Jeremi 22:21 - Maktub gə́ To gə Kəmee

²¹ Ma m’ula sí ta Loo gə́ seḭ síje dan maji’g, Nɛ seḭ pajena: A kooje ta el. Yee ɓa gə́ néra sí gə́ un kudee gə kas sí ba lé Seḭ unje ne mbi sí rəw dɔ ta’g lə neḛ.

Jeremi 22:21 Iomraidhean Croise

2 Sôrta Gḭka Israɛlje 33:10

Njesigənea̰ ula Manasə gə koso-dəwje ləa ta, nɛ deḛ d’un mbi dee dɔ’g rəw.

Pakɔsje 129:1

Pakɔs kḭ kaw tuga ne loo ɗao-ɗao gə́ tar. Un kudee loo gə́ m’nai basa ya ɓəi lé D’ulam ndubu lé d’aree asm ya, Maji kar Israɛlje lé pa bèe pana:

Gosota-Kəmkàrje 30:9

Nà banelə loo gə́ m’a si dan néje’g bèdèg ndá M’a mbadi pa ne pana: see Njesigənea̰ ɓa to nawa. Esé loo gə́ m’a si dan ndòo’g ndá M’a ɓogo kila ne ndɔl dɔ ri Ala’g lé ləm tɔ.

Esai 48:8

Seḭ ooje taree el ləm, Seḭ gərje el ləma, Ləw ba lé taree kara oso mbi sí’g el ləm tɔ, Mbata ma m’gər gao, Seḭ a gə toje njédɔkədərəje ləm, Un kudee gə kas sí ba lé Deḛ ɓar sí njékaltaje ləm tɔ.

Jeremi 13:10

Koso-dəwje nee gə́ to njémeeyèrje gə́ mbad koo taje lə neḛ ləm, gə́ ndolè goo takə̰jije gə́ meḛ dee’g ləma, gə ndolè goo magəje gə mba pole dee kunda ne barmba dəb kəm dee naŋg no̰ dee’g ləm tɔ lé maji kar dee tel to d’asəna gə ndar neelé gə́ to kəm ra ne né kára el ŋga lé tɔ.

Jeremi 19:15

Njesigənea̰ gə́ njeboo-néje, Ala lə Israɛlje pa togə́bè pana: Aa ooje, némeekonje lai gə́ m’pa taree kédé m’wɔji ne dɔ ɓee-boo neelé m’a gə karee teḛ dəa’g gə dɔ ɓee-booje lai gə́ nduna rɔ dee rəa’g lé mbata deḛ to njégwɔbkelkwɔije ɓó d’ur mbi d’oo ne taje ləm el.

Jeremi 2:25

Undaje kəmkàr dɔ rɔ sí’g Gə mba njaaje gɔl sí kari ba el ləm, Arje gwɔs sí tudu kurum-kurum el ləm tɔ! Nɛ seḭ pajena: Wah! to né kari ba! Mbata seḭ ndigije magəje gə́ dɔ ɓee’g ləm, Seḭ ndigije kawje goo dee’g ləm tɔ.

Jeremi 2:31

Seḭ ginkoji dəwje, Maji kar sí ooje ta lə Njesigənea̰ gə́ né ya! See ma m’to asəna gə dɔdilaloo mbata lə Israɛlje Esé ma m’to ɓee gə́ loo ndul keneŋ njudu-njudu wa. See gelee ban ɓa dəwje ləm pana: Loo gə́ meḛ sí ndigi ya j’a kaw’g Jeḛ ndigi kaw rɔi’g el lé wa.

Jeremi 25:3

Un kudee mee ləb gə́ njekɔm’g dɔg-giree-munda gə́ Jojias, ŋgolə Amo̰, mbai gə́ Juda o̰ ne ɓee saar ɓogənè lé Njesigənea̰ ulam ta as ləb rɔ-joo-giree-munda ŋga. Ma m’ula sí taree, m’ula sí taree ya teḛ gə́ ndɔ rad nɛ seḭ unje mbi sí rəw dɔ ta’g ləm.

Jeremi 25:4

Njesigənea̰ ula kuraje ləa lai gə́ njéteggintaje lé rɔ sí’g, yeḛ ula dee gə ndɔ rad ya. Nɛ seḭ unje mbi sí rəw dɔ’g ləm, seḭ tugaje mbi sí ooje ne ta lé el ləm tɔ.

Jeremi 25:7

Nɛ seḭ unje mbi sí rəw dɔ ta’g lə neḛ mba kar kula ra sí ar mee neḛ ḭ sə neḛ pu kar neḛ n’ra ne sə sí majel. Njesigənea̰ ɓa pa bèe.

Jeremi 25:8

Gelee gə́ nee ɓa Njesigənea̰ gə́ njeboo-néje pa ne togə́bè pana: To gə́ seḭ ooje taje lə neḛ el ndá

Jeremi 3:24

Magəje tuji kandə nékulaje lə bɔ síje-je Un kudee loo gə́ jeḛ nai ne basa ɓəi, Badje lə dee gə maŋgje lə dee Gə ŋgan deeje gə́ diŋgam gə njé gə́ dené tɔ.

Jeremi 3:25

Jeḛ lé n’toje naŋg dan rɔkul’g ləm, Rɔkul gə́ boo ɓa gə́ néko̰ dɔ sí ləm tɔ, Mbata jeḛ n’raje kaiya j’ɔsje ne ta lə Njesigənea̰, Ala lə sí rəw Jeḛ gə bɔ síje-je Un kudee loo gə́ jeḛ nai ne basa ɓəi Saar teḛ ɓogənè ləm, Jeḛ j’oo ndu Njesigənea̰, Ala lə sí gə́ né el ləm tɔ.

Jeremi 32:30

Mbata Israɛlje gə Judaje lé un kudee gə basa dee ya, né gə́ majel ɓa deḛ ra kəm’g, Israɛlje lé d’ar məəm ḭ səm pu gə né gə́ ji dee ɓa ra. Njesigənea̰ ɓa pa bèe.

Jeremi 35:15

Ma m’ula kuraje ləm lai gə́ to njéteggintaje rɔ sí’g, un kudee gə ndɔ rad ya m’ula dee m’ar dee d’aw d’ula sí pana: Ɔsje badm telje dɔ panjaa sí gə́ majel’g ləm, tel gɔlje néra síje ləma, awje goo magəje gə mba pole dee el ləm tɔ ndá seḭ a síje mee ɓee gə́ m’ar sí ləm, gə m’ar bɔ síje-je ləm tɔ. Nɛ seḭ tugaje mbi sí ooje ne ta ləm el ləm, seḭ unje mbi sí rəw dɔ’g ləm tɔ.

Jeremi 48:11

Ɓee gə́ Moab lé un kudee gə basee ba ya Aw yururu asəna gə mán-nduú Gə́ toso ɗəḭ-ɗəḭ dɔ gwɔiyee’g Ɓó dəw unee mbélee mee jo gə́ raŋg’d el ləm, D’aw səa ɓee-ɓər’g el ləm tɔ. Yee ɓa lel ləa ɔr ne el ləm, Baḭyee tel ə̰də ne ɓəd el ləm tɔ.

Jeremi 6:16

Njesigənea̰ pa togə́bè pana: Undaje rɔ sí rəwje’g aaje loo ooje. Dəjije kila-rəwje gə́ ləw ooje, See rəw gə́ ra ɓa maji wa. Bèe ndá njaaje keneŋ Ndá seḭ a kiŋgaje loo-kwa-rɔ sí keneŋ! Nɛ deḛ d’ilá keneŋ pana: Jeḛ j’a njaaje keneŋ el.

Ejekel 20:13

Nɛ gel-bɔje lə Israɛl d’ḭ sə neḛ d’ɔs ta lə neḛ rəw dɔdilaloo’g. Deḛ d’un goo godnduje lə neḛ el ləm, d’uba ndukunje lə neḛ gə́ dəw ra née ndá a si ne kəmba lé d’ya̰ ləma, deḛ d’ula sul dɔ ndɔ-kwa-rɔje’g lə neḛ ləm tɔ. Bèe ɓa neḛ n’wɔji mba ɓugu boo-oŋg lə neḛ dɔ dee’g dɔdilaloo’g kar dee d’udu guduru tɔ.

Ejekel 20:21

Nɛ ŋganje neelé d’ḭ sə neḛ d’ɔs ta lə neḛ rəw. Deḛ d’un goo godnduje lə neḛ lad-lad el ləm, deḛ d’aa dɔ ndukunje lə neḛ ra née gə́ dəw ra ndá a si ne kəmba lé el ləma, d’ila ndɔl ɓa dɔ ndɔ-kwa-rɔje’g lə neḛ ləm tɔ. Ndá neḛ n’wɔji mba ɓugu boo-oŋg lə neḛ dɔ dee’g ləm, kar oŋg lə neḛ aw lée’g béréré dɔ dee’g dɔdilaloo’g ləm tɔ.

Ejekel 20:28

Neḛ n’ɔr no̰ dee n’aw sə dee mee ɓee gə́ neḛ manrɔ neḛ gə mba kar dee ndá d’ila kəm dee dɔ dɔdərlooje’g lai gə́ tar ləm, gə dɔ kagje’g lai gə́ to bigim ləm tɔ, ndá lée neelé deḛ d’inja nékinjanéməsje lə dee ləm, d’ar nékarje lə dee gə́ ar mee neḛ ḭ ne sə neḛ jugugu ləm, deḛ tuu né gə́ baḭyee ə̰də sululu ləma, deḛ saga nékar lə dee gə́ to nékai lé naŋg ləm tɔ.

Ejekel 20:8

Nɛ deḛ d’ḭ sə neḛ d’ɔs ta lə neḛ rəw ɓó deḛ ndigi koo ta lə neḛ el. Dəw kára kara ya̰ goo néje gə́ mina̰ gə́ tel kəmee lé el ləm, deḛ d’ya̰ goo magəje gə́ Ejiptə lé el ləm tɔ. Ndá neḛ n’wɔji mba ɓugu boo-oŋg lə neḛ dɔ dee’g ləm, mba kar oŋg lə neḛ aw lée’g béréré dɔ dee’g mee ɓee gə́ Ejiptə ləm tɔ.

Soponi 3:2

Yeḛ oo ta lə dəw kára kara el ləm, Oo takwɔji-kəmkàr gə́ né el ləm, Ɔm mée dɔ Njesigənea̰’g el ləma, Yeḛ rəm pər gə́ rɔ Ala’g ləa el ləm tɔ.

Jakari 7:7

See seḭ gərje ta néje gə́ Njesigənea̰ pa gə ndu njéteggintaje gə́ dɔtar loo gə́ dəwje d’isi gə meekulɔm mee ɓee gə́ Jerusalem ləm, gə mee ɓeeje gə́ gugu dəa sub ləm, gə loo gə́ par gə́ dɔkɔl ləma, gə ndag-loo’g ləm tɔ lé el wa.

Tel tura Godndu 31:27

Mbata ma m’gər sí gə́ njékaltaje gə njégwɔbkelkwɔije gao ya. Ɓó lé seḭ alje ta ɔsje ne Njesigənea̰ rəw loo gə́ m’isi ne kəmba mbuna sí’g ya ɓəi, ŋga ɓəd ɓa loo gə́ m’wəi mba̰ ndá seḭ a raje kaareeje ur dɔ yee gə́ nee el ɓəi wa.

Tel tura Godndu 9:24

Seḭ toje njékɔsta lə Njesigənea̰ rəwje un kudee mee ndəa gə́ ma m’gər sí ne lé ya.

Tel tura Godndu 9:7

Arje meḛ sí olé dɔ né gə́ seḭ raje ɔsje ne oŋg lə Ala lə sí gə́ Njesigənea̰ ilaje dɔ sí’g dɔdilaloo’g lé arje meḛ sí wəi dɔ’g el. Un kudee mee ndəa gə́ seḭ undaje ne loo mee ɓee gə́ Ejiptə teḛje ne loo gə́ nee’g lé seḭ toje njékaltaje ɔsje ne Njesigənea̰ rəw ya.