Jeremi 5:17 - Maktub gə́ To gə Kəmee

¹⁷ D’a rɔm koje lə sí lai gə muru lə sí ləm, D’a tɔl ŋgan síje gə́ diŋgam gə njé gə́ dené ləm, D’a sɔ badje gə maŋgje lə sí ləm, D’a sɔ nduúje gə kodéje lə sí ləma, D’a tuji ɓee-booje lə sí gə́ siŋga dee to Gə́ seḭ ɔmje meḛ sí dɔ’g lé Gə kiambas ləm tɔ.

Jeremi 5:17 Iomraidhean Croise

Esai 62:8

Njesigənea̰ man rəa gə goo ji siŋgamoŋ ləa Ndá yeḛ pana: N’a kun kó ləi kar njéba̰je ləi D’ul ne rɔ dee nda̰ el ləm, Ŋgalə dəw-dɔ-ɓeeje d’a kai mán-nduú ləi Gə́ to kandə néndɔje ləi lé nda̰ el ləm tɔ.

Esai 62:9

Nɛ deḛ gə́ d’a mbo̰ kó kɔm damá lé D’a sɔ pidi ne Njesigənea̰, Deḛ gə́ d’a kinja kandə nduú lé D’a kai mee gadloo’g lə kəi ləm gə́ to gə kəmee tɔ.

Esai 65:22

D’a ra kəije kar dəw gə́ raŋg Ɓa si keneŋ el ləm, D’a ma̰a nduúje kar dəw gə́ raŋg Ɓa sɔ ka̰dee el ləm tɔ, Mbata ndɔje lə koso-dəwje ləm D’a to kasəna gə ndɔje lə kagje bèe ləm, Deḛ gə́ m’unda dee gə kəmee lé D’a ra rɔlel dɔ kulaje gə́ deḛ ra gə ji dee lé ləm tɔ.

Jeremi 1:15

Mbata aa oo, m’a gə ɓar Koso-dəwje lai gə́ d’isi ɓeeko̰je Gə́ par gə́ dɔgel, Njesigənea̰ ɓa pa bèe, Ndá deḛ d’a ree kar nana kara a kunda kalimbai ləa Tarəwkɔgje lə ɓee gə́ Jerusalem No̰ ndògo-bɔrɔje lai gə́ gugu dəa ləm, Gə no̰ ɓee-booje lai gə́ Juda ləm tɔ.

Jeremi 25:37

Oŋg lə Njesigənea̰ gə́ o̰ to gə́ pər bèe Tuji loo-sije lə dee gə́ kul yururu lé.

Jeremi 4:26

M’aa loo ndá aa oo, Dɔ mbal gə́ Karmel tel to dɔdilaloo, Ɓee-booje lai tuji no̰ Njesigənea̰’g No̰ boo-oŋg’d ləa.

Jeremi 4:7

Toboḭ ḭ loo-kum’g unda loo teḛ ləm, Njetuji ginkoji dəwje gə raŋg lé Uba loo-tée ya̰ Si njaa gə mba tuji ɓee lə sí, Ɓee-booje lə sí d’a tuji pugudu-pugudu ləm, Dəw kára kara a nai keneŋ el ləm tɔ.

Jeremi 5:18

Nɛ mee ndəaje’g neelé Njesigənea̰ pana: M’a tuji sí gə gel sí lai el.

Jeremi 50:17

Israɛl lé to ŋgon badə gə́ ndəm Gə́ toboḭje tuba gée, Mbai gə́ Asiri ɓa gə́ njesɔ dakasee kédé, yeḛ gə́ rudu lé to Nebukadnesar, mbai gə́ Babilɔn ndá yeḛ təd siŋga rém-rém.

Jeremi 50:7

Deḛ lai gə́ d’iŋga dee Ndá d’usɔ dee rɔg-rɔg Ndá njéba̰je lə dee pana: Taree wa dɔ neḛje el. Mbata deḛ ya ra kaiya D’ɔs ne ta lə Njesigənea̰ Gə́ to loo-gaŋg-rəwta Gə́ gə dɔ najee lé rəw ləm, D’ɔs Njesigənea̰ gə́ to nékunda-mee-yel lə bɔ deeje-je lé rəw ləm tɔ.

Jeremi 8:13

Ma m’ndigi kar dee d’udu guduru, Njesigənea̰ ɓa pa bèe. Kandə nduú a godo rɔ nduú’g ləm, Kandə kodé a godo rɔ kodé’g ləma, Kam dee a ndòlé ləm tɔ, Néje lai gə́ ma m’ar dee kédé lé D’a sané pá rɔ dee’g.

Jeremi 8:16

Ndu ndil lə kundaje ləa ɓar Kel loo gə́ Dan ləm, Loo gə́ d’oo ndu ndil lə dee ndá Dɔ naŋg nee lai yə ɓugu-ɓugu ləm tɔ. Deḛ ree ndá tuji naŋg Gə néje lai gə́ keneŋ ləm,

Nɔ̰-ndôo gə́ wɔji dɔ Jerusalem 2:12

Deḛ d’un ta dəji ko̰ deeje pana: See loo gə́ ra ɓa j’a kiŋga nésɔ gə mán-kai keneŋ wa. Deḛ toso ne dan rəwje’d gə́ mee ɓee-boo’g Asəna gə dəwje gə́ d’iŋga doo bèe. Tɔɓəi deḛ d’wəi ne kaar ko̰ deeje’g tɔ.

Nɔ̰-ndôo gə́ wɔji dɔ Jerusalem 2:2

Mbaidɔmbaije tuji loo-sije lə Jakob lai-lai Lal koo kəmtondoo ləa ləm, Dan meekḭ jugugu’g ləa lé Yeḛ unda ne kəi-kaar-kɔgərɔje Lə ŋgolə Juda gə́ dené lé naŋg rab-rab ləma, Yeḛ ar dee tel gɔl ne naŋg ləm tɔ, Tɔɓəi yeḛ ila ndɔl dɔ ɓeeko̰’g ləm, Gə dɔ ŋgan-mbaije gə́ keneŋ ləm tɔ.

Ejekel 36:4

ndá seḭ mbalje gə́ Israɛl lé ooje ta lə Mbaidɔmbaije gə́ Njesigənea̰! Mbaidɔmbaije gə́ Njesigənea̰ pata togə́bè ar mbalje, gə dɔdərlooje, gə kəm-rəw-manje, gə wəl-looje, gə looje gə́ tuji gə́ tel to dɔdilaloo, gə ɓee-booje gə́ d’uba dee d’ya̰ dee gə́ tel to gə́ nékwa gə nékunda-kogo lə ginkoji dəwje gə raŋg gə́ gugu dɔ dee lé.

Ojee 2:12

Bèe ɓa ɓasinè n’a kɔr kubu kudee’g kəm njéto səaje’g Ndá dəw kára kara a kɔree ji neḛ’g el.

Ojee 8:14

Israɛlje d’ar meḛ dee wəi dɔ yeḛ gə́ njekunda dee’g Ndá deḛ d’unda kəi-mbaije ləm, Judaje kara d’ar ɓee-booje gə́ gə siŋga dee lé D’ḭ dɔ maree’d gə́ kédé-kédé ləm tɔ. Nɛ m’a kar pər roo ɓee-booje lə dee ləm, A roo kəi-mbaije lə dee ləm tɔ.

Joɛl 2:3

Loo gə́ to no̰ dee’g lé To asəna gə pər gə́ roo loo dula-dula bèe ləm, Loo gə́ goo dee’g lé To asəna gə ndo̰ pər gə́ o̰ loo rug-rug bèe ləm tɔ, Dɔ naŋg gə́ no̰ dee’g kédé lé To asəna gə loo-ndɔ gə́ Edḛ bèe, Nɛ goo dee’g gogo ndá Loo tel to dɔdilaloo gə́ majel, Né kára kara nai keneŋ el.

Ləbije 26:16

aa ooje, né gə́ m’a gə ra sə sí ɓa nee: M’a kula gə néɓəlje, gə rɔko̰ gə́ sɔ siŋga dəw, gə rɔnuŋga dɔ sí’g ndá kəm sí a to ne ndòo ləm, seḭ a síje dan némeeko̰’g ləm tɔ, seḭ a dubuje né ya nɛ a kiŋgaje née el mbata njéba̰je lə sí d’a sɔ lai.

Soponi 3:6

Ma m’tuji ginkoji dəwje gə raŋg M’ar dee d’udu guduru ləm, Kəi-kaar-kɔgərɔje lə dee kara Ma m’tuji ləm tɔ, M’ar mba̰-rəwje lə dee tuji pugudu ləm, Njedəs keneŋ kara godo ləm tɔ! Ɓee-booje lə dee tuji pugudu ləm, Dəwje gə́ d’isi keneŋ kara godo ləm tɔ.

Malasi 1:4

Ɓó lé Edɔmje pana: Jeḛ lé ɓeeje lə sí tuji mba̰ nɛ j’a tel gɔl dee gogo ɓəi. Ndá Njesigənea̰ gə́ njeboo-néje lé pa togə́bè pana: Ɓó lé deḛ tel gɔl kara m’a kunda naŋg rab-rab ya. Ndá d’a ɓar dee dɔ naŋg gə́ némeeyèrje taa loo keneŋ pəl-pəl ləm, gə koso-dəwje gə́ mee Njesigənea̰ ḭ səa pu dɔ dee’g gə no̰ ləm tɔ.

Tel tura Godndu 28:33

Koso-dəwje gə́ seḭ a gər deeje el ya d’a sɔ néndɔ lə sí ləm, gə néje lai gə́ seḭ iŋgaje loo-kula’g lə sí ləm tɔ ndá ndɔje lai d’a kula kəm sí ndòo ləm, d’a ra sə sí né gə́ kədərə ləm tɔ.