ബെ്ളിപട്ട കാര്യ 15:2 - സാമി സേദി

² തീ കലാന്ത ഒന്റു കന്നാഡി കഡാല്‌ന പാസെ ഇര്‌ക്കുവാദ്‌ന നാന് കണ്ടെ. ബേ്ണ്ട്‌നാമ്, അയി ബേ്ണ്ട് സെലെനാമ്, അയാള് പേര്‌ന കാട്ടുവ എ്ണ്ണനാമ് സോലുസുനവാര് അയി കഡാല്‌ക്ക് അര്‌ഗെ നിന്റിന്താര്. അവാര് തമ്മ് കയില് സാമി കൊഡുത്ത ബീ്ണെഗാള്‌നാമ് പ്‌ഡിത്തിന്താര്.

ബെ്ളിപട്ട കാര്യ 15:2 Iomraidhean Croise

ബെ്ളിപട്ട കാര്യ 4:6

അയി കുറിഞ്ചി മുന്നുക്കു കന്നാഡിന പാസെ ഉള്ള കഡാല്‌മ് ഇന്ത്‌ദ്. അദ് പള്‌ങ്ക്‌ന പാസെ തെങ്ക്‌തെങ്ക ഇന്ത്‌ദ്. അദ്‌ല് നഡ്‌ക്കെ, അയി കുറുഞ്ചിക്ക് സുറ്റുമു നാക്ക് ഉജുരുകെ്ളെഗാള് ഇന്ത്‌ദ്. അദ്‌ഗാള്‌ക്ക് മുന്നുക്കുമു പിന്ന്‌ക്ക്‌മ് മൊത്തന കണ്ണ്‌ഗാള് ഇന്ത്‌ദ്.

ബെ്ളിപട്ട കാര്യ 12:11

കൊറ്യാഡ് കുട്ടി സോരെനാലേമ് തമ്മ സൊന്ന സത്ത്യ സേദിനാലേമ് അവാര് അയി പാമ്പ്‌ന സോലുസുനാര്. തമ്മ് ഉജുരുന ദൊഡ്ഡാദ് എന്റ് നോഡാദെ സായ ഗുഡി അവാര് ഒരിങ്കിന്താര്.

ബെ്ളിപട്ട കാര്യ 5:8

അദ്‌ന എ്ഡ്‌ത്താദ്‌മ് ഇരുവത്തിനാല് മൂപ്പനാമ്‌ഗാള്‌മ് അയി നാക്ക് ഉജുരുകെ്ളെഗാള്‌മ് അയി കൊറ്യാഡ് കുട്ടി മുന്നുക്കു സഡങ്ക ബ്‌ന്താര്. അവാര് ഒന്റൊന്റാള് കയില് ബീ്ണേമ്, സാമിഗാറാര്‌ത്ത് പരേസ എന്നുവ ഗമ്‌ഗമ ബാഡെ അഡിക്കുവ തുമ്മ തുമ്പിര്‌ക്കുവ പൊന്നു സട്ടിഗാള്‌മ് ഇന്ത്‌ദ്.

ബെ്ളിപട്ട കാര്യ 21:18

സൂര്യഗാന്ത കല്ല്‌ഗാള്‌ന ബെത്ത്‌ത്തെ അയി സിവാര്‌ന കെ്ട്ടിന്താദ്. തെങ്ക്‌തെങ്ക കന്നാഡിന പാസെ ഇര്‌ക്കുവ കലാപ്പില്ലാത്ത തങ്കാത്ത്‌ല്‌ത്തെ അയി പട്ടണന കെ്ട്ടിന്താദ്.

1 പത്ത്‌റോസു 1:7

ഈ സോദെണെഗാള് നിമാക്ക് നേര്‌മായിമ് നമ്പിക്കെ ഇര്‌ക്ക്‌ന്റ് എന്റ് കാട്ട്യ ബേ്ണ്ടിത്തെ. അളിന്ത് പോവ പൊന്നുന ഗുഡി തീക്കിക്കി സോദണെ ഗേവദാന പൊന്നുന ബ്‌ഡ ബെലെ ഇര്‌ക്കുവ നിമ്മ് നമ്പിക്കെനാമ് സോദെണെ ഗേഡൊ. അത്തെ നിമ്മ് നമ്പിക്കെ പോഗാദിന്തദാന ഏസ്സ് ക്‌റ്‌സ്‌ത്ത് ബരുവ നാള്‌ല് നിമാക്ക് പേര്‌മ് പെരിമേമ് മാനാമ് കെ്ഡേക്ക്‌മ്.

മത്തായി 3:11

നിമ്മ പാവ ഗേവാദ്‌ന ബ്‌ട്ട്‌തള്ളി സാമിസാരി തിര്‌ഗ്‌ന്‌റ് എന്റ് കാട്ട്യ ബേ്ണ്ടി നാന് നിമാന നീര്‌ല് മുളുഗുസുന്റെ. ആന എനാന ബ്‌ഡ അദിഗര ഇര്‌ക്ക്‌ന്റവാന് എന്ന് പിന്ന്‌ക്ക് ബരുവാന്. അയാള് ഇക്കിര്‌ക്കുവ സെര്‌പ്പ്‌ന ഗുഡി എ്ഡ്‌ക്കുവാദ്‌ക്കുള്ള തഗ്‌ദി എനാക്കില്ലെ. അയാള് നിമാന സാമിനിഗാല്‌ല്‌മ് തീയില്‌മ് മുളുഗുസുവാന്.

ബെ്ളിപട്ട കാര്യ 13:14

മുദാല്‌ല ബേ്ണ്ട് മുന്നുക്കു ബെത്ത് തനാന ഗേയ ബ്‌ട്ട അദിസ്യളഗാള് ഗേന്ത് കാട്ടി റണ്ടാവാദ് ബേ്ണ്ട് ബൂമില് ഇര്‌ക്കുവ ആള്‌ഗാള്‌ന ഒട്ടുക്കു ഏമാത്ത്‌റ്റ്. ബാള്‌ല് ബെ്ട്ട് കെ്ഡേസിമ് പെ്ളേക്കുവ ബേ്ണ്ട്‌ക്ക് ബേ്ണ്ടി ഒന്റു സെലെ ഉണ്ടാക്ക്യ ബൂമില ജനഗാള്‌ക്ക് സൊല്ലിമ് ഇര്‌ക്ക്‌ന്റ്.

1 പത്ത്‌റോസു 4:12

എനാക്ക് മെച്ച്‌പ്‌ഡിത്തവാരെ, നിമ്മ പട്ട് പോവ കജട്ടഗാള്‌ന പറ്റി അദിസ്യപഡാദേന്, നിമ്മ് നമ്പിക്കേന സോദണെ ഗേയ ബേ്ണ്ടി ബരുവ കജട്ടഗാള് തീമേലെ പോവ പാസെ ഇര്‌ക്കുവാദ്‌നാലെ അദ് ആര്‌ക്ക്‌മ് ബരാത്ത കാര്യ എന്റ് നെനേക്കാദേന്.

ബെ്ളിപട്ട കാര്യ 13:1

പ്‌റ കഡാല്‌ലിന്ത് ഒന്റു ബേ്ണ്ട് ഏ്റി ബരുവാദ്‌ന നാന് കണ്ടേന്. അദ്‌ക്ക് പത്ത് കൊമ്പുഗാള്‌മ്, ഏ്ള് തലെഗാള്‌മ്, ഒന്റൊന്റു കൊമ്പുഗാള്‌ല് ഒന്റൊന്റു ഗിര്യാഡാമ്, തലെഗാള്‌ല് സാമിന മാനഗെ്ഡ്‌സുവ ഒന്റൊന്റു പേര്‌ഗാള്‌മ് ഇന്ത്‌ദ്.

ബെ്ളിപട്ട കാര്യ 13:17

ഈ അഡ്യാള ഇല്ലാദെ ആര്‌ക്ക്‌മ് എന്തൊന്റു ബാങ്ക്യാഗൊ എന്തൊന്റു മാറ്യാഗൊ മുഡ്യാമാട്ട. ബേ്ണ്ട് പേരൊ, അയി പേര്‌ന കാട്ടുവ എ്ണ്ണാഗോത്തെ അയി അഡ്യാള.