പിലിപ്പ്യഗാറാര് 1:11 - സാമി സേദി

¹¹ അദല്ലാദെ താനെ ഒന്റു നേര്‌മെഗാറാരായി നിമ്മാമ് ഏസ്സ് ക്‌റ്‌സ്‌ത്ത് തരുവ ബിലാത്ത്‌ല് എല്ലാ ദിന്‌സ്‌ല നല്ല കാര്യഗാള്‌മ് ഗേന്ത് സാമിന മദ്‌സുഡൊ എന്റ്‌മ് സാമിക്ക് ദൊഡ്ഡ പേര് കെ്ഡേസി കൊഡുക്കുഡൊ എന്റ്‌മ് നാന് പരേസ്‌ന്റെ.

പിലിപ്പ്യഗാറാര് 1:11 Iomraidhean Croise

മത്തായി 5:16

അദേപാസെ നിമ്മ ഗേവ നല്ല കാര്യഗാള്‌ന കണ്ട് മേലോഗാത്ത്‌ല നിമ്മ് അപ്പാന് സാമിന അഡ്‌ത്തവാര് പെരിമെപഡ്യ നിമ്മ് ബെ്ള്‌സ അവാര് മുന്നുക്കു അഡിക്കുഡൊ.>>

ഓഗന്നാന് 15:16

നിമ്മ എനാന തെരിന്തെ്ഡ്‌ക്കാലെ, നാന്‌ത്തെ നിമാന തെരിന്തെ്ഡ്‌ത്ത്‌റ്‌ക്കുവാദ്. നിമ്മ പോയി കായി ബ്‌ഡ്യാമ് അയി ബ്‌ഡുവ കായി എന്നാല്‌ക്ക്‌മ് കൊട്ടാദിര്‌ക്ക്യാമ് ബേ്ണ്ടി നാന് നിമാന എ്ഡ്‌ത്ത് ബെത്ത്‌റ്‌ക്ക്‌ന്റെ. അന്നാപ്പ് നിമ്മ എന്ന് പേര്‌ല് അപ്പാന് സാമ്യോഡ കേ്ള്‌ക്കുവാദ്‌ന ഒട്ടുക്കുമു അയാള് നിമാക്ക് തരുവാന്.

ഓഗന്നാന് 15:2

എന്നോഡിന്ത് മൊളേത്ത് കായി ബ്‌ഡാത്ത സില്ല്‌ഗാള്‌ന ഒട്ടുക്കുമു ദോട്ടഗാറാന് ബെ്ട്ടി തള്ള്‌ന്റാന്. കായി ബ്‌ഡുവ സില്ല്‌നെല്ലെ മൊത്തനാക്ക് കായി ബ്‌ഡ്യ ബേ്ണ്ടി അയാള് കപാത്ത് എ്ഡ്‌ത്ത് ബ്‌ഡ്‌ന്റാന്.

ഓഗന്നാന് 15:8

നിമ്മ മൊത്തനാക്ക് കായി ബ്‌ഡ്‌ഗാട്ടി നിമ്മ എന്ന് സൊല്ലുപഡി നഡാക്ക്‌ന്റവാര് ആവുറു. അത്തെ എന്നപ്പാന്‌ക്ക് മദ്‌പ്പ് കെ്ഡേക്ക്‌ന്റ്.

റോമഗാറാര് 15:28

എര്‌സലേമ്‌ല ഏ്ളെഗാള്‌ക്ക് കൊഡിക്ക്യ തന്ത ദാനന നാന് അവാര്‌ കയിക്ക് കൊഡുത്തു ഒറേപ്പ് മാഡ്‌ന പ്‌റ നാന് പെയിന്‌ക്ക് പോവെ. അത്തെ പോഗാട്ടി നിമ്മ് പട്ട്‌ക്ക് ബരുവെ.

റോമഗാറാര് 6:22

ആന ഇന്നാല് നിമ്മ പാവ ഗേവാദ്‌ന തള്ളി സാമിക്ക് അഡിമെഗാള് ആയിര്‌ക്ക്‌ന്റ്‌റ്. അദുക്കുള്ള ഉവഗര നിമ്മ സുത്താപ്പുള്ളവാരായി തീരുവാദ്‌മ് കഡേസില് നിമാക്ക് എന്നാല്‌ക്ക്‌മ് ഇര്‌ക്കുവ പെ്ളേപ്പ് കെ്ഡേക്കുവാദ്‌മ്‌ത്തെ.

1 കൊരിന്ത്യഗാറാര് 10:31

അദ്‌നാലെ നിമ്മ തിന്റാല്‌മ് കുഡിത്താല്‌മ് എന്ത് ഗേന്താല്‌മ് സെരി അദെല്ലാമ് സാമി പേര്‌പെരിമേക്ക് ബേ്ണ്ടി ഗേന്.

2 കൊരിന്ത്യഗാറാര് 9:10

ബിത്ത്യ ബെദേമ് തിന്ന്യ തീനിമ് തരുവ സാമി നിമാക്ക് ബേ്ഡ്‌മാനാദെല്ലെ തന്ത് നിമാക്കുള്ളാദ്‌ന ഉദാക്കുവാന്. അത്തെ ബുദ്ദിമുട്ടുലു ഇര്‌ക്ക്‌ന്റവാര്‌ക്ക് എക്കസക്ക കൊഡുക്ക്യ നിമാക്ക് മുഡിമ്.

എപസോസുഗാറാര് 1:12

അദേപാസെ എല്ലാവാര്‌ക്ക് ബ്‌ഡ മുദാല് ക്‌റ്‌സ്‌ത്ത്‌ന നമ്പിര്‌ക്കുവ ഇസ്‌റവേല്‌ഗാറാര് ആയിര്‌ക്കുവ നമ്മ സാമിന പാഡി പെരിമെപഡുസുഡൊ എന്നുവാദ്‌നാമ് സാമി മുദാല് താനെ നെനേത്ത് ബെത്തിന്താന്.

എപസോസുഗാറാര് 1:14

അത്തെ നമാന സാമിനിഗാല്‌ല് അഡ്യാള ബെത്ത് നമ്മ സാമിപ്‌ള്ളെഗാള് എന്റ് ഒറേപ്പ് മാഡ്‌നാന്. നമ്മ സാമിക്ക് സൊന്ത പ്‌ള്ളെഗാളായി നമ്മ സാമിന ദൊഡ്ഡവാനെന്റ് പെരിമെപഡിസ്യ ബേ്ണ്ടി അളിന്ത് പോവ പെ്ളേപ്പ്‌ലിന്ത് സാമി നമാന തിരിക്കി എ്ഡ്‌ത്താന്.

എപസോസുഗാറാര് 2:10

ആന ക്‌റ്‌സ്‌ത്ത് ഏസ്സ് നല്ല കാര്യഗാള് ഗേന്ത പാസെ നമ്മാമ് നല്ല കാര്യഗാള് ഗേയ ബേ്ണ്ടിത്തെ ക്‌റ്‌സ്‌ത്ത് ഏസ്സോഡൊപ്പ സാമി നമാനാമ് പുദ്യ മന്‌സാര് മാഡ്‌നാദ്. ഇത്തെ നമ്മ നല്ല കാര്യഗാള് ഗേന്ത് പെ്ളേക്കുഡൊ എന്റ് സാമി മുദാല് താനെ നെനേത്തിന്താന്.

എപസോസുഗാറാര് 5:9

സാമിപ്‌ള്ളെഗാള് എന്നുവ മദ്‌പ്പോഡ ബെ്ള്‌സാത്ത്‌ല് പെ്ളേക്ക്‌ന്റവാര് പൊയി സൊല്ലാദെ നേര്‌മെഗാറാരായി പെ്ളേക്കുവാര്.

പിലിപ്പ്യഗാറാര് 4:17

നിമ്മ എനാക്ക് എന്താറ്റ തര്‌ഡൊ എന്റ് ആസെപഡുവാദ്‌നാലെ അല്ല നാന് ഇത്തെ സൊല്ലുവാദ്. നിമ്മ നല്ല കാര്യഗാള് സേത്തി സേത്തി ഗേഗാട്ടി സാമി സേത്തി സേത്തി നിമാക്ക് നല്ലാദ് ഗേവാന്. അത്തെ നിമാക്ക് നല്ലാദ് കെ്ഡേക്കുഡൊ എന്റ് ആസെപഡുവാദ്‌നാലെത്തെ നാന് ഇത്തെ സൊല്ലുവാദ്.

കൊലേസ്യഗാറാര് 1:10

അദല്ലാദെ താനെ സാമിന പറ്റി തെരിവ അറുവുലു ദൊഡ്ഡവാരായി സാമിക്ക് മെച്ച്‌പ്‌ഡിത്ത ദിന്‌സ്‌ല് നല്ല കാര്യഗാള് ഗേന്ത് ക്‌റ്‌സ്‌ത്ത്‌ന പാസെ നല്ല ഗുണ ഉള്ളവാരായി പെ്ളേക്ക്യ ബേ്ണ്ടിമ് എമ്മ പരേസ്‌ന്റേമ്.

കൊലേസ്യഗാറാര് 1:6

സാമി മന്‌സാന്‌ന ഗവപഡ്‌ന്റാന് എന്നുവ നല്ല സേദിന കേ്ട്ട് തെരിന്ത നാള്‌ലിന്ത് നിമ്മ സാമിക്ക് ബേ്ണ്ടി പെ്ളേത്ത് അദുക്കുള്ള ഗുണന കാട്ടുവ പാസെ ഈ ഉലഗൊട്ടുക്കുമു ഈ നല്ല സേദി ഇന്നാല് പജാന്ത് നിമാന പാസെ ഉലഗാത്ത്‌ല് എഞ്ചോ ആള്‌ഗാള് സാമിക്ക് ബേ്ണ്ടി ഗുണ ഉള്ളവാരായി പെ്ളേക്ക്‌ന്റാര്.

2 തെസെലോനിക്ക്യഗാറാര് 1:12

അത്തെ നമ്മ് സാമിമ് നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌മ് പ്‌ണ്ണ്യാത്ത്‌ല് നമ്മ് ആണ്ടവാന് ഏസ്സ് പേര്‌ക്ക് നിമ്മ്‌നാലെ മദ്‌പ്പ് കെ്ഡേക്കുഡൊ. അദേപാസെ ആണ്ടവാന് ഏസ്സ് ക്‌റ്‌സ്‌ത്ത് പേര്‌ല് നിമാക്ക്‌മ് മദ്‌പ്പ് കെ്ഡേക്കുഡൊ എന്റ് എമ്മ ഒപ്പ സാമിക്ക് പരേസ്‌ന്റേമ്.

തീത്തോസു 3:14

നമ്മ് ആള്‌ഗാള് ഉവഗരില്ലത്തവാരാഗാദെ അഡ്‌ത്തവാര്‌ക്ക് ബേ്ഡ്‌മാന കാര്യഗാള്‌ന കാണ്‌ഗാട്ടി അദ് ഗേന്ത് കൊഡുത്തു നല്ല കാര്യഗാള് ഗേയ പഡിക്കുഡൊ.

എവുറായാര് 12:11

ബുദ്ദി സൊല്ലി തിരുത്തുവാദെല്ല അയി തിരുത്തുവ ഗളിഗേല് നമാക്ക് പിര്യ ഉള്ള കാര്യല്ല. അദ് നമാന സങ്കഡപഡ്‌സ്‌ന്റ്. ആന അയി ബുദ്ദി സൊല്ലി തിരുത്തുവ കാര്യഗാള്‌ലിന്ത് നമ്മ പഡിക്കാട്ടി നമാക്ക് നിമ്മ്‌ദിമ് കെ്ഡേക്ക്‌മ്, നേര്‌മോഡ പെ്ളേക്ക്യാമ് മുഡിമ്.

1 പത്ത്‌റോസു 2:12

എഗുദാരല്ലാത്ത ജാദിഗാള് പട്ട്‌ല് നിമ്മ നലമായി പെ്ളേക്കുഡൊ. അത്തെ നിമ്മ കെ്ട്ട കാര്യഗാള് ഗേന്റവാര് എന്റ് സൊല്ലുന്റവാര് നിമ്മ ഗേവ നല്ല കാര്യഗാള്‌ന കണ്ട് സാമി ബരുവ നാള് സാമിന ദൊഡ്ഡവാന് എന്റ് സൊല്ലുവാര്.

1 പത്ത്‌റോസു 2:5

അത്തെ നിമ്മാമ് ഉജുരുള്ള കല്ല്‌ഗാളായി ഏസ്സ് ക്‌റ്‌സ്‌ത്ത്‌ന ബെത്ത് സാമി തങ്കാരിക്കുവാദ്‌മ് സാമിനിഗാല്‌ല് കൊഡുക്കുവാദ്‌മാന പലി കൊഡുക്ക്യ സാമിക്ക് പട്ട പൂസാരിഗാളായി ഒന്റു സാമിബീ്ഡ് കെ്ട്ടി കൊണ്ട്‌റ്‌ന്റാന്.

1 പത്ത്‌റോസു 2:9

നിമാന സാമി ഇ്റ്‌ട്ട്‌ക്ക് ഇര്‌ക്കുവ അദിഗരാത്ത്‌ലിന്ത് അദിസ്യപഡുവ തന്ന് ബെ്ള്‌സാക്ക് ബ്‌ളിത്ത് ബരിസ്സിര്‌ക്ക്‌ന്റാന്. എന്ത്‌ക്കെന്റ് സൊന്ന അയി സാമി ഗേന്ത് കൊണ്ട്‌റ്‌ക്കുവ നല്ല കാര്യഗാള്‌ന സൊല്ല്യത്തെ. ഇദ്‌ന സൊല്ല്യ ബേ്ണ്ടി സാമി തെരിന്തെ്ഡ്‌ത്ത ബമ്മേസാമ്, രാജാങ്ക പൂസാരി ഗിലാസ ഗേവ കൂട്ടാമ്, സാമിക്ക് പട്ട ജനഗാള്‌മ്, സാമിക്ക് സൊന്തഗാറാര്‌മ് ആയിര്‌ക്ക്‌ന്റവാര്‌ത്തെ നിമ്മ.

1 പത്ത്‌റോസു 4:14

ക്‌റ്‌സ്‌ത്ത്‌ന നമ്പി നഡാക്കുവാദ്‌നാലെ നിമ്മ നാണഗെ്ട്ടദാന നിമ്മ ബാഗ്യകേ്ട്ടവാര്‌ത്തെ. എന്ത്‌ക്കെന്റ് സൊന്ന മദ്‌പ്പുള്ള നിഗാലാന സാമിനിഗാല് നിമ്മ് മനേസ്സ്‌കുളാക്ക് ഇര്‌ക്ക്‌ന്റല്ല.