Taidas 1:8 - Kriol Baibul

⁸ Yu garra faindim detkain men weya oldei kain en tok langa enibodi, en im oldei dum ola gudwan ting. Im garra abum streitwan main wen im jinggabat, en im garra yusum im bodi gudwei, im garra oldei dumbat gudbala ting langa pipul en bulurrum det wei blanga God,

Taidas 1:8 Iomraidhean Croise

Fes Kings 5:1

Wal King Hairam brom det kantri gulum Taya bin oldei jidan gudfren blanga Deibid, en wen imbin irrim Salaman bin jidan king afta im dedi Deibid, imbin jandim sambala boswan mesinja langa im.

Fes Kings 5:7

Wal Hairam bin brabli gudbinji wen imbin irrim det mesij weya Salaman bin jandim, en imbin tok, “Preisimbat YAWEI, dumaji imbin gibit Deibid klebawan san blanga jidan king langa det gudwan kantri en langa ola pipul blanga im.”

Ola Saam 16:3

YAWEI, yu pipul olabat gudbala, en dei meigim mi gudbinji.

Eimos 5:15

Yumob kaan laigim ola nogudbala ting. Yumob garra laigim ola gudbala ting en yumob garra gibit ola pipul feyago langa kot. If yumob dum lagijat wal maitbi YAWEI garra kain langa detlot pipul hu stil jidan laibala.” Lagijat na aibin tok.

Luk Bin Dalim Ola Stori Blanga Jisas Langa Wan Jintail Men 2:25

Wal seimtaim wen dubala bin deigim det lilboi langa det Serramoni Pleis, wan olmen neim Simiyan bin jidan deya langa det taun. Imbin gudbala olmen, en imbin oldei weidabat blanga det rait taim wen God garra larramgo fri ol detlot pipul blanga im langa Isreil. Wal det Holi Spirit bin jidan garram det olmen,

Eks Hau Det Gudnyus Blanga Jisas Krais Bin Spredat Ebriweya 24:25

Bat wen imbin stat dalimbat dubala blanga jidan gudbalawei en blanga lukaftum miselp raitwei en blanga det laswan dei weya God garra jadjim ebribodi, wal det gabman bos bin bradin, en imbin dalim Pol, “Yu gin go na, en bambai wen mi abum taim, ai garra jingat blanga yu igin.”

Fes Thesaloniyans 2:10

Wal yumob witnis blanga melabat jis laik God im witnis blanga melabat weya melabat bin jidan gudbalawei garram yumob hu bilib langa im. Melabat bin jidan raitwei nomo garram enijing rong,

Fes Timathi 3:2

Bat det minista garra jidan nomo garram eni folt, en im garra abum oni wanbala waif, en im garra abum streitwan main en jinggabat gudbalawei olataim, en im garra yusum im bodi raitwei, en im garra oldei kain en tok langa enibodi, en im garra sabi hau blanga titjimbat pipul,

Fes Timathi 4:12

Bat maitbi sambala pipul deya kaan teiknodis langa yu, dumaji yu yangbala. Wal nomeda olabat kaan teiknodis langa yu, bat stil yu garra lenimbat olabat. Yu kaan jis dalimbat olabat. Yu garra shoumbat olabat. Yu garra shoumbat olabat hau blanga tok, en yu garra shoumbat olabat hau blanga jidan, en yu garra shoum olabat hau blanga laigim pipul, en yu garra shoumbat olabat hau blanga bilib brabliwei, en yu garra shoumbat olabat hau blanga abum det raitwan filing.

Fes Timathi 6:11

Wal Timathi, yu kaan bulurrum det nogudbalawei weya aibin jis dalimbat yu, dumaji yu wekinmen blanga God. Yu garra dum wanim rait, en yu garra jidan gudbalawei hau God wandim yu blanga jidan, en yu garra bilib langa God brabliwei, en yu garra laigim ola pipul brabliwei, en wen trabul kaman langa yu, wal yu garra jidan strongbala, en yu garra jidan kainbala langa ebribodi.

Sekan Timathi 2:22

Wal yu garra libum ol detlot nogudbala ting weya detlot yangbala pipul oldei wandimbat, en yu garra lafta trai en jidan raitwei, en bilib brabliwei, en yu garra laigim ola pipul brabliwei, en jidan gudbalawei garram ol detlot pipul hu jingat langa God garram det trubalawan filing insaid langa olabat hat.

Sekan Timathi 3:3

en dei kaan laigim enibodi, en dei kaan larramgo fri enibodi hubin dum nogudbala ting langa olabat, en dei garra tok olkain laiyawan stori blanga enibodi, en dei garra oldei gitwail brabliwei, en dei kaan holdimbek miselp blanga enijing, en dei kaan laigim enijing weya im jidan gudbala,

Taidas 2:7

Yu nomo jis toktok langa olabat. Yu garra shoum olabat hau dei garra jidan gudbalawei. En wen yu tok langa olabat, yu garra tok brabli streitbalawei.

Fes Jon 3:14

Trubala ai dalim yumob. Wibin libum det nogudbalawei weya meigim wi dai, en wi bulurrum det gudbalawei weya meigim wi jidan laibala olagijawan. En wi sabi wibin libum det nogudbalawei, dumaji wi laigim ola braja en sista blanga wi. Yumob sabi? Enibodi hu nomo laigim im braja o sista olabat stil bulurrum det wei weya meigim im dai.

Fes Jon 5:1

Wal detlot pipul hu tok Jisas na det Boswan gulum Masaiya, olabat na biginini blanga God. En enibodi hu laigim det dediwan laigim im biginini olabat du.

Fes Semyul 18:1

Wal afta wen King Sol en Deibid bin binij toktok, det san blanga King Sol neim Jonathan bin abum gudbala filing blanga Deibid, en imbin laigim Deibid brabliwei.