Jeremi 51:11 - Maktub gə́ To gə Kəmee

¹¹ Olje ndo̰ kag ɓandaŋgje lə sí ləm, Waje dərje lə sí kègègè ləm tɔ! Njesigənea̰ ɔs kudu mbaije gə́ Médi ɓɔḭ-ɓɔḭ, Mbata yeḛ wɔji mée’g Gə mba tuji Babilɔn, Mbata to dalba̰ lə Njesigənea̰, To dalba̰ gə́ wɔji dɔ kəi ləa Gə́ to gə kəmee.

Jeremi 51:11 Iomraidhean Croise

1 Mbaije 11:14

Njesigənea̰ ɔs kudu dəw kára gə́ to njeba̰ lə Salomo̰: yee ɓa to Adad, dəw gə́ Edɔm gə́ ḭ ginkoji’g lə mbai gə́ Edɔm tɔ.

1 Mbaije 11:23

Ala ar njeba̰ lə Salomo̰ gə́ raŋg kára uba naŋg ḭ ya tɔɓəi. Yeḛ lé ria lə Rejo̰, ŋgolə Eliada, yeḛ gə́ ḭ kəi lə ɓéeje Adadéjer, mbai gə́ Soba aḭ lé.

1 Sôrta Gḭka-Israɛlje 5:26

Ala lə Israɛlje ɔs mee Pul, mbai gə́ Asiri ləm, gə ɔs mee Tilgat-Pilneser, mbai gə́ Asiri ləm tɔ ndá Tilgat-Pilneser wa Rubḛje gə Gadje gə ges ginkoji Manasəje ɓər tɔɓəi yeḛ aw sə dee Halah, gə Habor, gə Hara, gə ta baa gə́ Gosan ar dee d’isi keneŋ saar teḛ mee ndɔ gə́ ɓogənè.

2 Sôrta Gḭka Israɛlje 36:22

Ləb ko̰ɓee gə́ dɔtar lə Sirus, mbai gə́ Persə lé Njesigənea̰ ar ta gə́ yeḛ pa gə ndu Jeremi lé aw lée’g béréré ya. Njesigənea̰ lé ɔs Sirus, mbai gə́ Persə lé ɓɔḭ-ɓɔḭ gə mba karee ar dee d’ila mber gə looje lai mee ɓeeko̰’g ləa ləm, gə ndaŋg taree ləm tɔ pana:

Esdras 1:1

Mee ləb ko̰ɓee gə́ dɔtar’g lə Sirus, mbai gə́ Persə lé Njesigənea̰ ar ta gə́ yeḛ pa gə ndu Jeremi lé aw lée’g béréré ya. Njesigənea̰ lé ɔs Sirus, mbai gə́ Persə lé ɓɔḭ-ɓɔḭ gə mba karee ar dee d’ila mber gə looje lai mee ɓeeko̰’g ləa ləm, gə ndaŋg taree mee maktub’g ləm tɔ pana:

Esai 10:26

Njesigənea̰ gə́ njeboo-néje a kunda dee gə ndəi to gə́ yeḛ unda ne Madianje dɔ mbal gə́ Oreb. Tɔɓəi yeḛ a kula kag-tɔs ləa ndiŋ dɔ baa-boo-kad’g lé ndá yeḛ a kula gə́ tar to gə́ yeḛ ra ne mee ɓee gə́ Ejiptə bèe lé ya ɓəi tɔ.

Esai 21:2

Némḭdi gə́ to ɓəl kədm-kədm inja kəm’g. Njekula kəm loo ndòo ula kəm loo ndòo ləm, Njetujiloo tuji loo ləm tɔ. Seḭje gə́ Elam, ɔrje rɔ rɔje! Seḭje gə́ Médi, aḭje dɔ ɓee-boo sub gə rɔ! M’a kar tuma̰ rɔ ŋgururu-ŋgururu lə dəwje godo lai.

Esai 21:5

Deḛ ra loo-nésɔ lə dee ləm, D’ɔm twaje naŋg ləma, Deḛ d’usɔ gə d’ai ləm tɔ. Seḭ mbaije, ḭje tar! Ubuje ubu dərje’g lə sí!

Esai 41:25

Ma m’ɓar dəw kára par gə́ dɔgel Ndá yeḛ si ree ya, Loo-kuba’g lə kàr lé deḛ ɓar ria keneŋ, Yeḛ mbula njésiŋgamoŋje naŋg To gə́ mbula ne bɔrɔ bèe ləm, To gə́ njekubajo mbɔḭ ne a̰ji bèe ləm tɔ.

Esai 45:1

Njesigənea̰ pata togə́bè ar Sirus gə́ yeḛ wa dəa gə ubu lé Yeḛ gə́ yeḛ wá jikɔlee’g Gə mba kunda ne ginkoji dəwje gə raŋg naŋg nea̰’g ləm, Gə mba tudu ne mina-mbai reŋ mbaije’g ləma, Gə mba kɔr tarəwkɔgje karee Kar dəw kára kara a kudu tarəwje lé el ləm tɔ pana:

Esai 45:5

Ma m’to Njesigənea̰ ɓó yeḛ gə́ raŋg godo, Ɓó lé m’godo ndá Ala kara godo tɔ. Kédé gə́ i gərm el ɓəi lé ya Ma m’tɔ mina-mbai reŋgi’g,

Esai 46:11

To ma ɓa m’ɓar yel gə́ njesɔ mareeje M’aree ḭ bər ree ləm, Ma m’ɓar dəw gə́ njekar néje gə́ m’wɔji-kwɔji ra lé d’aw lée’g béréré lé M’aree ḭ dɔ naŋg gə́ əw’g ree ləm tɔ. Ma m’pa taree ndá M’a karee aw lée’g béréré ya ləm, Ma m’wɔji njaŋg ndá M’a ra née ya ləm tɔ.

Jeremi 25:25

M’ar mbaije lai gə́ Jimri ləm, gə mbaije lai gə́ Elam ləma, gə mbaije lai gə́ Médi ləm tɔ lé d’ai.

Jeremi 46:3

Gɔlje dərje gə́ lam gə njé gə́ boi Ndá awje ne mba rɔje ne!

Jeremi 46:4

Tɔje kundaje Seḭ njérɔ gə kundaje, uba deeje! Teḛje gə dɔguguje lə sí dɔ sí’g ləm, Olje ndo̰ niŋga-ndəije lə sí ləma, Ulaje kubu-rɔ gə́ ŋgira kiŋ-kiŋ rɔ sí’g ləm tɔ!

Jeremi 46:9

Seḭ kundaje, ar sí j’awje! Seḭ pusu-rɔje, ar sí j’ɔsje rɔ sí ɓad! Seḭ njésiŋgamoŋje, Maji kar sí teḛje gə́ raga Deḛ gə́ Etiopi gə Put Gə́ gər loo kwa dər maji lé ləm, Gə deḛ gə́ Lud Gə́ gər goso rɔ gə ɓandaŋg maji ləm tɔ!

Jeremi 50:25

Njesigənea̰ ɔr takəi-ŋgəm-nérɔje ləa, Yeḛ teḛ gə nérɔje gə́ ka̰ oŋg ləa Gə́ to keneŋ, Mbata yee neelé to kula ra Mbaidɔmbaije Njesigənea̰ gə́ njeboo-néje, Mee ɓee gə́ Kalde.

Jeremi 50:3

Mbata ginkoji dəwje d’ḭ dɔgel D’aw gə mba rɔ səa, D’a kar ɓee ləa tel to dɔdilaloo ləm, Dəwje d’a si keneŋ el ŋga ləm tɔ. Dəwje gə daje d’aḭ d’aw.

Jeremi 50:45

Gelee gə́ nee ɓa maji kar sí ooje Né gə́ Njesigənea̰ wɔji mba ra Gə ɓee gə́ Babilɔn ləm, Gə néje gə́ yeḛ wɔji mée’g Gə mba ra gə ɓee lə Kaldeje ləm tɔ. Tɔgərɔ d’a ndɔr dee to gə́ ŋgan badje Gə́ siŋga dee godo bèe ləm, Tɔgərɔ d’a tuji loo-si dee Pugudu-pugudu ləm tɔ.

Jeremi 50:9

Mbata aa ooje, m’a kar ginkoji dəwje gə raŋg gə́ boo-boo ləm, Gə́ bula digi-digi ləm tɔ lé D’a kḭ ɓee gə́ dɔgel mba rɔ gə Babilɔnje. D’a tɔs rɔ dee gə mba kaw rɔ sə dee Ndá d’a dum dɔ dee, Kag ɓandaŋgje lə dee to asəna gə ka̰ njegər goso rɔ Gə́ ḭ loo-rɔ’g tel gə jia kari el.

Jeremi 51:12

Undaje nétɔji lə sí Wɔjije ne dɔ ndògo-bɔrɔ Gə́ Babilɔn njoroŋ. Ŋgəmje loo pèrèrè ləm, Undaje njéŋgəmlooje keneŋ ləma, Gɔlje loo-kumje ləm tɔ. Mbata né gə́ Njesigənea̰ wɔji njaŋg Gə mba ra lé ndá, Yeḛ aree aw lée’g béréré mba̰. To né gə́ yeḛ pa wɔji ne dɔ Deḛ gə́ d’isi Babilɔn lé.

Jeremi 51:24

Babilɔn gə dəwje lai gə́ d’isi Kalde lé M’a ra sə dee némajelje lai Gə́ deḛ ra gə Sio̰ lé kəm sí’g ya. Njesigənea̰ ɓa pa bèe.

Jeremi 51:35

Deḛ gə́ d’isi Sio̰ pa togə́bè pana: Maji kar néra kərm-kərm Gə́ deḛ ra sə sí ləm, Gə darɔ sí gə́ ti mbidi-mbidi ləm tɔ lé Tel ra gə njé gə́ Babilɔn bèe ya tɔ. Njé gə́ Jerusalem pa togə́bè to pana: Maji kar məs síjeḛ ɔm dɔ dəwje Gə́ d’isi Kalde tɔ.

Jeremi 51:36

Gelee gə́ nee ɓa Njesigənea̰ pa ne ta togə́bè pana: Aa ooje, m’a kaḭ rɔ mbata lə sí ləm, M’a dal ba̰ lə sí ləm tɔ! M’a kar baa-boo-kad gə́ Babilɔn Tudu kurum-kurum ləm, M’a kar ŋgira mán ləa yi tə-tə ləm tɔ.

Loo gə́ killa rea kəm Daniel’g 5:30

Mee til’g neelé nja deḛ tɔl Belsasar, mbai lə Kaldeje lé tɔ.

Ləbije 26:25

M’a kar dee ree rɔ sə sí gə kiambas mba dal ne ba̰ manrɔ ləm gə́ ma man ne rɔm m’ar sí lé, loo gə́ seḭ a mbo̰je dɔ na̰ mee ɓee-booje’g lə sí ndá m’a kula gə yoo-koso mbuna sí’g, tɔɓəi m’a kya̰ sí ji njéba̰je’g lə sí tɔ.

Jakari 14:12

Aa ooje, yoo-koso gə́ Njesigənea̰ a kunda ne koso-dəwje lai Gə́ d’a kḭ rɔ gə Jerusalem ɓa nee: Darɔ dee a ndum koso ludu Loo gə́ d’a kaar tar gə gɔl dee ya ɓəi ləm, Kəm dee a ndum koso ndərəg mee toree’g ləma, Ndo̰ dee kara a ndum koso ludu mee kil dee’g ləm tɔ.

Jakari 14:2

Ma mbo̰ ginkoji dəwje gə raŋg lai Gə mba kar dee rɔ gə Jerusalem, D’a taa ɓee-boo ləm, d’a buu mee kəije buu-buu ləm, D’a kur dɔ denéje’g ləm tɔ, Ges dəwje gə́ mee ɓee-boo’g lé D’a kaw ɓər, Nɛ ges koso-dəwje gə́ nai lé D’a tuji deḛ lai mee ɓee-boo’g el.