Jeremi 30:11 - Maktub gə́ To gə Kəmee

¹¹ Mbata Njesigənea̰ pana: Ma m’nai səi gə mba kɔri kilai tar, Ginkoji dəwje gə raŋg lai Gə́ ma m’tubai m’ilai mbuna dee’g lé M’a tuji dee pugudu-pugudu, Nɛ i lé ndá m’a tujii pugudu el, M’a kar bo̰ nérai ɔs tai’g gə goo rəbee Ɓó ma m’askəm kya̰’i Lal kwɔjii kəmkàr el!

Jeremi 30:11 Iomraidhean Croise

2 Samel 24:12

Aw ula Dabid pana: Njesigənea̰ pa togə́bè pana: N’unda nékəmndooje munda nea̰’g. Maji karee mbər yee gə́ kára dan dee’g ndá n’a kula ne kəmee ndòo wa lé.

Pakɔsje 6:1

Pa lə Dabid gə́ ar bao-pa mba karee ɔs sə dee lé. D’ɔs gə kṵdu-kag gə́ kulá jinaijoo.

Teḛ-Raga 34:7

meenoji ləa to saar-saar mbata lə ŋgaka deeje gə́ tɔl-dɔg-loo kára ləm, yeḛ ar mée oso lemsé dɔ deḛ gə́ néra dee to gə goo rəbee el ləm, gə dɔ njékal dɔ godnduje ləma, gə dɔ kaiya ra dee’g ləm tɔ, nɛ dəw gə́ ta wa dəa mba̰ lé yeḛ a kée gə́ njegelgodo el ləm, a kar bo̰ néra gə́ gə goo rəbee el lə bɔ ŋganje ɔs ta ŋgan deeje’g ləm, gə ŋgan meḛ ŋgan deeje ləm tɔ saar teḛ ne dɔ ŋgakadɔg deeje’g loo munda əsé loo sɔ bèe ya.

Esai 43:25

To ma nja ɓa m’tuji kaltaje lə sí Gə goo meenoji ləm ləm, M’a kar məəm olé dɔ kaiyaje’g lə sí Gɔgo el ləm tɔ.

Esai 8:10

Ɔmje ta lə sí na̰’d dɔ né gə́ seḭ wɔjije-kwɔji ra Ndá né neelé a teḛkɔr el, Unje ndu sí ar deeje Ndá a tel to né gə́ kari ba Mbata Ala si sə síjeḛ.

Jeremi 1:19

Deḛ d’a rɔ səi Nɛ deḛ d’a dum dɔi el, Mbata m’a nai səi mba kajii, Njesigənea̰ ɓa pa bèe.

Jeremi 1:8

I a ɓəl kəm dee el, Mbata m’a nai səi gə mba kajii. Njesigənea̰ ɓa pa bèe.

Jeremi 10:24

Ǝi Njesigənea̰, maji kari wɔjim kəmkàr Nɛ gə goo rəbee ɓa, Ɓó gə oŋg el, nà a tujim pugudu.

Jeremi 15:20

N’a telm asəna gə ndògo-larkas Mbata lə koso-dəwje neelé. D’a rɔ səm nɛ d’a dum dɔm el. Mbata n’a nai səm gə mba kajim ləm, Mba kɔrm ji dee’g ləm tɔ. Njesigənea̰ ɓa pa bèe.

Jeremi 4:27

Njesigənea̰ pa togə́bè pana: Ɓee bura a tel to dɔ nduba, Nɛ m’a tujee gə gelee bura el.

Jeremi 5:10

Ubaje dɔ ndògo-bɔrɔje ləa gə́ tar Ndá tujije loo, Nɛ tuji deeje lai el! Tɔrje barkəm nduúje ləa Gə́ to ka̰ Njesigənea̰ el lé!

Jeremi 5:18

Nɛ mee ndəaje’g neelé Njesigənea̰ pana: M’a tuji sí gə gel sí lai el.

Nɔ̰-ndôo gə́ wɔji dɔ Jerusalem 3:22

Némeemajije lə Njesigənea̰ lé Rudu dee godo ləm, Némeekaw taḭ-taḭje ləa kara D’unda ŋgaŋ dee el ləm tɔ.

Ejekel 11:13

Loo gə́ m’aw m’tegginta ndá Pelatia, ŋgolə Benaja oso vad wəi. Ma m’oso rəb m’dəb kəm naŋg tɔɓəi m’ra né gə ndum wəl m’pana: Ai-i Mbaidɔmbaije gə́ Njesigənea̰ see i a kar ges Israɛlje gə́ nai lé d’udu guduru bèe ya wa.

Ejekel 6:8

Nɛ n’a kya̰ ges síje gə́ na̰je kar dee taa rɔ dee ta kiambas’g mbuna ginkoji dəwje gə raŋg’g loo gə́ seḭ a saneje na̰ gə mee ɓeeje ɓəd-ɓəd lé.

Ojee 11:9

M’a ra né gə goo oŋg ləm gə ḭ səm pu lé el, M’a kya̰ goo tuji gə́ m’wɔji mba tuji ne Eprayimje lé. Mbata ma m’to Ala ɓó m’to dəw el, Ma m’to Njerɔkunda gə́ m’si mbuna sí’g, M’a tel ree ra né gə goo oŋg ləm el.

Ləbije 26:44

Nɛ loo gə́ d’a si mee ɓee’g lə njéba̰je lə dee kara m’a mbad dee gə no̰ el ləm, m’a tel ginkoji lə dee kar dee to gə́ né gə́ d’a tuji dee pugudu el ləma, ma gaŋg kúla manrɔ ləm rɔ sə dee el ləm tɔ, mbata ma m’to Njesigənea̰, Ala lə dee ya.

Matiyo 1:23

Aa oo, ŋgoma̰də a taa kèm ndá a koji ŋgon gə́ diŋgam, D’a kunda ria lə Emanuɛl (tel ta koji sí, Ala nai sə síjeḛ).

Matiyo 28:20

Ndoo deeje mba kar dee gər loo kaa dɔ néje lai gə́ m’un ndum m’ar sí lé. Aa ooje ma nja kara m’orè sə sí rəw na̰’d més saar ndɔ gə́ rudu naŋg nee a kun ɗiao.

Néra Njékaḭkulaje 18:10

mbata ma nja m’nai səi ya. Dəw kára kara a kɔrɔ rɔi ra səi majel el mbata koso-dəwje gə́ bula digi-digi mee ɓee-boo’g neelé to gə́ kama ya.

Tel tura Godndu 4:31

mbata Ala lə sí gə́ Njesigənea̰ to Ala gə́ njekookəmtondoo, yeḛ a kuba sí kya̰ sí el ləm, yeḛ a tuji sí el ləm tɔ. Mée a kwəi dɔ manrɔ’g lə bɔ síje-je gə́ yeḛ man ne rəa ar dee lé el.

2 Timote 4:22

Maji kar Mbaidɔmbaije nai gə ndili. Maji kar sí sije dan noji’g bèdèg.