gə́ deḛ taa ndá d’oso kas d’ila ta kɔrɔ yal mba̰.

Mark 4:6

Waga ba ya, loo gə́ kàr ɔs ndá kàr ɔsee aree tudu wa gɔgɔgɔ mbata ŋgira aw naŋg yaa̰ el.

Lugu 1:53

Yeḛ ar njéɓooje kila kɔd-kɔd loo ɓoo’g lə dee. Nɛ yeḛ un baoje tuba dee ji dee kari kari-kari.

Lugu 6:21

Seḭ gə́ ɓó tɔl sí ɓasinè lé Rɔ sí lel sí mbata meḛ sí a ndan tub-tub ɓəi! Seḭ gə́ no̰je jəm-jəm ɓasinè lé Rɔ sí lel sí mbata seḭ a ndubaje rɔ sí raŋg-raŋg ɓəi to!

Tagə́maji gə́ Ja̰ ndang 4:14

Nɛ nana ɓa a kai mán gə́ m’a karee neelé ndá kunda a tɔlee gogo el ŋga. Man gə́ m’a karee lé a tel to ŋgira mán mée’g gə́ a kaḭ teḛ kuji-kuji ndá yeḛ a si gə kəmə gə́ gə no̰ lé mée’g.

Maktub gə́ Jak ula ne ar ngan-Allaje 1:11

Kàr uba dor ɔs keḭ-keḭ ar mu ndòlé ləm, ar puduje gəḭ ləma, ar majee gə́ bə̰dərə bə̰ lé sané kad ləm tɔ. Togə́bè ɓa, bao kara a dəs koso kas loo-kula’g ləa bèe tɔ.

Loo gə́ killa rea kəm Ja̰’g 21:4

Yeḛ a bɔr mán-no̰ kəm dee’g ləm, yoo a ɓar ri dee gogo el ləm, kəmndooyoo kara a godo ləm, no̰ yoo a godo ləma, meeko̰ kara a godo ləm tɔ mbata néje gə́ dɔtar lé sané pá mba̰.