Jeremi 2:20 - Maktub gə́ To gə Kəmee

²⁰ Un kudee ləw ba lé Seḭ tədje néməməna̰ gwɔb sí’g ləm, Seḭ tije kulaje rɔ sí’g ləm tɔ Ndá seḭ pajena: Seḭ ndigije ra kula ɓər el ŋga! Nɛ dɔdərlooje lai gə́ d’ḭ tar lé ləm, Gə gel kagje lai gə́ təb ləm tɔ lé Seḭ rogoje keneŋ Asəna gə néra kaiya-dené bèe.

Jeremi 2:20 Iomraidhean Croise

1 Mbaije 12:32

Yeḛ tum gin ra naḭ mee naḭ gə́ njekɔm’g jinaijoo mee ndɔ gə́ njekɔm’g dɔg-giree-mi lə naḭ’g neelé mba karee to asəna gə naḭ gə́ deḛ ra mee ɓee gə́ Juda lé tɔ, tɔɓəi yeḛ inja nékinjanéməsje dɔ loo-nékinjaməs’g. Aa ooje, né gə́ deḛ ra Betel gə mba kar dee d’inja ne nékinjaməs no̰ néndaji ŋgan maŋgje gə́ yeḛ ra dee lé ɓa to nee: Yeḛ unda njékinjanéməsje gə́ wɔji dɔ looje gə́ ndəw gə́ yeḛ unda Betel lé.

1 Mbaije 14:23

Deḛ ya kara d’unda dɔ looje gə́ ndəw d’ar néndajije gə magəje mee dɔdərlooje’g lai gə́ d’ḭ tar ləm, gə gel kagje lai gə́ to təb’g ləm tɔ.

Pakɔsje 107:14

Yeḛ nja ɓa ɔr dee dan loo gə́ ndul’g gə ta yoo’g ləm, Kula gə́ tɔ dee ne lé Yeḛ gaŋg gwɔb dee’g ya ləm tɔ.

Pakɔsje 2:3

Deḛ pana: Maji kar sí n’gaŋgje kúla lə dee rɔ sí’g ləm, Ar sí n’tije kúla lar lə dee gə́ d’wa sí ne lé ləm tɔ.

Pakɔsje 78:58

D’ar oŋg ḭ ne səa pu Dɔ looje lə dee gə́ ndəw’g lé ləm, D’ɔs ne gel kəmkəḭ ləa Gə Magəpoleje lə dee lé ləm tɔ.

Teḛ-Raga 19:8

Koso-dəwje lai ya d’unda ndu dee na̰’d pana: Néje lai gə́ Njesigənea̰ pa taree lé j’a ra ya. Moyis lé tel ndaji ta lə koso-dəwje lé ar Njesigənea̰ tɔ.

Teḛ-Raga 24:3

Moyis ree ula koso-dəwje taje lə Njesigənea̰ lai ləm, gə godndiaje lai ləm tɔ ndá koso-dəwje lai d’unda ndu dee na̰’d kára ba pana: Jeḛ j’a raje néje lai gə́ Njesigənea̰ pa lé ya.

Teḛ-Raga 3:8

Bèe ɓa ma m’ree mba kɔr dee ji Ejiptəje’g ləm, gə mba kɔr no̰ dee teḛ sə dee mee ɓee gə́ maji gə́ tad yaa̰ ləm tɔ, to ɓee gə́ mbà to keneŋ yaa̰ ləm, ubu tə̰ji kara to keneŋ yaa̰ ləm tɔ, to loo-si Kana̰je ləm, gə Hetje ləm, gə Amɔrje ləm, gə Peresje ləm, gə Hebje ləma, gə Yebusje ləm tɔ.

Esai 1:21

See ban ɓa ɓee-boo gə́ njekila koji lé ya Tel to asəna gə kaiya-dené bèe wa! Kédé lé néra gə́ gə goo rəbee taa loo keneŋ pəl-pəl ləm, Néra gə́ gə dɔ najee ɓa ra ɓee keneŋ ləm tɔ, Nɛ ɓasinè ndá njétɔl dəwje ɓa d’isi keneŋ.

Esai 10:27

Mee ndəa’g neelé D’a taa nékodo lə dee gə́ wɔi dɔ tam sí’g ləm, D’a taa néməməna̰ lə dee gwɔb sí’g ləm tɔ, Ndá néməməna̰ lé a təd karee godo.

Esai 14:25

M’a təd Asirije rém-rém mee ɓee’g ləm ləm, M’a tuba dee gə gɔlm dɔ mbalje’g ləm ləm tɔ, Néməməna lə dee a godo gwɔb dee’g ləm, D’a kɔr nékodo lə dee gə́ wɔi lé dɔ tam dee’g ləm tɔ.

Esai 9:4

Mbata markob-rɔje lai gə́ d’aw ne loo-rɔ’g ləm, Gə kubu-rɔje lai gə́ rogo dan məs’g ləm tɔ lé D’a kɔm dee pər’d Kar dee roo dula-dula ya.

Jeremi 13:27

Neḛ n’oo mɔdkaiyaje ləi Gə ndui gə́ ɓar asəna gə ndu no̰ lə kunda bèe ləm, Gə néraije gə́ to kḛji asəna gə néra kaiya-dené Gə́ i ra dɔ looje gə́ ndəw’g gə mee ndɔje’g ləma, N’oo néraije gə́ mina̰ ləm tɔ. Meeko̰ a koso dɔi-i Jerusalem’g See saar ndɔ gə́ ra ɓa i a tila gə́ tila Mba kɔr won rɔi ɓəi wa.

Jeremi 17:2

To gə́ d’ə̰ji dɔ ŋgan deeje’g bèe lé deḛ d’ə̰ji dɔ loo-nékinjanéməsje’g le dee togə́bè ləm, Gə dɔ magə-Astartéje’g le dee gə́ to mbɔr kagje gə́ təb’g gə dɔ dɔdərlooje gə́ ndəw’g ləm tɔ.

Jeremi 2:31

Seḭ ginkoji dəwje, Maji kar sí ooje ta lə Njesigənea̰ gə́ né ya! See ma m’to asəna gə dɔdilaloo mbata lə Israɛlje Esé ma m’to ɓee gə́ loo ndul keneŋ njudu-njudu wa. See gelee ban ɓa dəwje ləm pana: Loo gə́ meḛ sí ndigi ya j’a kaw’g Jeḛ ndigi kaw rɔi’g el lé wa.

Jeremi 3:13

Maji kar sí tegje gin néra gə́ kori-korije lə sí ləm, Maji kar sí tegje gin majikoji el lə sí No̰ Njesigənea̰, Ala’g lə sí ləm, Gə kaw gə́ seḭ awje yo gə́ nee no̰ magəje gə́ dɔ ɓee’g gel kagje lai gə́ to təb ləma, Gə mbad gə́ seḭ mbad kooje Ne ta ləm saar lé ləm tɔ. Njesigənea̰ ɓa pa bèe.

Jeremi 30:8

Njesigənea̰ gə́ njeboo-néje lé pana: Mee ndəa’g neelé m’a təd néməməna̰ gə́ wɔi gwɔs sí’g ləm, m’a gaŋg kulaje gə́ d’wa sí ne lé mbidi-mbidi ti ləm tɔ. Dəw-dɔ-ɓeeje d’a kisi gə́ dəw dɔ sí el ŋga.

Jeremi 5:5

M’a kaw rɔ dəwje gə́ boo-boo’g Ndá m’a kula dee ta, Mbata deḛ lé gər rəw lə Njesigənea̰ ləm, Gə torndu Ala lə dee ləm tɔ. Nɛ deḛ lai kara təd néməməna̰ gwɔs dee’g ləm, Deḛ gaŋg kúla rɔ dee’g ləm tɔ.

Ejekel 16:28

I ya̰ rɔi dan kaiya’g gə Asirije mbata asi el, i ya̰ rɔi dan kaiya’g sə dee bèe kara asi el ya ɓəi.

Ejekel 16:31

Loo gə́ i unda kəije gə́ ka̰ ra kaiya keneŋ dɔ kila-rəwje kára-kára lai ləm, loo gə́ i ra looje gə́ ndəw gə looje lai-lai ləm tɔ lé i kara to asəna gə kaiya-dené gə́ njedəjilaree el bèe,

Ejekel 16:41

d’a roo kəije ləi ləm, d’a gaŋgta dɔi’g kəm denéje gə́ bula digi-digi’g ləm tɔ. Togə́bè ɓa n’a kari ɔs bo̰ kaiya raije ndá i a kar dəw nékoga-dɔ-jia gogo el ŋga.

Ejekel 20:28

Neḛ n’ɔr no̰ dee n’aw sə dee mee ɓee gə́ neḛ manrɔ neḛ gə mba kar dee ndá d’ila kəm dee dɔ dɔdərlooje’g lai gə́ tar ləm, gə dɔ kagje’g lai gə́ to bigim ləm tɔ, ndá lée neelé deḛ d’inja nékinjanéməsje lə dee ləm, d’ar nékarje lə dee gə́ ar mee neḛ ḭ ne sə neḛ jugugu ləm, deḛ tuu né gə́ baḭyee ə̰də sululu ləma, deḛ saga nékar lə dee gə́ to nékai lé naŋg ləm tɔ.

Ejekel 23:5

Ohola uba goo ndukun ləa ya̰ ar mal njéto səaje gə́ to Asirije gə́ to njéboataɓeeje ləa o̰ mée lèm-lèm.

Ojee 1:2

Taje gə́ dɔtar gə́ Njesigənea̰ un kudu pa gə ndu Ojee kar koso-dəwje ləa lé ɓa nee. Yeḛ ula Ojee pana: Maji kari aw taa kaiya-dené gə́ dené ləi Oji ne ŋganje gə́ to ŋgan kaiyaje, Mbata néra dəw-mee-ɓeeje neelé To asəna gə néra kaiya-dené gə́ uba ŋgabeeje yá̰ bèe Mbata deḛ d’uba Njesigənea̰ d’yá̰ tɔ.

Ojee 2:5

Ɓó lé bèe el ndá n’a tɔr kubu rəa’g, Kyán kudee dum to gə́ ndɔ kojee’g bèe ləm, N’a karee to asəna gə dɔdilaloo gə́ tudu kurum-kurum bèe ləma, N’a karee wəi yoo-kunda-mán ləm tɔ.

Ojee 3:3

Ma m’ulá m’pana: Maji kari si səm gə kuri ŋga ɓó i a ra rɔi gə́ kaiya-dené el ləm, a to ka̰ diŋgam gə́ raŋg el ləm tɔ ndá ma kara m’a ra səi togə́bè ya tɔ.

Ojee 4:13

Deḛ d’inja néməsje dɔ sém mbalje’g tar ləm, Deḛ roo néje gə́ ə̰də sululu dɔ dɔdərlooje’g Gel kagje gə́ ɓar dee sɛnəje gə pəplierje gə térébḭtəje Gə́ ndil dee to maji ya ləm tɔ. Gelee gə́ nee ɓa ŋgan síje gə́ dené D’ya̰ rɔ dee dan mɔdkaiya’g ləm, Məm síje-je gə́ dené kara Tel to ne kaiya-denéje ləm tɔ.

Ojee 9:1

Seḭ Israɛlje lé, maji kar sí raje rɔlel əsé alje rɔ sí To gə́ ginkoji dəwje gə́ raŋg bèe el, Mbata kuba gə́ seḭ ubaje Njesigənea̰ lə sí yá̰je Asəna gə kaiya-dené bèe ləm, Mbata loo-kunda-koje lai-lai Gə́ seḭ ndigi taaje nékoga dɔ ji sí gə́ mina̰ keneŋ ləm tɔ!

Ləbije 26:13

Ma m’to Njesigənea̰, Ala lə sí gə́ m’ar sí undaje loo mee ɓee gə́ Ejiptə teḛje ləm, m’ɔr sí kula ɓər’g ləm tɔ, ma m’gaŋg kúla néməməna̰ gə́ to gwɔb sí’g m’ar sí undaje dɔ sí tar njaaje ne ya.

Nahum 1:13

Ɓasinè m’a tuji néməməna̰ ləa gə́ to gwɔs sí’g ləm, M’a gaŋg kulaje gə́ tɔ sí ne mbidi-mbidi ləm tɔ.

Tel tura Godndu 12:2

Seḭ a tujije looje lai gə́ ginkoji dəwje gə raŋg gə́ seḭ a gə tuba deeje lé ra né keneŋ d’ar magəje lə dee dɔ sém mbalje’g ləm, gə dɔdərlooje’g ləma, gə gel kagje gə́ rara gə́ təb gə́ to rigim ləm tɔ.

Tel tura Godndu 15:15

Arje meḛ sí olé dɔ to gə́ seḭ toje ɓərje mee ɓee gə́ Ejiptə kédé ɓa Ala lə sí gə́ Njesigənea̰ ɔr sí keneŋ lé, gelee gə́ nee ɓa ɓogənè m’ar sí ne godndu neelé gə mbəa.

Tel tura Godndu 26:17

Ɓogənè seḭ arje Njesigənea̰ un ndia gə mba to Ala lə sí ləm, gə mba kar sí njaaje kila-rəwje’g ləa ləm, mba kar sí aaje dɔ torndiaje gə godndiaje gə ndukunje ləa ləma, gə mba kar sí ilaje ŋgonkoji dɔ tapeaje’g ləm tɔ.

Tel tura Godndu 4:20

Nɛ seḭ lé Njesigənea̰ ɔr sí ar sí undaje loo mee ɓee gə́ Ejiptə gə́ to loo gə́ nuŋga kəd-kəd asəna gə loo-kula-bṵda bèe teḛje, gə mba kar sí toje koso-dəwje gə́ toje kea̰je ya doŋgɔ doi to gə́ seḭ toje ne ɓogənè lé tɔ.

Tel tura Godndu 4:34

See ndɔ kára magə kára saŋg loo gə mba taa ginkoji dəwje mbuna ginkoji dəwje gə́ raŋg’d gə mbata ləa gə goo nénaaje ləm, gə nétɔjije ləm, gə némɔrije ləm, gə rɔ ləm, gə jia gə́ ɓar mèr-mèr gə́ ula ndiŋ ləma, gə néje gə́ to ɓəl kədm-kədm ləm tɔ to gə́ Ala lə sí gə́ Njesigənea̰ ra ɔr sí ne mee ɓee gə́ Ejiptə kəm sí’g nee lé ya to wa.

Tel tura Godndu 5:27

I ya aw oo ta néje lai gə́ Ala lə sí gə́ Njesigənea̰ a gə pa lé ndá i nja a ndaji ta néje lai gə́ Ala lə sí gə́ Njesigənea̰ a gə kulai lé kar sí ndá jeḛ j’a kooje ya ləm, j’a raje née ya ləm tɔ.

Jujé 1:16

Deḛ d’ila Juje keneŋ pana: J’a raje néje lai gə́ i un ndui dɔ’g ar sí ləm, loo gə́ rara gə́ i a kula sí keneŋ kara j’a kawje ya ləm tɔ.

Jujé 24:24

Koso-dəwje lé d’ula Juje pana: J’a kwaje Njesigənea̰, Ala lə sí meḛ sí’g ya ləm, j’a kila ŋgonkoji dɔ tapea’g ya ləm tɔ.

Jujé 24:26

Ta néje neelé Juje ndaŋg mee maktub godndu’g lə Ala ya. Tɔɓəi yeḛ un biri mbal kára ila lée’g gel kag-sɛnə’d gə́ to dan mee loo gə́ to gə kəmee’g mbata lə Njesigənea̰ lé.

Loo gə́ killa rea kəm Ja̰’g 17:1

Tɔɓəi kura gə́ dara kára mbuna deḛ gə́ siri gə́ d’aar gə bai gə́ siri ji dee’g lé ulam ta pana: Maji kari gə́ ree, m’a kari oo rəwta-gaŋg gə́ d’a gə gaŋg dɔ kaiya-dené’g yeḛ gə́ nérea to ɓəl kədm-kədm gə́ si dɔ mán baa-boo’g lé.

Njéga̰g-Rəwtaje 10:6

Israɛlje tel ra né gə́ taa kəm Njesigənea̰ el ya tɔɓəi, deḛ pole magə-Baalje ləm, gə magə-Astartéje ləm, gə magəje gə́ Siri ləm, gə magəje gə́ Sido̰ ləm, gə magəje gə́ Moab ləm, gə magəje lə Amo̰je ləma, gə magəje lə Pilistije ləm tɔ ndá d’uba ne Njesigənea̰ d’yá̰ lal kwá meḛ dee’g.

Njéga̰g-Rəwtaje 2:11

Israɛlje ra né gə́ majel kəm Njesigənea̰’g ndá deḛ pole magə-Baalje.

Njéga̰g-Rəwtaje 2:13

Deḛ d’uba Njesigənea̰ d’yá̰ ndá deḛ tel pole magə-Baal gə Astarteje ɓa.

1 Samel 12:10

Bèe ɓa deḛ no̰ ɓar Njesigənea̰ pana: Jeḛ n’raje kaiya, mbata jeḛ j’ubaje Njesigənea̰ j’yá̰je ndá jeḛ poleje magə-Baalje gə magə-Astartéje ya. Ɓasinè lé maji kari ɔr sí ji njéba̰je’g lə sí ndá j’a raje né kari-i ya.