பிலிப்பியர் 4:1 - Saurashtra Bible (BSI)

¹ தேஹாலிம் மொர் ப்ரேவ் பொரெ பை⁴ பெ⁴ய்னானு, மீ தும்கொ ஸனொ மெனி ஜுகு ஹவுர்கன் ஸே. துமீஸ் மொர் ஸொந்தோஷ். துமீஸ் மொர் க்ரீடு. மீ ஸங்கெதானுக் பகவான்கெ ஐக்யமும் தீ⁴ர்குகன் நிள்சி ர:வொ.

பிலிப்பியர் 4:1 Iomraidhean Croise

யோபு 31:36

மீ லிக்கெ விவர்னுக் மொர் கா²ந்துர் தகிலி ம:ட்டபோன்கன் சலி ஜவு; மொர் தொஸ்கா க்ரீடுகன் க⁴ல்லு.

ஸங்கீதுன் 125:1

பகவானுக் நொம்மஸ்தெனு சீயோன் தொங்கர்ஸோன் பலம்கன் ரா:ன்.

ஸங்கீதுன் 27:14

பகவான்ஜோள் நொம்கெ தோ²வ்: தெனு தொகொ பலம் தேன்; மொன்னு தி⁴ல்ல ஸுட்டுனாஸ்தக் பகவான்ஜோள் நொம்கெகன் ரா:

மத்தேயு 10:22

துமி மொர் சிஷ்யான்கன் ஸேஸ்தெஹால் அஸ்கின் தும்கொ த்³வேஷ் கெரன். ஸெத்ல லெங்கு தீ⁴ர்குகன் விஸ்வாஸும் நிள்சி ரா:ஸ்தெனூஸ் ரக்ஷண் பொந்தன்.

யோவான் 8:31

ஏசு அபுலுக் விஸ்வாஸ் கெரெ யூதர்னுக் ஸீ, “மொர் வத்தாம் துமி நிள்சி ரி:யெதி நிஜ்ஜம்கன் துமி மொர் சிஷ்யான்கன் ரா:ன்.

அப்போஸ்தலர் 11:23

தெனொ சொக்கட் மெனிக். பரிஸுத்த ஆவிகெ ஸக்திக் கள்ளி விஸ்வாஸ் ஸெங்கொ தேவுக் ஸேவொ கெரஸ்தெனொ. தெனொ தேட் ஜியெவேளு தேவுகெ க்ரியானுக் தெக்கி ஸொந்தோஷ் பொடெஸ்.

அப்போஸ்தலர் 14:22

தேட் ஹொதெ சிஷ்யான் மொன்னுக் தைர்யம் கெரி விஸ்வாஸும் நிள்சி ரா:ஸ்ததானுக் தெங்கொ புத்தி ஸங்க்யாஸ். அமி ஜுகு உபத்ரவமுன் பொந்தீஸ் தேவு ராஜ்யமுக் பாத்யம் கெல்லன் முஸய் மெனி ஸங்க்யாஸ்.

அப்போஸ்தலர் 2:42

தெனு அஸ்கின் அப்போஸ்தலர்னுகெ போதனாம், ஐக்யமும், அப்பம் கு²டஸ்தெமாம், ப்ரார்தன கெரஸ்தெமாம் தீ⁴ர்குகன் நிள்சி ஹொத்யாஸ். (லூக் 22:14-20)

ரோமர் 2:7

மொன்னு தில்ல ஸுட்டுனாஸ்தக் கொப்பிம் சொக்கட்யெ கெரி, மஹிமெகின், கெனம்கின், நாஸ் ஹோனா ஜிவ்னம் அப்பய் மெனி நொம்கெகன் ஜிவெதி நித்ய ஜிவ்னம் அப்பய்.

1 கொரிந்தியர் 15:58

மொர் ப்ரேவ் பொரெ பை⁴ பெ⁴ய்னானு, பகவான்கெ ஐக்யமும் ஜிவரிய துமி பொடரிய ப்ரயாஸ் விருதா ஹோனா மெனஸ்த களைளி விஸ்வாஸும் தீ⁴ர்குகன் நிள்சி ர:வொ. பகவான்கெ காமுக் அங்குன் வேன் உற்சாவ்கன் கெருவொ.

1 கொரிந்தியர் 16:13

ஜாக்ரதகன் ர:வொ. விஸ்வாஸும் நிள்சி ர:வொ. தைர்யம்கன் ர:வொ. மொன்னு தில்ல ஸொட்டுங்கன். (மத் 24:42)

2 கொரிந்தியர் 1:14

அம்ரெகுர்சி துமி ருவ்வோஸ் களைளி ரா:ன். அம்ரெ பகவான் ஏசு கிறிஸ்து பீர் அவஞ்ஜாரிய தின்னும் கோனக் அமி தும்ரெகுர்சி மேட்கன் ஹவ்டன்கீ திஸோஸ் துமி மெளி அம்ரெகுர்சி மேட்கன் ஹவ்டன்.

கலாத்தியர் 5:1

ப⁴ந்தைதுகன் ஹொதெ தும்கொ கிறிஸ்து ஸொடுவி கெர்யாஸ். ஸொடுவி பொந்தெ துமி தெல்லெ ஸுதந்தரமும் நிள்சி ர:வொ. துமி பீர் நியாய ப்ரமாணுக் ப⁴ந்தைதுகன் ரா:ஹோனா. (மத் 11:28; லூக் 4:31; அப் 15:10)

பிலிப்பியர் 1:27

துமி கிறிஸ்துகெ சொக்கட் ஸமசாருக் தகெதானுக் சொக்கட் குண்ணு மொன்னுகன் ஜிவ்னொ ஸேஸ்தேஸ் முக்யம். மீ தும்கொ அவி ஸியெத் மெளி, மீ அவன் முஸுனாஸ்தக் தும்ரெகுர்சி அய்கினி பொடெத் மெளி, துமி மொன்னு தில்ல ஸுட்டுனாஸ்தக் விஸ்வாஸும் தீ⁴ர்குகன் நிள்சி ர:வொ. ஒண்டே மொன்னுகன் தைர்யம்கன் ஏசுகெ சொக்கட் ஸமசார் அஸ்கினாக் ஸங்குவொ.

பிலிப்பியர் 1:8

தும்கொ ஸனொ மெனி மொர் மொன்னும் கித்க ஆஸெ ஸே மெனஸ்த தேவுக் களாய். ஏசு கிறிஸ்து தும்ரெஜோள் கித்க ப்ரேவ்கன் ஸேகீ, திஸோஸ் மீ மெளி, தும்ரெஜோள் ப்ரேவ்கன் ஸே. எல்லெகொ மெளி தேவூஸ் ஸாக்ஷி.

பிலிப்பியர் 2:16

எல்லெ புலோகுர் துமி ஜீவ் ஸேஸ்தெ தேவுகெ வத்தான்தானுக் ஜிவி, அகாஸு நக்ஷத்ருன்ஸோன் ஜொலிஞ்சன். இஸனி லம்புர் துமி கெரெதி கிறிஸ்து பீர் அவஞ்ஜாரிய தின்னும் மீ தும்கொ ஹவ்டி ஸொந்தோஷ் பொடன் முஸய். காமெனெதி மீ கெரெ காம்கின், பொடெ ப்ரயாஸ் விருதா ஹொயெனி மெனஸ்தக் துமீஸ் ஸாக்ஷின். (ஏசா 65:23)

பிலிப்பியர் 2:26

காமெனெதி தெனொ ஆங்கு ஸவுர்யம் நீ:ஸ்தக் ஹொதெ ஸமசார் துமி அய்கினி பொடெஹால் தெனொ ஜுகு மொன்னு பாத பொடெஸ்.

கொலோசெயர் 4:12

கிறிஸ்து ஏசுக் ஸெவ்கன்கன் ஸேஸ்தெ தும்ரெ ஸபாக் செரெ எப்பாப்பிராத்து மெளி தும்கொ நமஸ்கார் ஸங்கரியொ. தேவுகெ சித்தம் காயொ மெனி களைளஸ்தெமாம்கின், பூர்திகன் தெல்லெ காமுக் கெரி முஸட்னொ மெனிகின், மொன்னு தீ⁴ர்குகன் விஸ்வாஸும் நிள்சி ர:னொ மெனி தெனொ தும்ரெகுர்சி கொப்பிம் ப்ரார்தன கெர்லேத் ஸே. (கொலோ 1:7; பிலே 23)

1 தெசலோனிக்கேயர் 3:13

அம்ரெ பகவான் ஏசு அபுல் பரிஸுத்துடுன் ஸெங்கொ பீர் அவஸ்தவேளு, அம்ரெ பா³ப் தேவுகெ ப்ரஸன்னமும் துமி சூக் நீ:ஸ்தக் பரிஸுத்துடுகன் ரா:ஸ்தக் தேவ் தும்ரெ மொன்னுக் பலம் தேந்தக்.

2 தெசலோனிக்கேயர் 2:15

தேஹாலிம் மொர் பை⁴ பெ⁴ய்னானு, அமி தும்கொ கெரெ ப்ரஸங்கம், லிக்கெ லேகுன், பாரம்பர்யம்கன் துமி ஸிக்கிலியெ ஸத்ய வத்தானுக் ஸொட்டுனாஸ்தக் விஸ்வாஸும் நிள்சி ர:வொ.

2 தீமோத்தேயு 2:1

தீமோத்தேயு, மொர் பெடா, ஏசு கிறிஸ்துகெ ஐக்யமும் ஜிவரிய தூ, தெனு தீரிய கிருபாம் பலம் பொந்தி நிள்சி ரா:

எபிரேயர் 10:23

அம்கொ வாக்கு தியாஸ்தெனு நொம்கெ ஹொயாஸ்தெனு. தேஹாலிம் அவ்த காலுகுர்சி அமி அஸ்கினாஜோள் ஸங்கரிய அம்ரெ நொம்கெம் அமி தீ⁴ர்குகன் நிள்சி ர:னொ.

எபிரேயர் 3:14

ஹர்ம்பமும் அமி கிறிஸ்துக் விஸ்வாஸ் கெரெஸோன் ஸெத்ல லெங்கு விஸ்வாஸும் நிள்சி ரி:யெதி அமி கிறிஸ்துகெ ஸெவ்கனுன்கன் ரா:ன் முஸய்.

எபிரேயர் 4:14

அகாஸுனுக் தடி பரலோகுக் ஜியெ தேவுகெ பெடொ ஏசு அம்கொ மஹா ப்ரதான ப⁴ட்டர்கன் ஸே. தேஹாலிம் அமி தக்குனாஸ்தக் விஸ்வாஸும் நிள்சி ர:னொ.

2 பேதுரு 3:17

ப்ரேவ் பொரெஸ்தென்வோ, தும்கொ எல்லெஅஸ்கி முல்லோஸ் களாய். தேஹாலிம் துமி சொட்டொ போதகர்னுகெ அக்ரம க்ரியானும் ஸம்டி, தும்ரெ விஸ்வாஸுக் நாஸ் கெல்லுனாஸ்ததானுக் ஜாக்ரதகன் ர:வொ.