Danieli 5:12 - EBBAIBBO EMBOOSI YA NASAAE

¹² Olwohuba ali neende mwooyo w'aakulu muno, mukesi haandi atuumbula amahuluundu k'ebilooto, neende ohumanya amahuluundu k'eminaye, neende ak'ebiindu bidinyu ohumanya. Bino byoosi binyolehana mu Danieli wuno, yi mutuki yakuliha Bbelitesaasa. Mani bulaanu, leha balaange Danieli, mani achia ohuhutuumbulira amahuluundu.”

Danieli 5:12 Iomraidhean Croise

Esabbuli 16:3

Nae aboolerefu bomu syaalo, nibo abahunuufu, abo nimwo omuli esangaalo lyaange lyoosi.

Engaado 12:26

Omuundu muluungifu yeebwaaba esyonoono, nae omubi akwiisa abaasye mu sibi.

Engaado 17:27

Omuundu mukesi yetuka mu nomanoma, haandi otabbwanguha neende emboosi niye omuwuliri.

Esekeeli 28:3

Obaasa oti oli omukesi ohuhira Danieli; mani sibulao esyaama sibanyala ohuhukisa.

Danieli 1:17

Mani Nasaae n'aberesa abaraaga bane bano amakesi neende ohumanya bi beekesa byoosi bwaangu muno. Nae Danieli nameedwaho ohumanyaanga amahuluundu k'ohuboneherwa neende ak'ebilooto.

Danieli 1:7

Mani omuhuluundu wa bahalaabani balooye naakuliha abaraaga abo ameeta kano: Danieli n'amukuliha ati, Bbelitesaasa, Hanania n'amukuliha Sadiraka, Misaeli n'amukuliha Mesaka n'amukuliha nae Asaria n'amukuliha ati, Abbedinego.

Danieli 2:26

Mani omutuki n'ateeba Danieli, yi liita lyae liindi lyali Bbelitesaasa, ati: “Ewe onyala ohumboolera esilooto si ndaaloota neende amahuluundu kasyo?”

Danieli 4:19

Mani Danieli, eliita lyae liindi olaangwa ati, Bbelitesaasa, yamala embaka hooho niyeyendehereere, n'abula esy'ohuboola. Mani omutuki n'amuboolera ati: “Bbelitesaasa, esilooto neende amahuluundu kasyo, leha bihaye ohuhweyendeheresa daawe.” Bbelitesaasa mani n'akobolamo ati: “Omwaami waange, leha esilooto esyo sibe esy'abaandu batahudaha, haandi amahuluundu kasyo kabe ak'abasuku bao.”

Danieli 4:8

Nae luunyuma, Danieli niyeecha mu moni waange. Danieli oyo, yali niyakulihwa eliita liindi mbwe, Bbelitesaasa, koti lu nasaae waange yali n'alaangwa, haandi yalimo omusaambwa kwa banasaae boolerefu. Mani nimuboolera esilooto si ndaloota, nimboola endi:

Danieli 5:14

Ndawulira endi Mwooyo wa Nasaae Mwoolerefu ahulimo, haandi koti obona eyale muno haandi omanyire muno, haandi oli neende amakesi k'aakulu muno.

Danieli 5:16

Nae mbuliire nibahulomalomaho bati onyala ohutuumbula amahuluundu k'eby'engiso neende amahuluundu k'eby'amaya. Bulaanu, n'onanyala ohusoma obwandiike mani wamboolera amahuluundu kaabwo, ochia ohufwaalwa engubo ch'abachweenufu, obe neende olunyolo lw'esaabbu mu kosi, mani obe omuhuluundu wohudatu mu bwaami.”

Danieli 6:3

Mani Danieli wuno naahola emirimo bulai muno ohuhiraho abaasye babiri oba bagafana, olwohuba yali neende omwooyo mulai muno; haandi omutuki yali nabasirisa ohumuberesa obuhoongo mu bwaami bwae bwoosi.

Danieli 6:4

Mani abahuluundu baasye neende bagafana nibateemaho muno ohukoonyeresa esifune sibanafwaambe Danieli engeri y'aholeramo emirimo mu bwaami; nae nibatamunyoolaho esifune syoosi, oba esyonoono syoosi. Olwohuba Danieli yali omweesikwa, n'abulaho esifune syoosi esy'ohumufwaambya.

Abakolosaayi 1:29

Mani ni hulw'esifune syeene sino, sakira ndidiihana, nindeemaho ohuhola neende amaani kosi, esiindu syoosi si anyala ohuba ni yandeeremo ohuhola.