2 തിമിത്തോസു 2:16 - സാമി സേദി

¹⁶ ഉവഗരപഡാത്ത ബുദ്ദില്ലാത്ത നായഗാള്‌ന ലേസ ആള്‌ഗാള് സൊല്ലുവാര്. അദ്‌ന നീ കാദ്‌ക്കിക്കാദെ. അത്തവ നായഗാള് സൊല്ലുന്റവാര് സേത്തി സേത്തി സാമിന മദ്‌സാത്തവാര് ആവാര്.

2 തിമിത്തോസു 2:16 Iomraidhean Croise

1 കൊരിന്ത്യഗാറാര് 15:33

നിമാന ഏമാത്ത്യ ആര്‌നാമ് ബ്‌ഡാദേന്. <<കെ്ട്ടവാരോഡ കൂട്ടു എ്ണേവാദ് നല്ലവാര്‌ന കെ്ഡ്‌സ്‌ന്റ്.>>

1 കൊരിന്ത്യഗാറാര് 5:6

നിമ്മ ബക്‌തിഗാറാര് എന്റ് പെരിമെപഡുവാദ്‌ല് എന്ത് അര്‌ത്ത ഇര്‌ക്ക്‌ന്റ്? <<ഒന്റു സൊട്ടു പുളിമാവു മാവുനൊട്ടുക്കു പുളിത്ത മാവു മാഡ്‌ന്റ്>> എന്റ് നിമാക്ക് തെരിവാദില്ലേഗ?

1 തിമിത്തോസു 1:9

ഈ സാമിസട്ട ബെത്ത്‌റ്‌ക്കുവാദ് സാമി പിര്യാക്ക് പെ്ളേക്ക്‌ന്റവാര്‌ക്ക് ബേ്ണ്ട്യല്ല എന്റ് നമാക്ക് തെരിമ്. പിന്നെ ഇദ് ബെത്ത്‌റ്‌ക്കുവാദ് ആര്‌ക്ക് ബേ്ണ്ടി എന്റ് സൊന്ന, സാമി സട്ടാക്ക് മീ്റി നഡാക്ക്‌ന്റവാര്‌ക്ക്‌മ്, സാമിക്കിര്‌ക്കുവ അദിഗരാക്ക് കെ്ട്ട്‌പട്ട് നഡാക്കാത്തവാര്‌ക്ക്‌മ്, സാമിന പറ്റി നെനേവു ഇല്ലത്തവാര്‌ക്ക്‌മ്, കുറ്റഗേന്റവാര്‌ക്ക്‌മ്, കീ്ട്ട്‌ഗഗാറാര്‌ക്ക്‌മ്, സാമി ബക്‌തി ഇല്ലത്തവാര്‌ക്ക്‌മ്, അവ്വ്യപ്പാന്‌ന കൊലെ ഗേന്റവാര്‌ക്ക്‌മ്, കൊലെഗാറാര്‌ക്ക്‌മ്,

1 തിമിത്തോസു 4:7

സാമ്യോഡ ഉറാവു ബെത്ത് നഡാക്ക്യ ഉവഗരപഡാത്ത നേരല്ലാത്ത കദെഗാളൊന്റുനാമ് നീ കാദ്‌ക്കിക്കാദെ. അദ്‌ക്ക് ബദ്‌ല സാമി ആസെപഡി പെ്ളേക്ക്യ ഉവഗരപഡുവ കാര്യഗാള് നീ ഗേന്ത് പളാഗികൊണ്ടേ ഇര്‌ക്കുഡൊ.

1 തിമിത്തോസു 6:20

തിമിത്തോസെ, നീ ഗേയ ബേ്ണ്ടി സാമി നിന്ന് കയിക്ക് ഒപ്പിസി തന്ത്‌റ്‌ക്കുവ കാര്യഗാള്‌ന നീ സൂസാരിത്ത് ഗേഡൊ. സാമിന മദിസ്യ ഉവഗരപഡാത്ത ബുദ്ദില്ലാത്ത നായഗാള്‌ന ഇദ്‌ത്തെ അറുവു എന്റ് ഉറുട്ടുസൊല്ലികൊണ്ടു സില ആള്‌ഗാള് പഡ്‌സ്‌ന്റാര്. ഈ നായഗാള്‌ന നീ കേ്ള്‌ക്കാദെ.

2 തിമിത്തോസു 2:14

നീ ഈ കാര്യഗാള്‌നെല്ല ഏസ്സ്‌ഗാറാര്‌ക്ക് സൊല്ലി കൊഡുത്തു കൊണ്ടേ ഇര്‌ക്കുഡൊ. ഒന്റൊന്റു നായഗാള്‌ന സൊല്ലി തറ്‌ക്കദേന് എന്റ് സാമി കേ്ട്ട്‌കൊണ്ട്‌റ്‌ക്കാട്ടി താനെ നീ അവാര്‌ക്ക് സൊല്ലുഡൊ. ഇത്തവ തറ്‌ക്കഗാള് ഒന്റുക്കുമു ഉവഗര ഇല്ലത്താദ്‌മ് കേ്ള്‌ക്ക്‌ന്റവാര് നമ്പിക്കേന കെ്ഡ്‌സുവാദ്‌മ്‌ത്തെ.

2 തിമിത്തോസു 2:21

അദേപാസെ ഒന്റൊരുത്താന് എല്ലാ കെ്ട്ട കാര്യഗാള്‌നാമ് തെ്റിന്ത് തള്ളി കവാഡില്ലാത്തവാന് ആനദാന അയാള്‌ന നല്ല കാര്യഗാള്‌ക്ക് ബേ്ണ്ടി സാമി എ്ഡ്‌ത്ത് ബെക്കുവാന്. എന്ത്‌ക്കെന്റ് സൊന്ന അയാള് അയി കാര്യാക്ക് ബേ്ണ്ടി തെരിന്തെ്ഡ്‌ത്ത് ബെത്ത്‌റ്‌ന്റവാന്‌മ്, എല്ലാ കാര്യഗാള്‌ല്‌മ് പണ്ണാഡിക്ക് ഉവഗരപഡ്‌ന്റവാന്‌മ്, എല്ലാ നല്ല ഗിലാസാമ് ഗേയ ഒരുങ്കിര്‌ന്റവാന്‌മ്‌ത്തെ.

2 തിമിത്തോസു 3:13

ആനാല്‌മ് കെ്ട്ടവാര്‌മ് കെ്ട്ടാദൊന്റുമു ഗേവാദില്ലെന്റ് നഡിക്ക്‌ന്റവാര്‌മ് സേത്തി സേത്തി കെ്ട്ടാദ് ഗേന്ത്‌കൊണ്ടേ ഇര്‌ക്കുവാര്. ഇവാര് ബേ്റാള്‌ഗാള്‌ന സദിക്കുവാര്. ബേ്റെ ആള്‌ഗാള് ഇവാര്‌നാമ് സദിക്കുവാര്.

തീത്തോസു 1:11

അവാര്‌ന നീ മ്‌ണ്ട്യ ബ്‌ഡാദെ. എന്ത്‌ക്കെന്റ് സൊന്ന അവാര് ആള്‌ഗാള്‌ന ഏമാത്തി പണ സമ്പാരിക്ക്യ ബേ്ണ്ടി അവാര് പഡുസുവാദ്‌ക്കല്ലാത്ത കാര്യഗാള്‌ന ആള്‌ഗാള്‌ക്ക് പഡിസി എഞ്ചോ ബീ്ഡ്‌ലവാര്‌നൊട്ടുക്കു നേര്‌മാന ബുദ്ദിനായന നമ്പാത്തവാര് മാഡ്‌ന്റാര്.

തീത്തോസു 1:14

അദ്‌താനേമല്ല, അവാര് എഗുദാര് സൊല്ലുവ നേരല്ലാത്ത കദെഗാള്‌നാമ് സത്ത്യാക്ക് ബേ്ണ്ടി പെ്ളേക്കത്തവാര് സൊല്ലുവ നായഗാള്‌നാമ് കേ്ള്‌ക്കമാട്ടാര്.

തീത്തോസു 3:9

ആന അര്‌ത്തില്ലാത്ത നായഗാള്‌ന പറ്റിമ് മൂട്ടുമുറില്ലാത്ത കാല്‌കെ്ളെഗാള്‌ന പറ്റിമ് തറ്‌ക്കുവ തറ്‌ക്കഗാള്‌ക്ക്‌മ്, മോസെ ബെത്ത സാമി സട്ടന പറ്റി തറ്‌ക്കുവ തറ്‌ക്കഗാള്‌ക്ക്‌മ് എ്ണേഗാദെ ഒയിന്ത് നില്ലുഡൊ. എന്ത്‌ക്കെന്റ് സൊന്ന ഇദ് ഒന്റുക്കുമു ഉവഗരപഡാത്താദ്‌മ് ബെലെ ഇല്ലത്താദ്‌മ്‌ത്തെ.

എവുറായാര് 12:15

സാമി ഗേന്ത്‌റ്‌ക്കുവ പ്‌ണ്ണ്യ കെ്ഡേക്കാത്തവാര് ആഗാദെ ഇര്‌ക്ക്യ നിമ്മ എല്ലാവാര്‌മ് നോഡുഡൊ. ആര്‌മ് കീ്ട്ട്‌ഗ ബെത്ത് അദ്‌ന ദൊഡ്ഡാദ് മാഡാദെ ഇര്‌ക്ക്യ നോഡുഡൊ. അത്തവാള്‌ക്ക് എഞ്ചോ ആള്‌ഗാള്‌ന കെ്ഡിസ്യ മുഡിമ്.

2 പത്ത്‌റോസു 2:18

എന്ത്‌ക്കെന്റ് സൊന്ന, കാമാക്ക് കണ്ണില്ലാദെ പെ്ളേക്കുവാദ് പാവ അല്ല എന്നുവ അര്‌ത്തില്ലാത്ത പെരിമെനായഗാള്‌ന സൊല്ലി പാവ ഗേന്ത് പെ്ളേക്കുവ പെ്ളേപ്പ്‌ലിന്ത് കന്നപിന്ന തപ്പിസി കഡാന്തവാര്‌ന പിന്നേമ് അദേ പെ്ളേപ്പ്‌ക്ക് അവാര് സിക്ക്‌സ്‌ന്റാര്.

2 പത്ത്‌റോസു 2:2

പല ആള്‌ഗാള് അവാര് ഗേവ കെ്ട്ട കാര്യഗാള്‌ന പാസെ ഗേവാര്. അവാര് അത്തെ ഗേവാദ്‌നാലെ സത്ത്യാക്ക് ബേ്ണ്ടി പെ്ളേക്കുവാദ്‌ന പറ്റി ബേ്റാള്‌ഗാള് മോസമായി സൊല്ലുവാര്.

ബെ്ളിപട്ട കാര്യ 13:14

മുദാല്‌ല ബേ്ണ്ട് മുന്നുക്കു ബെത്ത് തനാന ഗേയ ബ്‌ട്ട അദിസ്യളഗാള് ഗേന്ത് കാട്ടി റണ്ടാവാദ് ബേ്ണ്ട് ബൂമില് ഇര്‌ക്കുവ ആള്‌ഗാള്‌ന ഒട്ടുക്കു ഏമാത്ത്‌റ്റ്. ബാള്‌ല് ബെ്ട്ട് കെ്ഡേസിമ് പെ്ളേക്കുവ ബേ്ണ്ട്‌ക്ക് ബേ്ണ്ടി ഒന്റു സെലെ ഉണ്ടാക്ക്യ ബൂമില ജനഗാള്‌ക്ക് സൊല്ലിമ് ഇര്‌ക്ക്‌ന്റ്.

ബെ്ളിപട്ട കാര്യ 13:3

അയി ബേ്ണ്ട് തലെഗാള്‌ല് ഒന്റുക്കു സത്ത് പോവാദ്‌ക്ക് തഗ്‌ന്ത ഒന്റു ഈ്ഡ് പട്ടിന്താദ്‌ന നാന് കണ്ടെ. അയി ഈ്ഡ് ആറിന്ത്‌ദ്. ഉലഗാത്ത്‌ലവാര് ഒട്ടുക്കു അദിസ്യപട്ട് അയി ബേ്ണ്ട് പിന്ന്‌മേലെ പോനാര്.