Jeremi 40:3 - Maktub gə́ To gə Kəmee

³ Njesigənea̰ ar néje neelé ree ləm, ta gə́ yeḛ pa lé aw lée’g béréré ləm tɔ ndá néje neelé teḛ dɔ sí’g mbata seḭ raje kaiya ɔsje ne ta lə Njesigənea̰ rəw ləm, seḭ unje mbi sí rəw dɔ ta’g ləa ləm tɔ.

Jeremi 40:3 Iomraidhean Croise

Nehemi 9:28

Nɛ loo gə́ deḛ d’iŋga loo-kwa-rɔ dee ndá Deḛ tel d’un néra gə́ majel ra nɔḭ’g ya tɔɓəi. Togə́bè ɓa i uba dee ya̰ dee ne ji njéba̰je’g lə dee Ar dee d’o̰ ɓee dɔ dee’g. Yen ŋga deḛ tel no̰ gə́ rɔi’g Ndá i oo ndu dee mee dara gə́ tar Tɔɓəi gə goo boo-meekɔrjol ləi lé I ɔr dee ɔm dee ne tar gɔl bula tɔ.

Nehemi 9:33

I to njera né gə dɔ najee dɔ néje lai gə́ teḛ dɔ sí’g ya I ra néje lai gə goo rəbee Nɛ jeḛ ɓa jeḛ n’raje majel.

Jeremi 11:17

Njesigənea̰ gə́ njeboo-néje gə́ man sí lé ɓar némeeko̰ gə́ dɔ sí’g. Mbata meeyèr lə gel-bɔje lə Israɛl ləm, gə ka̰ Judaje ləm tɔ, deḛ ɓa ra né d’ar mee neḛ ḭ ne sə neḛ pu, loo gə́ deḛ tuu ne né gə́ ə̰də sululu d’ar Baal lé.

Jeremi 22:8

Ginkoji dəwje gə raŋg bula d’a dəs mbɔr ɓee-boo’g neelé ndá d’a dəji na̰ ta yo gə́ nee pana: See gelee ban ɓa Njesigənea̰ ra gə ɓee-boo neelé né gə́ togə́bè wa.

Jeremi 39:16

Aw ula Ebed-Melek, dəw gə́ Etiopi pana: Njesigənea̰ gə́ njeboo-néje gə́ to Ala lə Israɛlje lé pa togə́bè pana: Aa oo, néje gə́ m’a karee ree dɔ ɓee-boo’g neelé to néje gə́ majel gə́ m’ila mberee lé ɓó to néje gə́ maji ɓa el. Néje neelé d’a ree mee ndəa’g neelé kari oo dee gə kəmi ya.

Jeremi 44:23

Mbata seḭ tuuje né gə́ ə̰də sululu raje ne kaiya ɔsje ne ta lə Njesigənea̰ rəw ləm, mbata seḭ unje mbi sí rəw dɔ ta’g lə Njesigənea̰ ləma, seḭ aaje dɔ godndiaje, gə ndukunje ləa, gə torndiaje el ləm tɔ, gelee gə́ nee ɓa némeekonje nee teḛ ne dɔ sí’g to gə́ d’oo ne ɓogənè lé tɔ.

Jeremi 50:7

Deḛ lai gə́ d’iŋga dee Ndá d’usɔ dee rɔg-rɔg Ndá njéba̰je lə dee pana: Taree wa dɔ neḛje el. Mbata deḛ ya ra kaiya D’ɔs ne ta lə Njesigənea̰ Gə́ to loo-gaŋg-rəwta Gə́ gə dɔ najee lé rəw ləm, D’ɔs Njesigənea̰ gə́ to nékunda-mee-yel lə bɔ deeje-je lé rəw ləm tɔ.

Nɔ̰-ndôo gə́ wɔji dɔ Jerusalem 2:17

Njesigənea̰ ra to gə́ yeḛ wɔji mée’g kédé lé ya. Taje gə́ yeḛ pa kédé gə́ ləw lé kara Yeḛ tɔl bém tɔ, Yeḛ tuji loo lal koo ne kəmtondoo ləm, Yeḛ teli gə́ nékalrɔ lə njeba̰ ləi ləma, Yeḛ ar siŋga njékula kəmi ndooje lé Ḭ dɔ maree’d gə́ kédé-kédé ləm tɔ.

Njé gə́ Rɔmə 2:5

Dɔkədərə ləi gə meendər dɔ kaiya’g ləi yee ɓa ar Ala turu ne oŋg ləa mée’g saar ndɔ kinja gin oŋg lé gə́ Ala a gaŋg ne ta dɔi’g gə goo rəbee.

Njé gə́ Rɔmə 3:19

Jeḛ n’gər gao taje lai gə́ godndu wɔji lé wɔji ar deḛ gə́ d’isi gel godndu’g lé mba kar nana kara təa to gə loo ndèmee sem-sem ləm, gə mba kar dəwje lai-lai d’isi gə ta dɔ dee’g no̰ Ala’g lé ləm tɔ.

Tel tura Godndu 29:25

To mbata deḛ d’aw pole magəje ləm, d’unda barmba no̰ dee’g ləm tɔ, to magəje gə́ deḛ gər dee el ləm, Njesigənea̰ ar dee gə́ néka̰ dee el ləm tɔ.