Jeremi 31:12 - Maktub gə́ To gə Kəmee

¹² D’a ree ra ne wəl gə rɔlel Dɔ dɔdərlooje gə́ Sio̰, D’a kaiŋgwɔd gə́ dɔ némajije’g Le Njesigənea̰ gə́ to wa ləm, Gə mán-nduú gə́ sigi ləm, gə ubu ləm, Gə badje ləma, gə maŋgje ləm tɔ, Meḛ dee a to kasəna gə loo-kamnaḭ Gə́ saga mán keneŋ bèe Ndá d’a si dan némeeko̰’g el ŋga.

Jeremi 31:12 Iomraidhean Croise

Pakɔsje 130:4

Nɛ i nja loo kiŋga meekoso lemsé to mbɔri’g Gə mba kar dəwje ɓəli ne.

Esai 1:30

Mbata seḭ a toje kasəna Gə kag gə́ kamee ndòlé bèe ləm, A toje kasəna Gə loo-ndɔ gə́ mán godo keneŋ ləm tɔ.

Esai 35:10

Deḛ gə́ Njesigənea̰ uga dɔ dee lé D’a tel ree, D’a kaw Sio̰ gə pa kun baŋga ta dee’g ləm, Rɔlel gə́ to gə no̰ a to dɔ dee’g ləm tɔ, Boo-rɔkal gə rɔlel lé d’a rəm pər ya Nɛ némeeko̰ gə tuma̰ ŋgururu-ŋgururu d’a godo tɔ.

Esai 51:11

Togə́bè ɓa deḛ gə́ Njesigənea̰ uga dɔ dee lé D’a tel ree, D’a tel ree Sio̰ gə pa kun baŋga ta dee’g Ndá rɔlel gə́ to gə no̰ a to dɔ dee’g asəna gə dɔgugu bèe, Kalrɔ gə rɔlel d’a ree pər gə́ rɔ dee’g ləm, Meeko̰ gə tuma̰ ŋgururu-ŋgururu d’a sané pá ləm tɔ.

Esai 52:8

Ndu njéŋgəmlooje lə sí ɓar wəl, Deḛ d’ɔr ndu dee gə́ tar ləm, Deḛ d’ɔr ndu dee gə́ tar na̰’d wəl Gə ndu pa kalrɔ ləm tɔ, Mbata kəm dee-deḛ ya d’oo ne To gə́ Njesigənea̰ tel gə njé gə́ Sio̰ mba̰.

Esai 58:11

Njesigənea̰ a to njekɔrnoḭ ya ta-ta ləm, Yeḛ a kar məəi nda̰ tub Mee looje gə́ tudu kurum-kurum’g ləm, Yeḛ a kar barkəmrɔije tel ŋgəŋ ŋgəŋ-ŋgəŋ ləm, I a to kasəna gə loo-kamnaḭ Gə́ saga mán dɔ’g ləma, A to kasəna gə ŋgira mán Gə́ manje d’yi keneŋ tə el ləm tɔ.

Esai 60:20

Kàr ləi a kur naŋg el ŋga ləm, Naḭ ləi kara a kwa til el ŋga ləm tɔ. Mbata Njesigənea̰ ɓa a to lookàr ləi saar-saar gə no̰ ləm, Ndɔ-kwa-ndòo-yoo ləi a dəs ŋga ləm tɔ.

Esai 65:19

M’a kar Jerusalem to gə́ nékalrɔ ləm ləm, M’a kar koso-dəwje ləm tɔ gə́ nérɔlel ləm ləm tɔ, D’a koo ndu no̰ gə ndu kii keneŋ gogo el.

Jeremi 3:14

Gə́ tel reeje, seḭ njékɔsta-rəwje, Njesigənea̰ ɓa pa bèe, mbata ma m’to ɓée síje. M’a kun sí mee ɓee-boo gə́ kára ləm, m’a kodo sí joo dan njémeekəije gə́ kára ləm tɔ. Ndá m’a kaw sə sí Sio̰.

Jeremi 31:24

Lée neelé Judaje gə ɓee-booje lə deḛ lai ləm, gə njḛ́dɔje ləm, gə deḛ gə́ d’on koso-nékulje ləm tɔ d’a si keneŋ.

Jeremi 31:25

Mbata yeḛ gə́ ɔr kɔd-kɔd lé m’a karee siŋgá ləm, nana ɓa gə́ unda ndolè kara m’a karee né gə́ yeḛ aw ndée ləm tɔ.

Jeremi 31:4

M’a tel gɔl sí gogo ndá Seḭ a kaarje njaŋg, Seḭ Israɛlje gə́ toje asəna gə ŋgoma̰də Gə́ gər ŋgaw el! Seḭ a teḛje gə mbarèje lə sí Ndamje ne gə rɔlel gə njéboa-ndamje lə sí.

Jeremi 31:6

Mbata ndɔ gə́ a gə ree lé Njéŋgəmlooje d’a ra né wəl Dɔ mbal gə́ Eprayim pana: Ḭje tar ar sí j’awje Sio̰ Rɔ Njesigənea̰ Ala’g lə sí!

Jeremi 31:7

Mbata Njesigənea̰ pa togə́bè pana: Raje né wəl gə ndu rɔlel dɔ Jakob’g ləm, Arje boo-rɔkal lə sí nduba rəa gə́ raga Dɔ yeḛ gə́ to doŋgɔr Le ginkoji dəwje gə raŋg ləm tɔ. Ɔrje ndu sí gə́ tar ɔsje ne pa Pideeje paje ne pana: Njesigənea̰, maji kari taa Dɔ koso-dəwje ləi, Ges Israɛlje gə́ nai lé!

Jeremi 32:15

Mbata Njesigənea̰ gə́ njeboo-néje gə́ to Ala lə Israɛlje lé pa togə́bè pana: D’a gə ndogo kəije gə loo-ndɔje gə ndɔ-nduúje ya ɓəi mee ɓee’g neelé.

Jeremi 33:12

Njesigənea̰ gə́ njeboo-néje lé pa togə́bè pana: Lée neelé gə́ to dɔdilaloo gə́ dəwje əsé daje godo keneŋ ləm, gə mee ɓee-booje ləa lai ləm tɔ lé loo-si njékulbadje a to keneŋ gə mba kar dee d’ar koso-nékulje lə dee d’wa rɔ dee keneŋ.

Jeremi 33:13

Mee ɓee-booje gə́ dɔ mbal’g ləm, gə mee ɓee-booje gə́ ndag-loo’g ləm, gə mee ɓee-booje gə́ dɔkɔl ləm, gə mee ɓee’g lə Bḛjami gə looje gə́ gugu dɔ Jerusalem ləma, gə mee ɓee-booje gə́ Juda ləm tɔ lé badje d’a dəs gel ji njetura dee’g ya ɓəi. Njesigənea̰ ɓa pa bèe.

Ejekel 17:23

N’a mea̰ dɔ mbal gə́ ŋgal gə́ Israɛl. Yee a tɔ barkəmeeje ləm, a kandə njim-njim ləma, a tel to kag-sɛdrə gə́ maji dum ləm tɔ. Yelje gə́ gə gel dee gel dee d’a kwa rɔ dee gelee’g ləm, néje lai gə́ gə bag dee d’a kwa rɔ dee barkəmeeje’g ləm tɔ.

Ejekel 20:40

Mbata dɔ mbal lə neḛ gə́ to gə kəmee gə́ to mbal lə Israɛlje gə́ ŋgal lé lée neelé ɓa gel-bɔje lə Israɛl lai gə́ to deḛ lai gə́ d’isi mee ɓee’g neelé d’a kwa neḛ meḛ dee’g keneŋ, Mbaidɔmbaije gə́ Njesigənea̰ ɓa pa bèe, lé neelé ɓa n’a kwa dee gə́ rɔ neḛ’d gə́ majee keneŋ ləm, n’a ndigi nékarje lə sí gə́ to kandə nénojije lə sí gə́ doŋgɔr ləm, gə néje lai gə́ seḭ a kundaje gə kəmee kar neḛje lé ləm tɔ.

Ejekel 34:14

N’a kul dee loo-ko̰-mu gə́ maji’g ləm, loo-to dee a to dɔ mbalje gə́ Israɛl gə́ ndəw ləm tɔ, lé nee ɓa d’a kwa rɔ dee loo-kwa-rɔ deḛ gə́ maji’g ləm, d’a kiŋga loo-ko̰-mu lə dee gə́ idi lururu dɔ mbalje gə́ Israɛl ləm tɔ.

Ejekel 36:30

N’a kar kandə kagje gə kandə néndɔje lə sí ḭ dɔ maree’d gə́ kédé-kédé mba kar rɔkul-boo lə ɓoo-boo tibi mbɔr sí mbuna ginkoji dəwje gə raŋg’g el ŋga.

Ojee 3:5

Gée gə́ gogo ndá Israɛlje d’a tel ree rɔ Njesigənea̰’g tɔɓəi d’a ndolè goo Ala lə dee ləm, gə Dabid gə́ to mbai lə dee ləm tɔ. Mee ndɔje gə́ aw ree’g lé, deḛ d’a rəm pər gə́ rɔ Njesigənea̰’g ləm gə rɔ némeemajije’g ləa ləm tɔ gə kàr gəd ya.

Ajee 2:19

See néje gə́ ka̰ dubu nai mee damje’g ya ɓəi wa. Kag-nduúje əsé kag-kodéje əsé kag-dḭje əsé kag-koiyoje kara d’andə el. Nɛ un kudee mee ndəaje gə́ nee lé n’a tel tɔr ndu neḛ dɔ sí’g ya.

Jakari 8:12

Mbata kandə néje gə́ deḛ dubu lé A teḛkɔr ləm, Nduú a kul bo̰-bo̰ gə ka̰dee ləm, Naŋg a kar dee nésɔ dee ləma, Dara a kar dee mán-tàl ləm tɔ, Bèe ɓa n’a kar ges koso-dəwje gə́ nai neelé D’al rɔ dee wɔji dɔ néje’g neelé lai ya.

Tagə́maji gə́ Ja̰ ndang 16:22

Seḭ kara ɓasinè lé seḭ síje dan némeeko̰’g, nɛ loo gə́ m’a tel koo sí ndá rɔ sí a lel sí tɔɓəi dəw kára kara a kɔr rɔlel lə sí el tɔ.

Njé gə́ Rɔmə 2:4

See bao-noji lə Ala ləm, gə meekila ləa ləma, gə meekai sam-sam ləa ləm tɔ lé i ə̰ji bəḭ-bəḭ wa. See meemaji lə Ala gə́ ɔsi ɓɔḭ-ɓɔḭ gə mba kari wa ndòo rɔi dɔ kaiya’g ləi lé see i gər el wa.

Loo gə́ killa rea kəm Ja̰’g 21:4

Yeḛ a bɔr mán-no̰ kəm dee’g ləm, yoo a ɓar ri dee gogo el ləm, kəmndooyoo kara a godo ləm, no̰ yoo a godo ləma, meeko̰ kara a godo ləm tɔ mbata néje gə́ dɔtar lé sané pá mba̰.

Loo gə́ killa rea kəm Ja̰’g 7:17

Mbata Ŋgonbad gə́ si dan kalimbai’g lé a ko̰ dee, a kɔr no̰ dee kaw sə dee kəm-rəw-mán gə́ ula tar yal-yal. Ala a bi mán-no̰ kəm dee’g pəd-pəd tɔ.