Jeremi 13:24 - Maktub gə́ To gə Kəmee

²⁴ M’a sané dee to gə́ ləm mu Gə́ lel gə́ dɔdilaloo’g sané bèe.

Jeremi 13:24 Iomraidhean Croise

Pakɔsje 1:4

Nɛ njémeeyèrje lé dee to togə́bè el. Deḛ to d’asəna gə ləm mu gə́ lel sané kad bèe.

Esai 17:13

Ndu ginkoji dəwje gə raŋg ɓar Asəna gə kaa manje gə́ ula u-u-u bèe. Njesigənea̰ ndaŋg dee sané dee Ndá d’aḭ d’aw əw Asəna gə ləm mu gə́ to dɔ mbalje’g Gə́ lel odo aw ne ləm, Asəna gə pudu kunje Gə́ lel-mal ɓir dee bèe ləm tɔ.

Esai 41:16

Seḭ a tó deeje séréré-séréré Ndá lel a kɔr dee kaw sə dee əw ləm, Lel-mal a sané dee kad-kad ləm tɔ. Nɛ seḭje lé seḭ a kalje rɔ sí gə mbata lə Njesigənea̰ ləm, Seḭ a kɔsje gaji rɔ sí wɔji ne dɔ Njerɔkunda lə Israɛlje lé ləm tɔ.

Jeremi 18:17

N’a sané dee no̰ njéba̰je’g lə dee To gə́ lel gə́ ḭ bər sané ne néje bèe. N’a tel gir neḛ kila kar dee ləm, N’a kila kəm neḛ dɔ dee’g ndɔ néurti’g lə dee el ləm tɔ.

Jeremi 9:16

Njesigənea̰ gə́ njeboo-néje pa togə́bè pana: Saŋje loo ɓarje njéno̰paje ar deeje ree! Ulaje kula rɔ denéje gə́ njéno̰paje ar deeje ree to!

Nɔ̰-ndôo gə́ wɔji dɔ Jerusalem 1:15

Bao-rɔje ləm lai lé Mbaidɔmbaije tal dee ras-ras rɔm’g, Yeḛ mbo̰ kudu njérɔje dɔm’g Mba tuji ne basaje ləm, Ma ŋgoma̰də gə́ to ŋgolə Juda lé Njesigənea̰ orəm njḛ́-njḛ́ To gə́ Kandə-nduú bèe loo-mbula-’g.

Ejekel 17:21

Deḛ lai gə́ d’a kḭ mbuna kudu-njérɔje’g ləa kaḭ lé d’a kwəi yoo-kiambas ləm, njé gə́ d’a nai lé d’a sané dee dan lel’g ləm tɔ. Bèe ɓa seḭ a gərje ne to gə́ neḛ Njesigənea̰ ya m’pata.

Ejekel 5:12

Dəwje lai gə́ kudu munda lé kudu deḛ gə́ kára d’a kwəi yoo-koso ləm, ɓoo-boo a kula kəm dee ndòo mbuna sí’g ləm tɔ, deḛ gə́ kudu kára d’a kwəi yoo-kiambas gugu gir sí sub, tɔɓəi deḛ gə́ kudu kára lé n’a sané dee dan lel’g ndá n’a kɔr kiambas kore ne goo dee tɔ.

Ejekel 5:2

Yee gə́ loo kára lé m’a roo dan mee ɓee-boo’g loo gə́ ndɔ kaḭ dəa sub gə rɔ lé aw lée’g béréré mba̰, yee gə́ njekɔm’g loo joo lé m’a kodo kaw tḭja gə yiŋga gugu ne gir ɓee-boo lé sub, tɔɓəi yee gə́ njekɔm’g loo munda lé m’a sané dan lel’g ndá n’a kɔr kiambas korè ne gée.

Ejekel 6:8

Nɛ n’a kya̰ ges síje gə́ na̰je kar dee taa rɔ dee ta kiambas’g mbuna ginkoji dəwje gə raŋg’g loo gə́ seḭ a saneje na̰ gə mee ɓeeje ɓəd-ɓəd lé.

Ojee 13:3

Gelee gə́ nee ɓa d’a to ne kasəna Gə mum gə́ oso teḛ gə́ ndɔ ləm, D’a to ne kasəna Gə mán tàl gə́ wa waga ɓa gəḭ ɓəi ləm, D’a to ne kasəna Gə tisa kó gə́ lel sané kad loo-kunda-kó’g bèe ləma, D’a to ne kasəna Gə sa pər gə́ teḛ kəmbolè’g bèe ləm tɔ.

Ləbije 26:33

M’a sané sí mbuna ginkoji dəwje gə raŋg’g, tɔɓəi m’a kar dee d’orè goo sí ndəŋ gə kiambas tɔ. Ɓee lə sí a to nduba ləm, ɓee-booje lə sí kara d’a tel to dɔdilalooje ləm tɔ.

Soponi 2:2

Kédé ɓa gə mba kar godndu gə́ wɔji dɔ sí aw lée’g béréré ɓəi ləm Kar ndəa neelé dəs to gə́ tisa kó gə́ dəs ɓəi ləm, Kédé ɓa kar oŋg lə Njesigənea̰ gə́ to asəna gə kɔr pər bèe lé ɔm dɔ sí’g ɓəi ləma, Kédé ɓa gə mba kar ndɔ oŋg lə Njesigənea̰ lé teḛ dɔ sí’g ɓəi ləm tɔ.

Lugu 21:24

D’a gaŋg dee gə ta kiambas kɔm dee naŋg ləm, d’a kwa dee ɓər kaw sə dee mbuna ginkoji dəwje gə raŋg’g lai ləma, tɔɓəi ginkoji dəwje d’a tuba Jerusalem gə gɔl dee mbajila-mbajila ləm tɔ saar kar ndəa ka̰ ginkoji dəwje gə raŋg a kun ɗiao.

Tel tura Godndu 28:64

Njesigənea̰ a sané sí mbuna ginkoji dəwje gə raŋg’g, un kudee gwɔi naŋg’d bər njal teḛ ne rudee gə́ dɔ-gó, lé gə́ neelé ɓa seḭ a poleje magəje gə́ to kag əsé mbal gə́ seḭ əsé bɔ síje-je gər dee kédé el lé keneŋ.

Tel tura Godndu 32:26

M’a m’ula m’pana: M’a gə sané dee gə lel tam ləm, M’a gə kar ri dee udu Mbuna dəwje’g ləm tɔ!

Tel tura Godndu 4:27

Njesigənea̰ a sané sí mbuna ginkoji dəwje gə raŋg’d gə́ raŋg ndá seḭ a naije jebəre ba mbuna ginkoji dəwje’d gə́ Njesigənea̰ a kar sí awje mbuna dee’g lé.