Wafilipi 3:10 - UVORO GHWALOLI KWA WANDU WOSE

¹⁰ Eri nimumanye Kristo na ndighi za kuzuka kwake na niwatane naye kwa kutiriro kwake, nikekala saye kele kufwa,

Wafilipi 3:10 Iomraidhean Croise

Matayo 20:23

Jesu kawauza, “Fulo munweghagha kikombe changu, ela kukala kele mkonu ghwangu ghwa kijo na ghwa kimosho si ghangu ghengi; sala ni kwa walye waikililo ni Aba.”

Johana 10:18

Sikwesi mundungi eghuusagha kufuma kwangu, ela naghufunya kwa kushaya kwangu imi mwenyi. Nio na ndighi yeghufunya na nio na ndighi yeghuusa. Agha nigho Aba ashaile nidee.”

Johana 17:3

Nagho ughu nigho umana ghwa kale na kale, kamba wakumanye uwe Mlungu mumojori wa Fulo na Jesu Kristo uyu umutumile.

Waroma 8:17

Kwa kukala nisi wana wake, tijepata mibaraka aikilile wandu wake, na sena tijepata ngila mojori na Kristo agha Mlungu amwikilile; kwani ngera tasirima na Kristo tijewatana naye kele ubwaa ghwake.

Waroma 8:29

Walye Mlungu amalile kuwasaghula, wawaika na mbali wakale sa Mwana wake, eri kamba Mwana akale wa hambiri kele wana wakwawe wengi.

Waroma 8:36

Mawandiko gha Kuela ghaghora, “Kwa undu ghwako tio kele ndengwa ya kifwa ijua lyose ilanzi; Tendekala sa ng'onzi zighenzogho kushinjo.”

2 Wakorintho 1:10

Iye wanatikizile kele ndengwa za kifwa, naye ujetikiza. Nesi takoserea kwake kamba ujetikiza sena.

2 Wakorintho 1:5

Kwani selyi kwenyi tio na ungaro na masirimo mengi gha Kristo, niko kwenyi tio na ngaro na usarusi mungi tighupatagha kwa ngila ya Kristo.

2 Wakorintho 13:4

Kwani hata ngera sani wanawambilo kwa unyonge kele msalaba, Iye uwo moyo kwa ndighi za Mlungu. Isi natose tikekala amweni kwake tio wanyonge, ela ngila mojori naye tijekala na ndighi za Mlungu kwa utumishi ghwenyu.

Wagalatia 2:20

Kwa hung'u simi ungi nio moyo, ela ni Kristo ewo moyo amweni kwangu; kukala moyo nio nako, nakala moyo kwa idumusi lyio kele Mwana wa Mlungu, uyu enishaile na kafunya umana ghwake kwa undu ghwangu.

Wagalatia 6:17

Kudua nendeghora mundungi sanisirimise sena, kwa kukala vilema nio navo muli vionyezagha kamba nimi msunyi wa Jesu.

Waefeso 4:13

Hung'u tighufikile umoju ghwa idumusi lyetu na kumumanya Mwana wa Mlungu, tikale wandu wazegue na kufikila kukatana na Kristo.

Wafilipi 3:8

Kwa fulo navitala vindu vose kukala hasara kwa undu ghwa gheo bora, ghemumanya Kristo Jesu Bwana wangu. Kwa undu ghwake nasigha kila kindu, nikevitala kukala sa mavi eri nimpate Kristo,

Wakolosai 1:24

Ndamu nio na maboelo kwa masirimi ghangu kwenyu, kwani kwa kusirima kwangu nawarura kukatisa kusirima kwa Kristo kwa muli ghwake, nilyo ikanisa.

Wakolosai 2:13

Nenyo moluo mufwile kele kaung'a zenyu na simochwilo mili yenyu, ela Mlungu katizusa ngila mojori na Kristo kwa kutifwila waya itose tio wakaung'a.

Wakolosai 3:1

Kwa hung'u ngera muzukile na Kristo, loleni malagho gha ighulu andu Kristo ewo kitembo kele mkonu ghwa kijo ghwa Mlungu.

1 Petro 1:3

Akaso Mlungu na Aba wa Bwana wetu Jesu Kristo! Kwa mbazi yake nyingi wanatihawile umana mwishi kwa kumuzusa Jesu Kristo kufuma kwa wafwa na katihawa ikosereo lya umana,

2 Petro 1:13

Ngelo zose nio moyo, niririkanya ni karakara kwangu kunula maririkanyo ghenyu.

1 Johana 2:3

Nesi timanyagha putu kamba tanamweni Mlungu, ilyi tawata milomu yake.

1 Johana 2:5

Ela uwo wose ewatagha ghore zake, amweni kwake mashayo gha Mlungu ghakatiso. Kwa undu ughu tamanya fulo kamba tio amweni kwake.

Ufunuo 1:18

Imi nimi ulya ewo moyo! Neluo nifwile, ela ndamu nio moyo kwa kale na kale. Nio na udimo ighulu ya kifwa na urumengu ghwa awa wafwile.