Rebaleishan 4:7 - Kriol Baibul

⁷ Det feswan bin luk jis laiga laiyan, en det sekanwan bin luk jis laiga buligi, en det namba thriwan bin abum feis jis laik yunmi, en det namba fo bin luk jis laiga igulok weya im flaiflai.

Rebaleishan 4:7 Iomraidhean Croise

Jenasis 49:9

Yu jis laiga bigbala laiyan weya oldei go en gajim enijing weya im wandim, en afta im gobek langa im kemp blanga abum spel, en nobodi kaman deya blanga hambag langa im.

Sekan Semyul 1:23

“Wal King Sol en Jonathan bin brabli gudbala, en aibin laigim dubala detmatj. Dubala bin oldei jidan mijamet, en dubala bin dai mijamet. Dubala bin brabli strongbala jis laiga laiyan, en dubala bin brabli kwikbala du jis laiga igulok weya im gajim samting.

Prabebs 28:2

Wen detlot pipul langa eni kantri nomo duwit langa olabat lida, olabat garra kipgon abum nyuwan lida olataim, bat wen dei abum wanbala lida en im lidimbat olabat gudbalawei, olabat kantri garra jidan seifwan.

Aisaiya 40:31

Bat detlot pipul hu trastimbat langa YAWEI, im garra meigim olabat jidan brabli strongbala. Olabat garra jidan brabli strongwan wulijim detlot igulok weya flaiflai langa top. Detlot pipul garra wokwokbat en ranranbat, bat olabat kaan neba nokap.

Isikiyel 1:10

Wal detlot enimul bin abum difrinwan feis. Blanga men feis bin lida, blanga laiyan feis bin raidensaid, blanga buligi feis bin lefthensaid en blanga igul feis bin langa bekwei.

Isikiyel 1:8

Detlot enimul bin abum fobala wing en deibin ol abum fobala bingga andanith langa olabat wing.

Isikiyel 10:14

Ebri tjerabim bin abum fobala feis. Det feswan feis bin laiga buligi, en det sekanwan feis bin laiga men, en det namba 3 feis bin laiga laiyan, en det namba 4 feis bin laiga igul.

Isikiyel 10:21

Olabat holot bin abum fobala feis en fobala wing, en deibin abum fobala bingga wulijim men andanith langa olabat wing. Detlot seimwan tjerabim na aibin luk deya langa det Keba Riba basdam en ol detlot tjerabim bin ol mub wanwei. Detlot seimwan tjerabim na aibin luk basdam.

Denyul 7:4

Det feswan enimul bin luk jis laiga laiyan, bat imbin abum wing jis laik igul. Wen aibin stil lukinatbat, sambodi bin pulumat im wing. Sambodi bin lidimap im, en meigim im jandap jis laik men jandap, en sambodi bin gibit im main jis laik men blanga jinggabat gudwei.

Obadaiya 1:4

Bat ai dalim yumob. Nomeda yumob jidan haibala jis laik detlot igulok weya oldei jidan langa haibala pleis, en nomeda yumob jidan haibala jis laik ol detlot sta oldei jidan, bat stil ai garra pulumdan yumob brom det pleis weya yumob oldei jidan.

Nambas 23:24

Detlot Isreil pipul jis laiga brabli strongwan laiyan. Im nomo abum spel raidap im dagadagat en dringgim det blad blanga det enimul weya imbin kilim.” Lagijat na Beilam bin tok.

Nambas 24:9

Detlot Isreil pipul olabat jis laiga laiyan. Wen im silip, nobodi kaan weikimap im. Enibodi hu gibit gudbala ting o wed langa detlot Isreil pipul garra gedim gudbala ting du, en enibodi hu singim detlot Isreil pipul garra abum det seimwan ting langa imselp.” Lagijat na Beilam bin tok.

Fes Karinthiyans 14:20

Wal main braja en sista olabat, yumob kaan kipgon jinggabat langa yumob main seimwei laiga lilwan biginini. Yumob garra growap en yusum yumob main gudbalawei seimwei laik big pipul. Bat langa ola nogudbala ting, yumob garra jidan jis laiga lilwan beibi weya nomo sabi hau blanga dumbat nogudbala ting.

Dyudaranami 28:49

En YAWEI garra bringimap langa yumob detlot pipul brom longwei kantri, en yumob nomo sabi olabat langgus. Dei garra kaman kwikbala langa yumob jis laik igulok weya im flaiflai langa top.

Rebaleishan 4:6

Wal lida langa det wanbala speshalwan tjeya samting bin jidan. Imbin jis laiga shainiwan woda, jis laiga shainiwan glas. En raidaran langa det wanbala speshalwan tjeya fobala najakain enimul bin jandap. Olabat bin abum blendibala ai langa olabat frant en langa olabat bekboun du.

Rebaleishan 6:3

Brom deya det yangwan ship bin deigimat det sekanwan bush gam brom det rolapwan peipa, en aibin lisin det sekanwan brom detlot fobala najakain enimul bin jingat adbala, “Kamat!”

Rebaleishan 6:5

Brom deya det yangwan ship bin deigimat det namba 3 bush gam brom det rolapwan peipa, en aibin lisin det namba thriwan brom detlot fobala najakain enimul bin jingat adbala, “Kamat!” Wal aibin luk wanbala blekwan hos bin kamat na. Det raida langa im bin abum skeil langa im bingga blanga weiyimbat enijing,

Rebaleishan 6:7

Brom deya det yangwan ship bin deigimat det namba 4 bush gam brom det rolapwan peipa, en aibin lisin det namba fowan brom detlot fobala najakain enimul bin jingat adbala, “Kamat!”