Ruth 3:7 - Kriol Baibul

⁷ Wen Bowes bin binij dagadagat daga en dringgimbat, imbin sedisfaid na, en imbin go en leidan wansaid langa detlot sid daga weya deibin hipimap, en wen imbin ded silip, Ruth bin snikap langa im kwaitbalawei, en imbin lidimap det bleingkit, en imbin leidan deya wansaid langa im futwei.

Ruth 3:7 Iomraidhean Croise

Jenasis 43:34

Brom deya ola wekinmen bin gajim sambala daga brom det teibul weya Josef bin jidan, en deibin deigim det daga langa det teibul weya ola braja blanga im bin jidan, en deibin gibit langa Benjamin bigmob daga mowa langa ola najalot braja blanga im. Afta na deibin dagadagat daga en dringgimbat wain raidap olabat bin lilbit drangginwan.

Sekan Semyul 13:28

en imbin dalim ola wekinmen blanga im, “Yumob garra wotjimbat Emnon, en wen yumob luk im dringgimbat detmatj, wal ai garra dalim yumob blanga kilim im ded. Yumob kaan bradin blanga enibodi, dumaji mi na wandim im blanga dai. En yumob garra jandap strongbala en nomo bradin blanga kilim im ded.”

Fes Kings 21:7

Jesabel bin tok, “Wal yu jidan bos blanga Isreil indit? Yu gidap en dagat daga na. Yu nomo wori. Ai garra gedim det greip fam brom Neiboth blanga yu.”

Esta 1:10

Wal langa det namba 7 dei wen det king bin brabli gudbinji brom dringgimbat detmatj wain, imbin jingat langa detlot sebenbala speshalwan wekinmen. Olabat na bin lau tok langa detlot gel deya langa det king haus, en olabat bin neim Mehuman, Bistha, Habona, Bigtha, Ebagetha, Sethara en Kakas.

Ola Saam 104:15

en meigim wain blanga meigim melabat jidan hepiwan, en oliboil blanga meigim melabat luk gudwan, en daga blanga meigim melabat strongbala.

Aklisiyestis 10:19

If yu abum blendi blanga dagat en dringgimbat, wal yu gudbinji, bat yu kaan abum dubala if yu nomo garram eni mani.

Aklisiyestis 2:24

Bat dijan na im gudwan ting wi gin dum. Wi oldei dagadagat en dringgimbat en wi oldei dumbat adwek. Dijan na meigim wi jidan gudbinjiwei. En aibin sabi God im gibit wi dijan.

Aklisiyestis 8:15

Wal trubala ai wandim ebribodi garra abum gudtaim langa dijan wel. Mobeda olabat kipgon dagadagatbat en dringgimbat en kipgon dumbat adwek, dumaji tharran na meigim wi jidan gudbinjiwei, en ai sabi God im gibit wi dijan.

Aklisiyestis 9:7

Orait ai dalim yu. Yu gin oldei dagadagatbat daga en dringgimbat wain gudbinjiwei, dumaji God im wandim yu blanga dum lagijat.

Fes Karinthiyans 10:31

Wal ai dalim yumob. Nomeda yumob dagat o dringgim o dumbat enijing, bat stil yumob garra dum ebrijing blanga shoum rispek langa God, dumaji yumob nomo wandi dum enijing weya garra stapam Juwish pipul o Jintail pipul o Kristjan pipul blanga bilib langa Jisas Krais.

Ifishans 5:18

Wal yumob nomo wandi jidan drangginbala, dumaji det grog im deigidawei yumob en meigim yumob laif nogud. Yumob garra larram det Holi Spirit jidan langa yumob brabliwei,

Jadjis 19:22

en deibin abum gudtaim deya garram det olmen. Bambai na sambala brabli nogudbala men brom det taun bin kaman, en deibin jandap raidaran langa det haus, en deibin noknok langa det dowa, en deibin jingat langa det olmen, “Yu bringimat det men hubin gowin langa yu haus. Yu meigim im kamat atsaid, dumaji melabat wandi silip garram im jis laiga wuman.”

Jadjis 19:6

Wal dubala bin jidan en dagadagat daga en dringgimbat oldei, en afta det gel dedi bin dalim dubala, “Yunbala garra silip iya tunait en abum gudtaim bifo yunbala garra gowei.”

Jadjis 19:9

Afta na wen det Libai men en im wekinmen bin binij dagadagat daga, dubala bin gidap blanga gowei garram det gel. Bat det gel dedi bin tok, “Yu luk. Im gulijap sangodan na. Wal yunbala lafta stap iya igin en abum gudtaim tunait, en ailibala yunbala gin kipgon.”

Ruth 3:6

Brom deya Ruth bin gidap, en imbin go langa det pleis weya Bowes bin klinimbat detlot sid daga, en deya na Ruth bin dum ebrijing det olgamen bin dalim im.

Ruth 3:8

Bambai na midulnait Bowes bin weikap kwikbalawei, en imbin tenim miselp, en imbin gedim shok wen imbin faindim det gel leidanbat deya langa im futwei,