Jeremi 38:7 - Maktub gə́ To gə Kəmee

⁷ Ebed-Melek, dəw gə́ Etiopi gə́ to njekaa dɔ néje gə́ si mee kəi’g lə mbai oo sor kila gə́ d’ila Jeremi bwa-mán’g lé. Mbai lé si tarəwkɔg’d lə Bḛjami.

Jeremi 38:7 Iomraidhean Croise

2 Mbaije 24:15

Yeḛ aw gə Jojakḭ Babilɔn, ko̰ mbai ləm, gə denéje lə mbai ləm, gə njékulaje ləa gə́ boo-boo ləma, gə dəwje gə́ boo-boo gə́ mee ɓee’g ləm tɔ lé yeḛ wa dee gə́ ɓər Jerusalem aw sə dee Babilɔn tɔ.

Pakɔsje 68:31

Da gə́ loo-siée to mee mu-kwaa’g ləm, Gə koso-bɔ maŋgje gə ŋgan maŋgje lə koso-dəwje neelé Gə́ d’unda barmba nɔḭ’g gə larndaje lə dee ləm tɔ lé Maji kari ḭ sə dee ar dee ndəb pəd-pəd, Koso-dəwje gə́ mal rɔ ra dee kara Maji kari sané dee kad-kad ləm tɔ.

Gosota-Kəmkàrje 29:10

Dəwje gə́ ta kila məs wa dɔ dee lé D’ə̰ji dəw gə́ njera né gə goo rəbee bəḭ-bəḭ, Nɛ dəwje gə́ njéra nédanaje lé D’aa dəa kər-kər.

Esai 56:3

Maji kar dəw-dɔ-ɓee Gə́ ɔm gə Njesigənea̰ na̰’d pana: Njesigənea̰ unda neḛ ɓad Rɔ koso-dəwje’g ləa bèe el ləm, Maji kar njekuji pana: Aa ooje, neḛ n’to kag gə́ tudu bèe el ləm tɔ!

Jeremi 13:23

See dəw gə́ Etiopi askəm tel ndar rəa ɓəd, Esé kàg a tel ndaŋg ləa ɓəd wa. Seḭ gə́ néra gə́ majel ɓa gə́ né gel sí, See seḭ asjekəm tel raje né gə́ maji Gə dɔ rɔ sí wa.

Jeremi 20:2

Ndá Pasur lé kunda Jeremi njetegginta tɔɓəi ila ɗa gɔlee’g tarəw gə́ lə Bḛjamije dɔ maree gə́ tar mee kəi’g lə Njesigənea̰.

Jeremi 26:16

Ŋgan-mbaije gə koso-dəwje lai d’ula njékinjanéməsje gə njéteggintaje pana: Dəw neelé kəm karee wəi el. Mbata yeḛ ula sí ta gə ri Ala lə sí gə́ Njesigənea̰ ɓa.

Jeremi 29:2

loo gə́ Jekonia, mbai ləm, gə kea̰je ləm, gə njéko̰ɓeeje ləm, gə mbaije gə́ Juda gə Jerusalem ləma, gə njéra-kula-kagje gə njéra lar-kudu-takəije ləm tɔ lé d’unda loo mee ɓee gə́ Jerusalem teḛ mba̰ lé.

Jeremi 34:19

gə mbaije gə́ Juda ləm, gə mbaije gə́ Jerusalem ləm, gə njéko̰ɓeeje ləm, gə njékinjanéməsje ləma, gə koso-dəwje lai gə́ mee ɓee’g nee gə́ njaa mbuna dakas ŋgon maŋg gə́ gaŋgee dana ləm tɔ lé

Jeremi 37:13

Loo gə́ yeḛ teḛ tarəwkɔg’d lə Bḛjamije ndá ɓé-njéŋgəmlooje gə́ ria lə Jireija gə́ to ŋgolə Selemia, ŋgolə Hanania aar lée’g neelé ndá yeḛ uba Jeremi, njetegginta wá pana: I si aw mba kɔm gə Kaldeje na̰’d.

Jeremi 38:8

Ebed-Melek unda loo kəi lə mbai teḛ aw ulá ta togə́bè pana:

Amɔs 5:10

Dəw gə́ ndaŋg dee tarəwkɔg’d lé D’wá gə meḛ dee ləm, Yeḛ gə́ ɔr ta gə́ tɔgərɔ kara Deḛ d’ə̰jee bəḭ-bəḭ ləm tɔ.

Jakari 14:10

Ɓee bura a tel to kasəna gə ndag-loo gə́ un gelee Geba saar teḛ Rimo̰, Par gə́ dɔkɔl lə Jerusalem, Ndá Jerusalem lé d’a kunee gə́ tar karee to lée’g ya Un gelee tarəwkɔg’d lə Bḛjami ya Saar teḛ ne loo gə́ tarəw gə́ dɔtar ləm, Saar teḛ ne tarəw gə́ to dɔkum kəije’g ləm tɔ, Un kudee kəi-kaar-kɔgərɔ’g lə Hananeel Saar teḛ ne godə loo-mbula-Kandə-nduú’g lə mbai ləm tɔ.

Matiyo 20:16

Togə́bè ɓa deḛ gə́ goo loo gə́ gogo lé d’a kaw gə́ ŋgaw ta dee kédé, tɔɓəi deḛ gə́ d’aw gə́ ŋgaw ta dee kédé lé d’a tel to njé gə́ goo loo gə́ gogo tɔ.

Tel tura Godndu 21:19

bɔbeeje gə kea̰je d’a kwá kaw səa rɔ ŋgatɔgje gə́ mee ɓee-boo’g ləa gə́ d’isi tarəwkɔg’d lə ɓee lé,

Jujé 20:4

Njetɔl dəw lé a kaḭ kaw par gə́ ɓee’g kára’d gə́ mbuna ɓee-booje’g neelé ləm, a kaar naŋg tarəwkɔg’d lə ɓee-boo neelé ləma, a kɔr goo ta ləa kar ŋgatɔgje gə́ mee ɓee-boo’g neelé d’oo ləm tɔ, bèe ɓa d’a kwá gə́ rɔ dee’g mee ɓee-boo’g neelé ləm, d’a karee loo-siée mba karee si sə dee’g ləm tɔ.