Jeremi 36:3 - Maktub gə́ To gə Kəmee

³ Loo gə́ gel-bɔje lə Juda d’a koo sor némajije lai gə́ ma m’wɔji gə mba ra sə dee lé ndá banelə nana kara a kɔs badm tel dɔ rəw-kabee gə́ majel’g. Yen ɓa məəm a koso lemsé dɔ panjaa dee’g ləm, gə dɔ kaiya ra dee’g ləm tɔ.

Jeremi 36:3 Iomraidhean Croise

Nehemi 1:9

Nɛ ɓó lé jeḛ n’tel reeje rɔi’g ləm, ɓó lé jeḛ j’aaje dɔ godnduije n’raje née ləm tɔ ndá lé d’a kwa sí ɓər kaw sə sí rudu dara’g kara lée gə́ neelé ɓa i a mbo̰ sí dɔ na̰’d ləm, i a tel ree sə sí loo gə́ i ɔr unda gə mba kar rii ɓar keneŋ lé ləm tɔ.

Pakɔsje 139:24

Aa loo oo ɓó lé m’aw rəw gə́ majel’g ndá Ɔr nɔm dan rəw gə́ to gə no̰’g.

Esai 6:10

Ar meḛ koso-dəwje neelé ndər ləm, Ar mbi dee udu ləma, Ar kəm dee libi ləm tɔ, Ɓa nà d’a koo gə kəm dee gə mbi dee ləm, D’a kḛji meḛ dee’g gər ginee ləma, D’a kɔs badm tel kar neḛ n’aji dee ləm tɔ.

Jeremi 18:11

Ɓasinè, maji kam m’pata m’ar dəwje gə́ Juda ləm, gə deḛ gə́ d’isi Jerusalem ləm tɔ pana: Njesigənea̰ pa togə́bè pana: Aa ooje, neḛ n’wa dɔ gɔl némeeko̰ mba ra sə sí ləm, neḛ n’la̰ji ta né mba ra sə sí ləm tɔ. Maji kar sí gɔlje rəw-kaw sí ləm, gə kula ra sí ləm tɔ.

Jeremi 18:8

Nɛ ɓó lé ginkoji dəwje neelé gə́ ma m’pata m’wɔji ne dɔ dee lé d’ya̰ goo meeyèr lə dee ndá ma tel gə ndum dɔ majel gə́ m’wɔji mba ra sə dee lé tɔ.

Jeremi 23:14

Nɛ mbuna njéteggintaje gə́ Jerusalem lé Neḛ n’oo néje gə́ to kḛji Gə́ to ɓəl kədm-kədm. Deḛ to njémɔdkaiyaje ləm, Deḛ njaa gə taŋgɔm ɓa ta dee’g ləm tɔ. Deḛ d’ula diŋgam meḛ njéra némajelje’g Gə mba kar dəw kára kara Uba goo meeyèr ləa ya̰ el. Neḛ n’oo deḛ lai asəna gə ɓee gə́ Sɔdɔm ləm, Neḛ n’oo njé gə́ Jerusalem kara Asəna gə ɓee gə́ Gɔmɔr ləm tɔ.

Jeremi 24:7

M’a kar dee ɓəŋgərə dee gə́ ka̰ gərm to gə́ ma m’to Njesigənea̰, ɓó lé d’a tel ree rɔm’g gə meḛ dee bura ndá d’a to koso-dəwje ləm ləm, m’a to Ala lə dee ləm tɔ.

Jeremi 26:3

Banelə d’a koo ta ləm kar nana kara ɔs badm tel ya̰ goo rəw-kabee gə́ majel. Bèe ɓa m’a kya̰ goo némajel gə́ m’wɔji gə mba ra sə dee mbata néra majelje lə dee lé.

Jeremi 35:15

Ma m’ula kuraje ləm lai gə́ to njéteggintaje rɔ sí’g, un kudee gə ndɔ rad ya m’ula dee m’ar dee d’aw d’ula sí pana: Ɔsje badm telje dɔ panjaa sí gə́ majel’g ləm, tel gɔlje néra síje ləma, awje goo magəje gə mba pole dee el ləm tɔ ndá seḭ a síje mee ɓee gə́ m’ar sí ləm, gə m’ar bɔ síje-je ləm tɔ. Nɛ seḭ tugaje mbi sí ooje ne ta ləm el ləm, seḭ unje mbi sí rəw dɔ’g ləm tɔ.

Jeremi 36:7

Banelə Njesigənea̰ a koo ndu ndòo raje lə dee kar nana kara a kɔs ne badm tel dɔ panjaa’g ləa gə́ majel’g. Mbata oŋg, gə meekḭ jugugu gə́ Njesigənea̰ wɔji-kwɔji ra gə koso-dəwje neelé to ɓəl yaa̰.

Ejekel 12:3

Ma ŋgon-dəw lé maji kam m’wa dɔ gɔl nékawmbá ləm, m’unda loo m’teḛ m’aw kəm dee’g dan kàrá ya! M’ḭ loo’g ləm gə́ m’isi keneŋ lé kəm dee’g ya m’aw loo gə́ raŋg’d, banelə a kar dee gər to gə́ deḛ to dəwje gə́ to njékɔsta-rəwje ya.

Ejekel 18:23

Kar njemeeyèr wəi lé see to né gə́ wa mee neḛ wa. Mbaidɔmbaije gə́ Njesigənea̰ dəji bèe. See karee tel panjaa ləa raŋg si ne kəmba ɓa gə́ né gə́ wa mee neḛ el wa.

Soponi 2:3

Seḭ njékula dɔ síje lai gə́ dɔ naŋg neelé Maji kar sí saŋgje Njesigənea̰, Seḭ lai gə́ raje né gə́ ndukunje ləa wɔji lé! Maji kar sí ndolèje goo meekarabasur ləm, Gə saŋgje loo kula dɔ sí ləm tɔ. Banelə Njesigənea̰ a kya̰ sí ndɔ oŋg’d ləa.

Matiyo 13:15

Mbata koso-dəwje neelé meḛ dee ndər ləm, Mbi dee udu ləma, Kəm dee libi ləm tɔ Ɓa nà d’a koo gə kəm dee gə mbi dee ləm, D’a kḛji meḛ dee gər ginee ləma, D’a kɔs ne badm tel kam m’aji dee ne ləm tɔ.

Mark 4:12

Mba kar dee d’oo gə kəm dee ya nɛ d’aa gə kaa mbə̰ ləm, Deḛ d’oo gə mbi dee ya nɛ ɓar mbi dee’g gə́ ɓar ɓó gər ginee el ləm tɔ, Ɓa nà d’a kɔs ne badm tel kar mee Ala oso lemsé dɔ dee’g.

Lugu 20:13

Mbai gə́ njendɔ-nduú lé pana: See m’a ra banwa. Ŋgon məəm gə́ m’ndigee m’undá dan kəm’g lé ya m’a kulá rɔ dee’g, banelə d’a ɓəl kəmee ya.

Néra Njékaḭkulaje 26:18

mba kari ar kəm dee inja, kar dee d’ḭ ne dan loondul’g teḛ ne dan kàrá ləm, mba kar dee d’unda rɔ dee ji siŋgamoŋ’g lə Njekurai ti d’ɔm ne ji Ala’g lé ləma, mba kar dee d’ɔm meḛ dee dɔm’g mba kar məəm ti mbidi dɔ kaiya’g lə dee ɓó gə kar dee d’isi gə deḛ gə́ to gə kəmee lé d’iŋga sə dee nénoji lé tɔ.

Néra Njékaḭkulaje 26:20

M’aw Damas kédé ɓa m’aw Jerusalem ləm, gə ɓeeje lai gə́ to ɓeeko̰ gə́ Jude ləma, gə goo ɓeeje lə njépole-magəje lé ləm tɔ lé m’ula dee ta kwa ndòo rɔ dɔ kaiya’g lə dee ləm, gə kɔs badm tel gə́ rɔ Ala’g ləma, gə néra gə́ a kwa bua kwa ndòo rɔ dɔ kaiya’g ləm tɔ.

Néra Njékaḭkulaje 28:27

Mbata koso-dəwje lé meḛ dee ndər ləm, Mbi dee udu ləma, kəm dee libi ləm tɔ, Ɓa nà d’a koo gə kəm dee gə mbi dee ləm, D’a kḛji meḛ dee’g gər ne ginee ləma, D’a kɔs badm tel kar neḛ n’aji dee ləm tɔ.

Néra Njékaḭkulaje 3:19

Bèe ndá waje ndòo rɔ sí dɔ kaiya’g lə sí ɔsje badm telje mba kar kaiya lə sí ɔr ndɔs-ndɔs ləm,

Tel tura Godndu 30:2

ɓó lé seḭ telje reeje rɔ Njesigənea̰ Ala’g lə sí ləm, ɓó lé seḭ tədje kag torndia dɔɓəŋgərə sí’g gə kankəmrɔ sí bura, seḭ ləm gə ŋgan síje-je gə goo néje lai gə́ ma m’ndaŋg taree m’ar sí ɓogənè ləm tɔ ndá,

Tel tura Godndu 30:8

Nɛ seḭ lé a telje reeje rɔ Njesigənea̰’g ləm, seḭ a kilaje koji dɔ torndiaje’g gə godndiaje lai gə́ ma m’un m’ar sí ɓogənè mba kar sí raje née ləm tɔ.

Tel tura Godndu 5:29

Né kára ba lé ɓó lé deḛ d’wɔji meḛ dee’g njaŋg gə mba ɓəlm ləm, gə mba kaa dɔ torndumje kər-kər ləm tɔ ndá deḛ ləm, gə ŋgan deeje ləm tɔ lé d’a si gə rɔlel saar-saar gə no̰ ya.

2 Piɛrə 3:9

Mbaidɔmbaije lé to njekuba goo ndukun ləa kyá̰ el. Njé gə́ na̰je ɓa la̰ji meḛ dee’g pana: Yeḛ uba yá̰ gə́ kyá̰ ŋga nɛ yeḛ ila mée dɔ sí’g po̰ mbata yeḛ ndigi kar dəw kára kara tuji el, nɛ yeḛ ndigi kar sí-seḭ lai unje kəm sí dɔ kaiya’g lə sí rəw ya.

1 Samel 7:3

Samel ula ginkoji Israɛlje lai pana: Ɓó lé seḭ telje reeje rɔ Njesigənea̰’g gə ŋgaw meḛ sí bura ndá tɔrje magəje gə́ dɔ ɓee’g ləm, gə magəje gə́ ri dee lə Astarte ləm tɔ mbuna sí’g ndá arje meḛ sí to gə́ dɔ Njesigənea̰’g ləm, raje né areeje-yeḛ nja kára ba ləm tɔ. Yee ɓa yeḛ a kɔr sí ne ji Pilistije’g kɔm sí tar ya.